1-2. Ki kuzas pode pô-nu ta txora?

 NOS tudu un óra ô otu dja nu txora. Óras ki nu ta pasa pa un situason ki ta dexa-nu txeu kontenti, nu pode txora di alegria. Talvês dja bu txora kantu kontise un kuza inportanti ô spesial ku bo. Pur izénplu, kantu bu fidju nase, kantu bu lenbra di un kuza sábi ki kontise, ô kantu bu odja un amigu ki bu krê txeu ki dja ten txeu ténpu ki nhos ka odjaba.

² Má txeu bês, nos lágua ta mostra kel dór ki nu sta xinti na fundu di korason. Pur izénplu, nu pode txora óras ki un algen diziludi-nu txeu. Tanbê nu pode txora óras ki nu sta sufri txeu pamodi un duénsa ô óras ki móre un algen ki nu ta ama. Na kes situason li, talvês nu pode xinti sima proféta Jeremias kantu Babilónia distrui Jiruzalen. Jeremias fla: ‘Lágua sta ta sai di nhas odju sima agu na rubera... Lágua sta ta kai di nhas odju; N sta ta txora sen para’. — Lam. 3:48, 49.

3. Modi ki Jeová ta xinti óras ki el ta odja se sérvus ta sufri? (Isaías 63:9)

³ Jeová sabe dretu kantu bês ki nu ta txora pamodi un situason difísil. Bíblia ta da-nu serteza ma Jeová sta sienti óras ki se sérvus ta pasa pa kalker situason difísil, i el ta obi-nu óras ki nu ta inplora pa se ajuda. (Sal. 34:15) Má Jeová ta faze más di ki sô odja-nu i obi-nu. Sima un pai ki ta ama ses fidju, el ta fika txeu tristi óras ki el ta odja ses fidju ta txora i el ta aji faxi pa djuda-s. — Lé Isaías 63:9.

4. Ki izénplus di Bíblia nu sta ben odja i kuzê ki nu ta ben prende sobri Jeová?

 ⁴ Jeová ta mostra na se Palavra, modi ki el ta reaji óras ki el ta odja ses sérvu ta txora. Nu pode odja kel-li óras ki nu ta lé izénplus di Ana, Davidi i rei Ezekias. Kuzê ki pô-s ta txora? Modi ki Jeová djuda-s? Modi ki ses izénplu pode djuda-nu óras ki nu ta txora pamodi tristéza, traison ô óras ki nu ta xinti ma un situason ka ten speransa más?

LÁGUAS DI TRISTÉZA

5. Modi ki situason di Ana pô-l ta xinti?

⁵ Ana pasa pa txeu prubléma ki pô-l ta txora di tristéza. Un di kes prubléma éra pamodi se maridu tinha otu mudjer. Nómi di kel mudjer éra Pinina i el ta maltrataba Ana. Tanbê, Ana ka ta pode tinha fidju i Pinina tinha txeu fidju. (1 Sam. 1:1, 2) Pinina ta provokaba Ana pamodi el ka ta pode tinha fidju. Modi ki bu ta xintiba si bu staba na kel situason li? Ana ta fikaba txeu tristi ki “el ta txoraba i nen el ka ta kumeba” i se korason fika “dizanimadu dimás”. — 1 Sam. 1:6, 7, 10.

6. Kuzê ki Ana faze pa atxa konsolu?

⁶ Kuzê ki Ana faze pa atxa konsolu? Un di kes kuza ki djuda Ana foi ba adora Jeová na tabernáklu, ki éra séntru di adorason verdaderu. Talvês na algun lugar pértu di entrada di tabernáklu, Ana “kumesa ta faze orason pa Jeová i ta txora sen para.” El fla Jeová pa el ‘odja modi ki el staba ta sufri i pa lenbra di el’. (1 Sam. 1:10b, 11) Ana fla Jeová na orason kuzê ki el staba ta pensa i ta xinti. Jeová xinti txeu tristi kantu el odja se fidju-fémia ta txora.

7. Modi ki Ana xinti dipôs ki el fla Jeová na orason modi ki el staba ta xinti?

⁷ Modi ki Ana xinti kantu el fla Jeová na orason modi ki el staba ta xinti i dipôs ki Eli, ki éra saserdóti prinsipal, da-l serteza ma Jeová ta respondeba se orason? Bíblia ta fla: “El bai se kaminhu, el kume i se róstu ka staba ta parse tristi más.” (1 Sam. 1:17, 18) Mésmu ki kel situason ki Ana staba ta pasa pa el inda ka mudaba, el xinti más kalmu. El kunfia ma Jeová ta intendeba ses sentimentu, se prubléma i ma el ta ba djudaba el. I é kel-li ki Jeová faze. El intende kuzê ki Ana staba ta xinti, el obi se orason i más tardi el abênsua-l pamodi el da-l fidju. — 1 Sam. 1:19, 20; 2:21.

8-9. Sima sta na Ebreus 10:24, 25, pamodi ki nu debe faze tudu kel ki nu ta pode pa nu sta na runion? (Odja fotu.)

⁸ Kuzê ki nu ta prende. Bu sta ta lida ku un situason difísil ki sta ta pô-u ta txora  di tristéza? Talvês bu sta ta sufri pamodi un família ô un amigu móre? Na un situason sima kel-li é normal bu krê fika bo sô. Má, sima Ana atxa konsolu i inkorajamentu kantu ki el bai pa tabernáklu, bo tanbê bu pode atxa konsolu óras ki bu ta partisipa na runion, mésmu si bu ka sta xinti dretu. (Lé Ebreus 10:24, 25.) Na runion, óras ki nu ta obi testus di Bíblia ki ta konsola-nu, Jeová pode djuda-nu muda kes pensamentu negativu pa pensamentus puzitivu. Kel-li pode djuda-nu kontrola kuzê ki nu sta xinti sikrê nos situason ka muda lógu.

⁹ Na nos runion, nos irmons ku irmans ta konsola-nu i es ta mostra-nu modi ki es ta ama-nu i nu ta xinti midjór óras ki nu sta djuntu ku es. (1 Tes. 5:11, 14) Odja spiriénsia di un irmon ki é pioneru spesial i ki se mudjer móre. El fla: “Alvês N ta meste fika mi sô pamodi N ka ta konsigi para di txora. Má runion sta ta da-m kel inkorajamentu ki N meste. Kes palavra bunitu ki nhas irmons ku irmans ta fla-m sta ta konsola-m. Sikrê N sta xinti preokupadu ô ku ansiadadi antis di bai runion, sénpri N ta xinti midjór óras ki N sta la.” Óras ki nu sta na runion, Jeová pode uza nos irmons ku irmans pa djuda-nu.

10. Modi ki nu pode sigi izénplu di Ana óras ki nu sta tristi dimás?

¹⁰ Ana xinti midjór dipôs ki el faze orason pa Jeová i el fla-l modi ki el staba ta xinti. Bo tanbê bu pode “bota tudu [bus] preokupason riba di [Jeová],” ku serteza ma el ta obi-u. (1 Ped. 5:7) Un irman ki bandidus mata se maridu fla: “N xinti sima ki nha korason kebradu padás-padás i ma nunka el ka ta kuraba. N ta xintiba konsoladu óras ki N ta oraba pa Jeová, ki é nha Pai ki sta séu. Alvês N ka ta konsigi atxaba palavras sértu, má el ta intendeba mi. Óras ki N ta xintiba tristi dimás, N ta oraba pa el da-m pas. Nton, lógu N ta xintiba kalmu i N ta konsigi fazeba kel ki N meste fazeba na kel dia.” Óras ki bu ta txora i bu ta konta Jeová bus prubléma, el tanbê el ta xinti tristi i el ta intende dretu modi ki bu sta ta xinti. Sikrê kel prubléma ki bu sta pasa pa el ka kaba, Jeová pode kalma bu korason i djuda-u xinti pas. (Sal. 94:19; Flp. 4:6, 7) El ta abênsua-u pamodi bu sta ta aguenta firmi di manera lial. — Ebr. 11:6.

LÁGUAS DI TRAISON

11. Modi ki kel situason difísil ki Davidi pasa pa el pô-l ta xinti?

¹¹ Duránti se vida, Davidi pasa pa txeu situason difísil ki pô-l ta txora. Txeu algen ta odiaba el, ti mésmu alguns di ses amigu i família ka foi lial pa el i es trai-l. (1 Sam. 19:10, 11; 2 Sam. 15:10-14, 30) Duránti un ténpu txeu difísil di se vida, el skrebe: ‘N sta kansadu di jeme; noti interu N ta intxi nha kama di lágua; N ta intxi nha kama di txoru ti ki ta baza.’ Pamodi ki Davidi staba ta xinti si? El splika: ‘Pamodi tudu kes ki ta ofende-m.’ (Sal. 6:6, 7) Kes kuza ki otus algen faze, poi Davidi ta xinti dór di tal manera ki el ta txoraba txeu.

12. Sima sta na Salmo 56:8, di kuzê ki Davidi staba konvensidu?

¹² Sikrê Davidi pasa pa situasons difísil, el tinha serteza ma Jeová ta amaba el. El skrebe: ‘Jeová ta ben obi-m ta txora.’ (Sal. 6:8) Na un otu situason, el skrebe kes palavra bunitu ki nu ta atxa na Salmo 56:8. (Lé.) Kes palavra ki el  skrebe ta mostra ma Jeová ta ama-nu txeu i ma el ta preokupa ku kel ki nu ta xinti. Davidi xinti sima si Jeová poi se lágua na un barkinu ô sima si el skrebe-l na un livru. Davidi tinha serteza ma Jeová ta odjaba i el ta lenbraba di se dór. Davidi staba konvensidu ma se Pai na séu ki ta ama-l txeu staba sienti, ka sô ku kel ki kontiseba ku el má tanbê modi ki kel-la pô-l ta xinti.

13. Kuzê ki pode konsola-u óras ki otus algen ta diziludi-u? (Odja fotu ku dizenhu.)

¹³ Kuzê ki nu ta prende. Bu sta ta sufri pamodi un algen ki bu ta kunfia na el diziludi-u ô trai-u? Talvês bu sta ta sufri pamodi bu namoru ô bu kazamentu tirmina sen bu staba ta spera, ô talvês pamodi un algen ki bu ta ama para di sirbi Jeová. Un irmon ki se mudjer faze adultériu i bandona-l fla: “N fika spantadu i N ka staba ta kridita ma kel-li kontise ku mi. N xinti sen valor, tristi i ku raiba.” Si un algen trai-u ô diziludi-u bu pode fika konsoladu di sabe ma Jeová nunka ka ta bandona-u. Un irmon fla: “N da kónta ma nu pode fadja ku kunpanheru, má Jeová é nos Rótxa. Ka ta inporta kuzê ki kontise, sénpri el ta sta la pa nos. El ka ta bandona kes ki é lial pa el.” (Sal. 37:28) Tanbê lenbra ma kel amor ki Jeová ten pa bo é mutu más txeu di ki amor ki kalker ómi ô mudjer ten pa bo. Sikrê é txeu difísil óras ki un algen trai-u, kel-li ka ta afeta kel preokupason ki Jeová ten pa bo. (Rom. 8:38, 39) Un kuza ki bu debe lenbra é ma ka ta inporta modi ki un algen trata-u, bu Pai ki sta na séu ta ama-u.

14. Ki garantia Salmo 34:18 ta da-nu?

¹⁴ Óras ki un algen trai-nu, tanbê nu pode atxa konsolu na kes palavra di Davidi ki sta na Salmo 34:18. (Lé.) Un livru ta fla ma kes palavra ‘tene spritu dizanimadu’ pode sta ta pâpia di “kes algen ki ka sta spera nada di bon”. Modi ki Jeová ta djuda kes algen ki sta xinti si pamodi es diziludidu txeu? Sima un pai ki ta ama se fidju ta karega-l i konsola-l óras ki el sta tristi, Jeová ‘sta pértu’ di nos tanbê. Sénpri el ta mostra-nu konpaxon i el sta prontu pa djuda-nu si nu sta xinti dizanimadu pamodi un algen trai-nu ô bandona-nu. El tene vontadi di konsola i kalma nos korason ki sta maguadu i nos spritu dizanimadu. El ta da-nu txeu kuza ki ta djuda-nu aguenta firmi na kes difikuldadi ki nu sta pasa pa el. — Isa. 65:17.

 LÁGUAS PAMODI DIZUSPERU

15. Ki situason Ezekias pasa pa el ki pô-l ta txora?

¹⁵ Kantu Ezekias, ki éra rei di Judá, tinha 39 anu el diskubri ma el tinha un duénsa gravi. Proféta Izaías leba-l un mensajen di Jeová ta fla-l ma el ta moreba pamodi kel duénsa. (2 Reis 20:1) Ta parse ma ka tinha ninhun speransa pa Ezekias. Kantu Ezekias obi kel notísia kasábi li, el fika tristi dimás ki el txora txeu. El faze orason pa Jeová ta inplora se ajuda. — 2 Reis 20:2, 3.

16. Modi ki Jeová responde orason di Ezekias?

¹⁶ Kantu Jeová obi orason di Ezekias i el odja se lágua el xinti péna di el i el fla-l: ‘N obi bu orason i N odja bus lágua. Pur isu, N ta kura-u.’ Através di Izaías, Jeová mostra-l mizerikórdia i el promete-l ma el ta viveba más txeu i ma el ta salvaba Jiruzalen di mô di gentis di Asíria. — 2 Reis 20:4-6.

17. Modi ki Jeová ta djuda-nu óras ki nu ta lida ku un prubléma di saúdi gravi? (Salmo 41:3) (Odja fotu ku dizenhu.)

¹⁷ Kuzê ki nu ta prende. Bu sta ta lida ku un prubléma di saúdi ki ta parse ma ka ten speransa? Abri bu korason pa Jeová na orason sikrê ta txora. Bíblia ta da-nu serteza ma kel “Pai xeiu di mizerikórdia i Deus di tudu konsolu” ta djuda-nu na tudu nos provason. (2 Kor. 1:3, 4) Oji nu ka pode spera ma Jeová ta kaba-nu ku tudu nos prubléma, má nu pode konta ku el pa djuda-nu lida ku tudu kes prubléma. (Lé Salmo 41:3.) Jeová ta uza se spritu santu pa da-nu forsa, sabedoria i pas déntu nos pa lida ku kes prubléma. (Pro. 18:14; Flp. 4:13) Tanbê, el ta konsola-nu através di kel speransa ki nu ta atxa na Bíblia di ben odja tudu tipu di duénsa ta kabadu ku el. — Isa. 33:24.

18. Ki testu di Bíblia ta konsola-u óras ki bu sta ta pasa pa un situason difísil? (Odja kuadru “ Kuzê ki Jeová ta fla-nu pa konsola-nu óras ki nu sta ta txora.”)

¹⁸ Kuzê ki Jeová fla Ezekias konsola-l. Di mésmu manera, nos tanbê nu pode atxa konsolu na Palavra di Deus. Jeová dexa kes palavra ki ta da-nu koraji i ki pode anima-nu na Bíblia pa djuda-nu óras ki nu sta pasa pa un situason txeu difísil. (Rom. 15:4) Kantu un irman na Áfrika Osidental atxadu ku kánser, el txora txeu bês. El fla: “Un di kes testu ki konsola-m foi Isaías 26:3. Sikrê nu ka ta konsigi kontrola tudu kes prubléma ki nu ta pasa pa el, kel versíklu li, da-m serteza ma Jeová pode da-nu pas déntu nos ki ta djuda-nu sabe lida ku kel situason.” Ten algun testu di Bíblia ki ta konsola-u óras ki bu sta pasa pa un  situason ki ta parse ma ka ten soluson?

19. Ki kuzas sábi nu pode spera ma ta ben kontise na futuru?

¹⁹ Nu sta ta vive na ténpu di fin, i nu ta spera ma kes kuza ki ta pô-nu ta txora ta kontinua ta bira más txeu. Má, sima nu odja na kes izénplu di Ana, Davidi i rei Ezekias, Jeová ta odja nos lágua i el ta xinti txeu tristi pamodi kel-la. Nos lágua ten txeu valor pa Jeová. Nton, óras ki nu sta pasa pa un situason txeu difísil nu debe abri nos korason pa Jeová na orason. Nunka nu ka debe fika lonji di nos irmons ku irmans na kongregason ki ta ama-nu. I nu pode kontinua ta atxa kes palavra ki ta konsola-nu na Bíblia. Nu pode ten serteza ma si nu kontinua ta aguenta firmi di manera fiel, Jeová ta ben rekonpensa-nu. Kel-li ta inklui kel promésa sábi di ben linpa tudu lágua di nos odju pamodi tristéza, traison i óras ki nu ta xinti ma un situason ka ten soluson. (Apo. 21:4) Nton, nu ta ben txora sô di alegria.