1. Pamodi ki bu gosta di algen ki ta mostra paxénxa?

 NOS tudu nu gosta di algen ki ta mostra paxénxa. Pamodi? Nu ta ruspeta kes algen ki ta konsigi spera algun kuza sen fika xatiadu. Nu ta fika kontenti pamodi otus algen ta mostra paxénxa ku nos si nu faze algun kuza mariadu. I nu sta kontenti pamodi nos instrutor di Bíblia mostra paxénxa ku nos kantu nu staba ta tenta prende, seta ô sigi kuzê ki Bíblia ta inxina. I más inportanti, nu sta kontenti pamodi Jeová ta mostra paxénxa ku nos! — Rom. 2:4.

2. Na ki situasons pode ser difísil mostra paxénxa?

² Enbóra nu gosta di algen ki ta mostra paxénxa, alvês é ka fásil nu mostra paxénxa. Pur izénplu, pode ser difísil pa nu kontinua kalmu si nu sta ta spera na un fila ku txeu algen, prinsipalmenti si nu sta atrazadu. Nu pode xatia si otus algen irita-nu. I alvês, pode ser difísil kontinua ta spera pa Jeová kunpri se promésa di traze mundu novu. Bu ta gostaba di mostra más paxénxa? Na kel studu li, nu sta ben odja modi ki nu pode mostra paxénxa i pamodi ki el é txeu inportanti. Tanbê, nu ta ben odja kuzê ki pode djuda-nu ten más paxénxa.

3. Modi ki un algen ki ta mostra paxénxa ta reaji óras ki el provokadu?

³ Odja kuatu manera ki nu pode mostra paxénxa. Primeru, un algen ki ten paxénxa ka ta xatia faxi. El ta tenta kontinua kalmu i el ka ta trata otus algen di manera  duru óras ki el provokadu ô óras ki el sta preokupadu dimás. Kel manera di mostra paxénxa li, ta parse pa primeru bês na Bíblia óras ki el ta fla ma Jeová é ‘Deus di mizerikórdia i konpaxon, ki ten paxénxa i sta xeiu di amor lial i di verdadi’. — Êxo. 34:6.

4. Modi ki un algen ki ta mostra paxénxa ta reaji óras ki el ten ki spera?

⁴ Sugundu, un algen ki ta mostra paxénxa pode spera ku kalma. Si algun kuza sta dura más di kel ki el staba ta spera, un algen ki ta mostra paxénxa ta tenta ka xatia. (Mat. 18:26, 27) Ten txeu situason ki nu ta meste spera ku kalma. Pur izénplu, nu meste obi ku paxénxa óras ki un algen sta pâpia, sen korta-l konbérsu. (Jó 36:2) Tanbê, nu meste ten paxénxa óras ki nu ta djuda un studanti intende un verdadi di Bíblia ô kaba ku un ábitu mariadu.

5. Kal ki é otu manera di mostra paxénxa?

⁵ Tirseru, un algen ki ten paxénxa ka ta aji faxi i sen pensa. É klaru ki na alguns situason, nu meste aji faxi. Má, óras ki un algen ki ten paxénxa tene un trabadju inportanti pa faze, el ka ta kumesa ô tirmina di faze-l ku présa. Envês di kel-li, el ta djobe dretu si el tene ténpu pa faze planu di kuzê ki el sta ba faze. Dipôs, el ta tra kel ténpu ki meste pa kel trabadju fika dretu.

6. Modi ki un algen ki ten paxénxa ta reaji óras ki el sta pasa pa un prubléma?

⁶ Kuartu, un algen ki ten paxénxa ta sforsa pa aguenta un provason sen reklama. Na kel situason li, paxénxa ten aver ku aguenta firmi. É klaru ki é ka mariadu dizabafa ku un grandi amigu sobri modi ki nu sta xinti ku un provason. Má un algen ki ten paxénxa, ta faze se midjór pa kontinua ta aguenta firmi i ku un  atitudi puzitivu. (Kol. 1:11) Povu di Jeová meste mostra paxénxa di tudu kes manera li. Pamodi? Nu ben odja alguns motivu.

7. Sima sta na Tiagu 5:7, 8, pamodi ki ten paxénxa é txeu inportanti? (Odja dizenhus.)

⁷ Nu meste ten paxénxa pa nu pode salva. Sima kes sérvu fiel di pasadu, nu meste spera ku paxénxa pa Deus kunpri se promésas. (Ebr. 6:11, 12) Bíblia ta konpara nos situason ku di un agrikultor. (Lé Tiagu 5:7, 8.) Un agrikultor ta trabadja duru pa símia i pa rega se simentera, má el ka sabe ki ténpu ki el ta nase. Pur isu, un agrikultor ta spera ku paxénxa i ku kunfiansa ma el ta faze kodjéta. Di mésmu manera, nu ta sta okupadu ku atividadis spritual sikrê nu “ka sabe ki dia ki [nos] Sinhor ta ben.” (Mat. 24:42) Nu ta spera ku paxénxa i ku kunfiansa ma na se ténpu sértu Jeová ta ben kunpri tudu kel ki el promete. Si nu perde paxénxa, nu pode fika kansadu di spera i nu pode kumesa ta disvia di verdadi. Tanbê, nu pode kumesa ta kóre tras di kes kuza ki nu ta atxa ma ta pô-nu xinti filís gósi. Má, si nu ten paxénxa, nu pode aguenta firmi ti fin i salva. — Miq. 7:7; Mat. 24:13.

8. Modi ki ten paxénxa ta djuda-nu da dretu ku otus algen? (Kolosensis 3:12, 13)

⁸ Ten paxénxa ta djuda-nu da dretu ku otus algen. El ta djuda-nu obi otus ku atenson óras ki es sta pâpia. (Tia. 1:19) Ten paxénxa tanbê ta djuda-nu ten pas ku kunpanheru. Si nu mostra paxénxa sikrê óras ki nu sta preokupadu dimás, nu ka ta aji sen pensa i nu ka ta fla algun kuza ki ta mágua kel algen. I si nu ten paxénxa, nu ka ta xatia faxi óras ki algen ta magua-nu. Envês di trata-l di manera duru, nu ta “kontinua ta aguenta kunpanheru i sta sénpri prontu pa púrdua kunpanheru”. — Lé Kolosensis 3:12, 13.

9. Modi ki ten paxénxa pode djuda-nu óras ki nu ten ki toma un disizon? (Provérbios 21:5)

⁹ Paxénxa tanbê pode djuda-nu toma bons disizon. Envês di nu aji sen pensa, nu meste tra ténpu pa piskiza i analiza kuzê ki nu pode faze. (Lé Provérbios 21:5.) Pur izénplu, si nu sta ta djobe un trabadju, nu pode ten tendénsia di seta kel primeru ki parse, sikrê kel-li ka ta dexa-nu sisti alguns runion ô ta pô-nu ta sai más poku na pregason. Má si nu ten paxénxa, nu ta para pa pensa na undi ki é kel trabadju, kantu óra ki nu ta gasta na el i na modi ki el ta afeta nos família i nos amizadi ku Jeová. Si nu ten paxénxa, nu pode ivita toma un mau disizon.

10. Kuzê ki un sérvu di Jeová meste faze pa ten i kontinua ta mostra paxénxa?

¹⁰ Ora ta pidi más paxénxa. Paxénxa é un kualidadi ki ta faze párti di frutu di spritu santu. (Gál. 5:22, 23) Pur isu, nu pode ora ta pidi spritu santu i pidi Jeová pa djuda-nu dizenvolve kes kualidadi di frutu di spritu santu. Si nu sta ta pasa pa un situason ki ta poi nos paxénxa na próva, nu “kontinua ta pidi” pa spritu santu djuda-nu ten paxénxa. (Luk. 11:9, 13) Tanbê, nu pode pidi Jeová pa djuda-nu odja kuzas sima el ta odja. Dipôs di faze orason, nu meste faze nos midjór pa mostra paxénxa tudu  dia. Si nu kontinua ta ora ta pidi paxénxa i sforsa pa mostra-l, Jeová ta djuda-nu ten kel kualidadi li más txeu, sikrê antis nu ka tinha paxénxa.

11-12. Modi ki Jeová sta ta mostra paxénxa?

¹¹ Midita na kes izénplu di Bíblia. Bíblia ten txeu izénplu di algen ki mostra paxénxa. Óras ki nu ta midita na kes izénplu li, nu pode prende maneras di mostra paxénxa. Antis di nu pâpia di kes izénplu li, nu ben pâpia di kel midjór izénplu di paxénxa ki é di Jeová.

¹² Na jardin di Éden, Satanás kalúnia nómi di Jeová i el tenta poi Eva ku dúvida si Jeová é un governanti justu i ki ten amor. Envês di distrui Satanás kel óra, Jeová mostra paxénxa i ma el ta kontrola se kabésa, pamodi el sabia ma mesteba algun ténpu pa prova ma se manera di governa é kel midjór. I timenti el sta ta spera, el sta ta aguenta tudu kes kalúnia kóntra se nómi. Tanbê Jeová sta ta spera ku paxénxa, asi pa más algen pode ten oportunidadi di vive pa tudu ténpu. (2 Ped. 3:9, 15) Pur isu, milhons di algen bira ta konxe-l. Si nu konsentra na modi ki paxénxa di Jeová ta djuda-nu, pode ser más fásil pa nu spera pa kel ténpu ki el ta ben traze fin.

13. Modi ki Jizus imita paxénxa di se Pai di manera perfeitu? (Odja fotu.)

¹³ Jizus imita paxénxa di se Pai di manera perfeitu i el mostra kel kualidadi li kantu el staba na téra. Nen sénpri ka foi fásil pa el mostra paxénxa, prinsipalmenti ku kes instrutor di lei i kes farizeu ki éra finjidu. (Juan 8:25-27) Má sima se Pai, Jizus ka ta xatiaba faxi. El ka trata kes algen ki insulta-l ô ki provoka-l di  manera duru. (1 Ped. 2:23) Ku paxénxa, Jizus aguenta firmi kantu el pasa pa provasons sen reklama. É pamodi kel-li ki Bíblia ta fla pa nu “pensa ku kuidadu na kel ki aguenta txeu palavra duru di pekadoris”! (Ebr. 12:2, 3) Ku ajuda di Jeová, nos tanbê nu pode aguenta firmi ku paxénxa, kalker provason ki nu pode pasa el.

14. Kuzê ki nu pode prende ku paxénxa di Abraon? (Ebreus 6:15) (Odja fotu i dizenhu.)

¹⁴ Má i si kel ki nu staba ta spera sobri fin inda ka kunpri? Talvês dja dura ki nu sta ta spera pa fin ben. Nu pode ten medu ma fin ka ta atxa-nu ku vida. Kuzê ki pode djuda-nu kontinua ta spera ku paxénxa? Odja izénplu di Abraon. Kantu Abraon tinha 75 anu i el ka tinha fidju, Jeová promete-l: ‘N ta bira-u un nason grandi’. (Gén. 12:1-4) Abraon odja kel promésa li ta kunpri? El odja sô un párti. Dipôs ki Abraon pasa na riu Eufratis i dipôs di spera 25 anu, el odja Jeová ta faze un milagri i se fidju Izaki nase. I dipôs di spera más 60 anu, el odja se nétus, Izaú ku Jakó, ta nase. (Lé Ebreus 6:15.) Má Abraon nunka ka odja se disendentis ta bira un nason grandi i ta erda kel téra ki Deus prometeba. Kel ómi fiel li tinha un amizadi fórti ku se Kriador. (Tia. 2:23) I óras ki Abraon ben resusitadu, el ta ben fika txeu kontenti di sabe ma pamodi se fé i se paxénxa, tudu nason di téra abensuadu! (Gén. 22:18) Kuzê ki nu ta prende? Nu pode ka odja tudu promésa di Jeová ta kunpri gósi. Má si nu ten paxénxa sima Abraon, nu pode ten serteza ma Jeová ta rekonpensa-nu gósi i mutu más inda na kel  mundu novu ki el promete-nu. — Mar. 10:29, 30.

15. Kuzê ki nu pode analiza na nos studu pesoal?

¹⁵ Bíblia ten txeu otus izénplu di algen ki mostra paxénxa. (Tia. 5:10) Pamodi ki bu ka ta faze un prujétu di studu pa analiza kes izénplu li? b Pur izénplu, enbóra Davidi skodjedu pa bira rei di Israel kantu el éra jóven, el tevi ki spera txeu anu antis di el kumesa ta governa. Simion ku Ana adora Jeová di manera fiel timenti es staba ta spera kel Misías ki prometedu. (Luk. 2:25, 36-38) Óras ki bu ta studa kes stória li, tenta atxa respósta pa kes pergunta li: Kuzê ki djuda kel algen mostra paxénxa? Modi ki mostra paxénxa djuda-l? Modi ki N pode imita-l? Tanbê, lé sobri kes algen ki ka mostra paxénxa pode djuda-u. (1 Sam. 13:8-14) Pensa na kes pergunta li: ‘Kuzê ki talvês pô-s ta perde paxénxa? Ki rezultadus ki es tevi?’

16. Di ki maneras ki mostra paxénxa ta djuda-nu?

¹⁶ Pensa na modi ki mostra paxénxa ta djuda-nu. Óras ki nu ten paxénxa, nu ta ser más filís i más kalmu. Pur isu, paxénxa pode midjora nos saúdi. Óras ki nu ten paxénxa ku otus, nu ta ten bon amizadi ku es i nos kongregason ta bira más unidu. Si un algen irita-nu, paxénxa ta djuda-nu ivita pa kel situason ka piora. (Sal. 37:8, nóta di rodapé; Pro. 14:29) Má más inportanti inda, óras ki nu ten paxénxa, nu ta imita nos Pai na séu i nu ta bira nos amizadi ku el más fórti.

17. Kuzê ki nu debe sta disididu na faze?

¹⁷ Paxénxa é un kualidadi bunitu i el ta djuda nos tudu! Enbóra pode ka ser fásil pa nos mostra paxénxa sénpri, ku ajuda di Jeová nu pode kontinua ta dizenvolve kel kualidadi li. I timenti nu ta spera pa mundu novu, nu pode ten serteza ma ‘odjus di Jeová ta sta sienti na kes ki ten grandi ruspetu pa el, kes ki ta spera pa se amor lial’. (Sal. 33:18) Nos tudu nu debe sta disididu na kontinua ta bisti di paxénxa.