NA TÉNPU ki Bíblia skrebedu, un noivu ô se família ta pagaba présu di noiva pa família di noiva. Es pode pagaba ku kuzas material, animal ô dinheru. Má alvês, kel noivu ta trabadjaba pa família di noiva, sima Jakó faze. El trabadja 7 anu pa pai di Rakel pa el pode kazaba ku Rakel. (Gén. 29:17, 18, 20) Pamodi ki es ta pagaba présu di noiva?

Carol Meyers, ki é un mudjer ki ta piskiza asuntus di Bíblia, fla: “Un fidju-fémia ta djudaba se família txeu, [prinsipalmenti na trabadju di agrikultura]. Pur isu, kel présu di noiva ta djudaba kel família óras ki ses fidju-fémia saíba di kaza.” Kel présu di noiva tanbê pode djudaba pa família di noivu ku noiva tinha bon amizadi. Asi kes dôs família pode djudaba kunpanheru na ténpu difísil. Tanbê, kel présu di noiva éra un próva ma kel mudjer staba noiva i ma gósi éra se maridu ki sta ba kuidaba di el envês di se pai.

Sikrê un ómi tinha ki pagaba présu di noiva, kel-li ka krê fla ma mudjer éra un kuza ki pode sérba kunpradu ô bendedu. Un livru ki ta splika modi ki éra vida na Israel, * na ténpu antigu, ta fla: “Na un kazamentu di israelitas, óras ki un noivu ta pagaba un dinheru ô un otu kuza di valor pa família di kel noiva, pode parse ma el staba ta kunpra kel noiva. Má el ka staba ta kunpra-l. Ta parse ma es ta odjaba kel [présu di noiva] sima un rekonpénsa pa se família.”

Na alguns país, pesoas ti inda sta ta sigi kel kustumu di paga présu di noiva. Óras ki pai ku mai ki ta sirbi Jeová ta pidi présu di noiva, es ka debe pidi un présu altu dimás, asi ‘tudu ómi ta fika ta sabe ma es é algen ikilibradu.’ (Fil. 4:5; 1 Cor. 10:32, 33) Di kel manera li, es ta mostra ma es ka ‘ta ama dinheru’, ô ma es é ka ganansiozus. (2 Tim. 3:2) Si es ka pidi un présu mutu altu, kel noivu ka ta xinti ma el ten ki muda dia di kazamentu pa el konsigi paga kel présu di noiva. Tanbê, kel noivu ka ta xinti ma el ten ki para di ser pioneru pa el pode trabadja más txeu pa el konsigi kel dinheru ki el pididu.

Na alguns párti di mundu, ten leis sobri présu di noiva. Na kes lugar li, pai ku mai ki ta sirbi Jeová debe obi ku kes lei. Pamodi? Pamodi Bíblia ta fla ma sérvus di Deus ‘debe obi ku autoridadi supirior’ i obi ku kes lei ki é ka kóntra leis di Deus. — Rom. 13:1; Atos 5:29.