1. Kuzê ki txeu algen ta pensa sobri trabadju?

KUZÊ ki maioria di algen ta pensa sobri trabadju na undi ki bu ta mora? Na un monti país, pesoas sta ta trabadja duru i mutu más txeu di ki un bês. Kes algen ki ta trabadja txeu dimás, ka ten ténpu pa diskansa, pa sta ku ses família ô pa prende sobri Deus. (Ecl. 2:23) Má tanbê, ten alguns algen ki ka gosta di trabadju pa nada ki ten, i es ta ranja diskulpa pa es ka trabadja. — Pro. 26:13, 14.

2-3. Kuzê ki izénplu di Jeová ku Jizus ta inxina-nu sobri trabadju?

² Txeu algen na kel mundu li ta trabadja txeu dimás i otus ta trabadja poku dimás. Má pensa na kuzê ki Jeová i Jizus ta atxa sobri trabadju. Nu sabe ma Jeová gosta di trabadja. Jizus dexa kel-li klaru kantu ki el fla: ‘Nha Pai ti inda sta ta trabadja, i mi tanbê N sta ta trabadja.’ (João 5:17 ) Pensa na tudu trabadju ki Deus faze kantu el kria un monti anju, strélas i planétas. Tanbê nu ta odja un monti kuza bunitu ki Deus faze li na Téra. É pur isu ki un skritor di Salmo fla: ‘Ó Jeová, bu faze txeu trabadju! Bu faze tudu es ku sabedoria. Téra sta xeiu di kuzas ki bu faze.’ — Sal. 104:24.

³ Jizus imita se Pai. El djuda Jeová ‘pripara séu’ i el staba djuntu ku el ‘sima un bon trabadjador.’ (Pro. 8:27-31) Txeu ténpu dipôs, kantu Jizus staba na Téra, el faze un grandi trabadju. El fla ma kel trabadju éra sima kumida, i tudu kuza ki Jizus faze na Téra mostra ma éra Deus ki manda-l. — João 4:34; 5:36; 14:10.

4. Kuzê ki izénplu di Jeová ku Jizus ta inxina-nu sobri diskansu?

 ⁴ Dja nu odja ma Jeová ku Jizus trabadja duru. Má kel-li krê fla ma nu ka debe diskansa? Klaru ki nau. Jeová nunka ka ta kansa, pur isu el ka meste diskansa dipôs ki el faze algun kuza. Bíblia ta fla ma dipôs ki Jeová kria séu ku Téra, ‘el para i el diskansa.’ (Êxo. 31:17) Kel-li krê fla ma Jeová para di kria kuzas i el tra ténpu pa el odja tudu kes trabadju ki el faze. Nbóra Jizus trabadja duru kantu el staba na Téra, el tra ténpu pa diskansa i pa kume ku se amigus. — Mat. 14:13; Luc. 7:34.

5. Kuzê ki é difísil pa txeu sérvu di Deus?

⁵ Bíblia ta insentiva povu di Deus pa ser trabadjador. Se sérvus ka debe ser prigisozu, má es debe trabadja duru. (Pro. 15:19) Talvês bu ta trabadja pa bu kuida di bu família. I tudu disiplus di Kristu ten responsabilidadi di partisipa na trabadju di prega notísias sábi. Má, bu meste diskansa dretu. Alvês, bu ta atxa difísil ten ténpu pa trabadja, pa prega i pa diskansa? Modi ki nu ta sabe kantu ténpu ki nu meste pa trabadja i pa diskansa?

6. Modi ki Marcos 6:30-34 ta mostra ma Jizus éra ikilibradu óras ki el ta trabadjaba i diskansaba?

⁶ Nu debe ser trabadjador, má trabadju ka debe ser kuza más inportanti na nos vida. Deus orienta Rei Salumon pa skrebe: ‘Ten un ténpu markadu pa tudu kuza’. El fla ma ten ténpu pa planta, pa konstrui, pa txora, pa ri, pa badja i pa faze otus kuza. (Ecl. 3:1-8) Pur isu, trabadju i diskansu é dôs kuza inportanti na vida. Jizus éra ikilibradu óras ki el ta trabadjaba i diskansaba. Un bês, apóstlus di Jizus staba txeu okupadu na trabadju di pregason ki es ka tinha ‘nen ténpu pa kume.’ Kantu es volta, Jizus fla-s: ‘Nhos ben, nu bai nos sô pa un lugar izoladu pa diskansa un bokadinhu.’ (Lé Marcos 6:30-34.) Alvês, Jizus ku se disiplus ka ta konsigi diskansaba na óra ki es ta kreba. Má Jizus sabia ma es tudu ta meste diskansaba.

7. Modi ki prende sobri lei di sábadu ta djuda-nu?

⁷ Un óra ô otu nos tudu nu meste diskansa ô faze kuzas diferenti. Nu pode odja kel-li, na kel lei di sábadu ki Deus daba se povu na ténpu antigu. Nos é ka obrigadu sigi kel lei li. Má simé, prende sobri lei di sábadu pode djuda-nu sabe kuzê ki nu ta pensa sobri trabadju i diskansu.

8. Di akordu ku Êxodo 31:12-15, sábadu éra un dia pa faze kuzê?

⁸ Palavra di Deus ta fla ma dipôs di 6 “dia” di kriason, Deus para di kria kuzas na Téra. (Gén. 2:2) Má, Jeová gosta di trabadju, pur isu ‘ti inda el sta ta trabadja’. (João 5:17 ) Jeová trabadja 6 “dia” i el diskansa na sétimu dia, pur isu el fla israelitas pa diskansa tudu sétimu dia. Deus fla ma sábadu éra un sinal entri el i Israel. Éra un dia di ‘diskansu konplétu i sagradu pa Jeová.’ (Lé Êxodo 31:12-15.) Ningen ka debe trabadjaba, nen mininu, nen skravu, nen animal. (Êxo. 20:10) Asi, tudu algen ta kuidaba más dretu di ses amizadi ku Jeová.

9. Na ténpu di Jizus, ki ideia mariadu alguns algen tinha sobri sábadu?

⁹ Dia di sábadu éra bon pa povu di  Deus. Má, txeu xéfi di relijion na ténpu di Jizus faze alguns régra izajeradu i duru sobri lei di sábadu. Es ta flaba ma na sábadu éra proibidu panhaba kumida na kanpu ô kuraba un algen ki staba duenti. (Mar. 2:23-27; 3:2-5) Má é ka éra kel-la ki Deus kreba i Jizus dexa kel-la klaru.

10. Di akordu ku Mateus 12:9-12, kuzê ki Jizus ta pensaba sobri sábadu?

¹⁰ Jizus ku se sigidoris, ki éra judeu, ta guardaba sábadu pamodi es ta sigiba kel Lei ki Deus daba israelitas através di Muizes. * Má Jizus mostra pa kuza ki el fla i ki el faze, ma ka éra mariadu fazeba bondadi ô djudaba un algen na dia di sábadu. El dexa kel-li klaru kantu el fla: ‘Pa lei, algen pode faze un kuza dretu na sábadu.’ (Lé Mateus 12:9-12.) El ka ta pensaba ma éra mariadu un algen fazeba bondadi ô djudaba otus na sábadu. Kuzas ki Jizus faze ta mostraba ma el ta ntendeba kel razon inportanti ki Deus flaba se povu pa diskansaba na dia di sábadu. Dja ki povu di Deus ta diskansaba di ses trabadju, es ta konsigi konsentraba na ses adorason pa Deus. Jizus kria na un família ki ta uzaba dia di sábadu pa adoraba Deus. Nu sabe kel-li pamodi kuzê ki Bíblia ta fla sobri Jizus kantu el staba na Nazaré, na sidadi ki el kria. El ta fla: ‘Di akordu ku se kustumu na dia  di sábadu, el entra na sinagóga i el labanta pa el lé.’ — Luc. 4:15-19.

11. Kenha ki da Jizus bon izénplu sobri trabadju?

¹¹ Juzé inxina Jizus modi ki el ta sérba un bon karpinteru i tanbê kuzê ki Deus ta pensa sobri trabadju. (Mat. 13:55, 56) I Jizus ta odjaba Juzé ta trabadjaba duru tudu dia pa sustentaba se família ki éra grandi. Ta da pa ntende pamodi ki Jizus fla se disiplus: ‘Un trabadjador merese se pagamentu.’ (Luc. 10:7) Jizus sabeba dretu kuzê ki é trabadja duru.

12. Ki testus di Bíblia ta mostra kuzê ki Polu ta pensaba sobri trabadja duru?

¹² Apóstlu Polu tanbê sabeba kuzê ki é trabadja duru. Se trabadju más inportanti éra pâpia ku otus algen sobri Jizus i kuzê ki Jizus faze. Má tanbê, Polu trabadja pa sustenta se kabésa. Kes irmon na Tesalónika sabia ma Polu ta ‘trabadjaba duru i ku txeu sforsu, dia ku noti’, asi pa el ka sérba un ‘karga pizadu’ pa ningen. (2 Tes. 3:8; Atos 20:34, 35 ) Talvês Polu staba ta pâpia di se trabadju, ki éra faze téndas. Timenti el staba na Korintu, el fika djuntu ku Ákila i Prisila, i ‘el trabadja ku es, pamodi es ta fazeba téndas.’ Kantu Polu fla ma el ta trabadjaba ‘dia ku noti’, nu ka debe pensa ma el ta trabadjaba sen para. Tinha ténpu ki el ta diskansaba, sima pur izénplu na dia di sábadu. Kel dia la ta daba el xansi di prega pa judeus, ki tanbê ka ta trabadjaba na sábadu. — Atos 13:14-16, 42-44; 16:13; 18:1-4.

13. Kuzê ki nu pode prende ku izénplu di apóstlu Polu?

¹³ Apóstlu Polu dexa-nu un bon izénplu. El tinha ki trabadjaba pa sustenta se kabésa. Má, el sforsa pa partisipa sénpri na ‘trabadju santu di notísias sábi di Deus.’ (Rom. 15:16; 2 Cor. 11:23) Tanbê, el nkoraja otus algen pa faze mésmu kuza. Pur isu, Ákila ku Prisila bira se ‘kolaborador na Kristu Jizus.’ (Rom. 12:11; 16:3) Polu insentiva irmons na Korintu pa es ‘ten sénpri txeu pa faze na óbra di Sinhor’. (1 Cor. 15:58; 2 Cor. 9:8) I Jeová ti orienta Polu pa skrebe: ‘Si un algen ka krê trabadja tanbê el ka ta kume.’ — 2 Tes. 3:10.

14. Kuzê ki Jizus krê flaba ku kes palavra ki sta na João 14:12 ?

¹⁴ Trabadju más inportanti ki nu pode faze na es ténpu di fin é prega i faze disiplus. I Jizus dja flaba ma se disiplus ta ben fazeba óbras mutu más grandi ki di sel! (Lé João 14:12.) El ka krê flaba ma nu ta ben fazeba milagris sima kes ki el faze. Má el krê flaba ma se sigidoris ta ben pregaba i inxinaba na tiritórius mutu más grandi, pa algen mutu más txeu i pa más ténpu ki el.

15. Ki perguntas nu debe faze nos kabésa i pamodi?

¹⁵ Si bu ten ki trabadja pa sustenta bu kabésa, nton faze kes pergunta li: ‘Ami é konxedu pa algen trabadjador na lugar ki N ta trabadja? N ta tirmina nha trabadju na ténpu i N ta faze nha midjór?’ Si bu respósta é sin, nton é más faxi pa bu patron kunfia na bo. Tanbê é más faxi pa bus koléga di trabadju krê obi notísias sábi. Sobri nos trabadju di prega i inxina, nu pode faze kes pergunta li: ‘Ami é konxedu pa un algen ki ta sforsa txeu na pregason? N ta pripara dretu pa N da tistimunhu? N ta volta lógu pa vizita kes algen ki mostra interesi? N ta partisipa  sénpri na kes otu manera di da tistimunhu?’ Si bu respósta é sin, bu ta konsigi ten alegria na bu trabadju di pregason.

16. Modi ki Jizus ku se apóstlus mostra ma es éra diferenti di txeu algen oji?

¹⁶ Jizus sabeba ma alvês el ku se apóstlus, es ta meste diskansaba. Má, txeu algen di ténpu di Jizus i di nos ténpu é sima kel ómi riku di ilustrason di Jizus. Kel ómi fla se kabésa: ‘Diskansa, kume, bebe, goza bu vida.’ (Luc. 12:19; 2 Tim. 3:4) El ta pensaba ma kuza más inportanti na se vida éra diskansa i pasa sábi. Má Jizus ku se apóstlus éra diferenti. Es ka ta pensaba ma ses dizeju éra kuza más inportanti na ses vida.

17. Modi ki nu ta uza nos ténpu óras ki nu ka sta ta trabadja?

¹⁷ Oji nu ta tenta imita Jizus. Óras ki nu ka sta ta trabadja, nu ka ta uza nos ténpu sô pa diskansa, má nu ta uza-l pa faze kuzas dretu sima bai pregason i sisti runion. Na verdadi, pa nos, faze disiplus i sisti runion é txeu inportanti, ki nu ta faze di tudu pa partisipa sénpri na kes trabadju li pa Jeová. (Heb. 10:24, 25) Mésmu óras ki nu sta na féria, nu ta kontinua ta sisti runions na kalker lugar ki nu sta. Tanbê, nu ta djobe oportunidadis pa pâpia sobri Bíblia ku kes algen ki nu nkontra ku es. — 2 Tim. 4:2.

18. Kuzê ki nos Rei, Jizus Kristu, krê pa nu faze?

¹⁸ Nu ta fika kontenti di sabe ma nos Rei, Jizus Kristu, ka ta spéra pa nu faze más di ki kel ki nu ta pode faze. I el ta djuda-nu pensa di manera ikilibradu sobri trabadju i diskansu. (Heb. 4:15) Jizus krê pa nu diskansa sima nu ta meste. Tanbê, el krê pa nu trabadja duru pa kuida di nos nisisidadis i pa nu ten alegria na trabadju di faze disiplus. Na kel otu studu, nu ta ben odja kuzê ki Jizus faze pa liberta-nu di pekadu.