1-2. Pamodi ki ntende resureison pa vive na Séu é inportanti pa nos tudu?

KUAZI tudu kes algen ki ta sirbi Jeová oji ten speransa di vive pa tudu ténpu na Téra. Má, un grupu pikinoti di kristons skodjedu ku spritu santu ten speransa di ser resusitadu pa ba vive na Séu. Kes kriston skodjedu tene gana di sabe modi ki ses vida ta ba ser na Séu. Tanbê, kes otu ovelha meste sabe kel-li, pamodi sima nu sta ben odja na kel studu li, resureison pa vive na Séu ta ben traze-s txeu benson. Nton, ka ta nporta si nos speransa é di vive na Séu ô na Téra, ntende resureison pa vive na Séu é txeu inportanti pa nos.

² Deus orienta alguns disiplu di Jizus na ténpu di apóstlus pa skrebe sobri resureison pa vive na Séu. Apóstlu Juan splika: ‘Gósi nos é fidjus di Deus, má inda ka mostradu kuzê ki nu ta ben ser. Nu sabe ma óras ki el ben mostradu, nu ta ser sima el’. (1 João 3:2 ) Pur isu, kes kriston skodjedu ku spritu santu ka sabe modi ki ses vida na Séu ta ba ser dipôs ki es resusitadu. Kuzê ki es sabe é ma óras ki es resebe ses rekonpénsa es ta odja Jeová. Bíblia ka ta fla tintin pa tintin modi ki ta ba ser vida na Séu. Má apóstlu Polu ta da-nu alguns informason sobri kel-li. Kes skodjedu ku spritu santu ta ba sta ku Kristu óras ‘ki el kaba ku tudu govérnus, tudu autoridadi i puder.’ Kel-li tanbê ta inklui ‘mórti, ki é kel últimu inimigu’. Na fin, Jizus djuntu ku kes skodjedu ku spritu santu ta ben fika dibaxu di Jeová i es ta ben poi tudu kuza dibaxu di el.  (1 Cor. 15:24-28) Di sertéza kel-li ta ben ser un ténpu sábi dimás! *

3. Sima sta na 1 Coríntios 15:30-32, modi ki fé ki Polu tinha na resureison djuda-l?

³ Fé ki Polu tinha na resureison djuda-l lida ku txeu prubléma. (Lé 1 Coríntios 15:30-32.) El skrebe pa kristons na Korintu: ‘N ta nfrenta mórti tudu dia.’ Tanbê el skrebe: ‘N luta ku féras na Éfezu’. Talvês Polu staba ta pâpia di se luta ku animal di verdadi na un kanpu di areia na Éfezu. (2 Cor. 1:8; 4:10; 11:23) Ô talvês el staba ta pâpia di judeus i otus algen ki ta ajiba sima ‘féras’ kóntra el. (Atos 19:26-34; 1 Cor. 16:9) Ka ta nporta ki prigus Polu pasa pa el, el kontinua ta kridita ma el ta tinha un futuru rei di sábi. — 2 Cor. 4:16-18.

4. Modi ki speransa di resureison ta bira fé di irmons oji más fórti? (Odja fotu na kapa.)

⁴ Nu sta ta vive na ténpus prigozu. Alguns di nos irmons ta sufri violénsia. Otus ta vive na lugaris undi es ka ten suguransa pamodi géra. Inda otus ta mora na paízis undi nos irmons ka ten liberdadi pa prega ô ti nos óbra sta proibidu, i es ta sirbi Jeová sikrê es kóre risku di podu na kadia ô matadu. Má simé, tudu kes irmon ku irmans ka ta dizisti di adora Jeová i es é un izénplu pa nos. Es ka ten medu pamodi es sabe ma mésmu ki es perde vida gósi, Jeová pode resusita-s pa un vida mutu más midjór na futuru.

5. Ki manera di pensa prigozu pode poi nos fé na resureison ta fika fraku?

⁵ Polu aviza se irmons sobri un manera di pensa prigozu ki alguns tinha: ‘Si mortus ka ta resusitadu, “nu kume i nu bebe, pamodi manhan nu ta móre.”’ Alguns algen dja ta pensaba si antis di ténpu di Polu. Talvês, el staba ta pâpia di kel ki Izaías flaba israelitas na Isaías 22:13. Envês di es bira ses amizadi ku Jeová más fórti, kes israelita staba más interesadu na pasa sábi. Nu pode fla ma éra sima si kes israelita staba ta fla: “Pruveta vida gósi, pamodi manhan pode ka da más.” Oji txeu algen ta pensa di kel manera li. Má, kuzê ki kontise ku kes israelita pode sirbi di lison pa nos. — 2 Cró. 36:15-20.

6. Modi ki nos speransa na resureison ta djuda-nu skodje dretu ken ki debe ser nos amigus?

⁶ Fé na resureison debe djuda-nu skodje dretu ken ki debe ser nos amigus. Kes irmon na Korintu meste tomaba kuidadu pa es ka biraba amigu di kes ki ka ta kriditaba na resureison. Kel-li ta sirbi di avizu pa nos oji. Si nu faze amizadi ku pesoas ki ka ta pensa na futuru i ki krê sô pasa sábi, nu pode ten maus rezultadu. Kel tipu di amizadi li pode kaba ku manera di pensa i kes bon ábitu ki un kriston verdaderu debe ten i pode ti pô-l ta faze kuzas ki Jeová ta ôdia. É pur isu ki Polu da kel avizu li: ‘Nhos rekupera nhos bon juís ta faze kel ki é justu i ka nhos faze pekadu’. — 1 Cor. 15:33, 34.

7. Ki pergunta ki sta na 1 Coríntios 15:35-38 alguns talvês pode faze?

⁷ Lé 1 Coríntios 15:35-38. Un algen ki ta duvidaba di resureison talvês ta perguntaba: “Modi ki mortus ta resusitadu?” É bon nu pensa na respósta di  Polu, pamodi txeu algen oji ten ses própi opinion sobri kuzê ki ta kontise óras ki un algen móre. Má kuzê ki Bíblia ta inxina?

8. Ki ilustrason pode djuda-nu ntende resureison pa vive na Séu?

⁸ Óras ki un algen móre, se korpu ta disfaze. Má si Deus konsigi kria Téra ku Séu i el ka tinha nada pa faze-s, tanbê é ka ninhun prubléma pa el resusita un algen ki dja disfaze i da-l un korpu ki el meste. (Gén. 1:1; 2:7) Polu uza un ilustrason pa mostra ma Deus ka meste resusita un algen na kel mésmu korpu. El uza izénplu di un ‘gran’ ô di un ‘simenti’ di un planta. Óras ki nu ta símia un simenti, el ta nase i el ta bira un planta novu. Kel planta novu é diferenti di kel simenti pikinoti. Polu faze kel konparason li pa mostra ma nos Kriador pode da kel algen ki resusita ‘un korpu sima el ta atxa midjór’.

9. Kuzê ki 1 Coríntios 15:39-41 ta fla sobri kes diferenti tipu di korpu?

⁹ Lé 1 Coríntios 15:39-41. Polu fla ma Deus kria txeu tipu di korpu. Pur izénplu, korpu di boi, di pasus i di pexi é diferenti di kunpanheru. Dipôs, Polu fla ma na séu nu ta odja diferénsa entri sól ku lua. I el fla ma ‘glória di un stréla é diferenti di kel di otu stréla.’ Má sikrê nu ka ta konsigi odja-s ku nos odju, ten strélas ki sientistas ta txoma di jigantis burmedju, di anon branku i strélas amarelu, sima nos sól. Polu tanbê fla ma ten ‘korpus di Séu i korpus di Téra’. Kuzê ki el krê flaba? Na Téra ten korpu di karni i osu, má na Séu ten korpu spritual, sima kes di anju.

10. Ki tipu di korpu kes ki resusitadu pa vive na Séu ta ba ten?

¹⁰ Repara kuzê ki Polu fla dipôs: ‘Mésmu kuza ta kontise na resureison di mortus. Ta simiadu un korpu ki ta  straga i ta resusitadu un ki ka ta straga.’ É klaru ki óras ki un algen móre se korpu ta disfaze i el ta volta pa téra. (Gén. 3:19) Nton, di ki manera ta resusitadu un korpu ‘ki ka ta straga’? Polu ka staba ta pâpia di resureison di kes algen ki resusitadu pa vive na Téra, sima kes ki Elias, Elizeu i Jizus resusita. Má, Polu staba ta pâpia di kes algen ki resusitadu ku un ‘korpu spritual’, kel-li krê fla ku un korpu pa ba vive na Séu. — 1 Cor. 15:42-44.

11-12. Ki mudansa kontise ku Jizus kantu el resusitadu, i ki mudansa ta kontise tanbê ku kes kriston skodjedu ku spritu santu?

¹¹ Kantu Jizus staba na Téra, el tinha un korpu di karni. Má kantu el resusitadu, el ‘bira un spritu ki ta da vida’ i el volta pa Séu. Di mésmu manera, kes kriston skodjedu ku spritu santu, ta sérba resusitadu ku un korpu ki pode vive na Séu. Polu splika: ‘Sima nu ta leba imaji di kel ki fazedu di Téra, tanbê nu ta leba imaji di kel ki é di Séu.’ — 1 Cor. 15:45-49.

¹² Polu staba ta txiga na kel asuntu prinsipal sobri resureison. É inportanti nu lenbra ma Jizus ka resusitadu ku un korpu sima di nos. Polu splika pamodi: ‘Karni i sangi ka pode erda Reinu di Deus’ na Séu. (1 Cor. 15:50) Di mésmu manera, kes apóstlu i otus kriston skodjedu ku spritu santu ka ta sérba resusitadu pa ba vive na Séu ku un korpu di karni i sangi ki pode straga. Ki ténpu ki es ta sérba resusitadu? Polu mostra ma kel resureison li ta ben kontiseba más pa frenti. El ka ta kontiseba lógu dipôs ki es moreba. Na ténpu ki Polu skrebe 1 Coríntios, alguns disiplu dja staba ‘ta durmi na mórti’, pur izénplu apóstlu Tiagu. (Atos 12:1, 2 ) Kes otu apóstlu i kes kriston skodjedu ku spritu santu, tanbê ta ben ‘durmiba na mórti’ más tardi. — 1 Cor. 15:6.

13. Kuzê ki ta ben kontiseba duránti prezénsa di Jizus?

¹³ Jizus ku apóstlu Polu pâpia di un ténpu inportanti ki staba ta binha. Kel ténpu é prezénsa di Kristu. Duránti kel prezénsa ta kontiseba géra, tremor di téra, duénsa i otus kuza mariadu na mundu interu. Nu sta odja kel profesia di Bíblia li ta kunpri désdi 1914. Má tanbê ta ben kontiseba otu kuza inportanti ki ta fazeba párti di prezénsa di Jizus. El fla ma kes notísia sábi di Reinu di Deus ta ben sérba pregadu na ‘mundu interu pa sirbi di tistimunhu pa tudu nasons, i dipôs fin ta [binha].’ (Mat. 24:3, 7-14) Polu fla tanbê ma duránti ‘prezénsa di Sinhor’, ta ben kontiseba resureison di kes kriston skodjedu ku spritu santu ‘ki staba ta durmi na mórti.’ — 1 Tes. 4:14-16; 1 Cor. 15:23.

14. Kuzê ki ta kontise ku kes kriston skodjedu ku spritu santu ki móre duránti prezénsa di Kristu?

¹⁴ Kes kriston skodjedu ku spritu santu ki móre gósi, duránti prezénsa di Kristu, ta resusitadu lógu pa ba vive na Séu. Polu konfirma kel-li na 1 Coríntios 15:51, 52. El fla: ‘É ka tudu nos ki ta durmi na mórti, má nos tudu nu ta mudadu, na un momentu, sima piska un odju, duránti kel últimu tronbéta.’ Kes palavra di Polu sta ta kunpri manenti! Óras ki es resusitadu, kes kriston skodjedu ku spritu santu ta ben fika rei di kontenti. Es ta ba sta ‘sénpri ku Sinhor.’ — 1 Tes. 4:17.

15. Ki trabadju kes skodjedu ku spritu santu ta ba faze na Séu?

¹⁵ Bíblia ta fla-nu ki trabadju ki kes  skodjedu ku spritu santu ta ba faze na Séu dipôs ki es resusitadu ‘sima piska un odju’. Jizus fla sobri es: ‘Kel ki vense i sigi nhas kaminhu ti fin, N ta da-l autoridadi riba nasons. I el ta ben governa-s ku un vara di féru, i es ta kebradu padás-padás sima vazus di baru, i é nha Pai ki da-m autoridadi pa faze kel-li.’ (Apo. 2:26, 27) Kes skodjedu ku spritu santu ta ben sigi ses Komandanti Jizus, i es ta ben pastora nasons ku vara di féru. — Apo. 19:11-15.

16. Modi ki txeu algen ta ben vense mórti?

¹⁶ Di sertéza kes kriston skodjedu ku spritu santu ta vense mórti óras ki es resusitadu. (1 Cor. 15:54-57) Nton, duránti géra di Armajedon, es ta ben partisipa na un otu vitória ki é kaba ku tudu maldadi na mundu interu. Milhons di otus sérvu di Jeová ta ben ‘sai di grandi tribulason’ i es ta ben entra na kel mundu novu. (Apo. 7:14) Kes ki ta ben skapa ta ben odja un otu vitória sobri mórti. Es ta ben odja bilhons di algen ta resusitadu. Imajina modi ki nu ta ben fika rei di kontenti óras ki kel-li kontise! (Atos 24:15 ) I tudu kes ki mante lial pa Jeová ti fin, tanbê ta ben vense kel mórti ki es erda di Adon. Es ta ben vive pa tudu ténpu.

17. Kuzê ki 1 Coríntios 15:58 ta insentiva-nu pa nu faze gósi?

¹⁷ Tudu kristons debe agradese pa kes palavra di Polu sobri resureison, na 1 Coríntios, ki ta konsola-nu. Nu ten bons motivu pa mostra ma nu ta seta kel konsedju di Polu di faze nos midjór na ‘óbra di Sinhor’. (Lé 1 Coríntios 15:58.) Si nu sta txeu npenhadu na es trabadju, nu pode ben ten un vida rei di sábi na futuru. Nos vida ta ben ser mutu más sábi di ki kel ki nu pode imajina. Tudu kel trabadju duru ki nu faze na óbra di Sinhor ka foi atoa.