Bu lé tudu artigu di Sentinéla di kel anu li? Nton, tenta responde kes pergunta li:

Kuzê ki ‘troka nos manera di pensa’ krê fla? (Rom. 12:2)

Kel-li ka krê fla ma nu debe faze sô alguns kuza dretu. Má, nu debe analiza kel algen ki nos é di pa déntu i muda kes kuza ki nu meste, asi pa nu pode obi ku leis di Jeová. — w23.01, pp. 8-9.

Modi ki nu pode mante ikilibradu óras ki nu ta odja kuzê ki sta kontise na mundu?

Nu ten bons motivu pa sta interesadu na kuzê ki sta ta kontise na mundu i odja modi ki kel-li sta ta kunpri profesias di Bíblia. Má nu ka krê fla nada ki ta straga nos union na kongregason. Pur isu, envês di nu tenta dibinha nu ta pâpia ku bazi na kuzê ki organizason di Jeová ta fla. (1 Kor. 1:10) — w23.02, p. 16.

Modi ki batismu di Jizus é diferenti di batismu di se sigidoris?

El ka meste daba se vida pa Jeová pamodi el nase na un nason ki éra didikadu pa Deus. El ka meste rapendeba di kalker pekadu pamodi el éra un ómi perfeitu, sen pekadu. — w23.03, p. 5.

Modi ki nu pode dexa más algen da komentáriu?

Un kuza ki nu pode faze é da komentáriu kurtu, asi ta da ténpu pa más algen da komentáriu. Tanbê, nu pode ivita pâpia di txeu pontu. Asi, nu ta dexa algun kuza pa otus algen komenta. — w23.04, p. 23.

Kuzê ki kel ‘Kaminhu di Santidadi’ ki Isaías 35:8 ta pâpia di el ta siginifika?

Na pasadu kel kaminhu li éra kel strada ki kes judeu viaja na el kantu es sai di Babilónia pa volta pa Jiruzalen. I na nos ténpu? Txeu anu antis di 1919, alguns ómi faze alguns trabadju ki mesteba pa pripara kaminhu sima trabadju di traduzi i inprimi Bíblia i otus kuza. Povu di Deus sta ta anda na ‘Kaminhu di Santidadi’ ki ta leba-s pa un paraízu spritual i pa kes benson ki Reinu di Deus ta ben traze. — w23.05, pp. 15-19.

Provérbios kapítlu 9 ta pâpia di dôs mudjer. Ki konsedju ki el ta da-nu sobri kes mudjer?

Livru di Provérbios ta pâpia di konviti di un ‘mudjer tola’ ki ta leba pa ‘Sipultura’ i di un konviti di un mudjer ki ta reprizenta ‘sabedoria di verdadi’, ki ta leba pa ‘kaminhu di intendimentu i pa vida’. (Pro. 9:1, 6, 13, 18) — w23.06, pp. 22-24.

Modi ki Jeová mostra ma el ten umildadi i konpaxon na manera ki el trata Ló?

Jeová fla Ló pa fuji pa montanhas. Má, kantu Ló pidi Jeová pa dexa el ku se família bai pa Zuar, Jeová obi pididu di Ló. — w23.07, p. 21.

Kuzê ki bu pode faze si bu maridu ta odja pornografia?

Bu debe lenbra ma kulpa é ka di bo. Bu meste konsentra na bu amizadi ku Deus i pensa na kes stória di Bíblia di kes mudjer ki pasa pa prublémas i ki atxa konsolu na Deus. Bu pode djuda bu maridu ivita kes situason ki pode pô-l na tentason. — w23.08, pp. 14-17.

Modi ki disirnimentu ta djuda-nu responde ku brandura óras ki algen faze-nu perguntas sobri kuzê ki nu ta kridita na el?

Envês di atxa ma ku kel pergunta kel algen sta ta ataka-nu ô ta kritika-nu, nu debe pensa ma kel pergunta ta djuda-nu sabe kuzê ki kel algen ta preokupa ku el. Pur isu, nu debe sta priparadu pa responde ku brandura. — w23.09, p. 17.

Kuzê ki nu ta prende sobri manera ki Maria resebe kel forsa ki el staba ta meste?

Otus algen da Maria kel forsa ki el staba ta meste kantu el fika ta sabe ma el ta sérba mai di kel mininu ki ta biraba Misías. Anju Gabriel i Elizabeti da Maria forsa ku bazi na Palavra di Deus. Nos tanbê nu pode resebe forsa ki nu sta meste di otus sérvu di Jeová. — w23.10, p. 15.

Modi ki Jeová pode responde nos orason?

El promete ma el ta obi nos orason i el ta djobe si nos pididu sta di akordu ku se vontadi. (Jer. 29:12) El pode responde dôs pididu igual di manera diferenti, má sénpri el ta djuda-nu. — w23.11, pp. 21-22.

Romanus 5:2 ta pâpia di “speransa”, nton pamodi ki na versíklu 4 el ta pâpia di speransa otu bês?

Óras ki un algen obi notísia sábi el ta ten speransa di ben vive pa tudu ténpu na un paraízu na téra. Má sima el ba ta pasa pa txeu prubléma, el aguenta firmi i el odja ma Jeová staba kontenti ku el. Talvês se speransa ta fika más fórti i más spesial pa el. — w23.12, pp. 12-13.