1. Óras ki nu ta pensa na fé ki Abraon tinha, ki pergunta talvês nu ta faze?

 TXEU algen dja obi ta papiadu di Abraon, má maioria di es sabe poku kuza sobri el. Má, bu sabe txeu kuza sobri Abraon. Pur izénplu, bu sabe ma Bíblia ta txoma Abraon di “pai di tudu kes ki ten fé.” (Rom. 4:11) Talvês bu ta pergunta: ‘N pode ser sima Abraon i ten un fé fórti na Jeová?’ Bu ta pode sin.

2. Pamodi ki é inportanti studa izénplu di Abraon? (Tiagu 2:22, 23)

² Un manera di nu konsigi ten un fé sima di Abraon é studa se izénplu. Abraon sénpri faze kuzê ki Deus ta mandaba el. El muda pa un téra lonji di se kaza, el mora na téndas pa txeu anu i el staba prontu pa sakrifika se fidju Izaki ki el ta amaba txeu. Abraon faze tudu kes kuza li pamodi el tinha un fé fórti na Jeová. Pamodi se fé i se bons óbra, Abraon dexa Jeová kontenti i el bira amigu di Deus. (Lé Tiagu 2:22, 23.) Jeová krê pa nos tudu i bo tanbê, ten se aprovason i bira se amigu. É pur isu, ki através di se spritu santu el poi Paulu i Tiagu ta skrebe sobri izénplu di Abraon na Bíblia. Na kel studu li, nu ta ben odja kuzê ki Romanus kapítlu 4 i Tiagu kapítlu 2 ta inxina-nu sobri Abraon. Na kes dôs kapítlu li nu ta lé un kuza txeu inportanti sobri Abraon.

3. Ki testu di Bíblia Paulu i Tiagu pâpia di el?

³ Paulu i Tiagu fla kes palavra ki sta na Génesis 15:6: ‘[Abraon] poi fé na Jeová, i kel-li pô-l ta tratadu sima  algen justu.’ Pa Jeová un algen justu é kel ki ta faze Se vontadi i ki ta agrada-l. É bon sabe ma Deus ta txoma pesoas inperfeitu i pekador di justu! Di serteza bu krê pa Deus odja-u sima un algen justu, i kel-li é posível. Pur isu, gósi nu ta ben odja pamodi ki Jeová txoma Abraon di justu, i kuzê ki nu debe faze pa el txoma-nu di justu.

4. Kuzê ki ta inpidi tudu algen di ser justu?

⁴ Na se karta pa Romanus, Paulu fla ma tudu algen é pekador. (Rom. 3:23) Nton, modi ki un algen pode ser justu i ten aprovason di Deus? Pa djuda tudu sérvus di Jeová atxa respósta pa kel pergunta li, Paulu pâpia di izénplu di Abraon.

5. Pamodi ki Jeová txoma Abraon di justu? (Romanus 4:2-4)

⁵ Jeová txoma Abraon di justu kantu inda el ta moraba na téra di Kanan. Pamodi ki Jeová txoma Abraon di justu? É pamodi Abraon ta sigiba Lei di Muizés di manera perfeitu? Klaru ki nau. (Rom. 4:13) Kel Lei li dadu pa nason di Israel más di 400 anus dipôs ki Jeová txoma Abraon di justu. Nton, pamodi ki Deus txoma Abraon di justu? Na Se grandi bondadi, Jeová txoma Abraon di justu pamodi se fé. — Lé Romanus 4:2-4.

6. Pamodi ki Jeová ta txoma un algen pekador di justu?

⁶ Paulu fla ma óras ki un algen ta poi fé na Deus “kel ómi é justu pamodi se fé.” (Rom. 4:5) Paulu fla tanbê: “Di mésmu manera, Davidi tanbê pâpia di alegria di kel ómi ki Deus ta fla ma el é justu sen djobe pa se óbra: ‘Filís é kes ki purduadu kes kuza mariadu ki es faze i kes ki ses pekadu kubridu. Filís é kel ómi ki Jeová ka ta leba en kónta se pekadu di ninhun manera.’” (Rom. 4:6-8; Sal. 32:1, 2) Deus ta púrdua pekadu di kes ki ta mostra fé na el. El ta púrdua tudu kes kuza mariadu ki es faze i el ka ta lenbra di es más. Deus ta odja kes algen sima si es é justu pamodi ses fé.

7. Pamodi ki nu pode fla ma kes sérvu di Deus di pasadu éra justu?

⁷ Enbóra Abraon, Davidi i otus sérvu fiel di Deus txomadu di justu, es kontinua inperfeitu i pekador. Má pamodi ses fé, Deus ta odjaba es sima algen justu, prinsipalmenti óras ki el ta konparaba es ku kes ki ka tinha fé na el. (Efé. 2:12) Sima Paulu mostra na se karta, fé é un kuza inportanti pa nu pode ser amigu di Deus. Sima Abraon ku Davidi, si nu ten fé na Jeová tanbê nu pode ser se amigu.

8-9. Ki ideias mariadu alguns algen ten sobri kuzê ki Paulu ku Tiagu skrebe i pamodi?

⁸ Dja ten txeu anu, ki xéfis di relijion sta ta pâpia di kuzê ki é más inportanti: fé ô óbras. Alguns xéfi di igreja ta inxina ma tudu kel ki bu meste faze pa salva é kridita na Sinhor Jizus Kristu. Talvês dja bu obi-s ta fla: “Seta Jizus i bu ta salva.” Ti bu pode obi-s ta fla kes palavra di Paulu li: “Deus ta fla ma el é justu sen djobe pa se óbra”. (Rom. 4:6) Má, otus ta fla ma “nu pode salva” si nu vizita kes lugar ki igreja ta fla ma é santu i si nu faze kuzas dretu. Pa prova ma kuzê ki es sta fla é verdadi es pode  uza Tiagu 2:24, ki ta fla: “Un ómi ta txomadu justu pamodi óbra, i ka sô pamodi fé.”

⁹ Pamodi kes opinion diferenti li, alguns studiozu di Bíblia ta atxa ma Paulu ku Tiagu ka ta konkordaba ku kunpanheru sobri kuzê ki un algen meste faze pa el pode ten aprovason di Deus. Di akordu ku alguns xéfi di relijion, Paulu ta kriditaba ma un algen meste sô di ten fé pa agrada Deus, má Tiagu ta kriditaba ma un algen debe faze kuzas dretu si el krê agrada Deus. Un studiozu fla: “Tiagu ka intende pamodi ki Paulu fla ma pa un algen [txomadu di justu] el meste sô di ten fé i el ka meste faze kuzas dretu.” Má Jeová uza se spritu santu pa djuda Paulu ku tiagu skrebe kuzê ki es fla. (2 Tim. 3:16) Nton, debe ten un manera sinplis di intende kuzê ki Paulu ku Tiagu fla. Pa nu intende midjór, nu ben odja kuzê ki Paulu ku Tiagu fla antis i dipôs na ses karta.

10. Di ki “óbras” ki Paulu staba ta pâpia? (Romanus 3:21, 28) (Odja dizenhus.)

¹⁰ Di ki “óbras” Paulu staba ta pâpia di es na Romanus 3 i 4? El staba ta pâpia prinsipalmenti di “kel ki lei ta fla,” ki é kel Lei di Muizés ki dadu na Monti Sinai. (Lé Romanus 3:21, 28.) Ta parse ma na ténpu di Paulu, alguns kriston judeu ta kriditaba ma inda es tinha ki obiba ku Lei di Muizés. Pur isu, Paulu uza izénplu di Abraon pa prova ma un algen ka meste sigi Lei di Muizés pa ser justu pa Deus. Envês di kel-li, Paulu splika na nu meste ten fé. Kel-li ta da-nu koraji pamodi el ta inxina-nu ma si nu  ten fé na Deus i na Jizus Kristu nu pode ten aprovason di Deus.

11. Kal ki é kes “óbra” ki Tiagu staba ta pâpia di el?

¹¹ Má kes “óbra” ki Tiagu pâpia di el na kapítlu 2 é ka mésmu kuza ki obi ku Lei di Muizés sima Paulu splika. Tiagu staba ta pâpia di óbras ô di kuzas ki kristons ta faze na ses dia-dia. É kes kuza li ki ta mostra si un sérvu di Deus ten fé di verdadi na el ô nau. Nu ben odja dôs izénplu ki Tiagu pâpia di el.

12. Modi ki Tiagu mostra kel ligason ki ten entri fé i óbras? (Odja dizenhus.)

¹² Na kel primeru izénplu, Tiagu mostra ma kristons meste trataba tudu algen di mésmu manera na ses dia-dia. Pa mostra kel-li el pâpia di un izénplu di un ómi ki mostra bondadi pa un algen riku, má el ka mostra bondadi pa un algen póbri. Tiagu mostra ma kel ómi pode ti flaba ma el tinha fé, má kuzê ki el faze ka ta mostra ma el tinha fé di verdadi. (Tia. 2:1-5, 9) Na kel sugundu izénplu, Tiagu pâpia di ‘un algen ki odja un irmon ô irman sen ropa ô sen kumida’, má el ka faze nada pa djuda-l. Sikrê kel algen fla ma el tinha fé, kuzê ki el faze mostra ma el ka tinha fé di verdadi. Sima Tiagu fla “fé el sô, sen óbra, sta mortu.” — Tia. 2:14-17.

13. Ki izénplu Tiagu uza pa prova ma nu meste ten fé através di bons kuza ki nu ta faze? (Tiagu 2:25, 26)

¹³ Tiagu fla ma Raabi é un bon izénplu di algen ki mostra fé através di kuzas ki el faze. (Lé Tiagu 2:25, 26.) El obi ta papiadu di Jeová i el rekonhese ma el staba ta djuda israelitas. (Jos. 2:9-11)  Kes kuza ki el faze mostra ma el tinha fé. Pamodi se fé el proteje kes dôs spion israelitas kantu ki ses vida staba na prigu. Pur isu, kel mudjer li enbóra el éra inperfeitu i el ka éra israelita el txomadu di justu, sima Abraon. Izénplu di Raabi ta mostra ma é inportanti nu mostra fé através di kuzas ki nu ta faze.

14. Pamodi ki nu pode fla ma kuzas ki Paulu i Tiagu skrebe sta di akordu ku kunpanheru?

¹⁴ Nton, Paulu ku Tiagu staba ta splika fé i óbra di dôs manera diferenti. Paulu staba ta fla kes kriston judeu ma nunka es ka ta konsigiba ten aprovason di Jeová si es obiba sô ku Lei di Muizés. Má, Tiagu staba ta distaka ma tudu kriston meste mostra fé através di kuzas ki es ta faze pa djuda otus.

15. Kal ki é alguns manera ki nu pode mostra fé através di nos óbras? (Odja fotus.)

¹⁵ Jeová ka fla ma pa nu ser justu nu ten ki faze kes mésmu kuza ki Abraon faze. Na verdadi, ten txeu manera ki nu pode mostra ma nu ten fé através di kuzas ki nu ta faze. Nu pode resebe dretu kes novu na kongregason, djuda irmons ku irmans ki sta pasa pa difikuldadis i faze kuzas dretu pa nos família. Tudu kes-li é kuzas ki Deus ta prova i ki el ta abênsua. (Rom. 15:7; 1 Tim. 5:4, 8; 1 Juan 3:18) Un di kes manera más inportanti ki nu ta mostra ma nu ten fé é óras ki nu ta prega ku zelu kes notísia sábi pa otus algen. (1 Tim. 4:16) Nos tudu nu pode mostra através di kuzas ki nu ta faze ma nu ten fé ma promésas di Jeová ta ben kunpri i ma manera ki el ta  faze kuzas é midjór. Si nu faze si, nu pode ten tudu serteza ma Deus ta odja-nu sima un algen justu i ma el ta txoma-nu di se amigu.

16. Kuzê ki Abraon staba ta spera i na kuzê ki el tinha fé?

¹⁶ Romanus kapítlu 4 ta distaka otu kuza inportanti ki nu pode prende di Abraon. Kel kapítlu li ta mostra ma nu meste kontinua ta ten speransa. Jeová promete ma através di Abraon ‘txeu nason’ ta ben sérba abensuadu. Pensa na kel speransa sábi dimás ki Abraon tinha! (Gén. 12:3; 15:5; 17:4; Rom. 4:17) Má, mésmu kantu Abraon tinha 100 anu i Sara tinha 90 anu, kel promésa ma es ta tinha un fidju inda ka kunpriba. Pa ómis, ta parse ma éra inposível Abron ku Sara tinha un fidju. Kel-li poi fé di Abraon na prova. Paulu skrebe: “Má ku bazi na speransa, el tinha fé ma el ta biraba pai di txeu nason”. (Rom. 4:18, 19) I ti ki enfin kel ki Abraon staba ta spera kontise. El bira pai di Izaki, ki éra kel fidju ki el staba ta spera. — Rom. 4:20-22.

17. Modi ki nu sabe ma nu pode ser txomadu di justu i ser amigu di Deus?

¹⁷ Nu pode ten aprovason di Jeová i nu pode txomadu di algen justu i ser se amigu, sima Abraon. Na verdadi, Paulu distaka kel-li kantu ki el skrebe: “Kes palavra “Deus fla ma el é” ka skrebedu sô pamodi [Abraon], má tanbê pamodi nos. Nos tanbê, Deus pode fla ma nos é justu, pamodi nu ta kridita na El, ki resusita Jizus”. (Rom. 4:23, 24) Sima Abraon, nu meste ten fé ku óbras i tanbê speransa. Na kapítlu 5, Paulu kontinua ta pâpia di speransa i nu ta ben pâpia di kel-li na kel otu studu.