Testu di Deuteronómio 22:25-27 é ka pa provaba ma kel ómi éra kulpadu, pamodi dja el éra kulpadu. Kel lei éra pa mostraba ma kel mudjer ka tinha kulpa. Nu ben analiza kes versíklu antis.

Kes versíklu antis ta pâpia di un ómi ki faze relason seksual ‘na sidadi’ ku un mudjer ki staba noiva. Dja ki el faze kel-li, el éra kulpadu di adultériu, pamodi pesoas ta odjaba kel mudjer noiva sima un mudjer kazadu. I sobri kel mudjer? Testu ta mostra ma ‘el ka grita na sidadi’. Si el fazeba kel-la, otus algen pode obiba el ta grita i es pode protejeba el. Má el ka grita. Pur isu, el tanbê el éra kulpadu di adultériu sima kel ómi. — Deut. 22:23, 24.

Má, kel lei ki ta ben dipôs, ta pâpia di un otu situason diferenti: ‘Si kel ómi atxa kel minina ki sta noiva na kanpu, i el pega-l i el deta ku el, nton, é sô kel ómi ki deta ku el ki debe móre; nada ka bu faze kel minina. Kel minina ka faze un pekadu ki el merese mórti. Kel kazu li é sima óras ki un ómi ta ataka se prósimu i el ta mata-l. Pamodi el atxa-l na kanpu, i kel minina ki staba noiva grita, má ningen ka staba la pa djuda-l.’ — Deut. 22:25-27.

Na kel kazu li, kes juís ta kriditaba na kel minina. Pamodi? Pamodi es ta ntendeba ma kel minina ‘grita má ningen ka staba la pa djuda-l.’ Nton el ka staba ta faze adultériu. Má kel ómi éra kulpadu di violason i adultériu, pamodi el ‘pega kel minina ki staba noiva i el deta ku el’.

Pur isu, nbóra kel lei éra pa provaba ma kel mudjer ka tinha kulpa, kel lei ten razon di fla ma kel ómi éra kulpadu di violason i adultériu. Nu pode ten sertéza ma kes juís ta fazeba un ‘invistigason i un piskiza ku kuidadu’ sobri kel asuntu i es ta tomaba un disizon di akordu ku kes orientason klaru ki Deus dja ripitiba txeu bês. — Deut. 13:14; 17:4; Êxo. 20:14.