DIANA ten más di 80 anu. Se maridu tinha un duénsa gravi i es pô-l na un kaza di algen grandi pa alguns anu, ti kantu ki el móre. Tanbê, el perde se dôs fidju i el luta kóntra kánser di mama. Má simé, óras ki Diana ta bai Salon di Reinu ô pregason tudu algen ta odja ma el ta sta sénpri kontenti.

John éra enkaregadu di grupu di kongregason pa más di 40 anu. El gostaba di faze kel trabadju la. Vizitaba kongregason éra se vida. Má dipôs, el tevi ki para di vizita kongregason pa el kuida di un algen di se família ki staba duenti. I gósi el ta sirbi na un kongregason. Má, óras ki kes irmon ki konxeba John ta nkontra ku el na asenbleia ô na kongrésu, es ta fla ma el kontinua kel mê. El kontinua ku txeu alegria.

Modi ki Diana ku John kontinua ku ses alegria? Modi ki un algen ki sta sufri ô ki pasa pa situasons difísil pode xinti alegria? I modi ki un algen ki dexa un priviléjiu ki el gosta txeu, pode kontinua filís? Bíblia ta da-nu respósta, el ta fla: ‘Justu ta ben xinti alegria na Jeová’. (Sal. 64:10) Pa nu ntende kel verdadi li midjór, nu ben odja kuzê ki pode i kuzê ki ka pode da-nu alegria di verdadi.

Di sertéza bu sabe ma ten alguns kuza ki kuazi sénpri ta da-nu alegria. Pur izénplu, pensa na dôs algen ki sta paxonadu i ki sta ben kaza. Ô pensa na un kazal ki sta ben ten un fidju, ô un algen ki sta ben dadu algun priviléjiu na organizason. Kes kuza li ta da txeu alegria, i el ta da mê. Kes kuza li ta ben di Jeová. É el ki kria kazamentu, el ki da-nu kapasidadi di ten fidju i el ki ta da diziginasons através di se organizason. — Gén. 2:18, 22; Sal. 127:3; 1 Tim. 3:1.

Má alguns alegria ta dura pa poku ténpu. É tristi óras ki un maridu ô un mudjer ta móre, ô óras ki un di es ta faze adultériu. (Eze. 24:18; Ose. 3:1) Alguns fidju ka ta obi ku ses pai ku ses mai i es ka ta obi ku Deus i alvês ti es pode ser dizasosiadu. Fidjus di  Samuel ka ta sirbiba Jeová di manera ki el ta kreba. I Davidi pasa pa txeu prubléma na família, pamodi kuza ki el faze ku Batiseba. (1 Sam. 8:1-3; 2 Sam. 12:11) Kuzas sima kes-li ka ta traze alegria, má es ta traze dór i tristéza.

Di mésmu manera, priviléjius ki nu pode ten na sirvisu di Jeová pode kaba, talvês pamodi prublémas di saúdi, alguns responsabilidadi na família ô mudansas na organizason. Txeu di kes ki dexa un diziginason, fla ma es xinti falta di kel alegria ki es ta xintiba.

Kel-li ta djuda-nu ntende ma fonti di kes alegria la, é ka pa tudu ténpu. Má, ten algun otu tipu di alegria ki nunka ka ta kaba, sikrê nos vida muda di un óra pa kel otu? Klaru ki sin! Pamodi Samuel, Davidi i otus ka perde alegria kantu es pasa pa prublémas.

Jizus sabia kuzê ki éra alegria di verdadi. Antis di el ben pa Téra, el ‘ta staba sénpri kontenti’ na frenti di Jeová. (Prov. 8:30) Má, kantu el ben pa Téra, el pasa pa txeu prubléma. Má simé, Jizus ta fikaba kontenti di faze kel ki Jeová mandaba el. (João 4:34 ) I kuzê ki el faze na se últimus óra di dór i sufrimentu? Bíblia ta fla: ‘Pa alegria ki el mostradu, el aguenta mórti na un staka di tortura’. (Heb. 12:2) Nos tanbê, nu pode ten kel mésmu alegria. Dôs kuza ki Jizus pâpia di el pode djuda-nu.

Un bês Jizus manda 70 disiplu pa bai prega. Kantu es volta, es staba kontenti pamodi kuzas ki es faze i ti es konsigi tra dimónis di algen. Nton Jizus fla-s: “Ka nhos fika kontenti sô pamodi nhos kóre ku dimónis, nhos fika más kontenti inda, pamodi nhos nómi sta skrebedu na séu.” (Lúkas 10:1-9, 17, 20, BPK ) Jizus mostra ma ten un kuza ki é mutu más inportanti ki kalker priviléjiu, ki é sabe ma Jeová sta kontenti ku nos. Sabe ma Jeová ta lenbra di tudu kel ki nu ta faze, ta da-nu txeu alegria.

Na un otu situason, Jizus staba ta inxina un monti di algen. Un mudjer fika dimiradu  ku palavras di Jizus, ki el fla na meiu di tudu algen ma mai di Jizus éra filís. Má Jizus responde-l: “Mutu más filís é tudu ken ki obi Palavra di Déus y faze sima Déus fla.” (Lúkas 11:27, 28, BPK ) É verdadi ki ten orgulhu di nos fidju pode da-nu alegria. Má, obi ku Jeová i ser se amigu ta da-nu mutu más alegria.

Ka ten nada ki ta da-nu más alegria di ki sabe ma nu sta ta faze vontadi di Jeová. Tanbê ka ten ninhun kuza ki ta tra-nu kel alegria li. Má, kontinua fiel sikrê ku prubléma ta da-nu más alegria inda. (Rom. 5:3-5) Tanbê, Jeová ta da se spritu santu pa tudu kes algen ki ta kúnfia na el. I kel alegria ta faze párti di frutu di spritu. (Gál. 5:22) Kel-li ta djuda-nu ntende pamodi ki Salmo 64:10 ta fla: ‘Justu ta ben xinti alegria na Jeová’.

Kel-li ta djuda-nu ntende pamodi ki Diana ku John, ki nu pâpia di es na komésu di es artigu, kontinua ku ses alegria mésmu ku prublémas. Diana fla: “N ta buska proteson na Jeová sima un mininu ta faze ku se pai.” Tanbê el fla: “Un di kes manera ki N ta xinti ma Jeová sta ta abensua-m é óras ki el ta djuda-m faze trabadju di pregason sénpri ku sorizu na róstu.” John inda sta ku txeu zelu na pregason, mésmu dipôs ki el dexa di vizita kongregasons. El fla kuzê ki sta ta djuda-l: “Désdi 1998, kantu ki N diziginadu pa N ser instrutor di Escola de Treinamento Ministerial, N fika ta studa mutu más txeu.” Tanbê el fla: “Mi ku nha mudjer sénpri nu staba disididu na sirbi Jeová mésmu ki nos situason muda. Pensa si, djuda-nu lida ku kes prubléma kantu nos situason muda. Nu ka ta rapende di disizon ki nu toma.”

Tanbê txeu algen odja ta kunpri na ses vida palavras ki sta na Salmo 64:10. Pur izénplu, un kazal ki sirbi na Betel di Mérka pa más di 30 anu, resebe diziginason pa es ser pioneru spesial. Es fla: “É normal nu fika tristi óras ki nu perde un kuza ki nu gosta.” Tanbê, es fla: “Má, nu ka pode kontinua tristi pa tudu ténpu.” Lógu ki es txiga na ses diziginason, es kumesa ta prega djuntu ku kongregason. Es fla: “Nu faze txeu orason sobri alguns asuntu. Kantu nu odja Jeová ta responde nos orason, kel-li da-nu koraji i nu fika más kontenti. Poku ténpu dipôs ki nu txiga, otus na kongregason bira pioneru i nu konsigi dôs bon studu di Bíblia.”

Nu ten ki seta ma é ka tudu óra ki nu ta sta kontenti. Ten óras ki nu ta sta sábi i ten óras ki nu ta sta kasábi. Má Jeová ta da-nu kel sertéza ki sta na Salmo 64:10. Mésmu ki nu sta dizanimadu pamodi nos vida muda, nu pode ten sertéza ma si nu kontinua fiel nu ta ten ‘alegria na Jeová’. Tanbê, nu pode spéra ma Jeová ta kunpri se promésa di faze ‘un Séu novu i un Téra novu’. Tudu algen ta bira perfetu i es ta fika kontenti pa tudu ténpu, pamodi tudu kuza ki Jeová ta faze. — Isa. 65:17, 18.

Imajina modi ki kel-li ta ben ser. Nu ta ben ten saúdi perfetu i nu ta korda tudu dia xeiu di forsa. Ka ta nporta kes kuza tristi ki nu pasa pa es, nu ka ta ben xinti kel dór más. Jeová promete ma kes ‘kuza ki dja pasa ka ta ben lenbradu más i nen es ka ta ben pasa pa korason.’ Nu ta ben resebe kes algen ki móre i nu ta ben xinti sima kel pai ku mai di kel minina di 12 anu ki Jizus resusita. Bíblia ta fla: ‘Es xinti txeu alegria ki es ka konsigi aguenta.’ (Mar. 5:42) Ti ki enfin, kada un di nos ta ser algen ‘justu’ di verdadi i nu ta ten ‘alegria na Jeová’ pa tudu ténpu.