É ka kel-li ki el krê flaba. Má Davidi krê lovaba nómi di Deus pa’ tudu ténpu’.

Odja kuzê ki el skrebe na versíklus sima kel-li: ‘N ta ben kanta lovor pa bu nómi pa tudu ténpu, sima N ta ba ta kunpri nhas promésa tudu dia.’ ‘Ó Jeová, nha Deus, N ta lova-u di tudu nha korason; N ta glorifika bu nómi pa tudu ténpu’. ‘N ta lova bu nómi pa tudu ténpu.’ — Sal. 61:8; 86:12; 145:1, 2.

Davidi ka staba ta izajera ta atxa ma nunka el ka ta moreba. El sabia ma tudu algen ta móre pamodi pekadu. I el fla ma el éra pekador. (Gén. 3:3, 17-19; Sal. 51:4, 5) El sabia ma ti mésmu ómis ki Jeová staba kontenti ku es sima Abraon, Izaki i Jakó móre. I Davidi sabia ma un dia el ta moreba. (Sal. 37:25; 39:4) Má kes palavra ki sta na Salmo 61:8 ta mostra ma el tinha vontadi di lova Deus pa tudu ténpu ô timenti el staba bibu. — 2 Sam. 7:12.

Alguns di kes kuza ki Davidi skrebe na kel ténpu éra sobri se vida, sima nu pode odja na kes informason ki sta pa riba di Salmo 18, 51 i 52. Na Salmo 23, Davidi fla ma Jeová é sima un pastor ki ta orienta, ki ta kuida i ki ta proteje se ovelhas. Davidi éra un pastor asi. I el krê sirbiba Deus pa ‘tudu ténpu di se vida.’ — Sal. 23:6.

Lenbra tanbê ma é Jeová ki poi Davidi ta skrebe kes kuza li. Kuzê ki el skrebe ta inklui profesias ki staba pa ben kontise txeu ténpu dipôs. Pur izénplu, na Salmo 110, Davidi fla ma ta ben tinha un ténpu ki se Sinhor ta ben ‘xintaba na ladu direita [di Deus]’ na séu i el ta resebeba txeu puder. Puder pa faze kuzê? Pa manda na kes inimigu di Deus i pa ‘julga i kastiga kes nason’ na téra. Misías ki ta ben governaba na séu i ki ta sérba ‘saserdóti pa tudu ténpu’ ben di família di Davidi. (Sal. 110:1-6) Jizus fla ma kel profesia ki sta na Salmo 110 éra sobri el i el ta ben kunpriba na futuru. — Mat. 22:41-45.

Jeová poi Davidi ta skrebe sobri se ténpu i sobri futuru óras ki el ben resusitadu i asi el ta pode lova Jeová pa tudu ténpu. Salmo 37:10, 11, 29 pode aplika na ténpu ki el skrebedu i tanbê na futuru. Kes versíklu li kunpri na pasadu na téra di Israel i tanbê el ta ben kunpri na futuru óras ki Deus ben kunpri se promésas. — Odja parágrafu 8 na artigu ku téma: “Bu ta ben sta ku mi na Paraízu” na kel revista li.

Salmo 61:8 i otus versíklu kuazi sima el ta mostra ma Davidi krê daba Jeová glória na Israel ti ki el moreba. I kes versíklu li ta mostra kuzê ki Davidi ta ben konsigi faze na futuru óras ki Jeová resusita-l.