STUDU 48
KÁNTIKU 97 Vida ta dipende di Palavra di Deus
Kuzê ki nu ta prende ku kel milagri di pon ki Jizus faze
“Ami é kel pon di vida. Ken ki ben na mi nunka más el ka ta xinti fómi”. — JUAN 6:35.
ASUNTU PRINSIPAL
Pâpia di kel stória ki nu ta atxa na Juan kapítlu 6 undi Jizus poi kel pon i kel pexi bira más txeu pa da un monti di algen kumida, i odja ki lisons ki nu ta prende di kel stória li.
1. Di ki manera pon éra inportanti na vida di pesoas kantu Bíblia skrebedu?
PON éra un di kes kumida prinsipal na ténpu ki Bíblia skrebedu. (Jén. 14:18; Luk. 4:4) Na verdadi, el éra inportanti di tal manera ki alvês Bíblia ta uza palavra “pon” pa pâpia di kumida. (Mat. 6:11; Atus 20:7) Tanbê pon foi un kuza inportanti na dôs milagri ki Jizus faze ki nu konxe dretu. (Mat. 16:9, 10) Nu ta atxa un di kes stória li na Juan kapítlu 6. Timenti nu ta ba ta studa kel stória li nu ta ben prende kuzas ki nu pode aplika oji.
2. Na ki situason milharis di algen mesteba kumida?
2 Dipôs ki apóstlus di Jizus tirmina pregason, Jizus leba-s na barku pa kel otu ladu di mar di Galilea asi pa es pode diskansaba. (Mar. 6:7, 30-32; Luk. 9:10) El leba-s pa un lugar izoladu ki ta fikaba pértu di Betsaida. Má kel óra txiga milharis di algen ki krê odjaba Jizus. Jizus ka iginora-s. Ku bondadi el tra ténpu pa inxina-s sobri Reinu i pa kura kes algen ki staba duenti. Pamodi staba ta fika tardi, kes disiplu staba ta pergunta modi ki tudu kes algen pode ranjaba kumida pa es kume. Talvês alguns di es tinha poku kumida ku es, má maioria di es meste baba pa kes vila i kunpra kumida. (Mat. 14:15; Juan 6:4, 5) Kuzê ki Jizus ta ba fazeba?
JIZUS FAZE UN MILAGRI KU PON
3. Kuzê ki Jizus fla se apóstlus pa faze pa kel monti di algen? (Odja dizenhu na kapa.)
3 Jizus fla se apóstlus: “Es ka meste bai ses kaminhu. Nhos da-s anhos algun kuza pa es kume.” (Mat. 14:16) Kel-li éra un prubléma pamodi tinha uns 5 mil ómi. Dja ki tinha mudjeris i kriansas la, talvês tinha uns 15 mil algen pa da kumida. (Mat. 14:21) André fla: “Sta un rapazinhu li ki tene sinku pon di sevada i dôs pexi pikinoti. Má kel-li é kuzê pa tantu algen?” (Juan 6:9) Pon di sevada éra un kumida ki pesoas póbri i otus algen ta kustuma kumeba i pode ser ki kes pexi pikinoti éra salgadu i séku. Má simé, kes pon i kes pexi ki kel rapazinhu tinha ka ta txigaba pa da tudu kes algen kumida.
Dipôs ki Jizus inxina pesoas sobri Jeová, ku bondadi el da-s kumida pa es kume. (Odja parágrafu 3.)
4. Kuzê ki nu pode prende na Juan 6:11-13? (Odja fotus.)
4 Dja ki Jizus krê resebeba kel monti di algen dretu el fla kes algen pa es xinta grupu-grupu na rélva. (Mar. 6:39, 40; Lé Juan 6:11-13.) Dipôs Jizus agradese se Pai pa kes pon ku pexi. Kantu Jizus faze kel-li, el mostra ma é Deus ki daba kel kumida. É inportanti nu sigi izénplu di Jizus óras ki nu ta faze orason antis di kume, ô nu sta nos sô ô si sta otus algen djuntu ku nos. Nton, Jizus dividi kel kumida i kes algen kume ti ki es fika fartu. Tinha txeu kumida ki pesoas ka konsigi kume tudu. Jizus ka kreba pa kel kumida stragaba. Dipôs Jizus fla se disiplus pa djunta kel kumida ki resta, talvês pa es pode kumeba el más tardi. Jizus dexa un bon izénplu di modi ki nu ta uza kes kuza ki nu ten ku sabedoria. Si bo é pai ô mai bu pode studa kel stória li djuntu ku bus fidju i dipôs nhos ta pâpia sobri kes lison ki nhos prende sobri orason, resebe otus algen dretu i gosta di da.
Pensa na kel pergunta li: ‘N sta ta sigi izénplu di Jizus di faze orason antis di kume?’ (Odja parágrafu 4.)
5. Kuzê ki pesoas krê fazeba dipôs ki es odja kes kuza ki Jizus faze na kel dia, má kuzê ki Jizus faze dipôs?
5 Povu fika dimiradu ku manera ki Jizus ta inxinaba i ku kes milagri ki el faze pa kura kes algen ki staba duenti. Es sabia ma Muizés flaba ma Deus ta mandaba un grandi proféta. Nton, pode ser ki es pensa ma Jizus éra kel proféta. (Deut. 18:15-18) Si es ta pensaba kel-la, pode parseba ma Jizus ta sérba un bon governanti, ki éra kapás di da tudu algen na Israel kumida. Pur isu, kel monti di algen krê ‘biraba el rei’. (Juan 6:14, 15) Si Jizus dexaba kel-li kontiseba, el staba ta partisipa na pulítika di judeus ki éra governadu pa romanus. El faze kel-li? Nau. Bíblia ta fla ma Jizus ‘bai pa monti el sô.’ Sikrê ku preson di otus algen Jizus ka mete na pulítika. Kel-li é un bon lison pa nos!
6. Modi ki nu pode imita izénplu di Jizus? (Odja dizenhu.)
6 É klaru ki otus algen ka ta pidi-nu pa nu poi pon ta bira txeu ô pa nu kura otus algen, nen es ka ta tenta pô-nu bira rei ô governanti di un país. Má talvês es pode insentiva-nu pa nu mete na pulítika. Pur izénplu, pa nu vota ô pa nu apoia un algen ki es ta atxa ma ta ben midjora kuzas. Má izénplu di Jizus é klaru. El nega mete na asuntus di pulítika i ti mésmu el fla: “Nha Reinu ka ta faze párti di es mundu.” (Juan 17:14; 18:36) Sérvus di Jeová oji meste imita manera di pensa di Jizus i se izénplu. Nu ta apoia, nu ta prega i nu ta ora pa se Reinu. (Mat. 6:10) Nu ben pâpia más un bokadinhu sobri kel milagri ki Jizus faze di pon i odja kuzê más ki nu pode prende.
Jizus ka involve na pulítika i nu debe sigi se izénplu tanbê (Odja parágrafu 6.)
‘KUZÊ KI KEL MILAGRI DI PON TA SIGNIFIKABA’
7. Kuzê ki Jizus faze i modi ki se apóstlus reaji? (Juan 6:16-20)
7 Dipôs ki Jizus da kel monti di algen kumida, el poi se disiplus ta bai pa Kafarnaun na barku i el bai pa un monti, asi pa pesoas ka poba el ta bira rei. (Lé Juan 6:16-20.) Timenti kes apóstlu staba ta bai, kumesa un tenporal ku béntu i óndias fórti. Dipôs Jizus bai ta anda riba di agu i el bai atxa-s. I el fla Pedru pa anda riba di agu tanbê. (Mat. 14:22-31) Lógu ki Jizus entra na barku, béntu para. Disiplus fika spantadu i es fla: “Abo é Fidju di Deus própi.” a (Mat. 14:33) É interesanti pamodi disiplus di Jizus fla kel-li dipôs ki el anda riba di agu i es ka fla kel-li dipôs ki el faze kel milagri ku pon. Odja kuzê ki Markus skrebe sobri kel-li. El fla: “[Kes apóstlu] fika txeu spantadu, pamodi es ka intendeba kuzê ki kel milagri di pon siginifikaba, i ses korason kontinua sen intende.” (Mar. 6:50-52) Kes disiplu ka intende ma Jeová daba Jizus puder pa faze más di ki sô kel milagri di pon. Má lógu dipôs, Jizus lenbra-s di kel milagri di pon i kel-li ta inxina-nu un otu lison.
8-9. Pamodi ki kel monti di algen tenta atxa Jizus? (Juan 6:26, 27)
8 Kel monti di algen ki Jizus da kumida mostra ma es staba más preokupadu ku ses nisisidadi i ku ses dizeju. Modi ki es mostra kel-li? Na kel otu dia es odja ma Jizus i se apóstlus staba ta dexaba es. Otus barku txiga di Tibérias, nton kel monti di algen entra na kes barku i es bai pa Kafarnaun pa bai atxa Jizus. (Juan 6:22-24) Es bai prinsipalmenti pa es ba obi más kuzas sobri Reinu? Nau. Es bai prinsipalmenti pamodi es kreba pa Jizus daba es más pon. Modi ki nu sabe kel-li?
9 Repara kuzê ki kontise kantu kel monti di algen atxa Jizus pértu di Kafarnaun. Jizus fla-s ma es bai na el sô pamodi es kreba más pon. El sabia ma es “kume pon i [es] fika fartu” ku kel “kumida ki ta kaba”. El fla-s pa es trabadjaba pa kel “kumida ki ta dura i ki ta leba pa vida pa tudu ténpu”. (Lé Juan 6:26, 27.) Jizus fla-s ma se Pai ta daba es kel kumida la. Kantu kes algen obi ma tinha kumida ki ta daba es vida pa tudu ténpu talvês es fika spantadu. Ki kumida pode fazeba kel-li i modi ki kes algen ki staba ta obi Jizus pode resebeba el?
10. Kuzê ki pesoas meste fazeba pa es tinha “vida pa tudu ténpu”?
10 Kes judeu krê sabeba kuzê ki es meste fazeba pa es resebeba kel kumida. Talvês es staba ta pensa na kes kuza ki Lei di Muizés ta flaba ma es meste fazeba. Má Jizus fla-s: “Kel-li é trabadju di Deus: pa nhos ten fé na kel ki el manda.” (Juan 6:28, 29) Es meste tinha fé na Jizus, ki é kel algen ki Deus manda, asi pa es pode “ten vida pa tudu ténpu.” Na verdadi, Jizus dja papiaba sobri kel-li antis. (Juan 3:16-18, 36) I dipôs el ta ben papiaba más sobri modi ki nu pode ten vida pa tudu ténpu. — Juan 17:3.
11. Modi ki kes judeu mostra ma inda es staba preokupadu sô ku kumida? (Salmo 78:24, 25)
11 Kes judeu ka seta kel ensinu di Jizus sobri kel novu “trabadju di Deus”. Es pergunta-l: “Ki milagri bu sta ben faze pa nu odja i pa nu kridita na bo?” (Juan 6:30) Es fla ma ses gentis grandi na ténpu di Muizés dadu maná, ki pode sérba konparadu ku pon. (Nee. 9:15; Lé Salmo 78:24, 25.) Kel-li ta mostra klaru ma es staba preokupadu sô ku kumida. I dipôs kantu Jizus pâpia ku es di “kel pon verdaderu ki ben di séu” ki diferenti di maná pode daba es vida pa tudu ténpu es ka pergunta-l kuzê ki kel-la siginifikaba. (Juan 6:32) Es staba konsentradu na ses nisisidadi ki es ka obi kuzê ki Jizus staba ta tenta inxina-s sobri ganha vida pa tudu ténpu. Kuzê ki nu ta prende di kel stória li?
KUZÊ KI DEBE SER MÁS INPORTANTI PA NOS
12. Modi ki Jizus mostra kuzê ki é más inportanti?
12 Juan kapítlu 6 ten un lison inportanti. Obi ku Deus i ten un bon amizadi ku el debe ser kel kuza más inportanti pa nos. Lenbra ma Jizus pâpia di kel-li kantu ki el nega kes tentason di Satanás. (Mat. 4:3, 4) I na kel diskursu ki el faze na monti, el mostra ma é inportanti pa nos ten un bon amizadi ku Deus. (Mat. 5:3) Nton, nu debe pensa na kel pergunta li: ‘Manera ki N ta vive ta mostra ma N ta preokupa más ku nha amizadi ku Jeová di ki satisfaze nhas própi dizeju?’
13. (a) Pamodi ki é ka mariadu fika kontenti ku kumida? (b) Ku kuzê ki nu debe ten kuidadu? (1 Koríntius 10:6, 7, 11)
13 É ka mariadu ora pa kes kuza ki nu meste i fika kontenti ku es. (Luk. 11:3) Bíblia ta fla ma é bon pa un algen ‘kume i bebe’ i ma kel-li ta ‘ben di mô di Deus verdaderu’. (Ecl. 2:24; 8:15; Tia. 1:17) Má simé nu meste toma kuidadu pa kuzas material ka bira más inportanti na nos vida. Apóstlu Paulu pâpia di kel-li kantu ki el skrebe pa kes kriston ki staba ta vive na kel ténpu ki Jiruzalen staba kuazi ta ser distruídu. El pâpia di kel mau izénplu di israelitas kantu ki es staba na dizértu i kuzê ki es faze pértu di monti Sinai. El aviza kes kriston pa “ka dizeja kes kuza ki ta prujudika-nu, sima [kes israelita] dizeja.” (Lé 1 Koríntius 10:6, 7, 11.) Jeová faze un milagri i el da israelitas kumida. Má pamodi ses ganánsia, kel-li bira un ‘kuza ki ta prujudikaba es’. (Num. 11:4-6, 31-34) Kantu israelitas adora kel bizeru di oru, es mostra ma es ta preokupaba más ku kume, bebe i pasa sábi di ki obi ku Jeová. (Êxo. 32:4-6) Paulu uza ses izénplu pa sirbi di avizu pa kes kriston ki staba ta vive poku ténpu antis di Jiruzalen i se ténplu distruídu na anu 70 D.K. Oji nu sta ta vive pértu di fin di kel mundu li pur isu é inportanti nu leba asériu kel konsedju ki Paulu da.
14. Kuzê ki Bíblia ta fla sobri kumida na mundu novu?
14 Kantu Jizus fla pa nu ora pa “pon ki nu meste pa es dia li” tanbê el inxina-nu ora pa vontadi di Deus fazedu “na téra, sima na séu.” (Mat. 6:9-11) Modi ki bu ta imajina ma mundu ta ben ser na kel ténpu? Bíblia ta mostra ma vontadi di Deus pa téra ta inklui ten bon kumida. Na Isaías 25:6-8 ta mostra ma óras ki nu ben vive dibaxu di Reinu di Jeová ta ben ten kumida avontádi pa tudu algen. Salmo 72:16 ta fla: ‘Ta ben ten kumida avontádi na téra, i riba monti ta ben ten un monti kumida.’ Bu sta ku vontadi di ba faze kes kumida ki más bu gosta ô faze algun kumida ki nunka bu ka fazeba antis? Tanbê nu ta ben planta nos pé di uva i kume ses fruta. (Isa. 65:21, 22) I tudu algen na téra ta ben goza di kes kuza sábi li.
15. Na mundu novu kuzê ki kes algen ki ta ba resusitadu ta ba prende? (Juan 6:35)
15 Lé Juan 6:35. Pensa otu bês na kes algen ki kumeba kel pon i kel pexi ki Jizus daba es. Bu pode ben konxe alguns di es na resureison. Mésmu ki na pasadu es ka mostraba fé es pode ben ser resusitadu. (Juan 5:28, 29) Má es ten ki ben prende kal ki é siginifikadu di kes palavra di Jizus li: “Ami é kel pon di vida. Ken ki ben na mi nunka más el ka ta xinti fómi”. Es ten ki ben dizenvolve fé ma Jizus da se vida pa es. Má na kel ténpu, kalker algen ki resusitadu i kalker mininu ki nase na mundu novu ta ba prende verdadi sobri Jeová i kal ki é se vontadi. Nu ta ba fika txeu kontenti di inxina-s kes kuza li. Djuda otus algen dizenvolve un amizadi ku Jeová ta ba da-nu mutu más alegria di ki tudu kes pon ki nu ta ba kume na mundu novu.
16. Kuzê ki nu sta ben odja na kel otu studu?
16 Nu pâpia di un párti di kel stória ki sta na Juan kapítlu 6, má Jizus inxina más kuza sobri “vida pa tudu ténpu.” Kes judeu ki Jizus staba ta pâpia ku es meste obiba ku atenson kuzê ki el staba ta fla i nos tanbê nu meste faze mésmu kuza. Na kel otu studu nu ta ben kontinua ta pâpia di Juan kapítlu 6.
KÁNTIKU 20 Bu da-nu bu fidju ki bu krê más txeu
a Pa más informason sobri kel stória sábi li odja livru Jizus — o Caminho a Verdade e a Vida na pájina 131 i Imite a Sua Fé na pájina 185.
