Bu lé tudu artigus di Sentinéla di kel anu li? Nton, tenta responde kes pergunta li:

Modi ki nu debe trata kes kriston skodjedu ku spritu santu?

Nu ta dimira ses fé, má nu ka ta da-s atenson dimás. Nu ta ivita ‘dimira manera di ser’ di otus. (Judas 16, nóta di rodapé) Nu ka ta faze-s pergunta sobri ses speransa. — w20.01, p. 29.

Kuzê ki ta da-u sertéza ma Jeová ta repara na bo?

Bíblia ta mostra ma Jeová odja-u antis di bu nase. I el ta obi bus orason. El sabe kuzê ki bu ta pensa i kuzê ki sta na bu korason, i kuzas ki bu ta faze pode poi Jeová tristi ô kontenti. (1 Cró. 28:9; Pro. 27:11) Tanbê el atrai-u pa el. — w20.02, p. 12.

Ki óra ki nu debe pâpia i ki óra ki nu debe fika kaladu?

Nu ta fika kontenti di pâpia di Jeová. Nu ta pâpia si nu odja algun algen ta bai pa un kaminhu mariadu. Ansions ta pâpia óras ki es meste da konsedju. Nu ka ta fla informasons sobri nos óbra na paízis undi trabadju sta proibidu i nu ka ta pâpia di asuntus ki otus ka ten direitu di sabe. — w20.03, pp. 20-21.

Kal ki é diferénsa entri kes kafanhotu di Joel kapítlu 2 ku kes di Apocalipse kapítlu 9?

Joel 2:20-29 ta fla ma Deus ta afastaba pa lonji kes kafanhotu i el promete ma el ta konpensaba kes kuza ki es straga. Dipôs di kel-la, Deus ta ben bazaba se spritu. Kel-li kontise kantu trópas di Babilónia invadi Jiruzalen i tanbê más tardi. Kes kafanhotu di Apocalipse 9:1-11 sta ta pâpia di kes kriston skodjedu ku spritu santu ki ta prega mensaji di julgamentu kóntra es mundu mau li. I kel-li ta inkomoda kes algen ki ta apoia kel mundu li. — w20.04, pp. 3-6.

Ken ki é rei di nórti gósi?

Rúsia i kes ki ta apoia-l. Es ataka povu di Deus pamodi es proíbi trabadju di pregason i es sta mostra ma es ta ôdia Tistimunhas di Jeová. Rei di nórti sta ta konpiti ku rei di sul. — w20.05, p. 13.

Kes kualidadi ki ta faze párti di ‘frutu di spritu’ é sô kes ki sta na Gálatas 5:22, 23 ?

Nau. Spritu santu ta djuda-nu ten kes otu bon kualidadi, sima justisa. (Efé. 5:8, 9) — w20.06, p. 17.

Kal ki é un di kes prigu di poi alguns kuza sobri nos na redi sosial?

Kes komentáriu, fotus ô vídius ki bu ta poi na redi sosial, pode mostra ma bu krê parse i ma bo é ka umildi. — w20.07, pp. 6-7.

Kuzê ki kristons pode prende ku kes bon piskador?

Es ta trabadja na óra i na lugar ki es pode pega pexi. Es meste ten feraméntas sértu i sabe modi ki es ta uza-s. Es ten koraji pamodi es ta trabadja na lugar ki situason pode muda di un óra pa kel otu. Nu pode faze mésmu kuza na pregason. — w20.09, p. 5.

Kal ki é alguns manera ki nu pode djuda nos studantis ten más amor pa Jeová?

Nu pode insentiva-s pa es lé Bíblia tudu dia i pa es pensa na kuzê ki es lé. Tanbê nu pode inxina-s faze orason. — w20.11, p. 4.

Di kenha ki kel frazi li sta pâpia: ‘Tudu algen ta ben resebe vida na Kristu’? — 1 Cor. 15:22.

Apóstlu Polu ka staba ta fla ma tudu algen ta sérba resusitadu. El staba ta pâpia di kes kriston skodjedu ku spritu santu, ki ‘santifikadu djuntu ku Kristu Jizus’. (1 Cor. 1:2; 15:18) — w20.12, pp. 5-6.

Ki trabadju kes kriston skodjedu ku spritu santu ta ba faze na Séu dipôs ki es ‘mudadu sima piska un odju, duránti kel últimu tronbéta’? — 1 Cor. 15:51-53.

Djuntu ku Kristu, es ta ben pastora nasons ku vara di féru. (Apo. 2:26, 27) — w20.12, pp. 12-13.