1. Pamodi ki é sábi pâpia ku otus sobri modi ki nu konxe “verdadi”?

 “MODI ki bu konxe verdadi?” Di sertéza dja bu responde kel pergunta li monti bês. Kel-li é un di kes primeru pergunta ki bu ta obi óras ki bu ta konxe un irmon. Nu gosta di obi nos irmons ku irmans ta konta modi ki es konxe i modi ki es bira ta ama Jeová, i nu gosta di fla-s kuzê ki verdadi siginifika pa nos. (Rom. 1:11) Konbérsus sima kes-li, ta djuda-nu lenbra di modi ki verdadi ten txeu valor pa nos. Tanbê, nu ta fika más disididu na ‘kontinua ta anda na verdadi’ ô kontinua ta vive di un manera ki ta agrada Jeová. — 3 João 4.

2. Kuzê ki nu sta ben odja na kel studu li?

² Na kel studu li, nu sta ben odja alguns kuza ki ta mostra pamodi ki nu ta ama verdadi. Dipôs nu ta ben odja modi ki nu pode kontinua ta mostra nos amor pa es prezenti ki ten txeu valor. Kel studu li ta ben djuda-nu mostra más gratidon pa Jeová pamodi el djuda-nu konxe verdadi. (João 6:44) Tanbê el ta ben pô-nu ku más gana di inxina verdadi pa otus algen.

3. Kal ki é kel motivu más inportanti ki ta pô-nu ta ama verdadi?

³ Nu ten txeu motivu pa ama verdadi. Má kel motivu más inportanti, é pamodi nu ta ama Jeová ki é Fonti di verdadi. Através di se Palavra, Bíblia, nu ta prende ma el é Deus Tudu-Poderozu, ma el kria Séu ku Téra i tanbê  ma el é nos Pai ki sta na Séu, ki ta kuida di nos tudu ku amor. (1 Ped. 5:7) Nu sabe ma el é un Deus di ‘mizerikórdia i konpaxon, ki ten paxénxa i ki sta xeiu di amor lial i di verdadi’. (Êxo. 34:6) Tanbê Jeová ta ama justisa. (Isa. 61:8) Ta due-l txeu odja-nu ta sufri i el ta spéra kel óra sértu pa el ben kaba ku tudu sufrimentu. (Jer. 29:11) Nu tene gana pa kel-li kontise! É ka atoa ki nu ta ama Jeová txeu!

4-5. Pamodi ki apóstlu Polu konpara nos speransa ku un ánkura?

⁴ Kal ki é un otu motivu ki ta pô-nu ta ama verdadi? Konxe verdadi ta djuda-nu txeu. Nu ben odja un izénplu. Verdadis di Bíblia ta inklui speransa ki nu ten pa futuru. Pa mostra valor di kel speransa li, apóstlu Polu skrebe: ‘Nu ten kel speransa li, sima un ánkura pa alma, ki é suguru i firmi’. (Heb. 6:19) Sima un ánkura ka ta dexa un barku sakudi txeu, di mésmu manera nos speransa ki ten bazi na Bíblia ta djuda-nu kontinua kalmu óras ki nu ta pasa pa prublémas.

⁵ Na verdadi, Polu staba ta pâpia di kel speransa ki kes kriston skodjedu ten di ba vive na Séu. Má kuzê ki el fla ta aplika tanbê na kes sérvu di Jeová ki ten speransa di vive pa tudu ténpu na paraízu li na Téra. (João 3:16) Di sertéza, prende sobri kel speransa di vive pa tudu ténpu ta da-nu un obijetivu na vida.

6-7. Modi ki prende verdadi sobri futuru djuda Ivone?

⁶ Odja spiriénsia di un irman ki txoma Ivone. El ka kria na verdadi i kantu el éra mininu el tinha medu di mórti. El ta lenbra ma el lé un frazi ki nunka el ka skese di el. Kel frazi ta flaba: “Un dia bu ka ta manxe”. Ivone fla: “Kel frazi li pô-m kordadu un noti interu ta pensa na nha futuru. N ta pensaba: ‘Vida ka pode ser sô kel-li. Kal ki é obijetivu di vida?’ N ka krê moreba!”

⁷ Dipôs, kantu Ivone éra jóven, el konxe alguns Tistimunha di Jeová. El fla: “N kumesa ta kridita ma pode tinha speransa di vive pa tudu ténpu na paraízu na Téra.” Modi ki prende verdadi djuda nos irman? El fla: “Gósi N ka ta fika kordadu di noti ta preokupa ku futuru ô ku mórti.” É klaru ki Ivone ta ama verdadi i el gosta txeu di pâpia ku otus sobri speransa ki el ten pa futuru. — 1 Tim. 4:16.

8-9. (a) Na kel ilustrason ki Jizus konta, kuzê ki kel ómi faze kantu el atxa un tizoru? (b) Ki valor ki verdadi ten pa bo?

⁸ Notísias sábi sobri Reinu di Deus tanbê ta faze párti di kes verdadi di Bíblia. Jizus fla ma verdadi sobri Reinu é sima un tizoru sukundidu. Sima sta na Mateus 13:44, Jizus fla: ‘Reinu di Séu é sima un tizoru sukundidu na kanpu, ki un ómi atxa i el sukundi otu bês. I pamodi el fika kontenti ku el, el bai i el bende tudu kuza ki el tinha i el kunpra kel kanpu.’ Repara ma kel ómi ka staba ta djobe un tizoru. Má kantu el atxa-l, el faze txeu sakrifisiu pa konsigi kel tizoru. Na verdadi, el bende tudu kel ki el tinha. Pamodi? Pamodi el sabia ma kel tizoru tinha txeu valor. El tinha más valor di ki kalker kuza ki el dexa pa tras.

 ⁹ Bu ta xinti mésmu kuza pa verdadi? É klaru ki sin! Nu sabe ma ka ten nada ki kel mundu li ta oferese-nu ki ta konpara ku alegria di sirbi Jeová gósi i di ten speransa di vive pa tudu ténpu na futuru na Reinu di Deus. Ten un amizadi fórti ku Jeová bale más di ki kalker sakrifisiu ki nu ta faze. Nos alegria más grandi é ‘agrada-l na tudu kuza’. — Col. 1:10.

10-11. Kuzê ki poi Mixel ta muda se vida?

¹⁰ Txeu di nos faze sakrifisius pa vive di un manera ki ta dexa Jeová kontenti. Alguns bandona karera ki da-s fama na mundu. Otus para di tenta bira riku. Inda otus muda ses manera di vive konpletamenti kantu es prende sobri Jeová. É kel-li ki Mixel faze. El ka kria na verdadi. Kantu el éra jóven el ta trenaba karaté. El fla: “Pa mi éra txeu inportanti ten un korpu bunitu. Alvês, N ta xintiba ma ningen ka ta ganhaba mi.” Má kantu Mixel kumesa ta studa Bíblia, el prende kuzê ki Jeová ta pensa sobri violénsia. (Sal. 11:5) Mixel fla sobri kel kazal ki ta studaba Bíblia ku el: “Nunka es ka fla-m ma N tinha ki paraba di trena karaté. Kuzê ki es faze foi kontinua ta inxina-m verdadis di Bíblia.”

¹¹ Sima Mixel ba ta prende sobri Jeová, se amor pa el bira kada bês más fórti. Un kuza ki toka-l txeu é odja modi ki Jeová ta mostra mizerikórdia pa se sérvus. Ku ténpu, Mixel da kónta ma el tinha ki tomaba un disizon ki ta mudaba se vida. El fla: “N sabia ma para di trena karaté ta sérba un di kes kuza más difísil ki N tinha ki fazeba na nha vida. Má tanbê N sabia ma kel-li ta dexaba Jeová kontenti i N tinha sertéza ma sirbi-l ta baleba más di ki kalker kuza ki N dexaba pa tras.” Mixel ta daba txeu valor pa kes verdadi ki el atxa pur isu, el muda se vida txeu. — Tia. 1:25.

12-13. Modi ki verdadi di Bíblia djuda Maili?

¹² Pa mostra modi ki verdadi ten txeu valor, Bíblia ta konpara-l ku un lánpida ki ta límia na sukuru. (Sal. 119:105; Efé. 5:8) Maili, di Azerbeijon, sta txeu kontenti pamodi Palavra di Deus límia se vida. El kria na un família ki se pai ku se mai éra di relijion diferenti. Se pai éra musulmanu i se mai éra di relijion di judeus. El fla: “Nbóra N ka tinha dúvida ma Deus ta izisti, N tinha txeu pergunta ki ta dexaba mi konfuzu. N ta perguntaba: ‘Pamodi ki Deus faze-nu i pamodi ki algen ta sufri se vida interu i dipôs el ta kemadu na inférnu pa tudu ténpu?’ Dja ki algen ta fla ma tudu kuza ki ta kontise é di vontadi di Deus N ta perguntaba: ‘Deus ta kontrola algen i dipôs el ta fika kontenti di odja-s ta sufri?’”

¹³ Maili kontinua ta djobe respósta pa se perguntas. I ku ténpu, el kumesa ta studa Bíblia i el bira un Tistimunha di Jeová. El fla: “Kes respósta klaru di Bíblia djuda-m bira un algen más filís i djuda-m xinti pas déntu mi.” Sima Maili, nu ta lova Jeová, ki é ‘Kel ki txoma-nu di sukuru pa Se grandi lus.’ — 1 Ped. 2:9.

14. Modi ki nu pode bira nos amor pa verdadi más fórti? (Tanbê odja kuadru “ Otus konparason”.)

¹⁴ Kes-li é alguns izénplu ki ta mostra ma verdadi ten txeu valor. Di sertéza bu ta konsigi pensa na otus izénplu.  Pamodi ki na bu studu pesoal bu ka ta piskiza otus motivu ki ta pô-nu ta ama verdadi? Si nos amor pa verdadi bira más fórti, nu ta atxa más manera di mostra nos amor pa el.

15. Kal ki é un manera ki nu ta mostra amor pa verdadi?

¹⁵ Nu pode mostra ma nu ta ama verdadi óras ki sénpri nu ta studa Bíblia i publikasons ki ten bazi na Bíblia. Ka ta nporta kantu ténpu ki dja nu ten na verdadi, sénpri ten kuzas pa prende. Kel primeru artigu di revista Sentinéla flaba: “Verdadi é sima un flor pikinoti na meiu di padja brabu. Pa nu atxa un flor sima kel-li nu ten ki sforsa txeu. Má un algen ka debe konforta sô ku un flor di verdadi. El debe kontinua ta djobe más flor.” Studa Bíblia ta iziji txeu sforsu, má bale péna faze kel sforsu li.

16. Modi ki bu ta studa Bíblia? (Provérbios 2:4-6)

¹⁶ É ka tudu algen ki gosta di lé i studa. Má Jeová ta konvida-nu pa nu ‘kontinua ta djobe’ asi pa nu pode  ntende verdadi midjór. (Lé Provérbios 2:4-6.) Óras ki nu ta faze kel sforsu li, sénpri nu ta ten bons rezultadu. Un irmon ki txoma Korei fla ma sénpri ki el ta faze se leitura di Bíblia el ta konsentra na un versíklu di kada bês. El fla: “N ta lé tudu kes nóta di rodapé, N ta djobe tudu kes referénsia i N ta faze otus piskiza. Asi, N ta prende txeu kuza.” Ka ta nporta modi ki nu ta studa, nu ta mostra ma nu ta da valor pa verdadi óras ki nu ta tra ténpu i nu ta sforsa pa studa Bíblia. — Sal. 1:1-3.

17. Kuzê ki vive verdadi krê fla? (Tiago 1:25)

¹⁷ É klaru ki nu sabe ma sô studa Bíblia ka ta txiga. Pa nu pode tra txeu pruvetu, nu debe vive verdadi ô faze kuzê ki nu prende. Asi nu ta ser filís di verdadi. (Lé Tiago 1:25.) Má modi ki nu pode sabe ma nu sta ta vive verdadi? Un irmon fla ma é bon nu izamina nos vida pa odja si nu sta ta faze kuzê ki nu sta ta prende i na undi ki nu meste midjora. Apóstlu Polu fla: ‘Ka ta nporta kal ki é prugrésu ki dja nu faze, nu kontinua ta anda na mésmu direson.’ — Fil. 3:16.

18. Pamodi ki nu ta sforsa pa ‘kontinua ta anda na verdadi’?

¹⁸ Pensa na kes rezultadu ki nu ta ten óras ki nu ta faze nos midjór pa ‘kontinua ta anda na verdadi’! Nu ta midjora nos vida i tanbê Jeová i nos irmons ta fika kontenti. (Pro. 27:11; 3 João 4) Di sertéza, nu ten txeu motivu pa ama verdadi i vive verdadi.