1. Kuzê ki un irmon meste faze pa el ten bons rezultadu?

 REI Davidi fla Salumon: ‘Ser fórti i mostra ma bo é ómi.’ (1 Reis 2:1-3) Kel konsedju li é inportanti pa tudu irmon ki krê imita Jizus oji. Pa es ten bons rezultadu, es meste prende obi ku leis di Deus i aplika prinsípius di Bíblia na tudu ária di ses vida. (Luk. 2:52) Pamodi ki é txeu inportanti pa irmons jóven bira un sérvu di Jeová maduru?

2-3. Pamodi ki é inportanti pa un irmon jóven bira un sérvu di Jeová maduru?

² Un ómi ki ta sirbi Jeová ten txeu responsabilidadi na família i na kongregason. Irmons jóven, di serteza dja nhos pensa na kes responsabilidadi ki nhos pode ben ten na futuru. Bu pode ten méta di entra na sirvisu pa ténpu interu, bira ajudanti di kongregason i dipôs bira un ansion na kongregason. Talvês bu krê kaza i ten fidjus. (Efé. 6:4; 1 Tim. 3:1) Pa alkansa kes méta li i ten bons rezultadu, bu meste ser un sérvu di Jeová maduru. b

³ Kuzê ki pode djuda-u bira un sérvu di Jeová maduru? Ten alguns kapasidadi inportanti ki bu meste dizenvolve. Nton, kuzê ki bu pode faze gósi pa bu pripara i ten bons rezultadu na kalker responsabilidadi ki bu pode ben ten na futuru?

4. Undi ki bu pode atxa bons izénplu pa bu imita? (Odja fotu i dizenhus.)

⁴ Skodje bons izénplu pa bu imita. Ten txeu izénplu na Bíblia ki jóvens pode imita. Kes ómi di pasadu ta amaba  Deus i es ta kuidaba di Se povu di txeu manera. Tanbê, bu pode atxa bons izénplu di ómis maduru na bu própi família i na bu kongregason. (Ebr. 13:7) I bu ten un izénplu perfeitu ki é Jizus. (1 Ped. 2:21) Timenti bu ta studa kes izénplu li ku kuidadu, pensa na kes kualidadi ki bu ta dimira na kes ómi li. (Ebr. 12:1, 2) Dipôs, djobe modi ki bu pode imita kes ómi li.

5. Modi ki bu pode dizenvolve kapasidadi di rasusina i pamodi ki kel-li é inportanti? (Salmo 119:9)

⁵ Dizenvolve i ‘proteje kapasidadi di rasusina’. (Pro. 3:21) Un ómi ki ten kapasidadi di rasusina ka ta aji faxi, má el ta pensa ku kuidadu antis di el disidi kuzê ki el ta faze. Nton, sforsa pa bu ten i pa bu kontinua ku kel kapasidadi li. Pamodi? Pamodi oji maioria di jóvens na kel mundu li, ta toma disizons ku bazi na ses própi ideia ô na kuzê ki es ta xinti. (Pro. 7:7; 29:11) Tanbê tilivizon, filmis, internet i redi sosial pode afeta manera ki bu ta pensa i bu ta aji. Má, modi ki bu pode dizenvolve kapasidadi di rasusina? Primeru, prende na Bíblia modi ki Jeová ta pensa i ta xinti i dipôs pensa sobri pamodi ki é bon pa bo faze sima el fla. Dipôs, uza kes kuza ki bu prende pa djuda-u toma disizons ki ta agrada Jeová. (Lé Salmo 119:9.) Si bu dizenvolve kes kapasidadi li, kel-li ta djuda-u bira un sérvu di Jeová maduru más rápidu. (Pro. 2:11, 12; Ebr. 5:14) Odja modi ki kapasidadi di rasusina ta djuda-u na kes dôs situason li: (1) na manera ki bu ta trata irmans i (2) óras ki bu ta toma disizons sobri kuzê ki bu ta bisti i bu aparénsia.

6. Modi ki kapasidadi di rasusina ta djuda un irmon jóven mostra ruspetu pa irmans?

⁶ Kapasidadi di rasusina ta djuda-u mostra ruspetu pa mudjer. É normal un irmon jóven krê konxe un irman midjór i ka ten nada di eradu na faze kel-li. Má un irmon jóven ki ten kapasidadi di rasusina ka ta fla, skrebe ô faze kalker otu kuza ki ta poi un irman ta pensa ma el krê namora ku el si el ka sta pensa kaza ku el. (1 Tim. 5:1, 2) Si el sta ta namora ku un irman, el ta proteje kel bon reputason di  kel irman, nunka el ka ta fika el sô ku el sen ningen responsável djuntu ku es. — 1 Kor. 6:18.

7. Modi ki kapasidadi di rasusina ta djuda un irmon jóven óras ki el ta skodje ki ropa ki el ta bisti i modi ki el ta tra kabélu?

⁷ Un otu manera ki un irmon jóven ta mostra ma dja el dizenvolve se kapasidadi di pensa, é óras ki el ta skodje ki ropa ki el ta bisti i modi ki el ta tra kabélu. Maioria di kes algen ki ta dizenha i ki ta faze publisidadis di novus stilu di ropa ka ta ruspeta Jeová. Tanbê, es pode ten un vida ki ka ta agrada Jeová. Pur isu, kes ropa ki es ta faze pode ser txeu pertadu ô pode poi ómi ta parse ku mudjer. Un jóven ki krê bira un sérvu di Jeová maduru, ta dexa pa prinsípius di Bíblia i kes bon izénplu na kongregason orienta-l óras ki el ta skodje ki ropa ki el ta bisti. El pode pergunta se kabésa: ‘Kes disizon ki N ta toma ta mostra ma N ten sabedoria i ma N ta ruspeta otus algen? Manera ki N ta bisti ta djuda otus algen kridita ma N ta sirbi Deus, di verdadi?’ (1 Kor. 10:31-33; Titu 2:6) Un irmon jóven ki ten kapasidadi di rasusina, ta ganha ruspetu ka sô di se irmons ku irmans, má tanbê di se Pai na séu.

8. Modi ki un irmon jóven pode prende ser un algen di kunfiansa?

⁸ Ser un algen di kunfiansa. Un jóven ki é di kunfiansa ta kuida dretu di tudu se responsabilidadis. (Luk. 16:10) Pensa na izénplu perfeitu di Jizus. Nunka el ka dexa di kuida di se responsabilidadis. Envês di kel-li, el faze tudu kel ki Jeová manda-l, mésmu óras ki éra difísil pa el. El ta amaba pesoas, prinsipalmenti se disiplus i el da se vida pa es di livri vontadi. (Juan 13:1) Bu ta imita Jizus óras ki bu ta sforsa pa bu kunpri kalker diziginason ki bu dadu. Si bu ka ten serteza modi ki bu ta faze kel diziginason, ser umildi i pidi ajuda na irmons maduru. Nunka ka bu fika kontenti di faze poku. (Rom. 12:11) Envês di kel-li, tirmina kel diziginason ki bu dadu i faze-l “sima ki é pa Jeová envês di ómis.” (Kol. 3:23) É klaru ma bo é ka perfeitu, nton ser umildi i rekonhese kalker fadja ki bu da. — Pro. 11:2.

9. Pamodi ki un irmon jóven meste prende faze kuzas ki ta djuda-l na se dia-dia?

⁹ Pa bu bira un irmon maduru, bu meste prende faze kuzas ki ta djuda-u na bu dia-dia. Kes kapasidadi ki bu ten ta djuda-u seta responsabilidadis na kongregason, atxa i kontinua na un trabadju ki ta djuda-u sustenta bu kabésa ô bu família i da dretu ku otus algen. Odja alguns di kes kapasidadi inportanti.

10-11. Modi ki prende lé i skrebe dretu ta djuda un irmon jóven i kongregason? (Salmo 1:1-3) (Odja fotu.)

¹⁰ Prende lé i skrebe dretu. Bíblia ta fla  ma un ómi filís i ki ten bons rezultadu ta tra ténpu tudu dia pa lé Palavra di Deus i midita na el. (Lé Salmo 1:1-3.) Óras ki el ta lé Bíblia tudu dia, el ta konxe manera ki Jeová ta pensa i kel-li ta djuda-l pensa di manera klaru i prende modi ki el ta aplika prinsípius di Bíblia. (Pro. 1:3, 4) É kes tipu di ómi li ki mestedu na kongregason. Pamodi?

¹¹ Nos irmons ku irmans meste di ajuda di ómis ki ta konsigi inxina i da konsedju ku bazi na Bíblia. (Titu 1:9) Si bu prende lé i skrebe dretu, bu ta pode pripara diskursus i komentárius ki ta djuda otus i ki ta bira ses fé más fórti. Tanbê, bu ta konsigi toma bons nóta óras ki bu ta studa i óras ki bu ta obi un diskursu na runion, na asenbleia i na kongrésu. Kes nóta li ta djuda-u bira bu fé más fórti i da otus algen koraji.

12. Kuzê ki ta djuda-u prende obi ku atenson i dizenvolve bu kapasidadi di pâpia?

¹² Prende obi ku atenson i dizenvolve bu kapasidadi di pâpia. Un irmon meste prende pâpia dretu ku otus algen. Kel-li krê fla ma el meste obi i intende kuzê ki otus algen ta pensa i ta xinti. (Pro. 20:5) El ta prende intende un algen óras ki el ta presta atenson na se ton di vós i jéstu na róstu i na korpu. Bu ka ta konsigi faze kel-li si bu ka pasa ténpu ku pesoas. Si sénpri bu ta uza aplikativus i aparelhus iletróniku pa pâpia ku algen, sima email i mensajen di testu, ta ser más difísil pa bu pâpia ku pesoas kara-kara. Pur isu, djobe maneras pa bu pâpia ku pesoas kara-kara. — 2 Juan 12.

13. Kuzê más ki un jóven meste prende? (1 Timótiu 5:8) (Odja fotu.)

¹³ Prende sustenta bu kabésa. Un sérvu di Jeová maduru meste sustenta se kabésa i se família. (Lé 1 Timótiu 5:8.) Na alguns país, irmons jóven talvês ta prende un profison ku se pai ô ku otus algen di família. Má na otus país, jóvens talvês ta prende un profison timenti es sta na liseu. É sénpri bon prende faze alguns kuza ki ta djuda-u atxa un trabadju. (Atus 18:2, 3; 20:34; Efé. 4:28) Trabadja duru i tirmina kel trabadju ki bu kumesa. Otus ta repara kel-li i es ta pensa dretu di bu trabadju. Si bu faze kel-li, bu ten más xansi di konsigi un trabadju i kontinua na el. Kes kualidadi i kapasidadis ki nu pâpia di el, tanbê é inportanti pa un ómi kuida di kes responsabilidadi ki talvês el pode ben ten na futuru. Nu ben odja alguns di kes responsabilidadi.

14. Modi ki un jóven pode pripara pa el entra na sirvisu pa ténpu interu?

¹⁴ Entra na sirvisu pa ténpu interu. Txeu irmon maduru entra na sirvisu pa ténpu interu kantu ki inda es éra jóven. Sirvisu di pioneru ta djuda jóvens trabadja ku pesoas ki ten manera di ser diferenti. I tanbê ta djuda-s prende modi ki el ta uza dinheru ku sabedoria i ka gasta más di ki kel ki es ten. (Fil. 4:11-13) Un kuza ki ta djuda-u entra na sirvisu pa ténpu interu, é ser pioneru ajudanti. Txeu irmon ta ser pioneru ajudanti pa un ténpu. Kel-li ta djuda-s sta priparadu pa es ser pioneru fíksu. Sirvisu di pioneru pode da-u oportunidadi pa otus tipu di sirvisu pa ténpu interu, sima djuda na konstruson di organizason ô ser betelita.

15-16. Modi ki un irmon jóven pode bira un ajudanti di kongregason i dipôs un ansion?

¹⁵ Bira un ajudanti di kongregason ô ansion. Tudu irmon debe ten méta di kualifika pa ser ansion na kongregason, asi pa es djuda ses irmons ku irmans. Bíblia ta fla ma ómis ki ta sforsa pa alkansa kel méta li, sta ta “dizeja un bon trabadju.” (1 Tim. 3:1) Antis di un irmon ser ansion, el meste kualifika pa el ser ajudanti di kongregason. Ajudantis di kongregason ta djuda ansions di txeu manera. Ansions i ajudantis di kongregason ta toma kónta di irmons ku irmans ku umildadi i es ta mostra zelu na pregason. Un irmon jóven pode kualifika pa ser ajudanti di kongregason sikrê el sta na fin di se adulesénsia. Un ajudanti di kongregason ki sta kualifikadu, ki ten 20 i poku anu, pode diziginadu pa ser ansion.

¹⁶ Kuzê ki bu meste faze pa bira un ajudanti di kongregason i dipôs un ansion? Bíblia ta mostra alguns kualidadi ki bu meste dizenvolve. Tudu kes kualidadi debe ser motivadu pa amor ki bu ta xinti pa Jeová, pa bu família i pa kongregason. (1 Tim. 3:1-13; Titu 1:6-9; 1 Ped. 5:2, 3) Sforsa pa bu intende kada un di kes kualidadi. Ora ta pidi Jeová pa djuda-u dizenvolve kes kualidadi. c

17. Modi ki un irmon jóven pode pripara pa bira un maridu i un xéfi di família? (Odja fotu.)

¹⁷ Bira un maridu i un xéfi di família. Sima Jizus fla, alguns irmon maduru ta disidi kontinua solteru. (Mat. 19:12) Má si bu disidi kaza, bu ta ben ten responsabilidadis  ki un maridu i xéfi di família ten. (1 Kor. 11:3) Jeová ta spera ma un maridu ta ama se mudjer, el ta da-l kes kuza ki el meste, el ta ser un bon amigu pa el i el ta djuda-l bira más amigu di Jeová. (Efé. 5:28, 29) Tudu kes kualidadi ki nu pâpia di el antis na kel studu li, sima dizenvolve kapasidadi di rasusina, mostra ruspetu pa mudjer i ser un algen di kunfiansa, ta ben djuda-u bira un bon maridu. Di kel manera li, bu ta ben sta priparadu pa kes responsabilidadi ki un maridu i un xéfi di família ten.

18. Modi ki un irmon jóven pode pripara pa ser pai?

¹⁸ Ser Pai. Dipôs ki bu kaza bu pode ser pai. Kuzê ki bu pode prende ku Jeová sobri ser un bon pai? Ten txeu kuza ki nu pode prende. (Efé. 6:4) Jeová fla se fidju Jizus, ma el ta amaba el i ma el staba kontenti ku el. (Mat. 3:17) Si bu ser pai, fla bus fidju sénpri ma bu ta ama-s. I sénpri ilojia-s óras ki es faze algun kuza dretu. Kes pai ki ta imita izénplu di Jeová, ta djuda ses fidjus bira un irmon i un irman maduru. Bu pode pripara gósi pa kes responsabilidadi li, si bu ta kuida di otus algen na bu família i na kongregason ku amor i prende fla-s ma bu ta ama-s i ma es ten txeu valor pa bo. (Juan 15:9) Kel-li ta djuda kunpri kes responsabilidadi ki bu pode ben ten na futuru sima bira maridu i ser pai. Má timenti bu ka resebe kes responsabilidadi, bu ten txeu valor pa Jeová i bo é un grandi ajuda pa bu família i pa kongregason.

19-20. Kuzê ki ta djuda irmons jóven bira sérvus di Jeová maduru? (Odja fotus na kapa.)

¹⁹ Irmons jóven, nhos sforsa txeu pa nhos bira un sérvu di Jeová maduru. Bu meste skodje un bon izénplu pa imita, dizenvolve kapasidadi di rasusina, ser di kunfiansa, prende faze un trabadju ki ta djuda-u na bu vida i ki ta djuda-u pripara pa responsabilidadis ki bu pode ben resebe na futuru.

²⁰ Óras ki bu ta pensa na tudu kuza ki bu meste faze, talvês bu pode pensa ma kel-la é difísil pa bo. Má bu ta konsigi. Lenbra ma Jeová krê djuda-u. (Isa. 41:10, 13) É klaru ki bus irmon ku irmans na kongregason tanbê ta ba djuda-u. Óras ki bu bira un sérvu di Jeová maduru, bu ta ten txeu benson i un vida sábi. Nu ta ama nhos, irmons jóven! Jeová ta abênsua nhos timenti nhos sta ta trabadja gósi pa nhos bira un sérvu di Jeová maduru. — Pro. 22:4.