1. Modi ki Jeová ta kustuma responde orason di se sérvus?

 BU SABIA ma Jeová pode uza-u pa responde un orason ki un algen faze di korason? Bu pode djuda sikrê bo é ansion, ajudanti di kongregason, pioneru ô publikador na kongregason. Bu pode djuda tanbê sikrê bo é jóven ô un algen di idadi ô si bo é un irmon ô un irman. Óras ki un algen ta ama Jeová i el ta pidi-l ajuda, nos Deus txeu bês ta uza ansions i otus sérvu fiel pa bira ‘un fonti di grandi konsolu’ pa kel algen. (Col. 4:11) Nu ta fika txeu kontenti di sirbi Jeová i nos irmons di kel manera li. Nu pode faze kel-li óras ki kontise un duénsa ki ta spadja, un disgrasa ô pirsigison.

2. Pamodi ki pode ser difísil djuda otus algen duránti un duénsa ki ta spadja?

² Un duénsa ki ta spadja pode ka dexa-nu djuda otus. Pur izénplu, nu ta krê vizita nos amigus, má é ka suguru nu faze kel-li. Nu pode krê konvida otus algen ki ten falta di dinheru pa ba kume ku nos, má nu ka pode faze kel-li tanbê. Nu pode krê djuda otus algen, má kel-li pode ser difísil si nos própi família sta ta sufri. Má simé, nu krê djuda nos irmons i Jeová ta fika kontenti óras ki nu faze kel ki nu ta pode pa es. (Pro. 3:27; 19:17) Kuzê ki nu pode faze?

3. Kuzê ki nu ta prende ku izénplu di ansions di kongregason di Deizi? (Jeremias 23:4)

 ³ Kuzê ki ansions pode faze. Si bo é un ansion, konxe irmons dretu. (Lé Jeremias 23:4.) Deizi, ki dja nu papiaba di el na kel otu studu, fla: “Kes ansion di nha grupu pa pregason sénpri trabadja na pregason ku mi i ku otus irmon i es ta pasaba algun ténpu djuntu ku nos.” b Pamodi sforsu ki kes ansion faze, bira más fásil djuda Deizi dipôs ki COVID-19 kumesa i ki alguns algen di se família móre pamodi kel vírus li.

4. Pamodi ki kes ansion konsigi djuda Deizi i kuzê ki nu ta prende ku kel-li?

⁴ Deizi fla: “Dja ki kes ansion éra nhas amigu, foi fásil pa mi fla-s modi ki N staba ta xinti i kal ki éra nhas preokupason.” Kuzê ki ansions pode prende ku kel-li? Kuida di kes algen ki bu ta toma kónta di el antis di kontise un disgrasa. Ser ses amigu. Si ten un duénsa ki ta spadja ki ka ta dexa-u bai ses kaza, tenta pâpia ku es di otus manera. Deizi fla: “Alvês, txeu ansion ta txomaba mi i es ta mandaba mi mensájen na mésmu dia. Kes testu di Bíblia ki es lé ô ki es manda-m, mexe ku mi txeu sikrê dja-m konxeba es dretu.”

5. Modi ki ansions pode sabe kuzê ki irmons ku irmans meste i modi ki es pode djuda-s?

⁵ Un manera ki bu pode sabe kuzê ki bus irmon i irmans meste é faze-s pergunta ku jetu. (Pro. 20:5) Es tene kumida ki ta txiga-s, ramedi i otus kuza ki es meste? Es sta ta kóre risku di perde ses trabadju ô ti ses kaza? Es meste pa bu djuda-s pidi ajuda di govérnu si ten? Irmons da Deizi alguns kuza ki el staba ta meste. Má é amor ki ansions mostra-l i nkorajamentu ki es da-l ku bazi na Bíblia, ki djuda-l más txeu aguenta kes prubléma. El fla: “Ansions faze orason ku mi. Sikrê N ka ta lenbra di kuzê ki es fla, N ta lenbra di modi ki N xinti. É sima ki Jeová staba ta fla-m: ‘Bu ka sta bo sô.’” — Isa. 41:10, 13.

6. Kuzê ki txeu algen na kongregason pode faze pa djuda otus? (Odja fotus.)

⁶ Kuzê ki otus algen pode faze. Nu ta spéra ma ansions ta kuida di irmons na kongregason. Má Jeová krê pa nos tudu nkoraja i djuda kunpanheru. (Gál. 6:10)  Sikrê nu faze un kuza pikinoti pa djuda un algen ki sta duenti, nu pode nkoraja-l txeu. Un mininu pode faze un karton ô un dizenhu pa nkoraja un irmon. Un jóven pode faze kónpra ô algun otu kuza pa un irman. Otus irmon na kongregason pode faze un kumida i leba un algen ki sta duenti na se kaza. É klaru ki óras ki un duénsa ki ta spadja kontise, tudu algen na kongregason meste di nkorajamentu. Talvês nu pode fika un kuzinha dipôs di runion pa pâpia ku irmons i ku irmans, ka ta nporta si runion é na Salon ô através di prugramas sima Zoom. I kes ansion meste di nkorajamentu tanbê. Alguns irmon agradese ansions ki txeu bês ta sta más okupadu óras ki kontise un duénsa ki ta spadja. É bon óras ki nu ta faze nos párti pa ‘kontinua ta nkoraja i ta djuda kunpanheru’! — 1 Tes. 5:11.

7. Kuzê ki pode ser difísil dipôs di un disgrasa?

⁷ Un disgrasa pode kontise na vida di un algen di un óra pa kel otu. Alguns algen pode perde ses kaza, kuzas ki es ten ô ti mésmu un algen ki es ta ama pode móre. Kes kuza li pode kontise ku nos irmons i irmans tanbê. Kuzê ki nu pode faze pa djuda-s?

8. Kuzê ki ansions i xéfis di família pode faze antis di kontise un disgrasa?

⁸ Kuzê ki ansions pode faze. Ansions, nhos djuda nhos irmons pripara antis di kontise un disgrasa. Nhos djobe dretu si tudu algen na kongregason sabe kuzê ki es debe faze pa es kontinua suguru i pa es pâpia ku nhos. Margaret, ki dja nu papiaba di el na kel otu studu, fla: “Na párti asuntus pa djuda kongregason, ansions aviza-nu ma inda tinha risku di lumi pegaba na florésta na undi ki nu ta moraba. Es fla-nu ma si kes autoridadi di la daba órdi pa nu saíba di kaza ô si kel situason biraba prigozu, nu debe saíba lógu. Irmons da-nu informason na óra sértu pamodi uns sinku simana dipôs lumi pega na florésta.” Na adorason na família, xéfis di família pode pâpia di kuzê ki kada algen debe faze. Si bo i bus fidju sta priparadu é más fásil nhos kontinua kalmu si kontise un disgrasa.

9. Kuzê ki ansions debe faze antis i dipôs ki kontise un disgrasa?

⁹ Si bo é un enkaregadu di grupu pa pregason, djobe dretu si bu tene nunbru di tilifóni i nderésu di tudu algen di bu grupu. I faze kel-li antis di kontise un disgrasa. Faze un lista i konfirma di vês en kuandu, si kes nunbru di tilifóni i nderésu sta dretu. Nton, si kontise un disgrasa, bu ta konsigi pâpia ku kada irmon i odja kuzê ki es meste. Manda kel informason li lógu pa kordenador di grupu di ansions i el ta pâpia ku enkaregadu di grupu di kongregason. Óras ki kes irmon li ta trabadja djuntu, es pode da grandi ajuda. Dipôs ki kel lumi pega, enkaregadu di grupu di kongregason di Margaret, kontinua kordadu duránti 36 óra. El staba okupadu na organiza trabadju di ansions, timenti es staba ta tenta pâpia i kuida di uns 450 irmon ku irmans ki tevi ki sai di ses kaza. (2 Cor. 11:27) Asi, tudu kes ki staba ta meste di un lugar pa fika resebe ajuda.

10. Pamodi ki ansions ta atxa ma faze vizita di pastoreiu é un kuza inportanti? (João 21:15)

¹⁰ Ansions ten responsabilidadi di nkoraja irmons ku bazi na Bíblia i djuda kes ki sta dizanimadu. (1 Ped. 5:2) Si kontise  un disgrasa, primeru ansions debe djobe dretu si kada irmon sta suguru, tene kumida, ropa i un lugar di fika. Má talvês dipôs di txeu mês, inda kes irmon ta meste di nkorajamentu i konsolu ku bazi na Bíblia. (Lé João 21:15.) Arold, ki ta faze párti di un Kumison di Filial i ki faze un runion ku txeu irmon i irmans ki sufri un disgrasa, fla: “Ta leba txeu ténpu pa es rekupera. Ses vida pode kumesa ta bira normal, má inda es ta kontinua ta lenbra di un algen ki es ta ama ki móre, di un kuza ki tinha txeu valor ki es perde ô di un situason prigozu ki es pasa pa el. Kes lenbransa li pode pô-s ta xinti tristi otu bês. Kel-li é ka pamodi es tene falta di fé, má é un kuza normal ki algen ta xinti.”

11. Kuzê ki famílias pode meste?

¹¹ Ansions ta leba asériu kel konsedju di ‘txora ku kes ki sta ta txora.’ (Rom. 12:15) Ansions meste garanti kes ki pasa pa un disgrasa ma Jeová i irmons ku irmans inda ta ama-s. Ansions krê djuda famílias kontinua ta faze kuzas sima orason, studa, sisti runion i bai pregason. Tanbê es pode insentiva pai ku mai pa djuda ses fidjus konsentra na kes kuza ki ninhun disgrasa ka pode kaba ku el. Pai ku mai, nhos lenbra nhos fidjus ma Jeová sénpri ta ser ses amigu i sénpri el ta djuda-s. I nhos splika-s ma es pode kontinua ta faze párti di un família na mundu interu di irmons ku irmans ki sta prontu pa djuda-s. — 1 Ped. 2:17.

12. Kuzê ki otus algen pode faze pa djuda óras ki kontise un disgrasa? (Odja fotu.)

¹² Kuzê ki otus algen pode faze. Si kontise un disgrasa pértu di undi ki bu ta mora, pergunta kes ansion modi ki bu pode djuda. Talvês bu pode dexa kes irmon ki perde ses kaza ô kes ki sta ta djuda na kel disgrasa, fika na bu kaza pa algun ténpu. Bu pode leba kumida ô otus kuza pa kes irmon ki meste. Si kontise un disgrasa na un lugar más lonji, modi ki bu pode djuda? Faze orason pa kes ki fika prujudikadu. (2 Cor. 1:8-11) Talvês bu ta konsigi faze kontribuison pa trabadju na mundu interu ki dipôs ta uzadu óras ki kontise un disgrasa. (2 Cor. 8:2-5) Si bu ta konsigi bai pa kel lugar ki kontise un disgrasa pa ba djuda, pergunta ansions kuzê ki bu pode faze pa djuda. Si bu konvidadu pa djuda, talvês bu ta  dadu algun trenu, asi pa bu pode djuda di midjór manera.

13. Ki prublémas nos irmons ta pasa pa el na kes país ki trabadju di pregason é proibidu?

¹³ Na kes país ki nos trabadju di pregason é proibidu, pirsigison sta ta bira vida di irmons más difísil. Irmons na kes país li inda ten falta di dinheru, es ta duense i kes algen ki es ta ama ta móre. Má pamodi nos trabadju é proibidu, ansions talvês ka ta konsigi ba vizita kes ki meste nkorajamentu ô pâpia ku es sima es ta krê. É kel-li ki kontise ku Andrei, ki dja nu papiaba di el na kel otu studu. Un irman di se grupu pa pregason tinha falta di dinheru. Dipôs, kel irman panha un asidenti di karu. El staba ta meste faze txeu operason i el ka ta konsigi trabadjaba. Sikrê ku proibison i ku COVID-19, kes irmon faze kel ki es pode pa djuda i Jeová staba ta odja-s.

14. Modi ki ansions pode da izénplu di kunfia na Jeová?

¹⁴ Kuzê ki ansions pode faze. Andrei faze orason i el faze kel ki el ta konsigiba. Modi ki Jeová responde se orason? El motiva alguns irmon na kongregason ki ta pode fazeba más pa djudaba kel irman. Alguns da-l buleia pa bai konsulta i otus da-l dinheru. Jeová motiva-s pa es faze kel ki es ta konsigiba i el abênsua ses union i kel sforsu ki es faze ku koraji. (Heb. 13:16) Ansions, óras ki nos trabadju sta proibidu, nhos pergunta otus irmon si es pode djuda. (Jer. 36:5, 6) I más inportanti, nhos kunfia na Jeová. El pode djuda nhos da kes irmon ku irmans kes kuza ki es sta ta meste.

15. Modi ki nu pode kontinua unidu ku nos irmons óras ki nu ta pirsigidu?

¹⁵ Kuzê ki otus algen pode faze. Timenti nos trabadju sta proibidu, talvês nu ten ki djunta ku nos irmons na grupus más pikinoti. Pur isu, é txeu inportanti nu sta na pas ku kunpanheru. Nos luta é kóntra Satanás, ka kóntra kunpanheru. Dexa pasa fadjas di bus irmon ô ka bu spéra txeu ténpu pa rezolve kalker prubléma. (Pro. 19:11; Efé. 4:26) Sta prontu pa djuda kunpanheru. (Tito 3:14) Ajuda ki kes otu irmon da kel irman ki staba ta meste, tevi bons rezultadu na ses grupu  pa pregason. Es fika más unidu ku kunpanheru, sima un família. — Sal. 133:1.

16. Sima sta na Colossenses 4:3, 18, modi ki nu pode djuda nos irmons ki sta ta pasa pa pirsigison?

¹⁶ Monti di irmon ku irmans sta sirbi Jeová sikrê govérnus ta proíbi nos trabadju di pregason. Alguns di es sta prézu pamodi ses fé. Nu pode ora pa es i pa ses família. Tanbê nu pode ora pa kes ki ta mostra koraji pa apoia kes irmon ku irmans ki sta prézu, sikrê es ta kóre risku di podu prézu tanbê. Es ta nkoraja kes irmon pa kontinua ta kunfia na Jeová i ta da-s kes kuza ki es ta meste i ta difende-s na tribunal. c (Lé Colossenses 4:3, 18.) Ka bu skese ma bus orason pode djuda tudu kes irmon ku irmans li. — 2 Tes. 3:1, 2; 1 Tim. 2:1, 2.

17. Modi ki bu pode pripara gósi pa pirsigison?

¹⁷ Bo ku bu família pode pripara gósi pa pirsigison. (Atos 14:22) Ka bu tenta imajina tudu kuza mariadu ki pode kontise. Má, bira bu amizadi ku Jeová más fórti i djuda bus fidju faze mésmu kuza. Si alvês bu ta xinti preokupadu dimás, abri bu korason pa Deus. (Sal. 62:7, 8) Fla bu família tudu kes motivu ki ta pô-u ta kunfia na Jeová. d Si kontise un disgrasa, bu priparason i bu kunfiansa na Jeová ta poi bus fidju ta ten koraji i ta xinti pas.

18. Kuzê ki nu pode spéra pa futuru?

¹⁸ Pas di Deus ta pô-nu ta xinti suguru. (Fil. 4:6, 7) Kel-li krê fla ma é através di kel pas li ki Jeová ta poi nos korason ta fika kalmu sikrê ku duénsa, disgrasa i pirsigison ki nu pode pasa pa el gósi. El ta uza ansions ki ta trabadja duru pa faze-nu vizitas di pastoreiu. I el ta da nos tudu priviléjiu di djuda kunpanheru. Kel ténpu di pas ki nu sta ta vive na el gósi, ta djuda-nu aguenta kes provason ki nu pode ben pasa pa el más txeu inda i ti mésmu ‘grandi tribulason’. (Mat. 24:21) Gósi, nu meste mante pas i djuda otus faze mésmu kuza. Má dipôs di grandi tribulason, nu ka ta ben pasa pa prublémas ki ta dexa-nu preokupadu. Ti ki enfin nu ta ben ten kel ki Jeová sénpri kreba pa nos, ki é pas di verdadi ki ta ben dura pa tudu ténpu. — Isa. 26:3, 4.