• “N xinti sima si nha maridu staba ta trai-m txeu bês.”

• “N xinti rabaxadu, feia i sen valor.”

• “N ka ta pode papiaba ku ningen sobri kel-li. N sufri kaladu.”

• “N xinti sima si Jeová ka sta preokupaba ku mi.”

Kes palavra li ta mostra ma un mudjer ta sufri txeu óras ki se maridu ta odja pornografia. I si maridu sta ta faze kel-li sukundidu, talvês duránti alguns mês ô alguns anu, se mudjer ta xinti ma el ka pode kunfia na el más. Un mudjer fla: “N ta fikaba ta pensa: ‘N ta xinti sima si N ka konxe nha maridu dretu. Kuzê más ki el sta ta sukundi di mi?’”

Kel artigu li fazedu ta pensa na un mudjer ki se maridu ta odja pornografia. a El ta pâpia di prinsípius di Bíblia ki pode konsola un mudjer ki sta na kel situason li. Kes prinsípiu li ta garanti-l ma Jeová ta ama-l, ma el krê apoia-l, djuda-l ten más pas i kontinua ku un amizadi fórti ku el. b

Enbóra bu ka ta pode kontrola tudu kuza ki bu maridu ta faze, ten alguns kuza ki bu pode faze pa xinti ménus dór i pa ten más pas. Odja alguns izénplu.

Ka bu atxa ma kulpa é di bo. Un mudjer pode xinti ma el é kulpadu pamodi se maridu ta odja pornografia. Alise c xinti ma se maridu ka ta atxaba ma el éra bunita. El ta perguntaba: ‘Pamodi ki nha maridu ta djobe pa otus mudjer envês di djobe pa mi?’ Alguns mudjer ta kulpa ses kabésa pa manera ki es ta reaji, pamodi es ta atxa ma es sta ta piora kel situason. Daniela fla: “N staba disgostadu i ku raiba. É sima si N staba ta kaba ku nos kazamentu.”

Si é si ki bu ta xinti, sabe ma Jeová ka ta kulpa-u pa kuzas ki bu maridu ta faze. Tiagu 1:14 ta fla: “Kada un ta provadu óras ki se própi dizeju ta atrai-l i ta ingoda-l.” (Rom. 14:12; Fil. 2:12) Envês di atxa ma kulpa é di  bo, Jeová ta da valor pa lialdadi ki bu ta mostra pa el. — 2 Cró. 16:9.

Otu kuza ki pode djuda-u é intende ma si bu maridu ta odja pornografia, kel-li ka krê fla ma bo é ka bunita ô ma bo é ka un bon mudjer. Spesialistas ta fla ma odja pornografia ta poi un algen ta ten dizejus seksual ki ninhun mudjer ka ta pode satisfaze.

Ka bu fika preokupadu dimás. Katarina fla ma el ta fikaba tudu óra ta pensa si se maridu staba ta odja pornografia ô nau. Fransiska fla: “N ta fika preokupadu dimás si N ka sabe na undi ki nha maridu sta. É si ki N ta fika duránti kel dia.” Otus mudjer fla ma es ta xinti vergónha óras ki es sta djuntu ku irmons ki pode sabe di prubléma di ses maridu. I ten otus ki fla ma es ta xinti es sô, pamodi es ta atxa ma ningen ka ta intende ses situason.

É normal xinti si. Má si bu fika tudu óra ta pensa na kes kuza li, bu ta fika más preokupadu inda. Envês di kel-li, tenta konsentra na bu amizadi ku Jeová. Faze kel-li ta djuda-u bira más fórti. — Sal. 62:2; Efé. 6:10.

Un kuza ki pode djuda-u, é lé i midita na stórias di Bíblia sobri mudjeris ki staba preokupadu dimás, má ki atxa konsolu kantu es faze orason pa Jeová. Nen sénpri Jeová ka kaba ku ses prubléma, má el da-s pas. Pur izénplu, Ana staba ‘disgostadu dimás’ pamodi se situason. Má, dipôs ki el ‘faze un orason kunpridu pa Jeová’, el xinti pas enbóra el ka sabia kuzê ki ta ben kontiseba na futuru. — 1 Sam. 1:10, 12, 18; 2 Kor. 1:3, 4.

Pidi ansions na kongregason pa djuda-u. Es pode ser ‘sima un lugar pa sukundi di béntu’ i ‘sima un lugar pa sukundi di tenporal’. (Isa. 32:2, nótas di rodapé.) Talvês ti es pode da-u sujiston di un irman ki bu pode dizabafa ku el i ki pode konsola-u. — Pro. 17:17.

Bu pode konsigi djuda bu maridu ki sta ta luta kóntra ábitu di odja pornografia? Talvês sin. Bíblia ta fla ma pa rezolve un prubléma ô pa vense un inimigu poderozu ‘dôs é midjór ki un’. (Ecl. 4:9-12) Piskizas ta mostra ma óras ki maridu ku mudjer ta  trabadja djuntu pa vense vísiu di odja pornografia i rekupera kunfiansa na ses kazamentu, normalmenti es ta ten bons rezultadu.

É klaru ki kel-li ta dipende txeu si bu maridu krê sforsa pa para di odja pornografia. El pidi Jeová pa da-l forsa i el djobe ajuda na ansions? (2 Kor. 4:7; Tia. 5:14, 15) El ten un planu ki ta djuda-l ivita odja pornografia? Pur izénplu, el ta poi limiti na se aparelhus eletróniku i el ta ivita situasons ki pode pô-l ta kai na tentason? (Pro. 27:12) El krê seta bu ajuda i el é sinseru di korason ku bo? Nton, talvês bu ta konsigi djuda-l.

Di ki manera? Odja un izénplu. Elton, ki é maridu di Filísia, tinha vísiu di odja pornografia désdi mininu. Filísia ta dexa Elton avontádi pa pâpia ku el óras ki el xinti gana di odja pornografia. Elton fla: “N ta pâpia ku nha mudjer ku sinseridadi i di korason. Ku amor, el ta djuda-m ivita tentason i sénpri el ta pergunta-m modi ki nha situason sta. Tanbê, el ta djuda-m kontrola modi ki N ta uza internet.” É klaru ki ka é fásil pa Filísia odja se maridu ta luta kóntra vísiu di odja pornografia. Filísia fla: “Fika xatiadu i maguadu ka ta djuda nha maridu kontinua ta luta kóntra kel vísiu li. Tudu bês ki nu ta pâpia sobri kel prubléma li, N ta odja ma Elton ta sforsa pa vense se vísiu, pamodi el ka ta krê odja-m tristi.”

Pâpia ku sinseridadi sobri kel prubléma li, pode djuda maridu kontinua ta luta kóntra vísiu di odja pornografia i tanbê djuda se mudjer kunfia na el otu bês. Óras ki un maridu fla se mudjer sobri se prubléma i kuzas ki el ta faze na dia-dia, ta fika más fásil pa se mudjer kunfia na el pamodi el ka ta sukundi-l nada.

Bu ta atxa ma bu pode djuda bu maridu? Nton, pamodi ki nhos ka ta lé kel artigu li djuntu i pâpia sobri el? Obijetivu di maridu ta ser para di odja pornografia i da-u un motivu pa bu kunfia na el. Envês di fika xatiadu ku bo pamodi bu krê pâpia sobri kel prubléma li, el debe tenta intende modi ki kel prubléma li ta pô-u ta xinti. Bu obijetivu debe ser djuda bu maridu na sforsu ki el ta faze pa kaba ku kel ábitu li i da-l oportunidadi di rekupera bu kunfiansa. Nhos tudu dôs, nhos meste prende kuzê ki ta poi un algen ta krê odja pornografia i modi ki kel algen pode vense kel prubléma li. d

 Si bu ten medu ma pâpia ku bu maridu pode poi nhos ta diskuti, talvês nhos pode pidi un ansion di nhos kunfiansa pa sta la óras ki nhos ta pâpia. Lenbra ma sikrê dipôs ki un maridu ô mudjer dja vense vísiu di odja pornografia, pode leba algun ténpu pa ganha kunfiansa di kunpanheru otu bês. Ka bu dizisti. Odja kes kuza pikinoti ki midjora na nhos kazamentu. Ten speransa ma ku ténpu i paxénxa, nhos kazamentu pode bira fórti otu bês. — Ecl. 7:8; 1 Kor. 13:4.

Si bu maridu ten un rekaída, kel-li ka krê fla ma el ka rapende ô ma se situason ka ten speransa. Si el sta visiadu na odja pornografia, kel-li é un prubléma ki talvês el ten ki lida ku el pa réstu di se vida. El pode ten un rekaída sikrê dipôs di alguns anu sen odja pornografia. El meste toma medidas más fórti i talvês kontinua ku kes medida sikrê ta parse ma kel prubléma dja pasa. (Pro. 28:14; Mat. 5:29; 1 Kor. 10:12) El meste bira se “manera di pensa más novu” i prende “ôdia kel ki é mau”. Kel-li ta inklui pornografia i otus kuza inpuru, sima masturbason. (Efé. 4:23; Sal. 97:10; Rom. 12:9) El krê faze kel sforsu li? Nton, se situason pode ten speransa. e

Má, i si bu maridu ka krê para di odja pornografia? É normal bu xinti dizanimadu, ku raiba i traídu. Dexa kel asuntu na mô di Jeová i asi bu ta xinti pas. (1 Ped. 5:7) Kontinua ta studa, ta ora i ta midita pa bu amizadi ku Jeová bira más fórti. Si bu faze kel-li, ten serteza ma Jeová ta bira más bu amigu. Sima Isaías 57:15 ta fla, el ta mora djuntu ku kes ki sta ‘maltratadu i umildi,’ pa anima ses spritu. Tenta sirbi Jeová di midjór manera ki bu ta pode. Djobe ajuda di ansions. I kontinua ku speransa ma na futuru bu maridu pode faze un mudansa di korason. — Rom. 2:4; 2 Ped. 3:9.