STUDU 33
Jeová ta kuida di se povu
‘Odjus di Jeová ta sta sienti na kes ki ten grandi ruspetu pa el’. — SALMO 33:18.
KÁNTIKU 4 ‘Jeová é nha Pastor’
KUZÊ KI NU STA BEN STUDA a
1. Pamodi ki Jizus pidi Jeová pa fika di odju na se disiplus?
NA KEL noti antis di Jizus móre, el faze un pididu spesial pa se Pai ki sta na Séu. El pidi Jeová pa fika di odju na se disiplus. (João 17:15, 20) É klaru ki Jeová sénpri ta kuida i ta proteje se povu. Má, Jizus sabia ma se disiplus pode ben pasaba pa txeu opozison di Satanás. Tanbê Jizus sabia ma es ta mesteba di ajuda di Jeová pa aguenta kes ataki di Satanás.
2. Sima sta na Salmo 33:18-20, pamodi ki nu ka meste ten medu di kes prubléma ki nu ta pasa pa el?
2 Kel mundu li ki Satanás ta kontrola, ta traze txeu prubléma pa kes algen ki ta sirbi Deus gósi. Nu ta pasa pa prublémas ki pode dizanima-nu i pode ti poi nos lialdadi pa Jeová na próva. Má sima nu ta ben odja na kel studu li, nu ka meste xinti medu. Jeová ta kuida di nos. El sta odja kes prubléma ki nu sta pasa pa el i el sta sénpri prontu pa djuda-nu lida ku es. Nu ben odja dôs izénplu na Bíblia ki ta mostra modi ki Jeová sta ‘sienti na kes ki ten grandi ruspetu pa el’. — Lé Salmo 33:18-20.
ÓRAS KI NU TA XINTI NOS SÔ
3. kuzê ki pode pô-nu ta xinti nos sô?
3 Nbóra nu ten txeu irmon ku irmans na kongregason, alvês nu pode xinti nos sô. Pur izénplu, jóvens pode xinti es sô óras ki es ta splika kuzê ki es ta kridita na el na skóla na frenti di ses koléga ô óras ki es ta muda pa un otu kongregason. Alguns di nos pode xinti tristi ô pode sta ta luta ku sentimentus negativu i ta pensa ma nu ten ki lida ku kes sentimentu li nos sô. Nu pode xinti medu di pâpia ku otus algen sobri kuzê ki nu sta xinti pamodi nu pode fika preokupadu ma es pode ka ntende-nu. I alvês ti nu pode pergunta nos kabésa si algun algen ta preokupa ku nos. Ka ta nporta pamodi ki nu ta xinti nos sô, alvês tanbê nu pode xinti bandonadu i preokupadu dimás. Jeová nunka ka krê pa nu xinti asi. Pamodi ki nu pode fla kel-li?
4. Pamodi ki proféta Elias fla: ‘É sô mi ki fika’?
4 Odja izénplu di Elias ki éra un ómi fiel. Jizabel promete ma el ta mataba el, nton el tevi más di 40 dia ta fuji pa el pode salvaba se vida. (1 Reis 19:1-9) Kantu el staba el sô na un kavérna el fla Jeová: ‘É sô mi [proféta] ki fika.’ (1 Reis 19:10) Má tinha otus proféta na Israel. Obadias konsigi salva 100 proféta pa Jizabel ka mataba es. (1 Reis 18:7, 13) Nton pamodi ki Elias staba ta xinti el sô? É pamodi el pensa ma kes proféta ki Obadias salva staba tudu mortu? El xinti el sô pamodi ningen ka krê sirbiba Jeová djuntu ku el sikrê kantu Jeová prova ma el éra Deus verdaderu na Monti Karmelu? Talvês el xinti ma ningen ka sabia kuzê ki el staba ta pasa pa el, ô el fika ta fla ma ningen ka ta nportaba ku el? Kel stória ka ta fla tudu kuza ki Elias xinti. Un kuza ki nu pode ten sertéza, é ma Jeová ntende pamodi ki Elias staba ta xinti el sô i el sabia kuzê ki el ta fazeba pa djudaba el.
Óras ki nu ta xinti nos sô, ki lison ki ta konsola-nu nu ta prende di modi ki Jeová djuda Elias? (Odja parágrafus 5 i 6.)
5. Modi ki Jeová da Elias sertéza ma el ka staba el sô?
5 Jeová djuda Elias di txeu manera. El dexa Elias avontádi pa pâpia ku el. El pergunta Elias dôs bês: ‘Kuzê ki bu sta faze li?’ (1 Reis 19:9, 13) Na tudu kes bês, Jeová obi kantu Elias fla-l modi ki el staba ta xinti. Jeová responde Elias kantu el mostra-l ma el staba di se ladu i ma el é un Deus ki ten txeu puder. Tanbê, Jeová da Elias sertéza ma inda tinha txeu israelita ki ta adoraba el. (1 Reis 19:11, 12, 18) Nu ka ten dúvida ma Elias xinti aliviadu dipôs ki el abri se korason pa Jeová i el obi kuzê ki Jeová fla-l. Jeová da Elias txeu diziginason inportanti. El pidi Elias pa skodje Azael pa ser rei di Síria, Jeú pa ser rei di Israel i Elizeu pa ser proféta. (1 Reis 19:15, 16) Kantu Jeová da Elias kel diziginason li, el djuda-l konsentra na kuzas puzitivu. Tanbê Jeová da-l un bon amigu, ki éra proféta Elizeu. Modi ki bu pode resebe ajuda di Jeová óras ki bu sta xinti bo sô?
6. Sobri kuzê bu pode ora óras ki bu ta xinti bo sô? (Salmo 62:8)
6 Jeová ta konvida-u pa bu pâpia ku el na orason. El ta odja kes prubléma ki bu ta pasa pa el i el ta da-u sertéza ma el ta obi bus orason na kalker óra. (1 Tes. 5:17) Jeová ta xinti sábi óras ki se sérvus ta pâpia ku el. (Pro. 15:8) Sobri kuzê ki bu pode ora, óras ki bu ta xinti bo sô? Abri bu korason pa Jeová sima Elias faze. (Lé Salmo 62:8.) Konta-l sobri bus preokupason i modi ki es sta pô-u ta xinti. Pidi Jeová pa el djuda-u lida ku bus sentimentu. Si bu ta xinti bo sô i ku medu óras ki bu ta da tistimunhu na skóla, pidi Jeová pa da-u koraji ki bu meste pa bu konsigi pâpia. Ti bu pode pidi-l sabedoria pa bu pode splika kuzê ki bu ta kridita na el ku jetu. (Luc. 21:14, 15) Si bu sta ta luta ku sentimentus negativu, pidi Jeová pa djuda-u pâpia ku un irmon maduru sobri kel-li. Bu pode pidi Jeová pa djuda kel algen ki bu sta bai pâpia ku el ntende modi ki bu sta xinti. Abri bu korason pa Jeová, odja modi ki el ta responde bus orason i seta ajuda di otus algen. Si bu faze kel-li, bu ka ta xinti bo sô.
Bu ta djobe maneras di faze más na pregason i bu ta faze-l djuntu ku otus irmon? (Odja parágrafu 7.)
7. Kuzê ki bu prende ku izénplu di Maurísiu?
7 Jeová da nos tudu un trabadju txeu inportanti pa nu faze. Bu pode ten sertéza ma el sabe i el ta da valor pa tudu kuza ki bu ta faze pa kunpri bus diziginason na kongregason i na pregason. (Sal. 110:3) Modi ki mante okupadu na kel trabadju li pode djuda-u ka xinti bo sô? Odja izénplu di un irmon jóven ki txoma Maurísiu. b Poku ténpu dipôs ki Maurísiu batiza, un di se midjór amigu kumesa ta bandona Jeová. El fla: “Odja nha amigu ta bandona Jeová dexa-m txeu tristi. N ta perguntaba si N ta konsigiba kontinua ta sirbi Jeová i ta faze párti di se família. N ta xintiba mi sô i N ta pensaba ma ningen ka ta ntendeba kuzê ki N staba ta pasa pa el.” Kuzê ki djuda Maurísiu? El fla: “N kumesa ta sai na pregason más txeu. Kel-li djuda-m para di pensa sô na nha kabésa i na nhas sentimentu negativu. N xinti filís i ma N ka staba mi sô óras ki N ta trabadjaba ku otus na pregason. Sikrê nu ka ta konsigi sta djuntu ku nos irmons na pregason, inda nu ta pode prega ku es pa tilifóni ô skrebe karta. I kel-li pode djuda-nu txeu.” Kuzê más ki djuda Maurísiu? El fla: “Tanbê N kumesa ta faze más na kongregason. N kumesa ta pripara dretu kes párti ki N ta fazeba na runion. Kes diziginason li djuda-m odja ma N tinha valor pa Jeová i pa irmons.”
ÓRAS KI NU TA XINTI DIZANIMADU PAMODI TXEU PRUBLÉMA
8. Ki prublémas ki nu pode pasa pa el?
8 Nu sta ta vive na ténpu di fin, pur isu nos tudu nu pode spéra ma nu ta pasa pa prublémas. (2 Tim. 3:1) Sikrê nu sabe ma kel-li ta kontise, nu pode pasa pa prublémas sen nu sta ta spéra. Pur isu, nu pode fika spantadu óras ki kel-li ta kontise. Nu pode pasa pa prublémas sima falta di dinheru, un duénsa gravi ô un algen ki nu ta ama pode móre. Na kes óra li nu pode xinti dizusperadu i sen sabe kuzê ki nu ta faze, prinsipalmenti óras ki ta parse ma nu sta ta pasa pa prublémas un tras di kel otu. Má nu debe lenbra ma Jeová sta ta kuida di nos, i ku se ajuda nu pode ten kunfiansa ma nu ta konsigi lida ku kalker prubléma.
9. Pâpia di alguns prubléma ki Jó pasa pa el.
9 Pensa na modi ki Jeová djuda Jó. El pasa pa txeu prubléma kasábi na poku ténpu. Sô na un dia Jó fika ta sabe ma tudu kes animal ki el tinha furtadu ô matadu, ma se sérvus matadu i más piór inda, ma se fidjus ki el kreba txeu móre. (Jó 1:13-19) Poku dipôs di kel-li, timenti Jó staba ku txeu dór el panha un duénsa gravi. (Jó 2:7) Situason di Jó éra mariadu di tal manera ki el fla: ‘N ta ôdia nha vida. N ka krê kontinua ta vive’. — Jó 7:16.
Jeová pâpia ku Jó sobri kes txeu manera ki el ta kuida di se kriason asi pa da Jó sertéza ma el ta amaba i el ta kuidaba di el. (Odja parágrafu 10.)
10. Modi ki Jeová da Jó kel ki el staba ta meste pa el aguentaba se prublémas? (Odja dizenhu na kapa.)
10 Jeová kuida di Jó. Dja ki Jeová ta amaba Jó, el da-l kes kuza ki el staba ta meste pa aguenta kes prubléma i kontinua fiel. Jeová pâpia ku Jó i el lenbra-l di se sabedoria ki ka ten konparason i di modi ki el ta kuida di se kriason ku amor. El pâpia di txeu animal ki ta dexa algen dimiradu. (Jó 38:1, 2; 39:9, 13, 19, 27; 40:15; 41:1, 2) Tanbê, Jeová uza un jóven ki txoma Eliú, pa da Jó forsa i pa konsola-l. Eliú garanti Jó ma Jeová sénpri ta rekonpensa kes algen ki ta adora-l i ki ta aguenta firmi. Má Jeová tanbê poi Eliú ta da Jó alguns konsedju ku amor. Kantu Eliú lenbra Jó ma nos é pikinoti konparadu ku Jeová ki é Kriador di Séu ku Téra, el djuda Jó ka pensa txeu dimás na el. (Jó 37:14) Jeová tanbê fla Jó pa faze un kuza. El fla-l pa el faze orason pa kes três ómi ki ba vizita-l i ki peka. (Jó 42:8-10) Modi ki Jeová ta djuda-nu oji óras ki nu ta pasa pa prublémas difísil?
11. Modi ki Bíblia ta djuda-nu óras ki nu sta pasa pa prublémas?
11 Jeová ka ta pâpia ku nos di manera dirétu sima el faze ku Jó, má el ta pâpia ku nos através di se Palavra Bíblia. (Rom. 15:4) El ta konsola-nu óras ki el ta da-nu un speransa pa futuru. Nu ben odja alguns kuza ki Bíblia ta fla ki pode konsola-nu óras ki nu ta pasa pa prublémas. Na Bíblia Jeová ta da-nu sertéza ma ka ten nada, nen kes prubléma más gravi, ki ‘ta konsigi sipara-nu di se amor.’ (Rom. 8:38, 39) Tanbê el ta garanti-nu ma el ‘sta pértu di tudu kes ki ta pâpia’ ku el na orason. (Sal. 145:18) Jeová ta fla-nu ma si nu kunfia na el, nu pode aguenta kalker prubléma i ser filís sikrê nu sta sufri. (1 Cor. 10:13; Tia. 1:2, 12) Palavra di Deus tanbê ta lenbra-nu ma konparadu ku kel rekonpénsa pa tudu ténpu ki Deus ta da-nu, nos prublémas é pa un ténpu i es ka ta dura txeu. (2 Cor. 4:16-18) Jeová ta da-nu sertéza ma el ta ben kaba ku kes ki ta pô-nu ta pasa pa tudu kes prubléma, ki é Satanás i kes ki ta imita-l. (Sal. 37:10) Bu dikora alguns párti di Bíblia ki ta djuda-u aguenta kes prubléma ki sta pa ben?
12. Kuzê ki Jeová krê pa nu faze pa se Palavra pode djuda-nu más txeu?
12 Jeová ta spéra pa nu tra ténpu pa nu studa Bíblia sénpri i pa nu midita na kuzê ki nu ta lé. Óras ki nu ta faze kel ki nu prende, nos fé ta bira más fórti i nu ta bira más amigu di nos Pai ki sta na Séu. Asi nu ta fika más fórti pa aguenta prublémas. Jeová tanbê ta da se spritu santu pa kes algen ki ta kunfia na se Palavra. I se spritu santu ta da-nu ‘puder alén di normal’ pa nu aguenta kalker prubléma. — 2 Cor. 4:7-10.
13. Modi ki kumida spritual ki ‘skravu fiel i prudenti’ ta da, ta djuda-nu aguenta prublémas?
13 Ku ajuda di Jeová, ‘skravu fiel i prudenti’ sta ta faze txeu artigu, vídiu i múzika ki pode djuda-nu ten un fé fórti i kontinua ku un bon amizadi ku Jeová. (Mat. 24:45) Nu meste uza dretu tudu kes kuza ki Jeová ta da-nu. Ka dura li, un irman na Mérka fla modi ki el ta xinti gratidon pa tudu kumida spritual ki el ta resebe. El fla: “Na es 40 anu ki dja N ten ta sirbi Jeová, nha lialdadi dja podu na próva txeu bês.” El pasa pa prublémas gravi. Un kondutor ki staba moku mata se avó. Se pai ku se mai móre pamodi un duénsa i dja el luta ku kánser dôs bês. Kuzê ki djuda-l aguenta firmi? El fla: “Jeová sénpri kuida di mi. Kumida spritual ki el ta da através di skravu fiel i prudenti djuda-m aguenta firmi. Pamodi kel-li N pode fla sima Jó: ‘Ti N móre, N ta mante nha lialdadi!’” — Jó 27:5.
Modi ki nu pode djuda otus na kongregason? (Odja parágrafu 14.)
14. Modi ki Jeová ta uza nos irmons ku irmans pa djuda-nu na prublémas difísil? (1 Tessalonicenses 4:9)
14 Jeová sta trena se povu pa ama i konsola kunpanheru na ténpus di frónta. (2 Cor. 1:3, 4; lé 1 Tessalonicenses 4:9.) Sima Eliú, nos irmons ku irmans tene gana di djuda-nu kontinua lial óras ki nu ta pasa pa prublémas. (Atos 14:22) Pur izénplu, odja modi ki kongregason di Diana nkoraja-l i djuda-l kontinua ku un amizadi fórti ku Jeová dipôs ki se maridu tevi un duénsa gravi. El fla: “Foi difísil, má nu xinti brasu fórti i xeiu di amor di Jeová na kes mês difísil. Nos kongregason faze txeu kuza pa djuda-nu. Kes vizita, kes xamada i kes abrasu di nos irmons ku irmans djuda-nu ka dizisti. Dja ki N ka sabe konduzi, irmons ku irmans djuda-m ba runion i ba pregason óras ki N ta konsigiba.” É un benson faze párti di kel família spritual li ki é xeiu di amor!
NU TEN GRATIDON PAMODI JEOVÁ TA KUIDA DI NOS KU AMOR
15. Pamodi ki nu pode ten sertéza ma nu pode aguenta prublémas?
15 Tudu nos ta pasa pa algun tipu di prubléma. Má sima nu prende nunka nu ka ta sta nos sô óras ki nu ta pasa pa un prubléma. Sima un pai ki ta ama-nu, Jeová ta kuida di nos sénpri. El sta di nos ladu, sénpri prontu pa obi óras ki nu ta pidi-l ajuda i el tene gana di djuda-nu. (Isa. 43:2) Nu ten sertéza ma nu pode lida ku prublémas pamodi el ta da-nu tudu kel ki nu meste pa nu ka dizisti. El da-nu orason, Bíblia, txeu kumida spritual i irmons ku irmans ki ta ama-nu pa djuda-nu óras ki nu meste.
16. Kuzê ki nu pode faze pa Jeová kontinua ta kuida di nos ku amor?
16 Nu ta agradese nos Pai na Séu txeu pamodi el ta kuida di nos! ‘Nos korason ta fika kontenti pamodi el.’ (Sal. 33:21) Nu pode mostra Jeová nos gratidon pamodi el ta kuida di nos ku amor, óras ki nu ta pruveta dretu tudu kes kuza ki el ta da-nu pa djuda-nu. Tanbê, nu meste faze nos párti pa Jeová kontinua ta kuida di nos. Kel-li krê fla ma si nu kontinua ta faze nos midjór pa obi ku Jeová i ta faze kel ki é dretu, el ta kontinua ta kuida di nos pa tudu ténpu! — 1 Ped. 3:12.
KÁNTIKU 30 Nha amigu, nha Pai i nha Deus