Na 2 Coríntios 12:2, 3 , Polu pâpia di un ómi ki ‘rabatadu pa tirseru séu.’ Ken ki éra kel ómi? Na karta ki Polu skrebe pa kristons na Korintu, el distaka ma Deus staba ta uza-l kómu apóstlu. (2 Cor. 11:5, 23) Dipôs, el pâpia di ‘vizons di párti di Sinhor.’ Si nu djobe na kes otu versíklu, Polu ka ta pâpia di ninhun otu irmon. Pur isu, nu pode fla ma kantu Polu pâpia di un ómi ki resebe vizons, el sta papiaba di se kabésa. — 2 Cor. 12:1, 5.

Nton, Polu éra kel ómi ki ‘rabatadu pa tirseru séu’ i ki ‘rabatadu pa paraízu’. (2 Cor. 12:2-4) El uza palavra ‘vizon’ pa mostra ma el fika ta sabe di kuzas ki ta ba ten na futuru.

Kuzê ki éra kel ‘tirseru séu’ ki Polu odja?

Na Bíblia palavra ‘séu’ pode ser kel séu ki nu ta odja. (Gén. 11:4; 27:28; Mat. 6:26) Má tanbê, ‘séu’ pode siginifika otu kuza. Alvês, el ta siginifika govérnus di ómi. (Dan. 4:20-22) Ô tanbê, el pode ser govérnu di Deus, sima Reinu di Deus. — Apo. 21:1.

Polu odja ‘tirseru séu.’ Kuzê ki kel-la siginifika? Alvês Bíblia ta ripiti un kuza três bês pa el distaka-l. (Isa. 6:3; Eze. 21:27; Apo. 4:8) Kantu Polu pâpia di kel ‘tirseru séu’ ta parse ma el sta papiaba di un tipu di govérnu mutu más grandi i mutu más midjór, ki é Reinu di Deus na mô di Jizus, djuntu ku 144 mil ki ta bai governa ku el. Sima apóstlu Pedru skrebe, nu sta ta spéra kel ‘séu novu’ di akordu ku promésa di Deus. — 2 Ped. 3:13.

Kuzê ki éra kel ‘paraízu’ ki Polu pâpia di el?

Palavra ‘paraízu’ pode siginifika txeu kuza: (1) Si nu pensa na kel lugar bunitu ki Deus poi ómi na el, ‘paraízu’ pode siginifika kel Paraízu ki ta ben ten na Téra na futuru. (2) El pode siginifika kel anbienti sábi i di pas ki Deus ta ben da se povu na mundu novu. (3) Tanbê, el pode siginifika kel anbienti sábi i bunitu ki ten na Séu, ‘kel paraízu di Deus’ ki Apocalipse 2:7 ta pâpia di el. — Djobe Sentinéla di 15 di julhu di 2015, p. 8. par. 8.

Kantu Polu pâpia di kuza ki kontise ku el na 2 Coríntios 12:4, talvês el sta ta papiaba di kes três kuza li.

Rezumu:

Kel ‘tirseru séu’ ki 2 Coríntios 12:2 ta pâpia di el, pode ser Reinu di Deus na mô di Jizus ku kes 144 mil, ki tanbê ta txomadu di ‘séu novu’. — 2 Ped. 3:13.

El é ‘tirseru séu’ pamodi Reinu é un tipu di govérnu mutu más grandi i el é midjór ki ten.

Kel ‘paraízu’ ki Polu ‘rabatadu pa el’ na kel vizon ki el odja, pode siginifika, (1) kel Paraízu ki ta ben ten na Téra, (2) paraízu spritual ki ta ben ten na futuru, ki é mutu más grandi ki kel paraízu spritual ki ten oji i (3) ‘kel paraízu di Deus’ na Séu. Tudu es ta ben izisti omésmu ténpu na kel mundu novu.

Di akordu ku kel ki nu odja, mundu novu ta ser formadu pa kel séu novu i un téra novu. Ta ben ser un kuza novu, ki é kel govérnu di Reinu na Séu i kes algen ki ta sirbi Jeová na paraízu na Téra.