Jeová flaba israelitas ma es debe sérba santu. I pa djuda-s faze kel-li, Jeová fla-s: ‘Ka bu anda na meiu di bu povu ta spadja kalúnia. Ka bu labanta kóntra vida di bu prósimu. Ami é Jeová.’ — Lev. 19:2, 16.

Kes palavra ‘labanta kóntra’ é un traduson palavra pa palavra di testu ebraiku. Má kuzê ki kel-li krê fla? Un livru di judeus, ki ta pâpia sobri livru di Levítico, ta fla: “Na ebraiku kes palavra li. . . é difísil di ntende dretu pamodi nu ka sabe kal ki é sentidu di kel ditadu na ebraiku, ki se traduson palavra pa palavra é ‘ka fika di pé riba di, na ladu ô pértu.’”

Alguns studiozu ta fla ma kel frazi li sta ligadu ku versíklu 15 ki ta fla: ‘Ka nhos faze injustisa na julgamentu. Ka bu faze skodjénsa pa djuda algen póbri nen pa djuda algen riku. Bu debe julga bu kunpanheru ku justisa.’ (Lev. 19:15) Nton na kel kazu li, kel mandamentu ki sta na versíklu 16, ki ta fla pa ka ‘labanta kóntra’ un algen, talvês ta siginifikaba ma un israelita ka debe fazeba injustisa na óra di julga, na nogósiu ô na família. Un israelita ka pode fazeba nada dizonéstu pa pruvetaba di un algen ô di un situason. É verdadi ki nu ka debe faze kes kuza li, má ten un splikason ki ta faze más sentidu pa kel frazi na versíklu 16.

Repara kuzê ki komésu di versíklu 16 ta fla. La Jeová fla ma un israelita ka debe andaba na meiu di povu ta spadja kalúnia. É inportanti nu lenbra ma kalúnia é un kuza mutu más grávi di ki sô pâpia na vida di algen, tanbê el pode poi algen na prubléma. (Pro. 10:19; Ecl. 10:12-14; 1 Tim. 5:11-15; Tia. 3:6) Óras ki un algen ta spadja kalúnia, el sta ta konta mintira di abuzu pa suja nómi di un otu algen. Ken ki ta spadja kalúnia pode txiga ti di da tistimunhu falsu kóntra otu algen, mésmu ki el sabe ma kel-li pode poi kel algen ta matadu. Un izénplu di kel-li é di kes dôs ómi ki spadja kalúnia kóntra Nabóti i es konta mintira sobri el. I pamodi kel-li, Nabóti fazedu un grandi injustisa. El dadu ku pédra ti el móre. (1 Reis 21:8-13) Sima Levítico 19:16 ta fla, un algen ki ta spadja kalúnia sta ta labanta kóntra vida di se prósimu pa pô-l ta matadu.

Tanbê si un algen ta faze kalúnia kóntra otu é sinal ma el ta ôdia kel algen. Na 1 João 3:15 ta fla: ‘Tudu kel ki ta ôdia se irmon é asasinu, i nhos sabe ma ninhun asasinu ka ta ten vida pa tudu ténpu na el.’ Repara ma dipôs ki Jeová fla ma é ka dretu labanta kóntra vida di otu algen, el fla: ‘Ka bu ôdia bu irmon na korason.’ — Lev. 19:17.

Pur isu kel mandamentu li, ki é un poku diferenti di Levítico 19:16 ta sirbi sima un avizu pa kristons. Nu meste sforsa pa nu ka ten pensamentus mariadu i pa es ka pô-nu ta kalúnia un algen. Si nu ‘labanta kóntra’ un algen, ta kalúnia-l ô ta pâpia mal di el, nu ta mostra ma nu ta ôdia kel algen na nos korason. Dja ki nos é sérvus di Jeová nu ka debe faze kel-li. — Mat. 12:36, 37.