N nase na sidadi di Kebéki, ki ta fika na pruvínsia di Kebéki na Kanadá. Língua prinsipal di kel zóna é fransês. Nha pai ku nha mai ki txomaba Louis i Zélia, kria-m ku txeu amor i karinhu. Nha pai éra un ómi tímidu i el gostaba txeu di lé. Ami N gostaba di skrebe i nha sonhu éra un dia sérba jornalista.

Kantu N tinha uns 12 anu, un koléga di trabadju di nha pai, ki txomaba Rodolphe Soucy, bai vizita-nu na nos kaza djuntu ku se amigu. Es éra Tistimunhas di Jeová. N ka sabia txeu kuza sobri Tistimunhas di Jeová i N ka staba mutu interesadu na ses relijion. Má simé, N fika dimiradu ku manera ki es ta uzaba Bíblia pa respondeba perguntas ku lójika i ku bondadi. Nha mai ku nha pai tanbê fika dimiradu, pur isu nu seta un studu di Bíblia.

Na kel ténpu, N ta studaba na un skóla katóliku. Alvês, N ta papiaba ku nhas koléga di skóla sobri kuzê ki N staba ta prende na nha studu di Bíblia. Ti ki un dia, kes profesor ki éra padri diskubri. Envês di es uza Bíblia pa prova ma N staba mariadu, un di es fla-m na frenti di tudu nhas koléga di turma ma mi éra rebéldi. Kel-la éra un situason difísil, má el da bons rezultadu. El djuda-m odja ma kes ensinu di relijion ki skóla staba ta inxina, ka staba di akordu ku Bíblia. N da kónta ma la é ka éra nha lugar. Nton, ku autorizason di nha mai ku nha pai, N muda pa otu skóla.

N kontinua ta studa Bíblia, má N ka staba ta faze txeu prugrésu, pamodi N tinha medu di pregaba di kaza en kaza. Igreja Katólika tinha txeu forsa na Kebéki i es éra kóntra  nos trabadju di pregason. Maurice Duplessis ki éra primeru ministru di Kebéki, éra un pulítiku ki tinha txeu ligason ku igreja. Ku se apoiu, pesoas ta poba Tistimunhas di Jeová medu i ti ta atakaba es. Pur isu, pregason na kel ténpu ta izijiba txeu koraji.

Un irmon ki djuda-m vense nhas medu é John Rae. El kursa Skóla di Jiliádi turma nunbru 9. John tinha txeu spiriénsa, má el éra umildi i pesoas ta xintiba avontádi ku el. Éra difísil pa el daba mi konsedju klaru, má N prende txeu ku se bon izénplu. John ka ta papiaba fransês dretu, pur isu txeu bês N ta saíba ku el i N ta djudaba el prega na fransês. Kes ténpu ki N pasa ku John djuda-m disidi ser un Tistimunha di Jeová. Dipôs di 10 anu ki Tistimunhas di Jeová pâpia ku mi pa primeru bês, N batiza na dia 26 di maiu di 1951.

Nos kongregason na sidadi di Kebéki éra pikinoti, má kuazi tudu algen éra pioneru. Ses bon izénplu pô-m ta ser pioneru tanbê. Na kel ténpu, nu ta uzaba sô Bíblia na pregason di kaza en kaza. Dja ki nu ta pregaba sen publikasons, nu tinha ki uzaba Bíblia dretu. Pur isu, N sforsa txeu pa N prende testus di Bíblia ki ta djudaba mi difendeba verdadi. Má, txeu algen ka ta krê leba ninhun traduson di Bíblia ki ka tinha aprovason di Igreja Katólika.

Na anu di 1952, N kaza ku Simone Patry ki éra un irman fiel di nha kongregason. Nu muda pa Montreal, i déntu di un anu nu abensuadu ku nos fidju-fémia, ki txoma Lise. Nbóra N para sirvisu di pioneru poku ténpu antis di nu kaza, mi ku Simone nu tenta mante un vida sinplis. Kel-li djuda-nu partisipa más txeu na atividadis di kongregason, sima runion i pregason.

Dipôs di 10 anu N pensa na ser pioneru otu bês. Na anu di 1962, N bai sisti Escola do Ministério do Reino pa ansions na Betel di Kanadá. N diziginadu pa fika na mésmu kuartu ki un irmon ki txomaba Camille Ouellette. N fika dimiradu ku zelu ki Camille tinha pa pregason, inda más pamodi el éra kazadu i el tinha fidjus. Na kel ténpu éra mutu poku irmons ku irmans na Kebéki ki éra pioneru i tanbê ku fidjus pa kria. Má simé, kel-la ki éra obijetivu di Camille. Duránti kel ténpu ki nu pasa djuntu, el insentiva-m pa N pensa na nha situason. Alguns mês dipôs, N odja ma N pode sérba pioneru fíksu otu bês. Alguns  algen atxa ma N ka toma un bon disizon. Má N kumesa nha sirvisu di pioneru, pamodi N tinha sertéza ma Jeová ta abensuaba nha sforsu di faze más na pregason.

Na anu di 1964, mi ku Simone nu diziginadu pa nu ser pioneru spesial na sidadi di Kebéki, undi ki nu nase. Nu pasa txeu anu ta prega la. Na kel ténpu, pirsigison staba más poku, má inda tinha alguns algen ki éra kóntra.

Na un sábadu di tardi, un guarda prende-m na Sainte-Marie, ki éra un sidadi pikinoti, ka mutu lonji di Kebéki. N podu prézu pamodi N staba ta prega di kaza en kaza sen ten un lisénsa. Dipôs, N lebadu pa un juís ki txomaba Baillargeon. El éra un ómi ki ta daba algen medu sô di odja-l. El pergunta-m kenha ki ta sérba nha adivogadu na tribunal. Kantu N fla nómi di Glen How, * ki éra un adivogadu Tistimunha di Jeová txeu konxedu, kel juís fla ku medu: “Modi? Ael gó nau!” Glen How éra konxedu na djuda Tistimunhas di Jeová ganha kazus na tribunal. Un ténpu dipôs, tribunal fla-m ma dja tradu kes akuzason kóntra mi.

Tanbê pamodi opozison na Kebéki, éra difísil atxaba un lugar pa renda ki ta daba pa faze runion. Úniku lugar ki nos kongregason pikinoti atxa, éra na un garaji bédju ki ta fazeba txeu friu na invérnu. Na ténpu friu, irmons ta uzaba un mákina pa kentaba lugar. Txeu bês nu ta djuntaba na vólta di kel mákina alguns óra antis di runion, pa kontaba alguns spiriénsa ki ta nkorajaba nos.

É rei di sábi odja kes bon rezultadu di nos trabadju di pregason. Na anus 60, tinha sô alguns kongregason pikinoti na kes zóna di sidadi di Kebéki, na zóna di Côte-Nord, i na Pinínsula di Gaspé. Oji ten un monti irmons na kes zóna la, i es ta faze runions na Salons di Reinu rei di bunitu.

Mi ku Simone nu konvidadu pa vizita kongregasons na anu di 1970. Dipôs, na anu 1973 nu diziginadu pa faze trabadju di distritu. Duránti kes anu, N prende txeu ku irmons ki tinha más spiriénsa sima Laurier Saumur * i David Splane, * ki tanbê ta vizitaba kongregasons. Dipôs di kada asenbleia, mi ku David nu ta daba kunpanheru konsedju sobri modi ki nu pode midjoraba nos manera di inxina. N ta lenbra ma un dia David fla-m: “Léonce, N gosta txeu di bu últimu diskursu. Staba bon, má N ta fazeba três diskursu ku tudu kel matéria!” N tinha tendénsia di uzaba txeu informason na nhas diskursu. N meste mudaba nha manera di faze diskursu i konsentraba na kes pontu prinsipal.

 Kes enkaregadu di distritu tinha responsabilidadi di nkorajaba kes enkaregadu di grupu di kongregason. Má, txeu publikador na Kebéki konxeba mi dretu. Txeu bês, es ta krê saíba ku mi na pregason óras ki N ta vizitaba kes grupu di kongregason. N gostaba di trabadjaba ku es na pregason, má N staba ta pasa poku ténpu ku enkaregadu di grupu di kongregason. Un bês, un enkaregadu di grupu ki ta trataba otus ku amor, lenbra-m: “É bon odja-u ta pasa ténpu ku irmons, má ka bu skese ma kel simana li é di meu. Ami tanbê N meste pa algen nkoraja-m!” Es konsedju ku amor djuda-m ser más ikilibradu.

Na anu di 1976, kontise un kuza tristi dimás ki N ka sta speraba. Simone, nha mudjer ki N kreba txeu, duense riju i dipôs el móre. El éra un bon mudjer, pamodi el gostaba di djuda otus i el ta amaba Jeová txeu. Dja ki N pasa txeu ténpu na pregason N konsigi lida ku kel dór di perde-l. I N ta agradise Jeová pa ajuda ki el da-m ku amor duránti kel ténpu difísil. Ku ténpu, N kaza ku Carolyn Elliott, un irman pionera zeloza. El éra di tiritóriu inglês, má el bai sirbi na Kebéki, undi tinha más nisisidadi. Carolyn é un algen ki pesoas ta xinti avontádi ku el i el ta preokupa txeu ku otus, prinsipalmenti kes algen ki é tímidu ô ki ta xinti es sô. El djuda-m txeu na nha diziginason.

Na janeru di 1978, N pididu pa N ser instrutor di primeru Skóla pa Pioneru na Kebéki. N staba nervozu dimás pamodi nunka N ka baba kel skóla i nen N ka odjaba kel livru. Pur isu tudu kuza éra novu pa mi i pa kes alunu. Má N fika kontenti, pamodi na primeru turma tinha txeu pioneru ku spiriénsa. Nbóra ami éra instrutor, N prende txeu ku kes alunu!

Más tardi, na anu di 1978, nu sisti Kongrésu Internasional ku téma: “Fé Vitoriosa” na Stádiu Olínpiku di Montreal. Foi un kongrésu  más grandi ki dja fazedu na Kebéki ti gósi, ku más di 80 mil algen ta sisti. N diziginadu pa trabadja na Dipartamentu di Notísias di kongrésu. N pâpia ku txeu jornalista i N fika uma kontenti di odja ma es skrebe un monti kuza dretu sobri nos. Dadu más di 20 óra di entrivista na rádiu, na tilivizon i publikadu un monti artigu na jornal. Kel-la foi un grandi tistimunhu!

Na anu di 1996, kontise un grandi mudansa ku mi. Dipôs di sirbi sô na tiritóriu fransês désdi ki N batiza, N diziginadu pa N faze trabadju di distritu na tiritóriu inglês na Torontu. N ka sta xintiba priparadu i sô di pensa na faze diskursu ku nha inglês mariadu, N ta fikaba xeiu di medu. N tevi ki faze txeu orason i kunfia inda más na Jeová.

Óras ki N ta pensa na kel ténpu, N pode fla ma kes dôs anu ki N pasa ta sirbi na zóna di Torontu, foi rei di sábi. Carolyn djuda-m ku txeu paxénxa ten más kunfiansa na pâpia inglês. Tanbê, irmons ku irmans apoia-nu i es nkoraja-nu txeu. Na poku ténpu nu ranja un monti amigu.

Alén di otus kuza ki N ta fazeba i kes priparason pa asenbleia na fin di simana, txeu bês N ta fazeba un óra di pregason di kaza en kaza, na sésta-fera di noti. Alguns talvês ta pensaba: ‘Pakê sai na pregason antis di un fin di simana ku txeu kuza pa faze na asenbleia?’ É pamodi kes bon konbérsu na pregason ta animaba mi. I mésmu gósi N ta fika txeu kontenti óras ki N ta sai na pregason.

Na anu di 1998, mi ku Carolyn nu diziginadu pa nu ser pioneru spesial na Montreal. Pa txeu anu, nha diziginason éra organizaba tistimunhu spesial pa públiku. Tanbê N ta trabadjaba ku jornalistas pa kababa ku kel ideia mariadu ki pesoas tinha sobri Tistimunhas di Jeová. Oji, mi ku Carolyn nu gosta di prega pa kes stranjeru ki ka dura muda pa Kanadá i ki txeu bês ta krê prende más sobri Bíblia.

Óras ki N ta pensa na nhas 68 anu batizadu ta sirbi Jeová, N ta xinti ma N resebe txeu benson. N fika rei di kontenti pamodi N prende gosta di pregason i N djuda txeu algen konxe verdadi. Dipôs ki nha fidju-fémia Lise i se maridu kaba di kria ses fidju, es kumesa sirvisu di pioneru fíksu. N ta fika kontenti óras ki N ta odja zelu di nha fidju-fémia na pregason. N ta agradise prinsipalmenti kes irmon ki através di ses bon izénplu i ses bon konsedju, djuda-m ten un amizadi fórti ku Jeová i kuida di txeu diziginason na organizason di Jeová. N diskubri ma nu ta kontinua fiel na un diziginason sô si nu kunfia na puder di spritu santu di Jeová. (Sal. 51:11) N ta kontinua ta agradise Jeová pamodi el da-m un priviléjiu grandi di lova se nómi! — Sal. 54:6.