STUDU 33
KÁNTIKU 130 Nu púrdua kunpanheru
Modi ki Jeová krê pa kongregason trata kes algen ki faze un pekadu gravi
“Si un algen faze un pekadu, nu ten un algen... ki ta djuda-nu”. — 1 JUAN 2:1.
ASUNTU PRINSIPAL
Kuzê ki nu ta prende ku manera ki kongregason na Korintu trata un ómi ki faze un pekadu gravi.
1. Ki disizon Jeová krê pa tudu algen toma?
JEOVÁ kria-nu ku liberdadi pa nu skodje. Bu ta uza kel prezenti li óras ki bu ta toma disizons. Kel disizon más inportanti ki un algen pode toma é da se vida pa Jeová i bira párti di se família ki ta adora-l. Jeová krê pa tudu algen faze kel-li. Pamodi? Pamodi el ta ama pesoas i el krê kel ki é midjór pa es. El krê pa es ser se amigu i pa es vive pa tudu ténpu. — Deut. 30:19, 20; Gál. 6:7, 8.
2. Kuzê ki Jeová krê pa kes algen ki inda ka rapende faze? (1 Juan 2:1)
2 Má, Jeová ka ta obriga ningen sirbi-l. El ta dexa kada algen disidi kuzê ki es ta faze. Má, i si un sérvu di Jeová batizadu faze un pekadu gravi? Si el ka rapende, el debe tradu di kongregason. (1 Kor. 5:13) Má simé, Jeová krê pa kel algen ki peka volta pa el. Na verdadi, un di kes motivu inportanti ki poi Jeová ta da-nu resgati é pamodi el krê púrdua pekadu di kes ki rapende. (Lé 1 Juan 2:1.) Nos Deus ki ta ama-nu txeu, ta pidi kes algen ki peka pa es rapende. — Zac. 1:3; Rom. 2:4; Tia. 4:8.
3. Kuzê ki nu sta ben odja na kel studu li?
3 Jeová krê pa nu pensa sima el sobri pekadu i sobri kes algen ki faze un pekadu gravi. Na kel studu li, nu sta ben odja (1) modi ki kongregason na Korintu lida ku un irmon ki faze un pekadu gravi, (2) kuzê ki Paulu fla kongregason pa faze dipôs ki kel irmon rapende, i (3) kuzê ki Jeová ta xinti pa kes algen na kongregason ki faze un pekadu gravi.
MODI KI KONGREGASON LIDA KU UN IRMON KI FAZE UN PEKADU GRAVI
4. Kuzê ki staba ta kontise na kongregason di Korintu? (1 Koríntius 5:1, 2)
4 Lé 1 Koríntius 5:1, 2. Timenti Paulu staba na se tirseru viajen misionáriu, el obi sobri un kuza orível ki staba ta kontise na kongregason na Korintu, ki éra un kongregason novu. Un irmon na kel kongregason staba ta faze konportamentu seksual mariadu ku se madrasta. Kel konportamentu li éra un kuza gravi ki ‘nen na kes otu nason ka ta kontiseba’! Kongregason ka staba sô ta seta se konportamentu, má tanbê ta parse ma es staba kontenti ku el. Talvês alguns algen na kongregason pensa ma es staba ta imita Jeová na mostra mizerikórdia pa un pekador. Má Jeová ka ta seta konportamentu mariadu na meiu di se povu. Pamodi konportamentu mariadu di kel ómi, talvês alguns algen ki ka ta adoraba Jeová fika spantadu i fla kuzas mariadu sobri Jeová i se povu. I si el kontinuaba na kongregason talvês otus kriston pode imitaba se konportamentu mariadu. Nton, kuzê ki Paulu fla kongregason pa faze?
5. Kuzê ki Paulu fla kongregason pa faze, i kuzê ki kel-li krê flaba? (1 Koríntius 5:13) (Odja imajen.)
5 Lé 1 Koríntius 5:13. Jeová poi Paulu ta skrebe pa kongregason i ta splika ma un algen ki faze un pekadu gravi i ki ka rapende debe tradu di kongregason. Modi ki kes kriston na kongregason debe trataba el? Paulu fla pa es “para di konvive” ku el. Kuzê ki kel-li krê flaba? Paulu splika kuzê ki kel-li ta involveba. El fla: “Nen nhos ka debe kume djuntu ku kel algen.” (1 Kor. 5:11) Óras ki nu ta xinta pa kume ku un algen, kel-li ta pô-nu ta pasa más ténpu djuntu ku el. Ta fika klaru, ma Paulu staba ta fla kongregason ma es ka debe pasaba ténpu djuntu ku kel ómi. Kel-li ta ba protejeba kongregason di mau influénsia. (1 Kor. 5:5-7) Tanbê, óras ki es dexa di pasaba ténpu ku kel ómi, kel-la ta poba el ta odja ma el staba lonji di kaminhu di Jeová. Dipôs el pode xintiba vergónha i rapende di se pekadu.
Jeová poi Paulu ta skrebe un karta pa kongregason ta fla ma kel ómi ki peka i ka rapende debe tradu di kongregason (Odja parágrafu 5.)
6. Modi ki kongregason reaji kantu es resebe kel karta di Paulu, i kuzê ki kel ómi ki staba ta peka faze?
6 Dipôs ki Paulu manda se karta pa kristons na Korintu, el fika ta pensa modi ki kongregason ta reajiba. Titu fla Paulu un kuza ki dexa-l txeu kontenti. Irmons na kongregason resebe dretu kel karta di Paulu. (2 Kor. 7:6, 7) Es sigi kes instruson. Tanbê, poku ténpu dipôs ki Paulu manda kel primeru karta, kel ómi rapende di se pekadu! Dja el mudaba se konportamentu i atitudi i el kumesa ta sigi kes lei justu di Jeová. (2 Kor. 7:8-11) Kuzê ki Paulu fla kongregason pa faze dipôs?
MODI KI KONGREGASON DEBE TRATABA KEL ÓMI KI RAPENDE
7. Modi ki kel ómi reaji dipôs ki el tradu di kongregason? (2 Koríntius 2:5-8)
7 Lé 2 Koríntius 2:5-8. Paulu fla: “Kel disiplina ki maioria di nhos dja da es ómi dja txiga-l.” Kel-li krê flaba ma kel ómi dja rapendeba, nton kongregason ka meste kontinuaba ta disiplina-l. — Ebr. 12:11.
8. Kuzê ki Paulu fla irmons na kongregason pa faze dipôs?
8 Paulu fla irmons na kongregason ma es debe mostraba bondadi i púrdua kel irmon ki peka pa es provaba ma es ta amaba el. Repara ma Paulu kreba pa kongregason fazeba más di ki sô dexaba kel ómi voltaba pa povu di Jeová. Paulu kreba pa irmons na kongregason mostraba pa kel ki es ta flaba i pa kel ki es ta fazeba, ma dja es purduaba kel irmon i ma es ta amaba el. Asi, kel irmon pode tinha serteza ma es staba kontenti pamodi el volta pa kongregason.
9. Pamodi ki talvês foi difísil pa alguns algen na kongregason púrdua kel irmon ki rapende?
9 Talvês foi difísil pa alguns algen mostra bondadi pa kel ómi kantu el volta pa kongregason. Pamodi ki nu pode fla kel-li? Alguns algen pode staba xatiadu pamodi el kria alguns prubléma na kongregason. I otus, inda pode staba tristi pamodi el magua-s. Irmons na kongregason ta sforsaba txeu pa obiba ku leis di Jeová. Pur isu, pode ser ki alguns xinti ma éra injustu pa un algen ki fazeba un pekadu gravi si, setadu otu bês na kongregason. (Konpara ku Lukas 15:28-30.) Má, pamodi ki éra inportanti pa irmons na kongregason mostraba amor pa kel irmon ki rapende?
10-11. Kuzê ki pode kontiseba si ansions ka purduaba kel ómi ki rapende?
10 Imajina kuzê ki pode kontiseba si ansions ka dexaba kel ómi ki rapende voltaba pa kongregason, ô si dipôs ki el voltaba irmons na kongregason ka mostraba el amor. Paulu fla ma “tristéza dimás” pode kababa ku kel ómi. El pode xintiba ma nunka más el ka ta konsigi sirbiba Jeová. El pode ti pensaba ma Jeová nunka ka ta purduaba el. El pode ti dizistiba di sforsa pa midjoraba se amizadi ku Jeová.
11 Kuzê más, ki pode kontiseba si irmons ku irmans ka purduaba kel ómi ki rapende? Es pode prujudikaba ses amizadi ku Jeová. Pamodi? Pamodi, es ka sta imitaba Jeová ki ta púrdua kes algen ki ta rapende. Envês di kel-li, es ta imitaba Satanás ki é mau i ki ka ten mizerikórdia. Es ta ba dexaba Satanás uza-s pa es poba kel ómi ta para di sirbi Jeová. — 2 Kor. 2:10, 11; Efé. 4:27.
12. Modi ki kongregason pode imitaba Jeová?
12 Modi ki kongregason na Korintu pode imitaba Jeová envês di imitaba Satanás? Es ta fazeba kel-li si es purduaba kes algen ki rapende sima Jeová ta púrdua. Repara kuzê ki alguns skritor di Bíblia fla sobri Jeová. Davidi fla: El é ‘bon i el sta sénpri prontu pa púrdua’. (Sal. 86:5) Mikeias skrebe: ‘Ken ki é Deus sima bo, ki ta púrdua éru i ta dexa pasa fadja?’ (Miq. 7:18) I Izaías tanbê fla: ‘Pa kes mau dexa ses kaminhu, i pa kes ki ta faze kuzas mariadu dexa ses pensamentu; pa es volta pa Jeová, ki ta ten mizerikórdia di es, pa nos Deus, pamodi el ta púrdua txeu.’ — Isa. 55:7.
13. Pamodi ki es debe setaba kel ómi ki rapende na kongregason? (Odja kuadru “ Ki ténpu ki kel ómi na kongregason di Korintu readimitidu?”.)
13 Pa imitaba Jeová, kongregason na Korintu tinha ki resebeba kel ómi otu bês i mostraba el amor. Óras ki es sigiba kel konsedju di Paulu di resebeba kel ómi ki rapende, kongregason staba ta mostra ma es é “obidienti na tudu kuza.” (2 Kor. 2:9) Kel ómi tradu di kongregason sô pa alguns mês, má el rapende. Nton, ansions ka meste dexaba pasa más ténpu antis di es setaba el.
MODI KI NU PODE IMITA JUSTISA I MISERIKÓRDIA DI JEOVÁ
14-15. Kuzê ki nu ta prende ku kel ki kontise na kongregason di Korintu? (2 Pedru 3:9) (Odja fotu.)
14 Kel stória sobri kuzê ki kontise na Korintu, podu na Bíblia “pa inxina-nu.” (Rom. 15:4) Kel stória li ta inxina-nu, ma Jeová ka ta dexa kes algen ki faze un pekadu gravi i ka rapende kontinua na kongregason. Alguns algen pode pensa ma pamodi Jeová é ‘mizerikordiozu’ el ta dexa pa un algen ki ka rapende kontinua na kongregason. Má é ka di kel manera li ki Jeová ta mostra se mizerikórdia. Enbóra Jeová é mizerikordiozu, el ka ta seta tudu tipu di konportamentu. Se leis sobri kel ki é dretu i mariadu ka ta muda. (Jud. 4) Si Jeová dexaba pa un algen ki faze un pekadu má ki ka rapende kontinuaba na kongregason, kel-li ka éra mizerikórdia, pamodi tudu algen na kongregason pode fikaba prujudikadu. — Pro. 13:20; 1 Kor. 15:33.
15 Tanbê, el ta inxina-nu ma Jeová ka krê pa ningen ser distruídu. Sénpri ki ta da el krê salva pesoas. El ta mostra se mizerikórdia pa kes algen ki muda ses korason i ki krê ser se amigu otu bês. (Eze. 33:11; lé 2 Pedru 3:9.) Pur isu, kantu kel ómi na Korintu rapende i el muda se konportamentu, Jeová uza Paulu pa splika kongregason ma es debe purduaba el i resebe-l otu bês.
Nu ta imita amor i mizerikórdia di Jeová, óras ki nu ta mostra amor i bondadi pa kes algen ki readimitidu na kongregason (Odja parágrafus 14-15.)
16. Kuzê ki bu ta xinti pa Jeová dipôs di sabe modi ki kel ómi na kongregason di Korintu tratadu?
16 Kel izénplu na kongregason na Korintu ta mostra ma Jeová é justu i el ta mostra txeu amor. (Sal. 33:5) Prende sobri kel-li ta pô-nu ta krê lova Jeová inda más txeu. Nu ta da txeu valor pa se mizerikórdia, pamodi nos tudu nu ta peka i nu meste se perdon. Tanbê, nu ta da txeu valor pa resgati ki Jeová da-nu, asi pa el pode púrdua nos pekadu.Ta konsola-nu txeu sabe ma Jeová ta ama se povu di verdadi i el krê kel ki é midjór pa es!
17. Kuzê ki nu ta ben pâpia di el na kes otu studu?
17 Si oji, un algen faze un pekadu gravi, modi ki ansions na kongregason pode imita amor di Jeová i djuda kel algen rapende? Modi ki irmons debe reaji óras ki ansions disidi tra ô seta un algen na kongregason? Na kes otu studu nu ta ben responde kes pergunta li.
KÁNTIKU 109 Nu ama kunpanheru di korason
