1. Kal ki é alguns kuza ki txeu jóven dja konsigi faze?

 TUDU anu txeu jóven ta batiza. Dja bu batiza? Si dja bu batiza, bus irmon ku irmans sta kontenti i Jeová tanbê sta kontenti! (Pro. 27:11) Pensa un bokadinhu na kantu kuza ki dja bu konsigi faze. Pur izénplu, bu studa Bíblia dretu talvês pa txeu anu. Kes kuza ki bu prende da-u sertéza ma Bíblia é Palavra di Deus. Má, más di ki kel-li, bu konxe i bu ama Autor di es livru sagradu. Bu amor pa Jeová bira fórti di tal manera ki bu disidi da bu vida pa el i batiza. Kel-li foi un bon disizon!

2. Kuzê ki nu sta ben odja na kel studu li?

 ² Di sertéza antis di bu batiza bu pasa pa txeu próva di fé, má sima bu ta ba ta kria bu ta pasa pa otus próva di fé. Satanás ta tenta poi bu amor pa Jeová ta bira más poku i pô-u ta para di sirbi-l. (Efé. 4:14) Ka bu dexa kel-li kontise. Kuzê ki pode djuda-u kontinua lial pa Jeová i kunpri promésa ki bu faze di sirbi-l? Bu debe kontinua ta faze prugrésu pa bu bira ‘un algen maduru’. (Heb. 6:1) Má modi ki bu pode faze kel-li?

3. Kuzê ki tudu algen ki ta sirbi Deus debe faze dipôs ki el batiza?

³ Dipôs di batismu nos tudu nu meste sigi konsedju ki apóstlu Polu da pa kes irmon na Éfezu. El fla-s pa es bira sima ‘un ómi maduru’. (Efé. 4:13) É sima si el staba ta fla: ‘Nhos kontinua ta faze prugrésu’. Polu konpara  prugrésu ki un algen ki ta sirbi Deus ta faze ku manera ki un mininu ta kria. Óras ki un mininu nase, se pai ku se mai ta ama-l i ta ten orgulhu di el. Má el ka pode kontinua un mininu pa tudu ténpu. Ku ténpu el ten ki kaba ku ‘kes manera di ser di mininu.’ (1 Cor. 13:11) É kel mésmu kuza li ki ta kontise ku un algen ki ta sirbi Deus. Dipôs di batismu nu debe kontinua ta faze prugrésu. Nu ben odja alguns sujiston ki ta djuda-nu faze kel-li.

4. Ki kualidadi ki pode djuda-u faze prugrésu? Splika. (Filipenses 1:9)

⁴ Omenta bu amor pa Jeová. Bu ta ama Jeová txeu, má bu amor pa el pode bira más txeu inda. Modi? Apóstlu Polu pâpia di un manera di faze kel-li na Filipenses 1:9. (Lé.) Polu ora pa amor di kes irmon na Filipus ‘bira kada bês más txeu.’ Nton nu pode omenta nos amor pa Jeová. Nu pode faze kel-li óras ki nu ta ten ‘konhisimentu izatu i tudu disirnimentu’. Sima nu ta ba ta konxe Jeová más midjór, nos amor pa el ta bira más txeu i nu ta da más valor pa se manera di ser i se manera di faze kuzas. Nu ta fika ku más vontadi di faze kuzas ki ta dexa-l kontenti i nunka nu ka ta krê faze nada ki ta dexa-l tristi. Nu ta faze nos midjór pa ntende kuzê ki el krê pa nu faze i modi ki nu pode faze kel-li.

5-6. Modi ki nos amor pa Jeová pode bira más txeu? Splika.

⁵ Jizus imita manera di ser di Jeová di manera perfeitu. Nton, óras ki nu konxe Jizus midjór, nu ta ama Jeová mutu más inda. (Heb. 1:3) Midjór manera di konxe Jizus é studa kes kuatu Ivanjélhu. Si inda bu ka ten ábitu di lé Bíblia tudu dia, pamodi ki bu ka ta kumesa oji? Sima bu ta ba ta lé kes stória sobri Jizus, presta atenson na se kualidadis. Algen ta xintiba avontádi ku el. Pur izénplu, el karega kes minís pikinoti ku amor. (Mar. 10:13-16) El dexa se disiplus avontádi ku el i es ka ta xintiba medu di fla-l kuzê ki es staba ta xinti. (Mat. 16:22) Di kel manera li, Jizus imita se Pai ki sta na Séu. Jeová tanbê ta poi algen ta xinti avontádi ku el. Nu pode pâpia ku el na orason. I óras ki nu ta faze orason nu pode fla-l kalker kuza ki nu sta pensa i ki nu sta xinti. Nu ten sertéza ma el ka ta julga-nu. El ta ama-nu i el ta kuida di nos. — 1 Ped. 5:7.

⁶ Jizus xinti konpaxon di algen. Apóstlu Mateus fla: ‘Óras ki el ta odjaba kes monti di algen, el ta xintiba péna di es, pamodi es ta staba sfoladu i botadu di un ladu pa kel otu, sima ovelhas sen pastor.’ (Mat. 9:36) I modi ki Jeová ta xinti? Jizus fla: ‘Nha Pai ki sta na Séu, ka krê pa perde nen un di kes pikinoti li.’ (Mat. 18:14) Kel-li ta mexe ku nos própi! Sima nu ta ba ta konxe Jizus midjór, nos amor pa Jeová ta bira más txeu.

7. Modi ki pasa ténpu ku irmons maduru pode djuda-u?

⁷ Tanbê bu pode prende mostra más amor i faze prugrésu, óras ki bu ta tra ténpu pa konxe bus irmon ku irmans na kongregason. Repara modi ki es ten alegria. Es ka ta rapende di disizon ki es toma di sirbi Jeová. Pidi-s pa es konta-u algun spiriénsia ki es tevi na trabadju di Jeová. I óras ki bu ten ki toma un disizon inportanti, pidi-s konsedju.  Lenbra ma ‘ku txeu algen ki ta da konsedju ta ten bons rezultadu.’ — Pro. 11:14.

8. Kuzê ki bu pode faze si bu ten dúvida sobri kuzê ki Bíblia ta inxina?

⁸ Tra bus dúvida. Sima dja nu odja na  parágrafu 2, Satanás ta tenta inpidi-nu di faze más prugrésu. Un manera di el faze kel-li é pô-u ku dúvida sobri alguns kuza ki Bíblia ta inxina. Pur izénplu, talvês alguns algen ta tenta konvense-u ma Deus ka kria-nu i ma nu ta izisti pamodi ivoluson. Talvês kantu abo éra más jóven bu ka ta pensaba na kel-li, má gósi ki dja bu sta más grandi talvês bu sta prende kel-li na skóla. Kes kuza ki bus profesor ta inxina-u pode parse ma ta faze sentidu i ta konvense-u. Má pode ser ki nunka es ka para pa odja próvas klaru ma ta izisti un Kriador. Lenbra di kuzê ki Provérbios 18:17 ta fla: ‘Kel primeru ki aprizenta se prubléma ta parse ma el ten razon, timenti kel otu párti ka txiga pa faze-l pergunta.’ Envês di bu atxa ma kes ideia ki bu ta obi na skóla é verdadi, tra ténpu pa bu studa ku kuidadu kuzê ki Bíblia ta fla. Faze piskiza na nos publikasons. Pâpia ku kes irmon i irmans ki antis ta kriditaba na ivoluson. Pergunta-s kuzê ki da-s más sertéza ma ta izisti un Kriador ki ta ama-nu. Kes konbérsu li pode djuda-u atxa próvas ma ta izisti un Kriador.

9. Kuzê ki bu prende ku izénplu di Melisa?

⁹ Un irman ki txoma Melisa tevi bons rezultadu kantu el faze piskiza sobri kriason. b El fla: “Na skóla kes profesor ta pâpia di ivoluson di un manera ki ta konvense algen. Na komésu, N ka ta krê fazeba piskiza pamodi N tinha medu di diskubri ma ivoluson é verdadi. Má N lenbra ma Jeová krê pa nu ten bons motivu pa nu kridita na el. Nton N kumesa ta faze piskiza. N lé kel livru Existe um Criador Que Se Importa com Você? i kes bruxura, Será Que a Vida Teve Um Criador? i A Origem da Vida — Cinco Perguntas Que Merecem Resposta. Éra  kel-li própi ki N staba ta meste. É péna pamodi N ka fazeba kel-li antis.”

10-11. Kuzê ki pode djuda-nu ten un konportamentu linpu? (1 Tessalonicenses 4:3, 4)

¹⁰ Ivita faze kuzas mariadu. Óras ki abo é más jóven, dizeju di faze séksu pode ser más fórti. I alvês otus algen ta faze-u preson pa bu faze konportamentu seksual mariadu. É kel-li ki Satanás krê pa bu faze. Kuzê ki pode djuda-u kontinua ta ten un konportamentu linpu? (Lé 1 Tessalonicenses 4:3, 4.) Óras ki bu ta ora pa Jeová, fla-l modi ki bu sta xinti i pidi-l pa el da-u forsa. (Mat. 6:13) Lenbra ma Jeová krê djuda-u, el ka ta julga-u. (Sal. 103:13, 14) Bíblia tanbê pode djuda-u. Melisa, ki dja nu papiaba di el antis, fla kuzê ki djuda-l luta kóntra pensamentus mariadu. El fla: “Lé Bíblia tudu dia djuda-m kontinua ta luta kóntra nhas dizeju mariadu. Kel-li djuda-m lenbra ma mi é di Jeová i ma N krê pa el faze párti di nha vida.” — Sal. 119:9.

¹¹ Ka bu tenta rezolve prublémas bo sô. Pâpia ku bu pai i ku bu mai sobri kuzê ki sta kontise. É klaru ki é ka fásil pâpia sobri kes asuntu li, má é inportanti faze kel-li. Melisa fla: “N faze orason ta pidi koraji i dipôs N pâpia ku nha pai sobri kel prubléma. Dipôs di kel-li N xinti txeu aliviadu. N sabia ma Jeová staba kontenti ku mi.”

12. Modi ki bu pode toma bons disizon?

¹² Dexa prinsípius di Bíblia orienta-u. Poku-poku bu ta ganha más liberdadi pa bu toma bus disizon. Má inda ten txeu kuza ki bu meste prende. Modi ki bu pode ivita faze un kuza mariadu ki pode prujudika bu amizadi ku Jeová? (Pro. 22:3) Un irman ki txoma Kari, fla kuzê ki djuda-l toma bons disizon. El da kónta ma kristons maduru ka meste un régra pa kada situason na vida. El fla: “N meste ntendeba kuzê ki Jeová ta pensa sobri alguns asuntu envês di sô sigi régras.” Óras ki bu ta lé Bíblia pergunta bu kabésa: ‘Kuzê ki kel-li ta inxina-m sobri kuzê ki Jeová ta atxa di kel asuntu li? Bíblia ten algun prinsípiu ki pode djuda-m faze kel ki é dretu? Modi ki faze kel ki Bíblia ta inxina pode djuda-m?’ (Sal. 19:7; Isa. 48:17, 18) Óras ki bu ta lé Bíblia i midita na se prinsípius ta ser más fásil toma disizon ki ta agrada Jeová. Si bu kontinua ta faze prugrésu bu ta odja ma bu ka meste di un régra pa kada situason, pamodi bu ta ntende kuzê ki Jeová ta pensa sobri alguns asuntu.

13. Modi ki bons amigu pode djuda-u? (Provérbios 13:20)

¹³ Skodje amigus ki ta ama Jeová. Sima dja nu papiaba antis, amigus ki bu ta skodje pode djuda-u bira un algen maduru. (Lé Provérbios 13:20.) Un irman ki txoma Sara, staba ta perde se alegria. Nton kontise un kuza ki djuda-l ten más alegria otu bês. El fla: “N atxa bons amigu na óra sértu. Mi ku un irman nu ta studaba Sentinéla djuntu tudu simana. Otu amiga tanbê djuda-m kumesa ta da komentáriu na runion. Pamodi ajuda di bons amigu, N kumesa ta da txeu valor pa nha studu pesoal i orason. N kumesa ta dizenvolve un amizadi más fórti ku Jeová i N kumesa ta xinti alegria otu bês.”

14. Modi ki Júliu faze bons amigu?

 ¹⁴ Modi ki bu pode faze amizadi ku algen ki ta djuda-u? Júliu, ki gósi é ansion, fla: “Kantu mi éra más jóven, N faze bons amizadi ku irmons ki N ta saíba ku es na pregason. Kes amigu li tinha txeu zelu i es djuda-m odja ma pregason pode ser un kuza sábi. Es djuda-m poi méta di trabadja pa ténpu interu. Tanbê N da kónta ma N staba ta perde oportunidadi di ten bons amigu pamodi antis N ta fazeba amizadi sô ku algen di nha idadi. Dipôs N faze bons amigu na Betel. Ses izénplu djuda-m skodje diverson midjór i pô-m ta bira más amigu di Jeová.”

15. Ki avizu apóstlu Polu da Timótiu sobri faze amizadi? (2 Timóteo 2:20-22)

¹⁵ Kuzê ki bu debe faze si bu da kónta ma un algen na kongregason pode prujudika bu amizadi ku Jeová? Polu sabia ma alguns algen na kongregason na ténpu di apóstlus, ka tinha un bon amizadi ku Jeová. Pur isu, el aviza Timótiu pa fika lonji di es. (Lé 2 Timóteo 2:20-22.) Nos amizadi ku Jeová ten txeu valor. Pur isu, nu ka debe dexa ningen straga kel amizadi ki nu sforsa txeu pa nu ten ku nos Pai ki sta na Séu. — Sal. 26:4.

16. Ki métas ki bu pode poi?

¹⁶ Poi métas ki ta djuda-u. Skodje métas ki ta djuda-u bira bu fé más fórti i un algen midjór. (Efé. 3:16) Pur izénplu, bu pode disidi midjora bu prugrama di studu pesoal i leitura di Bíblia. (Sal. 1:2, 3) Ô talvês bu pode tenta faze orason más txeu i di korason. Talvês bu meste toma más kuidadu ku diverson ki bu ta skodje ô modi ki bu ta uza bu ténpu. (Efé. 5:15, 16) Óras ki Jeová odja ma bu sta ta sforsa txeu pa faze más prugrésu el ta fika kontenti.

17. Modi ki bu ta xinti óras ki bu ta djuda otus algen?

¹⁷ Óras ki bu ta djuda otus bu ta bira un algen maduru. Jizus fla: ‘É más sábi da di ki toma.’ (Atos 20:35) Si bu uza bu  ténpu i forsa ki bu ten pamodi bo é jóven pa djuda otus, bu ta ten bons rezultadu. Pur izénplu, bu pode poi métas di djuda kes irmon ki dja sta algen grandi i duenti na bu kongregason. Talvês bu pode bai kunpra kes kuza ki es meste ô djuda-s uza aparelhus iletróniku. Si bo é un irmon, poi méta di bira ajudanti di kongregason. Asi bu ta konsigi djuda bus irmon ku irmans. (Fil. 2:4) Tanbê bu pode mostra amor pa kes algen ki ka ta sirbi Jeová óras ki bu ta pâpia ku es di notísias sábi di Reinu. (Mat. 9:36, 37) Si ta da, poi méta di partisipa di algun manera na sirvisu pa ténpu interu.

18. Modi ki sirbi Jeová pa ténpu interu pode djuda-u faze prugrésu?

¹⁸ Sirbi Jeová pa ténpu interu pode da-u txeu oportunidadi pa faze prugrésu. Ser pioneru pode da-u oportunidadi di bai Skóla pa pregadoris di Reinu. Bu pode bai Betel ô partisipa na prujétus di konstruson di organizason. Un pionera jóven ki txoma Kaitlin, fla: “Un kuza ki djuda-m faze prugrésu dipôs ki N batiza, foi pasa ténpu na pregason ku irmons i irmans ki ten txeu spiriénsia. Ses izénplu djuda-m studa Bíblia más txeu i midjora nha kapasidadi di inxina.”

19. Ki bensons ki bu ta ten si bu kontinua ta faze prugrésu?

¹⁹ Si bu ta kontinua ta faze prugrésu, bu ta resebe txeu benson. Bu ka ta uza bu juventudi pa npenha pa kuzas ki ka ten valor. (1 João 2:17) Bu ta ivita dór di toma maus disizon. Má bu ta ten bons rezultadu i filisidadi di verdadi. (Pro. 16:3) Bon izénplu ki bu ta da, ta nkoraja tudu irmons, kes ki é jóven i kes ki sta algen grandi. (1 Tim. 4:12) I más inportanti inda, bu ta xinti pas i alegria pamodi Jeová sta kontenti ku bo i pamodi bu ten un bon amizadi ku el. — Pro. 23:15, 16.