Bu lé tudu artigus di kes últimu Sentinéla? Nton, tenta responde kes pergunta li:

Modi ki ensinus di Jizus djuda pesoas vense diskriminason?

Txeu judeu di ténpu di Jizus ta fazeba diskriminason. Txeu bês, Kristu fla ma nu meste ser umildi i ma nu ka debe atxa ma nos rasa é midjór ki otu. El inxina se sigidoris trata kunpanheru sima irmon. — w18.06, pp. 9-10.

Deus ka dexa Muizes entra na kel téra ki el prometeba es. Kuzê ki nu ta prende ku kel-li?

Muizes tinha un amizadi fórti ku Jeová. (Deut. 34:10) Kantu Israel staba kuazi ta faze 40 anu na dizértu, povu kexa pa sugundu bês, pamodi ka tinha agu. Jeová manda Muizes pa pâpia ku rótxa, má Muizes da ku pó na rótxa. Talvês Jeová fika xatiadu pamodi Muizes ka sigi se orientason ô pamodi el ka da-l glória pa kel milagri. (Núm. 20:6-12) Kel-li ta inxina-nu ma sénpri nu debe obi ku Jeová i da-l glória. — w18.07, pp. 13-14.

Di ki manera é faxi nu julga un algen pa kel ki nu ta odja?

Ten três kuza ki pode pô-nu ta julga un algen pa kel ki nu ta odja: se rasa ô di undi ki el é, si el ten txeu dinheru i se idadi. Má, nu debe sforsa pa nu trata tudu algen igual, sima Jeová ta faze. (Atos 10:34, 35 ) — w18.08, pp. 8-12.

Modi ki irmons di más idadi pode djuda otus?

Un irmon di más idadi, ki muda di diziginason, ta kontinua ta ten valor pa Deus, i el pode faze txeu kuza pa otus. El pode djuda maridus di kes irman ki ka é Tistimunhas di Jeová, djuda inativus, faze studus di Bíblia i djobe manera di faze más na pregason. — w18.09, pp. 8-11.

Kal ki é kes feraménta prinsipal pa inxina?

Nu ten kartons di kontatu i konvitis. Tanbê nu ten 8 folhetu, revistas Sentinéla i Despertai!, alguns bruxura, dôs livru di faze studu i kuatu vídiu inportanti, sima Pamodi ki nu debe studa Bíblia?. — w18.10, p. 16.

Di akordu ku Provérbios 23:23, modi ki un kriston pode ‘kunpra verdadi’?

Nu ka ta kunpra verdadi ku dinheru. Má, nu meste gasta ténpu i faze sforsu pa konsigi-l. — w18.11, p. 4.

Kuzê ki nu ta prende ku kuza ki kontise ku Ozeias i se mudjer Gómer?

Gómer faze adultériu más ki un bês. Má Ozeias purdua-l i el kontinua kazadu ku el. Si un maridu ô un mudjer ki ta sirbi Jeová, faze adultériu, kel maridu ô mudjer fiel pode disidi purdua-l. Óras ki es dôs torna ten relason seksual, Bíblia dja ka ta da más motivu pa es divôrsia. — w18.12, p. 13.