1. Sima sta na 1 Tessalonicenses 5:11, ki trabadju ki nos tudu ta partisipa na el?

 BU KONGREGASON dja faze ô dja konpo un Salon di Reinu? Si kel-li dja kontise, di sertéza bu ta lenbra di kel primeru runion ki bu sisti na el. Bu agradese Jeová pa kel-li. Na verdadi, talvês bu fika kontenti di tal manera ki nen bu ka konsigi kanta na komésu. Nos Salon di Reinu ki fazedu di un manera dretu ta da glória pa Jeová. Má nu ta da glória pa Jeová inda más txeu óras ki nu ta partisipa na otu tipu di trabadju. Kel trabadju li ten mutu más valor di ki faze prédius di organizason. Kel-li ta inklui djuda kes algen ki ta ben pa kes lugar di adorason. Apóstlu Polu staba ta pensa na kel tipu di ajuda li kantu el skrebe kes palavra ki tradu téma di kel studu li ki sta na 1 Tessalonicenses 5:11. — Lé.

2. Kuzê ki nu ta ben odja na kel studu li?

² Apóstlu Polu é un bon izénplu di algen ki sabia modi ki el ta djudaba se irmons ku irmans. El ta poba na lugar di kes irmon. Na kel studu li, nu ta ben odja modi ki el djuda-s (1) aguenta prublémas, (2) mante pas ku kunpanheru i (3) bira ses fé na Jeová más fórti. Nu ta ben odja modi ki nu pode imita Polu, asi pa nu pode djuda nos irmons ku irmans oji. — 1 Cor. 11:1.

3. Ki ideia ikilibradu ki Polu tinha?

³ Polu ta amaba se irmons txeu. El pasa pa prublémas, pur isu el ta xintiba konpaxon i el poi na lugar di se irmons kantu es staba ta pasa pa prublémas. Un bês Polu fika sen dinheru. Nton el tinha ki atxaba trabadju  pa el sustentaba se kabésa i se kunpanherus. (Atos 20:34) Se trabadju éra faze ténda. Kantu el txiga na Korintu, el trabadja ku Ákila i Prisila. Má ‘tudu sábadu,’ el ta pregaba pa judeus i pa gregus. Dipôs, kantu Silas ku Timótiu txiga, ‘Polu fika txeu okupadu sô na prega palavra’. (Atos 18:2-5) Polu nunka ka skese ma se obijetivu prinsipal na vida éra sirbi Jeová. Pamodi Polu da un bon izénplu di trabadja duru na pregason i na kuida di se nisisidadis, el konsigi nkoraja se irmons ku irmans. El lenbra-s pa es ka dexa prublémas na vida i preokupason ku sustenta família pô-s ta skese di ‘kuzê ki é más inportanti,’ ô skese di adora Jeová. — Fil. 1:10.

4. Modi ki Polu ku Timótiu djuda kes irmon lida ku pirsigison?

⁴ Lógu dipôs ki kongregason na Tesalónika formadu, kes novu irmons pasa pa txeu opozison. Kantu un grupu violéntu ka konsigi atxa Polu ku Silas, es rasta ‘alguns irmon ti kes autoridadi di sidadi’ ta grita: ‘Kes ómi li é kóntra lei di Séza’. (Atos 17:6, 7) Bu ta konsigi imajina modi ki kes novu irmon fika kantu es diskubri ma kes ómi di sidadi staba kóntra es? Es pode paraba di sirbi Jeová, má Polu ka kreba pa kel-la kontiseba. Nbóra el ku Silas tinha ki saíba di kel sidadi, es krê djobeba dretu ma tinha algun algen pa tomaba kónta di kel kongregason novu. Polu fla kes irmon di Tesalónika: ‘Nu manda nhos Timótiu, nos irmon, pa el konsola nhos i pa el da nhos forsa na nhos fé, asi pa ningen ka fika ku medu pamodi kes tribulason li.’ (1 Tes. 3:2, 3) Talvês Timótiu pasa pa pirsigison na Listra, ki éra kel sidadi ki el nase. El odja modi ki Polu nkoraja kes irmon di la. Dja ki Timótiu odja modi ki Jeová djuda-s, el da kes irmon ku irmans sertéza ma tudu ta fikaba dretu ku es tanbê. — Atos 14:8, 19-22; Heb. 12:2.

5. Modi ki un ansion djuda un irmon ki txoma Briant?

⁵ Di ki otu manera Polu nkoraja kes irmon? Na se sugundu viaji pa Listra, Ikóniu i Antiokia, Polu ku Barnabé ‘dizigina ansions pa es na kada kongregason’. (Atos 14:21-23) Nu ka ten dúvida ma kes ansion prova ma es éra un fonti di konsolu pa kongregason sima ansions di gósi. Odja kuzê ki un irmon ki txoma Briant fla: “Kantu N faze 15 anu, nha pai sai di kaza i nha mai dizasosiadu. N xinti bandonadu i dizanimadu.” Kuzê ki djuda Briant aguenta kel momentu difísil la? El fla: “Toni, ki é ansion, pâpia ku mi na runion i na otus momentu. El konta-m sobri kes algen ki pasa pa prublémas má simé es éra filís. El mostra-m testu di Salmo 27:10 i txeu bês el pâpia ku mi sobri Ezekias, ki sirbi Jeová di manera fiel sikrê se pai ka éra un bon izénplu pa el.” Modi ki ajuda ki Briant resebe djuda-l ka dizisti? Ku ajuda di Toni, Briant fla: “Ti ki enfin, N kumesa un trabadju ki ta da-m alegria, ki é ser pioneru.” Ansions, nhos sta sienti pa djuda kes irmon, ki sima Briant, pode meste ‘un palavra sábi’ di konsolu. — Pro. 12:25.

6. Modi ki Polu uza stória di vida di otus algen pa da se irmons ku irmans koraji?

⁶ Polu lenbra se irmons ma ku forsa di Jeová, un grandi ‘núven di tistimunhas’ aguenta difikuldadis. (Heb. 12:1) Polu sabia ma stória di vida di kes algen na pasadu ki pasa pa prublémas, má  simé es kontinua ku alegria, pode djudaba se irmons kontinua konsentradu na kel ‘sidadi di kel Deus bibu.’ (Heb. 12:22) Mésmu kuza ta kontise oji. Kenha ki ka ta xinti nkorajadu óras ki el ta lé sobri modi ki Jeová djuda Jidion, Baraki, Davidi, Samuel i otus algen? (Heb. 11:32-35) I kuzê ki nu pode fla di izénplu di kes ki ta mostra fé na nos ténpu? Sédi mundial ta resebe txeu karta di irmons ku irmans ki ses fé bira más fórti dipôs ki es lé stória di vida di kes sérvu fiel di Jeová di nos ténpu.

7. Kuzê ki bu prende ku konsedju di Polu ki sta na Romanos 14:19-21?

⁷ Nu ta djuda nos irmons ku irmans óras ki nu ta faze kuzas ki ta mante pas na kongregason. Nu ka debe dexa opinion di otus algen pô-nu ta afasta di kunpanheru. I nu ka debe insisti na nos opinion si ninhun prinsípiu di Bíblia ka sta nvolvidu. Nu ben odja un izénplu. Kongregason na Roma tinha irmons ki éra judeu i kes ki ka éra judeu. Kantu Lei di Muizés kabadu ku el, kes algen ki ta adoraba Jeová ka meste sigiba kes lei sobri ka kume alguns tipu di kumida. (Mar. 7:19) Di la pa dianti, alguns judeu xinti avontádi pa kume tudu tipu di kumida. Má otus ka xinti avontádi pa faze kel-li, pur isu kongregason fika divididu. Má, Polu mostra-s ma éra inportanti mante pas. El fla: ‘É midjór ka kume karni, nen bebe vinhu, nen faze nada ki ta poi bu irmon tropesa.’ (Lé Romanos 14:19-21.) Di kel manera li Polu djuda se irmons odja ma kel dizunion li ta prujudikaba kada un di es i kongregason interu. Tanbê, el staba dispostu na muda se manera di konporta pa el ka fazeba otus tropesa. (1 Cor. 9:19-22) Di mésmu manera, nu ta mante pas na kongregason si nu ka fika ta diskuti ku nos irmons sobri asuntus ki ka ta viola prinsípius di Bíblia.

8. Modi ki Polu reaji kantu un asuntu inportanti poi pas di kongregason na prigu?

⁸ Polu da un bon izénplu na mante pas ku kes algen ki es ka ta konkordaba na alguns asuntu inportanti. Pur izénplu, na primeru séklu alguns irmon na kongregason fika ta insisti ma kes irmon ki ka éra judeu meste sérba sirkunsidadu. Talvês es faze kel-la pa kes algen ki éra judeu ka kritikaba es. (Gál. 6:12) Polu ka konkorda ku kel-li. Má envês di insisti pa kuzas fazedu di se manera, ku umildadi el pidi ajuda di otus apóstlu i di ansions na Jiruzalen pa toma un disizon. (Atos 15:1, 2) Manera ki Polu lida ku kel situason li djuda irmons kontinua ta ten alegria i pas na kongregason. — Atos 15:30, 31.

9. Modi ki nu pode imita izénplu di Polu?

⁹ Si parse algun prubléma gravi na kongregason, nu ta mante pas óras ki nu ta sigi orientason di kes algen ki Jeová skodje pa kuida di kongregason. Txeu bês nu pode atxa orientasons ku bazi na Bíblia na nos publikasons ô na kes instruson ki organizason ta da-nu. Si nu sforsa pa sigi kes orientason li, envês di fika ta kria régras pa kuzas bai di manera ki nu krê, nu ta mante pas na kongregason.

10. Kuzê ki Polu faze pa mante pas na kongregason?

¹⁰ Polu ta manteba pas na kongregason  pamodi el ta konsentraba na kes bon kualidadis di se irmons ku irmans, envês di na ses fadjas. Pur izénplu, kantu ki Polu tirmina di skrebe kel karta pa romanus, el fla nómi di txeu irmon, i na txeu situason el ta ilojiaba es. Nu pode imita izénplu di Polu óras ki sénpri nu ta ilojia kes bon kualidadis ki nos irmons ku irmans ten. Óras ki nu ta faze asi, irmons na kongregason ta bira ses amizadi más fórti i es ta ten más amor pa kunpanheru.

11. Modi ki nu pode mante pas óras ki parse un prubléma?

¹¹ Alvês ti kes irmon maduru pode ka konkorda ku kunpanheru. É kel-li ki kontise ku Polu i ku se amigu Barnabé. Es tevi un grandi diskuson sobri si es ta lebaba Markus ô nau pa kel otu viaji ki es staba ta ba faze. ‘Es tevi un grandi diskuson’ i dipôs di kel-li es sipara. (Atos 15:37-39) Má dipôs Polu, Barnabé ku Markus faze pas ku kunpanheru, pamodi pa es, pas i union na kongregason éra kel kuza más inportanti. Dipôs Polu pâpia dretu di Markus ku Barnabé. (1 Cor. 9:6; Col. 4:10) Nos tanbê nu meste rezolve kalker prubléma ki nu ten ku nos irmons na kongregason i nu ta sforsa pa odja kes bon kualidadis ki es ten. Di kel manera li, nu ta mante pas i union na kongregason. — Efé. 4:3.

12. Kal ki é alguns prubléma ki nos irmons ku irmans ta pasa pa el?

¹² Nu ta nkoraja nos irmons ku irmans óras ki nu ta djuda-s ten un fé más fórti na Jeová. Alguns ta sufri pamodi ses família ki ka é Tistimunha di Jeová ô ses koléga di trabadju ô di skóla ta faze-s trósa. Otus tene un duénsa gravi ô es sta ta luta pa tenta skese un kuza ki algen faze-s i ki magua-s. I alguns sérvu di Jeová ki dja ten alguns anu ta sirbi-l, dja dura ta spéra pa fin ben. Tudu kes kuza li pode poi fé di un algen ki ta sirbi Deus na próva. Kes algen na kongregason na ténpu di apóstlus pasa pa prublémas sima kes-li. Kuzê ki Polu faze pa bira fé di se irmons ku irmans más fórti?

13. Modi ki Polu djuda kes ki fazedu trósa pamodi ses krénsas?

¹³ Polu uza Skrituras pa bira fé di se irmons ku irmans más fórti. Pur izénplu, alguns judeu ki bira kriston talvês ka sabia kuzê ki es ta flaba ses família ki ka éra kriston ki ta atxaba ma relijion di judeus éra más inportanti di ki sigi kes kuza ki Jizus inxina. Má karta ki Polu skrebe pa ebreus di sertéza da kes irmon txeu koraji. (Heb. 1:5, 6; 2:2, 3; 9:24, 25) Es pode uzaba kes kuza ki Polu fla-s pa sabe kuzê ki es ta flaba ses família ki ka éra kriston. Oji tanbê alguns di nos irmons ta fazedu trósa pamodi ses fé. Nu pode djuda-s sabe modi ki es ta uza nos publikasons, ki ten bazi na Bíblia, pa splika ses fé. I si jóvens ta fazedu trósa pamodi es ta kridita na kriason, nu pode djuda-s atxa más informason na kes bruxura A Vida Teve Um Criador? i A Origem da Vida — Cinco Perguntas Que Merecem Resposta pa mostra pamodi ki es ta kridita ma izisti un Kriador.

14. Sikrê Polu staba okupadu na prega i na inxina, kuzê ki el faze?

¹⁴ Polu nkoraja se irmons ku irmans pa mostra amor através di ‘bons óbra’. (Heb. 10:24) El djuda se irmons ku  irmans na kuzê ki el fla i na kuzê ki el faze. Pur izénplu, kantu irmons na Judea staba ta pasa fómi, Polu leba-s alguns kuza ki es staba ta meste. (Atos 11:27-30) Nbóra Polu staba okupadu ta prega i ta inxina, sénpri el ranja manera pa djuda kes ki staba ta pasa pa nisisidadi. (Gál. 2:10) Kantu el faze kel-li, el djuda se irmons kunfia ma Jeová staba ta kuida di es. Oji, óras ki nu ta tra di nos ténpu, nos inerjia i nos kapasidadi pa djuda kes irmon ki pasa pa un dizastri na naturéza, nu ta djuda-s bira ses fé más fórti. Tanbê nu pode djuda óras ki nu ta faze kontribuison pa trabadju ki ta fazedu na mundu interu. Si nu faze kes kuza li, nu ta djuda nos irmons ku irmans kunfia ma Jeová nunka ka ta bandona-s.

15-16. Modi ki nu pode djuda kes irmon ki tene un fé fraku?

¹⁵ Polu ka dizisti di kes ki staba ku fé fraku. El mostra konpaxon pa es i el pâpia ku es ku amor i di un manera puzitivu. (Heb. 6:9; 10:39) Pur izénplu, na kel karta ki el skrebe pa ebreus, txeu bês el uza palavra ‘nu’ i ‘nos,’ pa mostra ma el tanbê el tinha ki aplikaba kel konsedju ki el daba. (Heb. 2:1, 3) Sima Polu, nu ka debe dizisti di kes ki sta ku fé fraku. Nu debe sforsa pa mostra ma nu ta preokupa ku es di verdadi. Di kel manera li, nu ta mostra nos amor pa es. É bon nu lenbra ma óras ki nu ta pâpia di un manera kalmu i ku karinhu, nu pode djuda nos irmons mutu más txeu di ki kel ki nu ta imajina.

¹⁶ Polu da se irmons ku irmans sertéza ma Jeová sabia di tudu kes bons óbra ki es staba ta faze. (Heb. 10:32-34) Nu pode faze mésmu kuza óras ki nu ta djuda  nos irmons ki tene un fé fraku. Nu pode pidi-s pa es konta-nu modi ki es konxe verdadi ô insentiva-s pa es lenbra di un situason ki Jeová djuda-s. Tanbê nu pode uza kel oportunidadi li pa da-s sertéza ma Jeová nunka ka ta skese di amor ki es mostra pa el i ma nunka el ka ta bandona-s. (Heb. 6:10; 13:5, 6) Talvês kes konbérsu li pode nkoraja nos irmons i djuda-s kontinua ta sirbi Jeová.

17. Kuzê ki nu pode faze pa djuda nos irmons?

¹⁷ Sima ténpu ta ba ta pasa, un algen ki ta trabadja na konstruson ta midjora se manera di trabadja. Nos tanbê nu pode midjora nos manera di djuda nos irmons. Nu pode djuda nos irmons ten forsa pa nfrenta prublémas óras ki nu ta konta-s spiriénsia di kes algen ki konsigi vense kes prubléma ki es pasa pa el. Tanbê nu pode mante pas na kongregason óras ki nu ta pâpia dretu di otus algen i nu ta sforsa pa mante pas óras ki ta parse algun prubléma ki pode kaba ku union na kongregason. I nu debe sta prontu pa faze pas ku nos irmons óras ki nu ten algun prubléma. I nu pode kontinua ta djuda nos irmons bira ses fé más fórti óras ki nu ta pâpia ku es sobri alguns verdadi inportanti di Bíblia pa djuda-s na kel ki es meste i pa apoia-s óras ki ses fé sta fraku.

18. Kuzê ki bu debe sta disididu na faze?

¹⁸ Kes irmon ki ta trabadja na prujétus di konstruson di organizason ta fika kontenti. Tanbê nu pode fika kontenti óras ki nu ta djuda nos irmons ku irmans bira ses fé más fórti. Kes prédiu ki irmons ta faze, ka ta dura pa tudu ténpu. Má óras ki nu ta djuda nos irmons nu ta ten rezultadus ki ta dura pa tudu ténpu. Pur isu, nu debe sta disididu na ‘kontinua ta nkoraja i ta djuda kunpanheru’. — 1 Tes. 5:11.