1. Pamodi ki Abraon pode kontinuaba ta ten speransa ma el ta tinha un fidju?

 JEOVÁ promete se amigu Abraon ma tudu algen ta resebeba un benson pa es através di se fidju. (Gén. 15:5; 22:18) Abraon tinha txeu fé na Deus, pur isu el tinha serteza ma kel promésa ki Deus faze-l ta ben kunpriba. Má simé, kantu Abraon tinha 100 anu i se mudjer 90 anu, inda es ka tinha fidju. (Gén. 21:1-7) Má, Bíblia ta fla: “Ku bazi na speransa, [Abraon] tinha fé ma el ta biraba pai di txeu nason di akordu ku kel ki fladu”. (Rom. 4:18) I sima bu sabe, kuzê ki Abraon staba ta spera kontise. El bira pai di Izaki, ki é kel fidju ki el staba ta spera dja tinha txeu ténpu. Pamodi ki Abraon tinha serteza ma Jeová ta kunpriba se promésa?

2. Pamodi ki Abraon tinha tudu serteza ma promésa di Jeová ta kunpriba?

² Pamodi Abraon konxeba Jeová dretu, “el tinha tudu serteza ma Deus ta konsigi fazeba kel ki El prometeba.” (Rom. 4:21) Jeová fika kontenti ku Abraon i el txoma-l di justu pamodi se fé. (Tia. 2:23) Sima Romanus 4:18 ta mostra, Abraon tinha fé i speransa. Nu ben odja gósi kuzê ki Paulu fla sobri speransa sima sta skrebedu na kapítlu 5 di Romanus.

3. Kuzê ki Paulu splika sobri speransa?

³ Paulu splika pamodi ki nu pode ten serteza ma nos “speransa ka ta diziludi-nu”. (Rom. 5:5) Tanbê, el ta djuda-nu intende modi ki nos speransa pode bira más fórti. Nu ta ben odja kuzê ki Paulu skrebe na Romanus 5:1-5. Timenti  nu ta faze kel-li, pensa na modi ki bu speransa ba ta fika más fórti sima ténpu ba ta pasa. Kuzê ki Paulu skrebe pa Romanus, tanbê ta djuda-u odja modi ki bu pode bira bu speransa más fórti inda di ki kel ki bu ten gósi. Má primeru nu ben odja un speransa sábi ki Paulu fla ma ka ta diziludi-nu.

4. Kuzê ki Romanus 5:1, 2 ta pâpia di el?

⁴ Lé Romanus 5:1, 2. Paulu skrebe kes palavra li pa kongregason na Roma. Kes irmon ku irmans di la prende verdadi sobri Jeová i Jizus, es dizenvolve ses fé i es bira kriston. Nton, Deus fla-s “ma [es] é justu pamodi fé” i el skodje-s ku spritu santu. Es ganha un speransa sábi i es tinha serteza ma es ta ben resebeba el.

5. Ki speransa kes kriston skodjedu ku spritu santu ten?

⁵ Más tardi, Paulu skrebe pa kes kriston skodjedu ku spritu santu na Éfezu sobri kel speransa ki Jeová da-s. Kel speransa li ta inklui resebeba “un eransa pa kes santu”. (Efé. 1:18) I tanbê kantu Paulu skrebe pa kes irmon na Kolosus el mostra na undi ki kes kriston skodjedu ku spritu santu ta resebeba ses rekonpensa. Paulu fla-s ma ses ‘speransa staba guardadu pa es na séu.’ (Kol. 1:4, 5) Nton, speransa pa kes ki skodjedu ku spritu santu é ma es ta resusitadu pa vive pa tudu ténpu na séu, undi es ta ba governa ku Jizus. — 1 Tes. 4:13-17; Apo. 20:6.

6. Kuzê ki un irmon ki skodjedu ku spritu santu fla sobri se speransa?

⁶ Kes kriston skodjedu ku spritu santu ta da txeu valor pa kel speransa li. Frederick Franz, ki é un di kes irmon skodjedu ku spritu santu fla modi ki el ta xintiba. El fla: “Nos speransa é un kuza sértu i el ta ben kunpri na kada un di kes 144 mil skodjedu di ribanhu pikinoti di un manera mutu más midjór di kel ki nu ta  konsigi imajina.” Na 1991, dipôs ki el sirbi di manera fiel pa txeu anu, irmon Frederick fla: “Inda [nu] ta da txeu valor pa nos speransa... Kantu más nu spera pa el, más gratidon nu ta xinti pamodi nu ten kel speransa li. É un kuza ki bale péna spera, sikrê pasa un milhon di anu. N ta da valor pa nos speransa mutu más di ki antis.”

7-8. Ki speransa ki maioria di sérvus di Jeová ten? (Romanus 8:20, 21)

⁷ Oji maioria di kes algen ki ta adora Jeová ten un speransa diferenti. Es ten kel mésmu speransa ki Abraon tinha ki é vive pa tudu ténpu na téra dibaxu di Reinu di Deus. (Ebr. 11:8-10, 13) Paulu skrebe sobri kes kuza sábi ki kes algen ki ten kel speransa li ta ben resebe. (Lé Romanus 8:20, 21.) Kantu ki bu prende pa primeru bês sobri kes promésa di Bíblia pa futuru, kuzê ki bu gosta más txeu? É sabe ma un dia bu ta fika livri di pekadu i bu ta bira perfeitu? Ô bu fika txeu kontenti pamodi ken ki bu ta ama ki móre ta ben vive otu bês na un paraízu na téra? Pamodi kel speransa ki Deus da-nu, bu ten txeu kuza sábi pa spera.

⁸ Ka ta inporta si nos speransa é vive pa tudu ténpu na séu ô na un paraízu na téra, nos tudu nu ten motivus pa nu fika kontenti. I nos speransa sábi pode bira inda más fórti. Paulu splika modi ki kel-li pode kontise. Nu ben odja kuzê ki el skrebe sobri nos speransa. Kel-li ta ben djuda-nu ten más kunfiansa ma kel ki nu sta spera ta ben kunpri.

9-10. Sima izénplu di Paulu ta mostra, kuzê ki sérvus di Jeová pode spera? (Romanus 5:3) (Odja fotus.)

⁹ Lé Romanus 5:3. Paulu fla ma sufrimentu ki nu ta pasa pa el pode djuda nos speransa bira más fórti. Kel-li talvês pode parse stranhu. Má na verdadi, tudu sigidor di Kristu pode pasa pa sufrimentu. Odja izénplu di Paulu. El fla kes kriston  na Tesalónika: “Kantu nu staba ku nhos, nu ta kustuma avizaba nhos ma nu ta pasaba pa prublémas”. (1 Tes. 3:4) I pa kes korintu, Paulu skrebe: “Nu ka krê pa nhos fika sen sabe di kes prubléma ki nu pasa... i ti nu fika ta pensa si nu ta moreba ô nau.” — 2 Kor. 1:8; 11:23-27.

¹⁰ Oji tanbê, sérvus di Jeová pode spera ma es ta pasa pa algun tipu di sufrimentu. (2 Tim. 3:12) I bo? Dja bu pirsigidu pamodi bu mostra fé na Jizus i bu sigi-l? Bus amigu i famílias dja faze-u trósa? Talvês ti es trata-u di manera duru. Ô bu patron ô kolégas di trabadju dja pirsigi-u pamodi bo é onéstu? (Ebr. 13:18) Dja bu pasa pa opozison di govérnu pamodi bu pâpia ku otus sobri bu speransa? Ka ta inporta kal ki é sufrimentu ki nu ta pasa pa el, Paulu fla ma nu pode fika kontenti. Pamodi?

11. Pamodi ki nu debe sta disididu na aguenta firmi óras ki nu sta pasa pa kalker prubléma?

¹¹ Nu pode fika kontenti mésmu óras ki nu ta sufri pamodi nu sabe ma kel-li ta djuda-nu dizenvolve un kualidadi inportanti. Romanus 5:3 ta fla ma “sufrimentu ta inxina-nu aguenta firmi.” Tudu sérvu di Jeová ta pasa pa sufrimentu. Pur isu, nos tudu nu debe, sta disididu na aguenta firmi na kalker prubléma ki nu pode pasa pa el. Sô nu ta ten kel kuza ki nu sta spera si nu aguenta firmi i nu kontinua ta sirbi Jeová. Nu ka krê ser sima kes algen ki Jizus staba ta pensa na el kantu el pâpia sobri kes simenti ki kai na un txon sô pédra. Na komésu, es obi palavra ku alegria, má kantu “difikuldadis ô pirsigison ben”, es tropesa. (Mat. 13:5, 6, 20, 21) É verdadi ma pasa pa prublémas é ka un kuza sábi. Má óras ki nu ta aguenta firmi nu ta ten txeu bons rezultadu. Di ki manera?

12. Ki bons rezultadu nu ta ten óras ki nu ta pasa pa prublémas i nu ta aguenta firmi?

¹² Disiplu Tiagu fla pamodi ki nu ta ten bons rezultadu óras ki nu ta pasa pa prublémas i nu ta aguenta firmi. El fla: “Nhos dexa pa kapasidadi di aguenta firmi konpleta se trabadju, asi pa nhos pode ser konplétu i sen difeitu na tudu kuza, i pa ka falta nhos nada.” (Tia. 1:2-4) Tiagu fla ma nos kapasidadi di aguenta firmi ten un obijetivu. Ki obijetivu é kel-li? El pode djuda-nu ten más paxénxa, ten más fé i kunfia más na Deus. Má tanbê, nu pode ten otus bon rezultadus si nu aguenta firmi.

13-14. Kuzê ki ta kontise óras ki nu ta aguenta firmi i modi ki nos speransa ta fika? (Romanus 5:4)

¹³ Lé Romanus 5:4. Paulu fla ma si nu aguenta firmi “Deus ta fika kontenti ku nos”. Nton, óras ki bu ta aguenta firmi bu ta ten aprovason di Jeová. Kel-li ka krê fla ma Jeová ta fika kontenti óras ki bu sta sufri ô bu sta pasa pa algun prubléma. Má, el ta fika kontenti pamodi bu sta aguenta firmi di manera fiel. Pamodi bu aguenta firmi, Deus ta fika kontenti ku bo. Kel-li ta da-nu koraji! — Sal. 5:12.

¹⁴ Lenbra ma Abraon pasa pa prublémas i kantu el aguenta firmi di manera fiel, Jeová fika kontenti ku el. Jeová ta odjaba el sima Se amigu i sima un algen justu. (Gén. 15:6; Rom. 4:13, 22) Mésmu kuza pode kontise ku nos. Jeová ta fika kontenti ku nos ka pamodi kantu trabadju nu ta faze ô pamodi priviléjius ki nu ten. Má, el ta fika kontenti ku nos pamodi nu ta aguenta firmi di manera fiel. I ka ta inporta kal ki é nos idadi, nos situason ô kapasidadi, nos tudu nu pode aguenta  firmi. Bu sta pasa pa un prubléma gósi i bu sta ta aguenta firmi? Si kel-li sta ta kontise ku bo, bu pode fika konsoladu di sabe ma Jeová sta kontenti ku bo. Óras ki nu odja ma Deus sta kontenti ku nos, nos speransa na kes benson ki el promete ta bira más fórti.

15. Kuzê ki Paulu fla na Romanus 5:4, 5, i ki pergunta alguns algen pode faze?

¹⁵ Sima Paulu fla, nu ta ten aprovason di Jeová óras ki nu ta kontinua fiel i nu ta aguenta prublémas. Repara modi ki Paulu kontinua se karta. El fla: “Óras ki Deus fika kontenti ku nos, nu ta ten speransa, i nos speransa ka ta diziludi-nu”. (Rom. 5:4, 5) Kel-li pode dexa alguns algen konfuzu. Pamodi? Pamodi antis, sima sta na Romanus 5:2, Paulu flaba ma kes kriston na Roma dja tinha “speransa di resebe glória di Deus.” Nton, algen pode pergunta: ‘Si kes kriston dja tinha un speransa, pamodi ki Paulu pâpia otu bês di speransa?’

16. Modi ki speransa ki un algen ten pode bira más fórti? (Odja fotus.)

¹⁶ Nu pode intende kuzê ki Paulu krê flaba óras ki nu ta lenbra ma speransa é un kuza ki pode bira más fórti. Pur izénplu, bu ta lenbra kantu bu obi pa primeru bês sobri kel speransa sábi ki sta na Palavra di Deus? Na kel ténpu talvês bu pensa ma kel ideia di vive pa tudu ténpu na un paraízu na téra éra bon dimás pa ser verdadi. Má dipôs ki bu prende más sobri Jeová i sobri promésas di Bíblia, bu speransa ma Jeová ta ben kunpri tudu kel ki el promete bira más fórti.

17. Modi ki bu speransa kontinua ta bira fórti dipôs ki bu da bu vida pa Jeová i bu batiza?

¹⁷ Sikrê dipôs ki bu batiza, bu ba ta konxe Jeová más midjór i bu amor pa el ba ta omenta. Nton, bu speransa fika más fórti inda. (Ebr. 5:13–6:1) Talvês kuzê ki Romanus 5:2-4 ta fla, kontise ku  bo. Talvês dja bu pasa pa txeu prubléma, má bu aguenta firmi i bu odja ma Jeová staba kontenti ku bo. Pamodi bu sabe ma Deus ta ama-u, gósi bu ten más motivu inda pa bu spera ma el ta ben kunpri kes kuza ki el promete. Bu speransa bira más fórti di ki kel ki bu tinha na komésu. Gósi, kel speransa li é más rial pa bo i el é más spesial. El sta ta afeta-u mutu más txeu inda. El sta influensia tudu ária di bu vida i el muda modi ki bu ta trata bu família, modi ki bu ta toma disizons i ti mésmu modi ki bu ta uza bu ténpu.

18. Ki serteza Jeová da-nu?

¹⁸ Apóstlu Paulu fla un kuza txeu inportanti sobri speransa ki nu ten dipôs di resebe aprovason di Deus. El da-nu serteza ma nos speransa ta ben kunpri sen fadja. Pamodi ki nu pode ten kel serteza li? Pamodi Paulu pâpia di kel garantia di Deus kantu el skrebe pa kes kriston. El fla: “Nos speransa ka ta diziludi-nu, pamodi amor di Deus bazadu na nos korason através di spritu santu ki nu dadu.” (Rom. 5:5) Bu pode ten tudu serteza na kel speransa li ki Jeová da-u.

19. Ki serteza bu pode ten sobri bu speransa?

¹⁹ Pensa na kel promésa di Jeová pa Abraon i modi ki Deus fika kontenti ku el i El txoma-l di Se amigu. Abraon ka spera atoa. Bíblia ta fla: “Dipôs ki Abraon mostra paxénxa, el resebe kel promésa li.” (Ebr. 6:15; 11:9, 18; Rom. 4:20-22) Di serteza el ka fika diziludidu. Bo tanbê bu ka ta fika diziludidu si bu kontinua fiel. Bu ta resebe kes kuza ki bu sta spera. Bu ten txeu motivu pa fika kontenti pamodi bu sabe ma bu speransa ta ben kontise i bu ka ta fika diziludidu! (Rom. 12:12) Paulu fla: “Pa kel Deus ki ta da speransa intxi nhos di tudu alegria i pas pamodi nhos ta kunfia na el, asi pa puder di spritu santu poi nhos speransa ta fika más fórti.” — Rom. 15:13.