Bu lé tudu artigus di Sentinéla di kel anu li? Nton, tenta responde kes pergunta li:

Salmo 103:8 ta fla ma Jeová ‘ten mizerikórdia i el é xeiu di amor lial.’ Sabe kel-li ta da-nu sertéza di kuzê?

Nu sabe ma Jeová ta púrdua nos éru pamodi el ten mizerikórdia. Tanbê Salmo 103:8 ta mostra ma mizerikórdia di Jeová ta pô-l ta djuda-nu. Nu ta faze dretu óras ki nu ta imita-l. — w21.01, p. 21.

Pamodi ki Jeová da alguns algen autoridadi?

El ta faze kel-li pamodi el ta ama-nu. Autoridadi ta djuda pa tudu kuza na família di Jeová funsiona na órdi i na pas. Tudu família ki ta ruspeta kel autoridadi ki Jeová da, sabe ken ki debe toma kes disizon final i aji di akordu ku kes disizon. — w21.02, p. 3.

Pamodi ki kristons debe toma kuidadu óras ki es ta uza kes aplikativu di manda mensájen?

Si un algen disidi uza algun di kes aplikativu, el debe djobe dretu ku kenha ki el sta faze amizadi. É más difísil faze kel-li óras ki un grupu di manda mensájen é grandi. (1 Tim. 5:13) Tanbê ten prigu di fika ta pâpia ô ta ripiti kes stória izajeradu ô ki ka sta konfirmadu i uza kontatus di organizason pa asuntus di nogósiu. — w21.03, p. 31.

Kal ki é alguns razon ki poi Deus ta dexa Jizus ta sufri i móre?

Primeru, Jizus tinha ki sérba pregadu na staka, pa libertaba judeus di un maldison. (Gál. 3:10, 13) Kel sugundu razon éra pamodi Jeová staba ta trena Jizus pa ben sérba Saserdóti Prinsipal na futuru. Tirseru, kantu Jizus mante lial ti mórti, el prova ma kes algen ki ta sirbi Jeová pode mante fiel mésmu óras ki es ta pasa pa próvas difísil. (Jó 1:9-11) — w21.04, pp. 16-17.

Kuzê ki bu pode faze si sta difísil atxa pesoas na kaza óras ki bu ta sta na pregason?

Bu pode bai djobe kes algen na óra ki é más faxi atxa-s na kaza. Tanbê bu pode tenta prega na otus lugar. Bu pode tenta prega di un manera diferenti, sima skrebe karta. — w21.05, pp. 15-16.

Kuzê ki Polu krê flaba, kantu el fla: ‘Através di Lei, N móre pa Lei’? (Gál. 2:19)

Lei di Muizés ta mostra klaru ma nos é inperfetu i el leba israelitas pa Kristu. (Gál. 3:19, 24) Kel-li poi Polu ta seta Kristu i kantu el faze kel-li, Polu ‘móre pa lei’. Kel-li krê fla ma el ka tinha obrigason más di sigiba lei. — w21.06, p. 31.

Kuzê ki nu ta prende ku izénplu di Jeová na aguenta firmi?

Jeová sta ta aguenta kuzas ki ta suja se nómi, kes algen ki é kóntra se direitu di governa, alguns di se fidjus ki rabela, kes mintira ki Diabu ta konta, sufrimentu di se sérvus, mórti di se amigus, kes algen mau ki sta ta maltrata otus i kes algen ki sta ta distrui se kriason. — w21.07, pp. 9-12.

Modi ki izénplu di Juzé ta djuda-nu ten paxénxa?

Juzé aguenta kes injustisa ki se irmons faze-l. Tanbê na Ijitu, es kulpa-l di kuza ki el ka faze i el podu prézu pa txeu anu. — w21.08, p. 12.

Di ki tremor Ageu 2:6-9, 20-22 ta pâpia di el?

Nasons ka ta seta kel mensaji di Reinu ki nu ta prega. Má txeu algen sta ta seta verdadi. Ka ta dura, nasons ta ben podu ta treme pa últimu bês óras ki es ben distruídu. — w21.09, pp. 15-19.

Pamodi ki nu ka debe dizisti di faze nos trabadju di pregason?

Jeová ta odja sforsu ki nu ta faze i el sta kontenti ku nos. Si nu ka dizisti, nu ta ganha vida pa tudu ténpu. — w21.10, pp. 25-26.

Modi ki Levítico kapítlu 19 ta djuda-nu aplika kel konsedju li: ‘Nhos bira santu na tudu ária di nhos vida’? (1 Ped. 1:15)

Ta parse ma kel versíklu li tradu di Levítico 19:2. Na kapítlu 19 nu ta atxa txeu izénplu di modi ki nu pode aplika 1 Pedro 1:15 na nos dia-dia. — w21.12, pp. 3-4.