Nha pai ku nha mai éra katóliku ferénha. Má kantu es prende na Bíblia ma nómi di Deus é Jeová, es bira Tistimunhas di Jeová ku txeu zelu. Nha pai para di faze imajens di Jizus. Envês di kel-li, dja ki el éra karpinteru, el konpo kel párti di baxu di nos kaza pa ser kel primeru Salon di Reinu na San Juan del Monte ki é un zóna ki ta fika pértu di Manila ki é kapital di Filipinas.

Dipôs ki N nase na anu di 1952, nha pai ku nha mai kumesa ta inxina-m sobri Jeová sima es ta inxinaba nhas kuatu irmon i nhas três irman más grandi. Sima N ba ta kria, nha pai insentiva-m pa N lé un kapítlu di Bíblia tudu dia i el studa txeu di nos publikasons ku mi. Alvês nha pai ku nha mai ta konvidaba enkaregadu di grupu di kongregason i reprizentantis di Betel pa fikaba na nos kaza. Tudu nos família ta xintiba txeu alegria i inkorajadu ku kes spiriénsia ki kes irmon ta kontaba nos, kel-li motiva-nu pa poi pregason na primeru lugar na nos vida.

Nha pai ku nha mai dexa-m un bon izénplu di fé. Dipôs ki nha mai ki N krê txeu móre pamodi un duénsa, mi ku nha pai nu kumesa sirvisu di pioneru djuntu na anu di 1971. Má dipôs na anu di 1973, kantu N tinha 20 anu, nha pai móre. Dipôs ki N perde nha pai ku nha mai, N xinti un vaziu i mi sô. Má envês di N fika tristi dimás, kel speransa “suguru i firmi” djuda-m kontinua puzitivu i fika más amigu di Jeová. (Ebr. 6:19) Poku ténpu dipôs ki nha pai móre, N seta un diziginason di pioneru spesial na Coron, ki é un ilha izoladu, na pruvínsia di Palawan.

N tinha 21 anu kantu N txiga na Coron. Pamodi sénpri N mora na sidadi, N fika dimiradu di sabe ma kel ilha tinha poku lus i agu kanalizadu i tanbê tinha poku karu i móta. Enbóra tinha alguns irmon la, N ka tinha ninhun  koléga pioneru i alvês N tinha ki pregaba mi sô. Na kes primeru mês N xinti txeu sodadi di nha família i di nhas amigu. Di noti N ta djobeba pa strélas na séu i N ta txoraba. N krê dizistiba di nha diziginason i voltaba pa kaza.

Duránti kes momentu ki N ta xintiba mi sô, N ta flaba Jeová tudu kuza ki N staba ta pensa i xinti. N ta lenbraba di kuzas ki ta da algen koraji ki N lé na Bíblia i na nos publikason. Txeu bês N ta pensaba na Salmo 19:14, N da kónta ma Jeová ta sérba ‘nha Rótxa i nha Salvason’ si N pensaba na kuzas ki ta dexa-l kontenti sima kuzas ki el ta faze i se kualidadis. Kel artigu di Sentinéla ku téma: “Nunca está sozinho” a djuda-m txeu. N le-l txeu bês. Sta mi sô ku Jeová da-m bons oportunidadi pa faze orason, studa i midita.

Un ténpu antis di N viaja pa Coron, N diziginadu pa ser ansion. Dja ki mi éra úniku ansion, N kumesa ta faze Escola do Ministério Teocrático, Reunião de Serviço, Studu di livru di kongregason i Studu di Sentinéla tudu simana. Tanbê N ta fazeba diskursu pa públiku tudu simana. Un kuza éra sértu, N ka tinha ténpu pa N xintiba mi sô!

N tevi un bon rezultadu na trabadju di pregason na Coron. Alguns di nhas studanti di Bíblia kaba pa batiza. Má tanbê tinha dizafius. Alvês N ta pasaba meiu dia ta anda ti ki N txigaba na tiritóriu sen sabe undi ki N ta durmiba óras ki N txigaba. Tiritóriu di nos kongregason tanbê tinha txeu ilha pikinoti. Txeu bês N ta viajaba na barku di motor, na mar brabu, pa N pode txigaba na kes ilha, enbóra N ka sabe nadaba. Na tudu kes dizafiu li Jeová proteje-m i el djuda-m. Ku ténpu N da kónta ma Jeová staba ta pripara-m pa dizafius más grandi na kel otu diziginason.

Na anu di 1978, N diziginadu pa Papua Nova Giné ki ta fika na nórti di Austrália. Papua Nova Giné é un país ki ten txeu montanha i el é kuazi di tamanhu di Spanha. N fika dimiradu kantu N diskubri ma la ten uns três milhon di algen ki ta papiaba más di 800 língua. Filismenti, maioria di kes algen ta papiaba pidjin di Melanézia, ki normalmenti pesoas ta txoma di tok pisin.

N diziginadu pa N sirbi pa un ténpu na un kongregason inglês ki ta fikaba na Port Moresby ki é kapital. Má dipôs, N muda pa un kongregason tok pisin i N sisti aula pa N prende kel língua. N uza kes kuza ki N staba ta prende na aula na trabadju di pregason. Kel-li djuda-m prende kel língua más faxi. Na poku ténpu dja N staba priparadu pa faze diskursu pa públiku na tok pisin. Imajina modi ki N fika spantadu pamodi na ménus di un anu ki N txiga na Papua Nova Giné N diziginadu pa ser un enkaregadu di grupu di kongregason pa kes kongregason tok pisin na kes pruvínsia grandi.

Dja ki kes kongregason ta fikaba lonji di kunpanheru, N tevi ki organiza txeu asenbleia i faze txeu viajen. Na komésu N xinti mi sô txeu bês, pamodi N staba na un otu país, undi pesoas ta papiaba un língua diferenti i  es tinha kustumus diferenti di kel ki N staba kustumadu ku el. Pamodi tinha txeu montanha i es éra inklinadu, ka tinha otu manera di txigaba na kes kongregason si ka éra di avion. Pur isu, N tinha ki viajaba di avion kuazi tudu simana. Alvês ami éra úniku pasajeru na kel avion pikinoti i ki tinha sô un motor. Kes viajen ta poba mi ta xinti fadigadu sima viajen di barku!

Poku algen la tinha tilifóni, pur isu N ta papiaba ku kongregasons através di kartas. Txeu bês N ta txigaba antis di kes karta i N tinha ki perguntaba pesoas di kel lugar undi ki kes publikador ta moraba. Má tudu bês ki N ta inkontraba ku irmons es ta resebeba mi ku txeu gratidon i amor. I kel-li ta lenbraba mi pamodi ki N staba ta faze tudu kes sforsu. N odja ajuda di Jeová di txeu manera i nha amizadi ku el bira más fórti.

Na nha primeru runion na un ilha ki txoma Bougainville, un kazal txiga na mi ta ri i es pergunta-m: “Bu ta lenbra di nos?” N lenbra ma N daba kel kazal li tistimunhu kantu N txiga na Port Moresby pa primeru bês. N kumesa ta faze-s studu di Bíblia i dipôs N pidi un irmon di la pa kontinua ta studa ku es. Gósi es staba batizadu. Kel-li é un di kes txeu benson ki N resebe duránti kes três anu ki N pasa na Papua Nova Giné.

Antis di N saíba di Coron na anu di 1978, N konxe un irman bunita, ki txomaba Adel i ki gostaba di faze sakrifisius. El éra pionera fíksu timenti el ta kriaba ses dôs fidju ki txomaba Samuel i Shirley. Omésmu ténpu el ta kuidaba di se mai ki dja staba di idadi. Na maiu di 1981, N volta pa Filipinas pa kaza ku Adel. Dipôs ki nu kaza, nu sirbi di pioneru fíksu i nu kuida di nos família djuntu.

Enbóra N tinha un família, na anu di 1983 N diziginadu pa ser pioneru spesial otu bês. N diziginadu pa sirbi na ilha di Linapacan na pruvínsia di Palawan. Família interu muda pa kel ilha izoladu ki ka tinha ninhun Tistimunha di Jeová. Mai di Adel móre más ô ménus un anu dipôs. Má nu kontinua okupadu na pregason i kel-li djuda-nu aguenta nos dór. Na Linapacan nu kumesa txeu studu di Bíblia ki staba ta faze prugrésu. Pur isu, na poku ténpu nu staba ta meste un Salon di Reinu pikinoti. Nton nu faze un nos mê. Três anu dipôs ki nu txiga la, nu fika kontenti di odja 110 algen ta sisti Komemorason. Txeu di es faze prugrésu i batiza dipôs ki nu sai di la.

Na anu di 1986, N diziginadu pa ilha di Culion, ki tinha txeu algen ki éra leprozu. Dipôs di kel-li, Adel diziginadu pa ser pionera spesial tanbê. Na komésu nu fika ku medu di prega pa pesoas ki tinha lépra. Má kes irmon di la da-nu serteza ma kes algen ki staba ta sufri di kel duénsa dja resebeba tratamentu i tinha poku risku di es pasa-nu kel duénsa. Alguns di es ta sistiba runion na kaza di un irman. Lógu nu kustuma i nu kumesa ta gosta  di prega pa pesoas ki ta xintiba ma Deus i otus algen ka ta preokupaba ku es. Éra un kuza sábi dimás odja pesoas ki tinha un duénsa gravi ta fika kontenti di prende sobri kel promésa di un dia ten saúdi perfeitu. — Luk. 5:12, 13.

Modi ki nos fidju kustuma ku vida na Culion? Mi ku Adel nu konvida dôs irman jóven di Coron pa bai ku nos, asi pa nos fidjus pode tinha bons amizadi. Samuel, Shirley i kes dôs irman jóven tevi bons rezultadu na pregason. Es ta studaba ku txeu mininu timenti mi ku Adel nu ta studaba ku ses pai i ses mai. Tevi un ténpu ki nu staba ta studa ku 11 família. Na poku ténpu nu staba ta faze txeu studu di Bíblia ki staba ta faze prugrésu, pur isu nu konsigi forma un novu kongregason!

Na komésu mi éra úniku ansion na kel lugar. Pur isu, filial pidi-m pa N faze runion tudu simana pa kes 8 publikador na Culion i dipôs pa N fazeba mésmu kuza pa kes 9 publikador na un vila ki txomaba Marily ki ta fikaba uns 3 óra di barku. Dipôs di runion la, nos família ta andaba duránti txeu óra na un lugar ki tinha montanha pa ba fazeba studus di Bíblia na un vila ki txomaba Halsey.

Ku ténpu, nu odja txeu algen ta seta verdadi na Marily i na Halsey, pur isu nu faze Salon di Reinu na kes dôs lugar. Sima na Linapacan, kes irmon i kes algen ki tinha interesi na verdadi oferese maioria di kes material i es trabadja na konstruson. Kel Salon di Reinu na Marily pode kebeba 200 algen i tinha manera di abriba el pa el fikaba más grandi, asi nu ta konsigi fazeba asenbleias la.

Na anu di 1993, kantu kes mininu dja staba adultu mi ku Adel nu kumesa ta faze trabadju di vizita kongregasons na Filipinas. Dipôs, na anu 2000 N bai pa Escola de Treinamento Ministerial pa resebe trenu pa ser instrutor di kel skóla. N ka staba ta xinti kualifikadu pa ser un instrutor, má Adel sénpri  ta daba mi koraji. El ta lenbraba mi ma Jeová ta daba mi forsa pa N kunpriba kel novu diziginason. (Flp. 4:13) Adel sabia ma kel-li éra verdadi pamodi el staba ta kunpri se diziginason timenti el staba ta lida ku prublémas di saúdi.

Na anu di 2006, timenti mi éra instrutor, Adel atxadu ku duénsa di Parkinson. Nu fika spantadu! Kantu N fla-l pa nu para nos diziginason pa N kuida di el, Adel fla-m: “Favor djobe un dotor pa kuida di mi i N sabe ma Jeová ta djuda-nu kontinua nos diziginason.” Dipôs ki el atxadu ku kel duénsa, el pasa 6 anu na sirvisu pa Jeová sen reklama. Kantu dja el ka staba ta konsigi anda, el ta pregaba na kadera di róda. Kantu dja staba difísil pâpia, el ta komentaba un ô dôs palavra na runion. Antis di Adel móre na anu di 2013, el resebe txeu mensajen di irmons ta mostra ses gratidon pa se izénplu na aguenta firmi. N pasa más di 30 anu ku nha mudjer ki éra fiel i ki gostaba di mostra amor. Pur isu kantu el móre, N xinti tristi i mi sô otu bês.

Adel krê pa N kontinuaba na nha diziginason i é kel-li ki N faze. N mante okupadu i kel-li djuda-m ka xinti mi sô. Di 2014 ti 2017, N diziginadu pa vizita kongregasons di língua tagalog na alguns país undi nos óbra tinha poku liberdadi. Dipôs di kel-li, N vizita kongregasons di língua tagalog na Taiuan, na Mérka i na Kanadá. Na 2019, N diriji Skóla pa Pregadoris di Reinu na Índia i na Tailándia, na inglês. N xinti txeu alegria na tudu kes diziginason li. N ta xinti más filís óras ki N ta sta fokadu na sirvisu pa Jeová.

Na kada novu diziginason N ta faze txeu amizadi ku nhas irmon ku irmans, pur isu sénpri é difísil dexa-s. Na kes óra li N prende poi tudu nha kunfiansa na Jeová. Sénpri N xinti se ajuda i kel-li djuda-m seta di tudu korason kalker mudansa ki ben. Gósi mi é pioneru spesial na Filipinas. N ta xinti sábi na nha novu kongregason ki é sima un família ki ta preokupa ku mi i ta kuida di mi. Tanbê N ta xinti orgulhu di odja Samuel i Shirley ta imita izénplu di fé di ses mai. — 3 Juan 4.

N pasa pa txeu difikuldadi na vida i un di es é odja nha mudjer ki N krê txeu ta sufri i ta móre pamodi un duénsa gravi. N tevi ki kustuma ku txeu situason difísil. Má tanbê N odja ma Jeová “ka sta lonji di kada un di nos.” (Atus 17:27) Mô di Jeová é ‘ka kurtu dimás’ pa djuda i pa da se sérvus forsa sikrê na un lugar izoladu. (Isa. 59:1) Jeová ki é nha Rótxa ten stadu ku mi duránti tudu nha vida i N ten txeu gratidon pa el. Na ninhun momentu di nha vida N ka staba mi sô.