Ta parse ma nau. Diabu ka fla Eva ma si el kumeba di kel frutu ki Deus fla-l pa el ka kume, se korpu ta moreba, i se spritu ta kontinuaba bibu na un otu lugar. Através di un kóbra, Satanás fla ma si Eva kumeba di frutu di kel arvi ‘di sertéza el ka ta moreba’. El krê flaba ma Eva ta kontinuaba bibu i ma el ta tinha un vida más sábi na Téra, un vida sen dipende di Deus. — Gén. 2:17; 3:3-5.

Si kel ensinu falsu ki ta fla ma alma ka ta móre ka kumesa na jardin di Éden, nton na ki ténpu ki el kumesa? Nu ka pode fla ku sertéza. Má nu sabe ma tudu adorason falsu kabadu ku el na Dilúviu na ténpu di Nué. Ninhun ensinu falsu di relijion ka skapa na Dilúviu, pamodi ki skapa é sô Nué ku se família ki éra adoradoris verdaderu di Deus.

Nton, pode ser ki kel ensinu ki ta fla ma alma ka ta móre kumesa dipôs di Dilúviu. Kantu Deus konfundi línguas na Babel i pesoas spadjadu ‘pa tudu kantu di téra’, di sertéza es leba djuntu ku es kel ideia ma nu ten un alma ki ka ta móre. (Gén. 11:8, 9) Ka ta nporta ki ténpu ki es ensinu falsu kumesa, nu pode ten sertéza ma ‘pai di mintira’, ki é Satanás ki tanbê ta txomadu Diabu, é responsável pa kel-li i el ta fika kontenti di odja-l ta spadja pa mundu interu. — João 8:44.