STUDU 31
KÁNTIKU 12 Nos Deus Jeová é grandi
Kuzê ki Jeová dja faze pa salva-nu di pekadu i di mórti
“Deus ama mundu di tal manera ki el da se úniku Fidju”. — JUAN 3:16.
ASUNTU PRINSIPAL
Nu sta ben odja modi ki Jeová ta djuda-nu luta kóntra pekadu i sirbi-l. Tanbê nu sta ben odja modi ki Jeová mostra se mizerikórdia kantu el ranja manera pa nu vive pa tudu ténpu sen pekadu.
1-2. (a) Kuzê ki é pekadu i kuzê ki nu pode faze pa nu luta kóntra el? (Odja “Más splikason”.) (b) Kuzê ki nu sta ben odja na kel studu li i na kes otu studu ki sta na kel Sentinéla li? (Odja “Un nóta pa leitor” na kel revista li.)
BU TA gostaba di sabe ti ki pontu Jeová Deus ta ama-u? Bu pode atxa respósta óras ki bu prende sobri kuzê ki dja el faze pa libra-u di pekadu ku mórti. Pekadu a é un inimigu kruel ki nu ka ta konsigi luta ku el nos sô. Nos tudu nu ta peka tudu dia i nu ta móre pamodi pekadu. (Rom. 5:12) Má ten un notísia sábi! Ku ajuda di Jeová nu ta ben vense pekadu. I nu ten serteza ma nos vitória é sértu!
2 Dja ten uns 6 mil anu ki Jeová sta ta djuda pesoas luta kóntra pekadu. Pamodi? Pamodi el ta ama-nu. Jeová ama-nu désdi kantu el faze-nu. Pamodi el ta ama-nu txeu, el da-nu txeu kuza pa djuda-nu óras ki nu peka. Deus sabe ma nu ta móre pamodi pekadu. Má, el ka krê pa nu móre. El krê pa nu vive pa tudu ténpu. (Rom. 6:23) É kel-li ki Jeová krê pa bo. Na kel artigu li nu sta ben pâpia sobri três pergunta: (1) Ki speransa Jeová da-nu? (2) Modi ki kes algen ki vive na ténpu ki Bíblia skrebedu ganha aprovason di Deus? (3) Kuzê ki Jizus faze pa salva-nu di pekadu ku mórti?
KI SPERANSA JEOVÁ DA-NU?
3. Kuzê ki poi Adon ku Eva ta peka?
3 Kantu Jeová faze kel primeru ómi i kel primeru mudjer, el krê pa es sérba filís. El da-s un lugar bunitu pa es mora i un diziginason rei di sábi. Tanbê, el uni-s na kazamentu ki ta daba es txeu filisidadi. Es tinha ki ten fidju pa intxiba téra i biraba téra interu na un paraízu, sima jardin di Éden. El da-s sô un órdi sinplis i el fla-s ma si es ka obiba ku kel órdi es ta moreba. Nu sabe kuzê ki kontise. Un anju mau, ki ka ta ama Deus, nen pesoas, poi Adon ku Eva ta dizobidese Deus. Adon ku Eva faze kel ki Satanás, kel anju mau, kreba. Es ka kunfia na ses Pai ki mostra-s txeu amor. Envês di obi ku el, es peka. Nu sabe ma kontise ku es sima Jeová dja flaba. Pamodi Adon ku Eva ka obi, es sufri pa réstu di ses vida. Es bira bédju, es duense i dipôs es móre. — Jén. 1:28, 29; 2:8, 9, 16-18; 3:1-6, 17-19, 24; 5:5.
4. Pamodi ki Jeová ta ôdia pekadu? (Romanus 8:20, 21)
4 Jeová poi kel stória tristi li na Bíblia pa djuda-nu intende un kuza inportanti. El ta djuda-nu intende pamodi ki el ta ôdia pekadu. Pekadu sipara-nu di nos Pai i pamodi kel-li nu ta móre. (Isa. 59:2) Satanás ta ôdia Jeová i pesoas. É pur isu ki el poi Adon ku Eva ta peka i el sta kontinua ta poi pesoas ta peka oji. Nton kantu Adon ku Eva peka, Satanás talvês pensa ma el straga vontadi ki Jeová tinha pa pesoas na komésu, na jardin di Éden. Má el ka intende kel grandi amor ki Jeová ten pa nos. Jeová nunka ka muda se vontadi pa kes fidju di Adon ku Eva. Pamodi el ta ama-nu txeu, lógu el ranja un speransa pa nos. (Lé Romanus 8:20, 21.) Jeová sabia ma alguns di kes fidju di Adon ku Eva ta skodje amaba el i obiba ku el. I dja ki el é ses Pai i Kriador, el ta ranjaba un manera pa libraba es di pekadu i pa es biraba se amigu. Kuzê ki Jeová faze pa kel-li kontiseba?
5. Ki ténpu Jeová kumesa ta da-nu speransa? Splika. (Jénezis 3:15)
5 Lé Jénezis 3:15. Jeová fla kuzê ki ta ben kontiseba ku Satanás. Deus dja flaba ma ta ben tinha un “disendenti” ki ta ben salvaba nos. Kel disendenti ta ben distruíba Satanás, i el ta ben kababa ku tudu kes prubléma ki Satanás kria na jardin di Éden. (1 Juan 3:8) Má primeru Satanás ta ben friba kel disendenti i el ta poba el ta móre. Kel-li ta poba Jeová txeu tristi. Má Jeová staba dispostu na sufri i dexaba pa kel “disendenti” sufreba, asi pa el ben salvaba un monti di algen di pekadu ku mórti.
MODI KI PESOAS INPERFEITU NA TÉNPU KI BÍBLIA SKREBEDU GANHA APROVASON DI JEOVÁ?
6. Kuzê ki Abel, Nué i otus algen fiel faze pa bira amigu di Jeová?
6 Sima anus ba ta pasa, poku-poku Jeová mostra kada bês más klaru modi ki nu pode biraba se amigu. Abel, ki é kel sugundu fidju di Adon ku Eva, foi kel primeru algen ki poi fé na Jeová dipôs ki kontise kes kuza na jardin di Éden. Pamodi Abel ta amaba Jeová i el krê agradaba el i biraba se amigu, el oferese-l un sakrifisiu. Dja ki Abel éra pastor, el traze alguns di se ovelhas, i el oferese-s pa Jeová. Modi ki Jeová reaji? El “fika kontenti ku Abel i ku se oférta”. (Jén. 4:4) Jeová tanbê fika kontenti ku otus sakrifisiu sima kel-li ki otus algen sima Nué oferese-l, pamodi es ta amaba el i es ta kunfiaba na el. (Jén. 8:20, 21) Kantu ki Jeová seta kes sakrifisiu li, el mostra ma sikrê nos é pekador, nu pode ganha se aprovason i bira se amigu. b
7. Abraon staba dispostu na sakrifikaba se própi fidju. Kuzê ki nu ta prende ku kel-li?
7 Abraon tinha un fé fórti na Jeová. Jeová pidi-l pa el faze un kuza txeu difísil. El fla Abraon pa ofereseba se fidju Izaki, pa sérba un sakrifisiu. Di serteza kel-li foi kuza más difísil ki Abraon pode imajinaba faze. Má el obi ku Jeová. Kantu Abraon staba kuazi ta mataba se fidju, Deus ka dexa-l faze kel-li. Jeová sabia ma Abraon ta xintiba txeu dór si el mataba se própi fidju. Kel izénplu li ta inxina un verdadi inportanti pa tudu algen ki ten fé. El ta inxina-nu ma Jeová ta ben staba dispostu na ofereseba se própi Fidju ki el ta ama pa sérba un sakrifisiu. Jeová ta ama-nu txeu dimás! — Jén. 22:1-18.
8. Kuzê ki nu ta prende ku kes sakrifisiu di animal ki Lei ta mandaba israelitas pa faze? (Levítico 4:27-29; 17:11)
8 Txeu ténpu dipôs, kel Lei ki Jeová daba israelitas ta flaba pa es oferese sakrifisiu di animal pa ses pekadu pode ser purduadu. (Lé Levítico 4:27-29; 17:11.) Kes sakrifisiu li mostra ma Jeová ta ben ranja un sakrifisiu midjór ki ta libraba nos di tudu pekadu. Jeová fla se profétas pa skrebe sobri kel disendenti ki staba pa ben. El splika ma un Fidju spesial di Deus ta ben sufreba i moreba. El ta ben sérba sima un ovelha ki matadu pa un sakrifisiu. (Isa. 53:1-12) Nton Jeová promete ma el ta ben ofereseba se Fidju ki el ta ama pa ser un sakrifisiu pa ben salva tudu algen di pekadu ku mórti. Kel-li é un kuza sábi dimás ki el faze pa nos, i el faze kel-li pa bo tanbê!
KUZÊ KI JIZUS FAZE PA SALVA-NU DI PEKADU?
9. Kuzê ki Juan Batista fla sobri Jizus? (Ebreus 9:22; 10:1-4, 12)
9 Na anu 29, Juan Batista odja Jizus di Nazaré i el fla: “Nhos odja Korderu di Deus ki ta tra pekadu di mundu!” (Juan 1:29) Kes palavra li mostra ma Jizus éra kel disendenti spesial ki Deus prometeba ma ta binha. Jizus ta ba sakrifikaba se vida. Kel-li é un kuza ki ta trazeba speransa pa tudu algen. El da-nu speransa ma nu ta konsigi vense pekadu pa tudu ténpu. — Lé Ebreus 9:22; 10:1-4, 12.
10. Modi ki Jizus mostra ma el “ben txoma” kes pekador?
10 Jizus konsentra na djuda kes algen ki ta xintiba tristi pamodi ses pekadu. El konvida-s pa bira se disiplus. El sabia ma kel razon prinsipal ki ta pô-nu ta sufri é pekadu. Pur isu, el ta djudaba prinsipalmenti kes algen ki es ta txomaba di pekador. Através di un ilustrason el splika: “Kes algen ki tene saúdi ka meste dotor, má é kes duenti ki meste.” Tanbê el fla: “N ka ben txoma kes algen justu, má kes pekador.” (Mat. 9:12, 13) Jizus vive di akordu ku kes palavra li. Kantu un mudjer laba pé di Jizus ku se láguas el pâpia ku el ku bondadi i el púrdua se pekadus. (Luk. 7:37-50) Jizus inxina kel mudjer samaritana un verdadi inportanti, sikrê el sabia ma el staba ta vive ku un ómi ki ka éra se maridu. (Juan 4:7, 17-19, 25, 26) Deus ti da Jizus puder pa kaba ku mórti ki é rezultadu di pekadu. Modi? Jizus resusita ómis, mudjeris i mininus. — Mat. 11:5.
11. Pamodi ki kes algen ki ta fazeba kuzas mariadu ta xintiba avontádi ku Jizus?
11 Nu ta konsigi intende pamodi ki pesoas ki fazeba kuzas mariadu ta xintiba avontádi ku Jizus. El ta intendeba kuzê ki es pasa pa el i el ta trataba es ku bondadi. Es ka tinha medu di pâpia ku Jizus. (Luk. 15:1, 2) I Jizus ilojia i el rekonpensa alguns di es pamodi ses fé. (Luk. 19:1-10) Jizus mostra mizerikórdia sima se Pai. (Juan 14:9) Pa manera ki Jizus pâpia ku pesoas i el trata-s nu ta prende ma Jeová ten mizerikórdia di nos pamodi nos é inperfeitu, el ta ama-nu i el krê djuda-nu. Jizus djuda pesoas inperfeitu ten dizeju di muda ses vida i sigi-l. — Luk. 5:27, 28.
12. Kuzê ki Jizus fla sobri se mórti?
12 Jizus sabia kuzê ki staba ta ba kontise ku el. Más di ki un bês el fla se disiplus ma el ta ba sérba traídu i ma es ta ba mataba el na un staka. (Mat. 17:22; 20:18, 19) El sabia ma se sakrifisiu ta traba pekadu di mundu sima Juan i kes otu proféta dja flaba. Jizus fla tanbê ma dipôs ki el móre el ta ben ‘atraiba pa el tudu tipu di algen.’ (Juan 12:32) Pesoas inperfeitu ta pode agradaba Jeová óras ki es ta poba fé na Jizus i es obiba ku se mandamentus. Si es fazeba kel-li es ta ben sérba “libertadu di pekadu”. (Rom. 6:14, 18, 22; Juan 8:32) Pur isu, Jizus mostra koraji i el staba dispostu na sufri i na móre pa el pode salva-nu. — Juan 10:17, 18.
13. Modi ki Jizus móre i kuzê ki se mórti ta inxina-nu sobri Jeová Deus? (Odja dizenhus.)
13 Jizus traídu, el prendedu, el insultadu i akuzadu, el kondenadu i ti mésmu el torturadu. Dipôs trópas prega-l na un staka pa el móre. Timenti el staba ta aguenta tudu kel dór di manera fiel tinha un otu algen ki staba ta xinti más dór inda. Kel algen li éra Jeová Deus. Jeová tinha puder i kapasidadi di ka dexaba se Fidju sufreba, má el ka faze kel-la. Pamodi? Kuzê ki poi un Pai, ki ten txeu amor, ta aji di kel manera li? É pamodi Jeová ta ama-nu. Jizus fla: “Deus ama mundu di tal manera ki el da se úniku Fidju, asi pa tudu kel ki mostra fé na el ka ser distruídu, má pa ten vida pa tudu ténpu.” — Juan 3:16.
Jeová sufri txeu kantu el dexa se Fidju matadu, asi pa nu pode fikaba livri di pekadu ku mórti. (Odja parágrafu 13.)
14. Kuzê ki nu ta prende ku sakrifisiu di Jizus?
14 Sakrifisiu di mórti di Jizus é un di kes próva más grandi di amor di Jeová pa kes fidju Adon ku Eva. El ta prova má Jeová ta ama-nu txeu dimás. El da-nu se midjór i el aguenta txeu tristéza pa el pode salva-nu di pekadu ku mórti. (1 Juan 4:9, 10) El krê djuda kada un di nos luta kóntra pekadu i pa nu ganha!
15. Kuzê ki nu meste faze pa nu tra pruvetu di sakrifisiu di Jizus?
15 Pamodi kel prezenti ki Deus da-nu, ki é sakrifisiu di se úniku Fidju, nu ta purduadu di nos pekadu. Má pa nu resebe perdon di Deus, nu ten ki faze algun kuza. Kuzê ki nu debe faze? Juan Batista i tanbê Jizus Kristu da-nu respósta: “Nhos rapende, pamodi Reinu di séu sta kuazi ta txiga.” (Mat. 3:1, 2; 4:17) Pur isu, nu meste rapende di nos pekadu si nu krê bira amigu di Jeová i ten se perdon. Má, kuzê ki rapende krê fla i modi ki el ta djuda-nu agrada Jeová sikrê nu sabe ma nos é pekador? Nu ta ben odja respósta na kel otu studu.
KÁNTIKU 18 Obrigadu pa resgati
a MÁS SPLIKASON: Na Bíblia, palavra “pekadu” pode krê fla óras ki nu faze algun kuza ki Jeová ta fla ma é mariadu ô óras ki nu ka ta faze un kuza ki Jeová ta fla ma é dretu. Má palavra “pekadu” alvês pode krê fla inperfeison ô pekadu ki tudu algen erda di Adon. I pamodi nu erda pekadu nu ta móre.
