1-2. Pamodi i modi ki Jeová ranja manera pa nu pode faze párti di se família?

JEOVÁ konvida-nu pa nu faze párti di se família ki ta adora-l. Fórti konviti sábi! Tudu kes ki ta faze párti di es família é kes algen ki dja da ses vida pa Deus i ten fé na sakrifisiu di resgati di se Fidju. Anos é un família filís. Nu ten un vida sábi gósi i nu ten speransa di ben vive pa tudu ténpu, na Séu ô na Paraízu na Téra.

² Jeová ta ama-nu txeu. Pur isu, el faze un sakrifisiu grandi pa nu pode faze párti di se família. (João 3:16 ) Nu ‘kunpradu pa un présu.’ (1 Cor. 6:20) Através di sakrifisiu di Jizus, nu pode ten un amizadi fórti ku Jeová. Nu ten priviléjiu di txoma kel Algen Más Grandi di Séu ku Téra di nos Pai. I sima nu prende na kel otu studu, Jeová é midjór Pai ki ten.

3. Ki perguntas talvês nu pode faze? (Tanbê odja kuadru “ Jeová konxe-m dretu?”)

³ Talvês nu pode pergunta sima un skritor di Bíblia: ‘Modi ki N ta paga Jeová pa tudu kuza dretu ki dja el faze pa mi?’ (Sal. 116:12) É klaru ki nunka nu ka ta pode paga nos Pai kuzê ki el faze pa nos. Má simé, se amor pa nos ta pô-nu ta ama-l tanbê. Apóstlu Juan skrebe: ‘Nu ta ama pamodi el ama-nu primeru.’ (1 João 4:19 ) Di ki maneras nu pode mostra nos Pai na Séu ma nu ta ama-l?

4. Di akordu ku Tiago 4:8, pamodi ki nu debe sforsa pa nu ser más amigu di Jeová?

⁴ Jeová krê pa nu ser se amigu i pa nu pâpia ku el. (Lé  Tiago 4:8.) El ta insentiva-nu pa ‘nu ka para di faze orason’ i el sta sénpri prontu pa obi-nu. (Rom. 12:12) Nunka el ka sta okupadu dimás ô kansadu dimás pa obi-nu. I nu ta obi-l óras ki nu ta lé Bíblia, ki é se Palavra, djuntu ku kes publikason ki ta djuda-nu ntende-l. Tanbê, nu ta obi-l óras ki nu ta presta txeu atenson na runions. Sima un fidju ta fika más amigu di se pai óras ki el ta pâpia ku el sénpri, nos tanbê nu ta fika más amigu di Jeová óras ki nu ta pâpia ku el sénpri.

5. Modi ki nu pode faze orason sima Jeová ta krê?

⁵ Pensa modi ki bu sta ta faze bus orason pa Deus. Jeová krê pa bu abri bu korason pa el na orason. (Sal. 62:8) Éra bon nu perguntaba nos kabésa: ‘Nhas orason é sima un mensájen ki N ta kôpia i N ta manda, ô é sima un karta ki N ta skrebe di korason?’ Di sertéza bu ta ama Jeová txeu i bu krê kontinua ta ten un amizadi fórti ku el. Má pa kel-li, bu ten ki pâpia ku el sénpri. Konta-l tudu kuza. Konta-l bus alegria i bus sufrimentu. Bu pode ten sertéza ma si bu txiga na el, el ta djuda-u.

6. Kuzê ki nu meste faze pa nu kontinua ta ser amigu di nos Pai na Séu?

⁶ Pa nu kontinua ta ser amigu di nos Pai na Séu, nu ten ki agradise-l sénpri. Nu ta konkorda ku salmista ki skrebe: ‘Kantu kuza ki bu faze, ó Jeová nha Deus, bu faze txeu kuza spetakular pa nos i bu pensa txeu na nos. Ka ten ningen ki ta konpara ku bo. Si N tenta konta-s i pâpia di es, es ta sérba txeu dimás pa N konta’! (Sal. 40:5) Nu ta faze más di ki sô xinti gratidon; nu ta mostra nos gratidon pa Jeová através di kuzas ki nu ta fla i ki nu ta faze. É kel-li ki ta pô-nu ser diferenti di txeu algen oji. Nu sta ta vive na un mundu ki pesoas ka ta da valor pa tudu kuza ki Deus ta faze pa es. Na verdadi, un di kes kuza ki ta mostra ma nu sta ta vive ‘na ténpu di fin’ é ingratidon. (2 Tim. 3:1, 2) Nunka nu ka krê ser asi!

7. Kuzê ki Jeová krê pa nu faze i pamodi?

⁷ Ninhun pai ka ta krê pa se fidjus sta ta briga, má pa es ser amigu di kunpanheru. Di mésmu manera, Jeová krê pa tudu kes algen ki ta adora-l ser amigu di kunpanheru. Na verdadi, é kel amor ki nu ten pa kunpanheru ki ta mostra ma nos é kristons verdaderu. (João 13:35 ) Nu ta konkorda ku salmista ki skrebe: ‘Modi ki é bon i sábi dimás pa irmons vive djuntu i unidu!’ (Sal. 133:1) Óras ki nu ta ama nos irmons i nos irmans, nu sta mostra Jeová ma nu ta ama-l tanbê. (1 João 4:20 ) É rei di sábi faze párti di un família di irmons i irmans ki ta ‘trata kunpanheru ku bondadi, i konpaxon di korason.’ — Efé. 4:32.

8. Di akordu ku 1 João 5:3, kal ki é razon prinsipal ki ta pô-nu ta obi ku Jeová?

⁸ Jeová krê pa fidjus obi ku ses pai ku ses mai, i tanbê el krê pa nu obi ku el. (Efé. 6:1) El merese pa nu obi ku el pamodi el é nos Kriador, el ta sustenta nos vida i el ten más sabedoria ki kalker pai. Má, razon prinsipal ki ta pô-nu ta obi ku Jeová é pamodi nu ta ama-l. (Lé 1 João 5:3.) Nbóra nu ten txeu razon pa nu obi ku Jeová, el ka ta obriga-nu obi ku el. El da-nu liberdadi pa nu faze kuzê  ki nu krê. Pur isu, el ta fika kontenti óras ki nu ta skodje obi ku el pamodi nu ta ama-l.

9-10. Pamodi ki é inportanti konxe i vive di akordu ku leis di Deus?

⁹ Pai ku mai ta krê pa ses fidjus sta suguru. É pur isu ki es ta kria régras di konportamentu pa proteje ses fidjus. Óras ki fidjus ta sigi kes régra, es ta mostra ma es ta kunfia na ses pai ku ses mai i ma es ta ruspeta-s. Pur isu, é más inportanti inda pa nu konxe i sigi kes régra ki nos Pai na Séu ta da-nu. Óras ki nu ta faze si, nu ta mostra ma nu ta ama i nu ta ruspeta Jeová. Tanbê, obi ku Jeová é bon pa nos. (Isa. 48:17, 18) Má, kes ki ka ta obi ku Jeová i nen ku se leis ta prujudika ses kabésa. — Gál. 6:7, 8.

¹⁰ Óras ki nu ta vive di manera ki ta agrada Jeová, nu ta proteje di kuzas ki pode prujudika nos saúdi, ki ta pô-nu ta xinti tristi ô ki pode straga nos amizadi ku el. Jeová sabe kuzê ki é midjór pa nos. Un irman ki ta mora na Mérka, ki txoma Aurora, fla: “N sabe ma óras ki nu ta obi ku Jeová, sénpri nu ta ten kel midjór vida ki ten.” Nos tudu nu ta konkorda ku kel-li. Bu ta konsigi lenbra modi ki sigi leis di Jeová dja djuda-u?

11. Modi ki orason ta djuda-nu?

¹¹ Orason ta djuda-nu ser obidienti  mésmu óras ki é difísil faze kel-la. Alvês é difísil obi ku Jeová pamodi nos é inperfetu. Má simé, nu meste sforsa txeu pa nu ka peka. Un salmista inplora Deus: ‘Labanta déntu mi vontadi di obi ku bo.’ (Sal. 51:12) Un pionera fíksu ki txoma Denise, fla: “Si N atxa difísil obi ku un di kes lei di Jeová, N ta ora ta pidi forsa pa N faze kel ki é dretu.” Nu pode ten sertéza ma Jeová sénpri ta obi kel tipu di orason li. — Luc. 11:9-13.

12. Di akordu ku Efésios 5:1, kuzê ki nu debe faze?

¹² Lé Efésios 5:1. Nu krê faze nos midjór pa nu imita Jeová, pamodi nos é ‘fidjus ki el ta ama’. Nu ta imita se kualidadis óras ki nu ta mostra amor, bondadi i óras ki nu ta púrdua otus. Óras ki kes algen ki ka konxe Deus ta odja nos bon konportamentu, talvês es pode xinti vontadi di prende más sobri Deus. (1 Ped. 2:12) Pai ku mai ki ta sirbi Jeová debe trata ses fidjus sima Jeová ta trata-nu. Óras ki es ta imita Jeová, ses fidjus tanbê pode krê ser amigu di nos Pai ki ta ama-nu.

13. Kuzê ki nu meste faze pa nu ten koraji?

¹³ Un mininu ta xinti orgulhu di se pai i el ta fika kontenti di pâpia di el. Di mésmu manera, nu ta xinti orgulhu di Jeová, ki é nos Pai na Séu i nu krê pa otus  algen konxe-l. Nos tudu nu ta xinti déntu nos korason sima Rei Davidi ki skrebe: ‘N sta ba pâpia di Jeová ku orgulhu’. (Sal. 34:2) Má i si nu ta xinti txeu vergónha di pâpia sobri Jeová? Modi ki nu pode ten koraji? Nu ta ten koraji óras ki nu ta pensa modi ki Jeová ta fika kontenti si nu pâpia di el. Tanbê pensa modi ki konxe Jeová ta djuda otus algen ten un vida midjór. Jeová ta da-nu koraji ki nu meste. Sima el djuda kes kriston na ténpu ki Bíblia skrebedu ten koraji, el ta djuda-nu tanbê. — 1 Tes. 2:2.

14. Pamodi ki trabadju di pregason é inportanti?

¹⁴ Jeová ta trata tudu algen igual. Pur isu, el ta fika kontenti óras ki el ta odja-nu ta trata otus ku amor, ka ta nporta di undi ki es é. (Atos 10:34, 35 ) Un di kes midjór manera di mostra amor pa otus é óras ki nu ta pâpia ku es di notísias sábi. (Mat. 28:19, 20) Pamodi ki kel trabadju li é inportanti? Kes ki seta notísia sábi pode ten un vida midjór gósi i ten speransa di vive pa tudu ténpu na Paraízu. — 1 Tim. 4:16.

15-16. Ki razons nu ten pa sta kontenti?

¹⁵ Jeová é un Pai ki ten amor, i el krê pa se família ser filís. (Isa. 65:14) Nu ten txeu razon pa nu ser filís gósi, sikrê nu sta pasa pa prublémas. Pur izénplu, nu ten sertéza ma nos Pai na Séu ta ama-nu txeu. Nu ten konhisimentu izatu di Palavra di Deus, ki é Bíblia. (Jer. 15:16) I nu ta faze párti di un família spesial ki tudu algen ta ama Jeová, ta ama se leis i ta ama kunpanheru. — Sal. 106:4, 5.

¹⁶ Nu pode kontinua filís pamodi nu ten sertéza ma nu ta ben vive mutu más midjór na futuru. Nu sabe ma ka ta dura, Jeová ta ben kaba ku tudu maldadi i el ta ben uza se Reinu pa bira Téra un paraízu. Tanbê nu ten un speransa sábi dimás di ben resebe kes algen ki nu ta ama ki móre. (João 5:28, 29 ) Ta ben ser un ténpu rei di sábi! I más inportanti inda, nu ten sertéza ma ka ta dura, tudu algen na Séu i na Téra ta ben da nos Pai ki ta ama-nu, ónra, lovor i adorason ki el merese.