Apóstlu Paulu skrebe pa Timótiu ki éra un ansion sima el. El fla: “N ta da-u órdi, dianti di Deus, di Kristu Jizus i di kes anju ki el skodje, pa bu sigi kes instruson li sen prekonseitu i trata tudu algen igual.” — 1 Tim. 5:21

Primeru, nu ta ben pâpia di kes anju ki ka pode sta na kel grupu di anju li. É klaru ki es é ka kes 144 mil. Kantu Paulu skrebe pa Timótiu inda ninhun di kes skodjedu ku spritu santu ka resusitadu pa ba viveba na séu. Kes apóstlu i otus kriston skodjedu ku spritu santu inda ka tinha un korpu spritual. Nton “kes anju ki el skodje” ka pode ser es. — 1 Kor. 15:50-54; 1 Tes. 4:13-17; 1 Juan 3:2.

Tanbê “kes anju ki el skodje” ka pode ser kes anju ki dizobidese na ténpu di dilúviu. Kes anju li skodje ladu di Satanás i es bira dimónis ki é inimigus di Jizus. (Jén. 6:2; Luk. 8:30, 31; 2 Ped. 2:4) Na futuru, kes anju li ta ben fika prézu na abismu pa mil anu i dipôs es ta ben distruídu djuntu ku Diabu. — Jud. 6; Apo. 20:1-3, 10.

Nton “kes anju ki el skodje” ki Paulu ta pâpia di el talvês é kes anju ki ta apoia ‘Deus i Kristu Jizus’, ki kel mésmu versíklu ta pâpia di es.

Ta izisti un monti di anju fiel. (Ebr. 12:22, 23) Nu ka debe pensa ma tudu anju ten mésmu trabadju omésmu ténpu. (Apo. 14:17, 18) Lenbra ma un bês sô un anju distrui 185 mil trópa di Asíria. (2 Reis 19:35) Má ten txeu anju ki ten trabadju di ‘tra di Reinu di Jizus tudu kes kuza ki ta poi algen ta tropesa i kes algen ki ta faze kel ki é kóntra lei’. (Mat. 13:39-41) Ten otus ki pode “djunta kes ki el skodje” ku spritu santu pa ba vive na séu. (Mat. 24:31) I inda ten otus ki diziginadu pa ‘proteje-nu na tudu nos kaminhu.’ — Sal. 91:11; Mat. 18:10; Konpara ku Mateus 4:11; Lukas 22:43.

“Kes anju ki el skodje” ki 1 Timótiu 5:21 ta pâpia di el talvês é kes anju ki diziginadu pa kuida di asuntus di kongregason. Na kel kontestu li, Paulu da konsedju sobri modi ki ansions debe kuida di ses responsabilidadi i tanbê di modi ki kongregason debe mostra ruspetu pa kes ansion. Ansions debe kuida di ses responsabilidadi “sen prekonseitu i trata tudu algen igual” i es ka debe toma disizons sen pensa dretu. Un otu motivu ki ansions ten pa sigi kel konsedju ki Paulu da-s é pamodi es sta “dianti di Deus, di Kristu Jizus i di kes anju ki el skodje”. Ta fika klaru ma alguns anju diziginadu pa kuida di asuntus di kongregason sima proteje sérvus di Deus, kuida di pregason i fla Jeová kuzê ki es ta odja na kongregason. — Mat. 18:10; Apo. 14:6.