Danièle ta staba sénpri sienti i lógu el da kónta di kuzê ki staba ta kontise. El fla-m na obidu: “Bu ka meste nen tilifona pulísia, dja es sta li!” Para un karu nos tras, na frenti di otel. Alguns minutu dipôs, trópas pô-nu prézu. N fika kontenti pamodi Danièle aviza-m, asi N konsigi ntrega alguns dukumentu pa un otu irmon ki staba ku nos.

Timenti kes trópa staba ta leba-nu pa skuadra, N fika ta pensa modi ki éra bon sta kazadu ku un mudjer ki ten koraji i ki ten un amizadi fórti ku Jeová. Kel-li é un di kes monti situason ki mi ku Danièle nu trabadja sima un ekipa. Dexa-m splika nhos modi ki nu bai vizita kes país ki tinha poku liberdadi pa prega.

N nase na 1930 na Croix, un sidadi pikinoti ki ta fika na nórti di Fransa. Nos família éra txeu katóliku. Tudu simana nu ta baba misa i nha pai ta partisipaba na tudu kuza di igreja. Má kantu N tinha 14 anu, kontise un kuza ki pô-m ta odja finjimentu di igreja.

Duránti sugundu géra na mundu, trópas di Alimanha invadi Fransa. Na kes diskursu ki padri ta fazeba, sénpri el ta insentivaba nos pa nu apoia govérnu di Vichy, un govérnu ki ta staba na ladu di kes trópa di Alimanha. Kes diskursu ta poba nos ta xinti mal. Sima txeu algen na Fransa ta fazeba, nos tanbê nu ta obiba rádiu BBC sukundidu, ki ta daba informasons sobri kes trópa ki staba kóntra trópas di Alimanha. Nton, kantu kes trópa di Alimanha tradu di undi nu ta moraba na setenbru di 1944, kel padri dirapenti fika ta apoia kes trópa ki antis el staba kóntra es. Ti el organiza un komemorason na igreja pa festeja ses vitória, na setenbru di 1944. N fika dimiradu ku finjimentu di kel padri, pur isu N perde kunfiansa na igreja.

Poku ténpu dipôs di géra, nha pai móre, nha irman más grandi dja kazaba i el ta viveba na Béljika. Pur isu, N konsigi un trabadju na fábrika di tisidu pa N podia kuidaba di nha mai. Nha xéfi ku ses fidju éra txeu katóliku. N tinha un futuru rei di sábi na ses fábrika, má faltaba poku pa N pasaba pa un próva.

Nha irman Simone ben djobe-nu na anu 1953. Dja el éra Tistimunha di Jeová. El uza Bíblia dretu pa el djuda-m ntende ma kes ensinu ki katólikus  ta inxina sima inférnu, Trindadi i ma alma ka ta móre, éra tudu falsu. Na komésu N fla-l ma el ka sta uza Bíblia katóliku. Má lógu N da kónta ma el tinha razon. Más tardi, el leba-m alguns Sentinéla antigu i N gostaba txeu di leba es na nha kuartu di noti. N fika ku sertéza ma kel-la éra verdadi. Má N fika ku medu ma si N biraba un Tistimunha di Jeová N ta perdeba nha trabadju.

Pa alguns mês, N fika ta studa Bíblia djuntu ku Sentinélas mi sô. Ti ki N disidi bai pa un Salon di Reinu. Kel anbienti di amor ki N atxa la, toka nha korason. N studa Bíblia ku un irmon maduru pa 6 mês i N batiza na setenbru di 1954. Algun ténpu dipôs, N fika txeu kontenti di odja nha mai ku nha irman más pikinoti ta bira Tistimunha di Jeová.

N fika tristi, pamodi nha mai móre uns simana antis di kongrésu internasional, na 1958, na Nova York, na Mérka. N tevi xansi di sta na kel kongrésu. Kantu N volta pa kaza N ka tinha más ningen pa N kuidaba di el. Nton, N larga trabadju i N bira pioneru. Na kel ténpu, N fika noivu di Danièle Delie un pionera ki tinha txeu zelu. Na maiu di 1959 nu kaza.

Danièle kumesa se sirvisu pa ténpu interu na Bretanha. Éra un zóna ki ta fikaba lonji di sidadi i di se kaza. El ta mesteba txeu koraji pa el pregaba la. Kuazi tudu algen la éra katóliku i el tinha ki andaba di bisikléta pa tudu kes lugar. Sima mi, el sabia ma pesoas tinha ki obiba kel mensaji. Nu sabia ma nu staba pértu di fin. (Mat. 25:13) Sénpri el poi interesi di otus más primeru ki di sel i kel-la djuda-nu kontinua na sirvisu pa ténpu interu.

Alguns dia dipôs di nos kazamentu, nu diziginadu pa vizita kongregasons. Nu prende leba un vida más sinplis. Primeru kongregason ki nu vizita, tinha 14 publikador i kes irmon ka tinha kondison di resebeba nos na ses kaza. Nton, nu tevi ki durmi na un koltxon finu, na tribuna di Salon di Reinu. É ka éra sábi, má kel-li djuda-nu txeu ku kuluna!

Nu ta fikaba txeu okupadu na vizita kongregasons, má Danièle kustuma dretu ku kel trabadju. Óras ki ta parseba un runion ku ansions ki N ka sta ta speraba, el ta fikaba déntu di nos karu ta spera-m, má nunka el reklama. Nu ten sô dôs anu ta vizita kongregason. Duránti kel ténpu, nu prende ma é inportanti un kazal pâpia klaru ku kunpanheru i trabadja djuntu sima un ekipa. — Ecl. 4:9.

Na 1962, nu konvidadu pa turma nunbru 37 di Skóla di Jiliádi. Nu pasa 10 mês na kel skóla na Brooklyn, na Nova York, na Mérka. Nos éra 100 studanti i tinha sô 13 kazal. Nu fika kontenti di kursa Skóla di Jiliádi djuntu. Inda N ta lenbra di kes momentu ki nu pasa djuntu ku irmons ki tinha txeu fé, sima Frederick Franz, Ulysses Glass i Alexander H. Macmillan.

Kel skóla trena-nu pa nu presta txeu atenson na manera ki nu ta odja kuzas. Na alguns sábadu di  tardi, dipôs di aula es ta lebaba nos pa alguns lugar na sidadi di Nova York. Na sugunda-fera nu ta fazeba un próva pa nu skrebe sobri kuzê ki nu odja na kes vizita. Óras ki txigaba sábadu di noti dja nu staba kansadu, má kel betelita ki éra nos gia, ta fazeba nos perguntas pa djudaba nos pripara pa próvas di sugunda-fera. Na un sábadu, nu anda un tardi interu na sidadi. Nu bai pa lugar undi nu ta pode odjaba strélas i otus kuza na séu. La nu prende kal ki é diferénsa entri un meteoro i un meteorito. * Dipôs nu bai pa un muzeu i nu prende kal ki é diferénsa entri un jakaré i un krokodilu. Kantu nu volta pa Betel, kel gia pergunta-nu: “Nhos ta lenbra kal ki é diferénsa entri un meteoro i un meteorito?” Danièle staba txeu kansadu ki el responde: “Kes denti di meteorito é más grandi!”

Nu fika spantadu kantu nu diziginadu pa Betel di Fransa, i nu sirbi la pa más di 50 anu. Na 1976, N diziginadu pa N ser kordenador di Kumison di Filial. Tanbê N diziginadu pa N vizita alguns país di Áfrika i di Orienti Médiu, undi nos óbra éra proibidu ô nos irmons tinha poku liberdadi. É pur isu, ki N bai pa Gabon, undi kontise kel kuza ki N konta na komésu di nos stória. Pa fla verdadi, nunka N ka xintiba ma mi éra kapás di lida ku kes responsabilidadi. Má nha mudjer djuda-m txeu. El da-m forsa pa N kuida di kalker tipu di diziginason ki N dadu.

Sénpri nu gosta di vive na Betel. Danièle konsigi prende inglês na sinku mês antis di nu bai pa Skóla di Jiliádi. El bira bon na traduzi nos publikasons. Nu ta fikaba kontenti ku nos trabadju na Betel, má trabadja pa kongregason ta daba nos más alegria inda. Ku amor, N ta lenbra di kes noti ki mi ku Danièle nu ta staba na métru na Paris, ti tardi. Nu ta staba kansadu, má kontenti pamodi kes bon studanti di Bíblia ki nu fazeba studu djuntu. Danièle sénpri tinha txeu zelu, pur isu foi difísil kantu dirapenti se saúdi kumesa ta trapadja se trabadju ki el gostaba txeu.

Na 1993, el diskubri ma el staba ku kánser na mama. Tratamentu éra difísil dimás. El faze operason i kimioterapia. Kel tratamentu éra fórti. Dipôs di 15 anu, el torna panha otu tipu di kánser más gravi inda. Má, Danièle gostaba txeu di se trabadju di traduson. Pur isu, lógu ki el xintiba midjór el ta ba trabadjaba.

Sikrê Danièle tinha un duénsa gravi, nunka nu ka pensa na sai di Betel. Má, fika duenti na Betel é más difísil inda, óras ki otus ka sabe ma bu situason é gravi. (Prov. 14:13) Mésmu kantu Danièle dja tinha kuazi 80 anu, el ka ta parseba ma el staba duenti. El kontinua ku se sorizu bunitu i ku bon aparénsia. Danièle ka ta kexaba se prublémas, má el ta konsentraba na djuda otus. El sabia ma obi otus podia djudaba txeu kes algen ki staba ta sufri. (Prov. 17:17) Danièle ta uzaba se spiriénsa pa djudaba txeu irman pa ka xinti medu di kánser.

 Tanbê nu prende lida ku otus prubléma. Kantu Danièle ka ta konsigi trabadjaba un dia interu, el ranja otus manera di apoia-m na undi ki N mesteba. El faze txeu pa bira nha vida más fásil. Kel-la djuda-m ser kordenador di Kumison di Filial pa 37 anu. Pur izénplu, tudu dia el ta priparaba tudu kuza pa nu almusaba na nos apartamentu i dipôs pa nu ten ténpu di diskansa djuntu. — Prov. 18:22.

Danièle sénpri ta pensaba di manera puzitivu i el tinha vontadi di vive. Má el panha kánser pa tirseru bês. Nu fika sen sabe kuzê ki nu ta faze. Faze kimioterapia i radioterapia, ta traba Danièle tudu forsa i alvês nen el ka ta konsigi andaba. Éra tristi dimás odja nha mudjer ki N ta ama txeu, ki éra un bon tradutora ka ta konsigi atxa palavras pa el flaba kuzê ki el staba ta xinti.

Mésmu óras ki nu ka sabia kuzê ki nu ta fazeba, nunka nu ka dexa di faze orason. Nu tinha sertéza ma Jeová ka ta dexaba nos sufri más di kel ki nu ta pode aguentaba. (1 Cor. 10:13) Sénpri nu ta agradiseba Jeová pa tudu ajuda ki el ta daba nos através di Bíblia, di ekipa di médikus di Betel i di apoiu di nos irmons na fé.

Txeu bês nu ta pidiba Jeová pa djuda-nu skodje ki tratamentu nu ta setaba. Tevi un ténpu ki nu fika sen faze ninhun tratamentu. Dotor ki ta kuidaba di Danièle pa 23 anu, ka ta ntendeba pamodi ki el ta dismaiaba tudu bês ki el ta fazeba kimioterapia. El ka atxa ninhun otu tratamentu ki Danièle podia fazeba. Nu xinti nos sô, nu ka sabia kuzê ki podia kontiseba. Nton un otu dotor, fla ma el ta kuidaba di Danièle. Éra sima si Jeová staba ta mostra-nu un saída pa nu lida ku nos preokupasons.

Un otu kuza ki ta djudaba nos lida ku nos preokupason, éra viveba un dia di kada bês. Sima Jizus fla: ‘Kada dia ten se própi prublémas.’ (Mat. 6:34) Pensa na kuzas dretu i sta sénpri kontenti tanbê ta djuda. Pur izénplu, kantu Danièle fika dôs mês sen faze kimioterapia el fla-m ku sorizu di mininu: “Nunka N ka xinti sábi na nha vida sima N sta xinti gósi!” (Prov. 17:22) Danièle ta sufreba txeu, má el gostaba di trena kes kántiku novu ku vós altu i ku kunfiansa.

Manera ki Danièle ta pensaba, djuda-m lida ku nhas prubléma. Pa fla verdadi, na kes 57 anu ki nu ten kazadu, sénpri el kuida di mi. Danièle nunka ka dexa-m frita nen un ovu! Nton, kantu el fika txeu duenti N tevi ki prende laba losa, laba ropa i faze kes kumida ki éra más sinplis. Na faze kes kuza li, N kebra alguns kópu, má N ta fikaba txeu kontenti di faze kes kuza li pa Danièle. *

Óras ki N djobe pa tras, N ta odja ma N prende txeu ku difikuldadis ki prublémas di saúdi i bedjisa ta traze. Primeru, nunka nu ka debe sta okupadu dimás pa nu ka pasa ténpu ku algen ki nu ta ama. Pruveta dretu kes anu ki inda bu tene forsa pa bu kuida di kel algen ki bu ta ama. (Ecl. 9:9) Sugundu, nu ka debe preokupa dimás ku kuzas pikinoti, kel-li pode ka dexa-nu odja kes benson ki Jeová ta da-nu tudu dia. — Prov. 15:15.

Óras ki N ta pensa na nos vida na sirvisu pa ténpu interu, N ka ten dúvida ma Jeová abensua-nu mutu más ki kel ki nu ta imajina. N ta xinti sima skritor di salmo ki fla: ‘Dexa nha alma diskansa otu bês, pamodi Jeová trata-m ku bondadi.’ — Sal. 116:7.