TUDU algen ta krê ten alegria na vida. Má na es ténpu di fin, nos tudu nu ta pasa pa prublémas ‘difísil di aguenta.’ (2 Tim. 3:1) Injustisa, prublémas di saúdi, falta di trabadju, dór i otus tipu di preokupason i tristéza pode poi txeu algen ta perde alegria poku-poku. Mésmu kes algen ki ta sirbi Jeová pode fika dizanimadu i odja ses alegria ta kaba. Si kel-li dja kontise ku bo, modi ki bu pode rekupera bu alegria?

Pa responde kel pergunta li, primeru nu meste ntende kuzê ki é alegria di verdadi i modi ki otus algen konsigi mante alegria mésmu ku prublémas. Dipôs nu ta ben prende kuzê ki nu pode faze pa mante i omenta nos alegria.

Nu ka debe konfundi alegria ku sta kontenti ô animadu. Pur izénplu, un algen ki sta moku ta ri txeu. Má, óras ki el fika normal grasa ta kaba i el ta volta pa se vida xeiu di tristéza i prublémas. Kel kontentamentu ki el xinti é ka éra alegria di verdadi. — Prov. 14:13.

Má, alegria é un kualidadi ki ta ben di korason. Ta fladu ma alegria é “sentimentu ki nu ta xinti pamodi dja nu konsigi ô nu sta spéra resebe un kuza bon.” Alegria é filisidadi ô kontentamentu ki nu ta xinti mésmu ki nu sta pasa pa bon ô mau momentu. (1 Tes. 1:6) Un algen pode sta ta pasa pa prublémas, má simé el pode ka perde se alegria na korason. Pur izénplu, apóstlus sotadu pamodi es staba ta pâpia sobri Kristu. Má ‘es sai di Sinédriu kontenti pamodi es atxadu meresedor di pasa vergónha pamodi se nómi.’ (Atus 5:41, BPK ) É klaru ki es ka fika kontenti pamodi es sotadu. Má, es xinti alegria pamodi es mante ses lialdadi pa Jeová.

Nu ka nase ku kel tipu di alegria li i nen el ka ta kria di el pa el. Pamodi? Pamodi alegria di verdadi ta faze párti di frutu di spritu santu di Deus. Alegria ta faze párti di ‘kel manera di ser novu’ ki nu ta ten ku ajuda di spritu santu di Deus. (Efé. 4:24; Gál. 5:22) Tanbê, óras ki nu dizenvolve alegria nu ta konsigi lida midjór ku prublémas di vida.

Jeová ka kreba pa kes kuza mariadu ki nu sta odja oji, kontise na Téra. El kreba sô kuzas dretu pa nos. Má simé, kuzas mariadu ki sta fazedu ka ta tra Jeová se alegria. Se Palavra ta fla: ‘Na lugar ki el ta mora ten forsa i alegria.’ (1 Crón. 16:27) Tanbê, kuzas dretu ki se sérvus ta faze ta poi ‘korason [di Jeová] fika kontenti.’ — Prov. 27:11.

Sima Jeová, nu ka debe fika preokupadu dimás óras ki kuzas ka sta kontise sima nu staba ta spéra. Envês di perde  nos alegria, nu pode konsentra na kuzas bon ki nu ten gósi i spéra ku paxénxa pa kuzas midjór ki sta pa ben. *

Tanbê na Bíblia nu ta atxa txeu izénplu di pesoas ki mante ses alegria na situason difísil. Abraon é un di kes ki aguenta prublémas difísil na vida i difikuldadis ki otus algen pô-l ta pasa. (Gén. 12:10-20; 14:8-16; 16:4, 5; 20:1-18; 21:8, 9) Mésmu ku kes prubléma li Abraon mante alegria na korason. Modi ki el konsigi? El ta konsentraba na se speransa di ben vive na mundu novu dibaxu di Reinu di Deus. (Gén. 22:15-18; Heb. 11:10) Jizus fla: ‘Abraon nhos pai, fika txeu kontenti pamodi speransa di odja nha dia.’ (João 8:56 ) Nu pode imita Abraon si nu konsentra na nos speransa pa futuru. — Rom. 8:21.

Sima Abraon, apóstlu Polu ku se kunpanheru Silas, staba konsentradu na promésas di Deus. Es tinha un fé fórti i es mante ses alegria mésmu na situasons difísil. Pur izénplu, dipôs ki es sotadu i es podu na kadiâ, ‘la pa meia noti, Polu ku Silas staba ta ora i ta lova Deus ku kántiku.’ (Atos 16:23-25 ) Ses speransa da-s forsa, má Polu ku Silas staba xeiu di alegria pamodi es sufri na nómi di Kristu. Nu pode imita Polu ku Silas óras ki nu ta lenbra di bensons ki nu ta resebe pamodi nu ta sirbi Deus ku lialdadi. — Fil. 1:12-14.

Oji nu pode atxa bons izénplu di txeu irmon na mundu interu, ki mante alegria na situasons difísil. Pur izénplu, na novénbru di 2013, kantu kel grandi furakon Haiyan kontise na Filipinas, más di mil kaza di Tistimunhas di Jeová fika distruídu. Un irmon ki txoma George ki perde se kaza na sidadi di Tacloban, fla: “Mésmu ku kuza ki kontise, irmons sta kontenti. É difísil splika alegria ki nu sta ta xinti.” Sikrê nu pasa pa un grandi difikuldadi, nu pode mante nos alegria si nu pensa na kuza ki Jeová dja faze pa nos. Ki otu motivu di alegria Jeová ta da-nu?

Alén di nos amizadi ku Jeová, ki otu grandi motivu di alegria nu ten? Pensa na kel-li: nu konxe Kriador di Séu ku Téra. El é nos Pai, nos Deus i nos Amigu! — Sal. 71:17, 18.

Tanbê nu ta da valor pa prezenti di vida i kapasidadi di goza vida. (Ecl. 3:12, 13) Jeová skodje-nu i el dexa-nu sabe kuzê ki el krê pa nos. (Col. 1:9, 10) Tanbê nu sabe kal ki é obijetivu di vida i nu ten orientason pa gia-nu. Má kuazi tudu algen na mundu ka sabe kal ki é obijetivu di vida. Pa mostra es diferénsa apóstlu Polu skrebe: ‘‘Odju ka odja i obidu ka obi, nen ka podu na korason di ómi kes kuza ki Deus pripara pa kes ki ta ama-l.’ Pamodi é pa nos ki Deus mostra kes kuza através di se spritu.’ (1 Cor. 2:9, 10) Nu ka ta fika kontenti di ntende kal ki é vontadi di Jeová?

Pensa na kuzê más ki Jeová dja faze pa se povu. Nu ka ta fika kontenti pamodi nos pekadu pode ser purduadu? (1 João 2:12 ) Pamodi mizerikórdia di Deus nu ten speransa sértu ma ka ta dura mundu novu di Deus ta ben. (Rom. 12:12) Mésmu gósi, Jeová ta da-nu irmons ki ta djuda-nu. (Sal. 133:1) Palavra di Deus ta da-nu sertéza ma Jeová ta proteje se povu di Satanás i di se dimónis. (Sal. 91:11) Si nu pensa na tudu kes benson ki ta ben di Deus, nu ta odja nos alegria ta omenta. — Fil. 4:4.

Modi ki un kriston alégri pode omenta se alegria? Jizus fla: ‘N fla nhos kes kuza li pa nhos xinti mésmu alegria ki mi, i pa nhos alegria bira konplétu.’ (João 15:11 ) Kel-li ta mostra ma nu pode omenta nos alegria. Sforsu ki nu ta faze pa omenta alegria é sima poi lenha na lumi. Bu ten ki poi más lenha pa lumi fika más fórti. Di mésmu manera, pa omenta bu alegria bu meste bira bu amizadi ku Jeová más fórti. Lenbra ma alegria ta ben di spritu santu. Nton, bu ta ten txeu alegria si sénpri bu pidi ajuda di spritu santu di Jeová i midita ku orason na se Palavra. — Sal. 1:1, 2; Lucas 11:13.

Tanbê bu alegria pode fika más fórti óras ki bu ta sforsa pa faze kuzas ki ta agrada Jeová. (Sal. 35:27; 112:1) Modi ki nu sabe kel-li? Pamodi nu fazedu pa ‘ruspeta Deus verdaderu i obedise se mandamentus, pamodi é kel-li ki tudu ómi debe faze.’ (Ecl. 12:13) Kel-li krê fla ma nu kriadu pa faze vontadi di Deus. Pur isu óras ki nu ta sirbi Jeová, nu ta xinti sábi na vida. *

Sima nu ta ten alegria di Deus, nu ta odja rezultadus ki é más di ki kel ki nu ta xinti déntu nos. Pur izénplu, nu ta dexa nos Pai na Séu más kontenti óras ki nu ta sirbi-l ku alegria, sikrê ku prublémas. (Deut. 16:15; 1 Tes. 5:16-18) Tanbê, kómu nu ten alegria di verdadi nu ka ta npenha pa kuzas material, má nu ta faze grandis sakrifisiu pa apoia Reinu di Deus. (Mat. 13:44) Óras ki nu odja kuzas ki Reinu sta ta faze nos alegria ta omenta, nu ta xinti sábi ku nos kabésa i tanbê nu ta djuda otus algen xinti alegria. — Atos 20:35 ; Fil. 1:3-5.

Dipôs ki un piskizador di Universidadi di Nebraska na Mérka, faze monti piskiza sobri saúdi, el skrebe: “Si bu sta filís i kontenti ku bu vida gósi, bu ten más xansi di ten bon saúdi na futuru.” Kel-li sta di akordu ku kel ki Bíblia ta fla: ‘Korason alégri é un bon ramedi’. (Prov. 17:22) Sima bu ta ba ta omenta bu alegria, bu ten más xansi di ten bon saúdi.

Nbóra nu sta vive na ténpu difísil, nu pode ten alegria di verdadi i ki ta dura si nu pidi spritu santu na orason, nu studa i nu pensa na Palavra di Jeová. Tanbê nu pode omenta nos alegria óras ki nu ta pensa na bensons ki nu sta resebe, imita fé di otus algen i npenha pa faze vontadi di Deus. Asi nu pode xinti na nos vida kel ki Salmo 64:10 ta fla: ‘Justu ta ben xinti alegria na Jeová i ta buska proteson na el.’