STUDU 7
KÁNTIKU 15 Lova Fidju di Jeová!
Kuzê ki perdon di Jeová ta siginifika pa bo?
‘Kel verdaderu perdon sta ku bo’. — SALMO 130:4.
ASUNTU PRINSIPAL
Nu ta ben odja alguns izénplu di modi ki Jeová ta purdua-nu. Kel studu li ta ben djuda-nu ten más gratidon pa perdon di Jeová.
1. Pamodi ki é difísil sabe kuzê ki pesoas krê fla óras ki es ta fla-nu ma es ta purdua-nu?
“N TA PURDUA-U.” Fórti é sábi obi kes palavra li, prinsipalmenti si nu faze ô fla algun kuza ki mágua un algen! Má, kuzê ki kes palavra “N ta purdua-u” krê fla? Kel algen ki bu mágua krê fla ma inda nhos pode ser bons amigu? Ô sô kel algen krê fla ma el ka krê pâpia más sobri kuzê ki kontise? Óras ki un algen ta fla-nu ma el ta purdua-nu, el pode krê fla kuzas diferenti.
2. Kuzê ki Bíblia ta fla sobri perdon di Jeová? (Odja nóta di rodapé.)
2 Manera ki Jeová ta purdua-nu é diferenti di manera ki nu ta púrdua kunpanheru. Ningen ka ta konsigi púrdua sima Jeová. Salmista fla kel-li sobri Jeová: ‘Kel verdaderu perdon sta ku bo, asi pa algen pode ten txeu ruspetu pa bo.’ a (Sal. 130:4) Perdon di Jeová é kel ‘verdaderu perdon’. El é úniku algen ki pode mostra-nu kuzê ki é púrdua di verdadi. Na alguns situason, skritoris di Bíblia uza un palavra na ebraiku pa pâpia di manera ki Jeová ta púrdua, ki nunka ka uzadu pa pâpia di manera ki pesoas ta púrdua kunpanheru.
3. Modi ki manera di Jeová púrdua é diferenti di kel di nos? (Isaías 55:6, 7)
3 Óras ki Jeová ta púrdua un algen, el ta laba pekadu di kel algen di manera konplétu. Asi kel algen ta pode ten un amizadi fórti ku Jeová otu bês. Nu ta xinti txeu gratidon pamodi Jeová sénpri ta purdua-nu di kel manera li! — Lé Isaías 55:6, 7.
4. Modi ki Jeová ta djuda-nu intende kuzê ki é perdon di verdadi?
4 Si manera ki Jeová ta púrdua é diferenti di manera ki nu ta púrdua, modi ki nos ki é inperfeitu, nu pode intende kuzê ki é púrdua di verdadi? Jeová faze alguns konparason bunitu pa djuda-nu intende modi ki el ta purdua-nu. Na kel studu li, nu sta ben odja alguns di es. Es ta ben mostra-nu modi ki Jeová ta tra nos pekadu i omésmu ténpu modi ki nu pode ten un amizadi fórti ku el otu bês. Kes konparason li ta ben omenta nos amor i gratidon pa nos Pai Jeová, ki é bon, ki ten mizerikórdia i ki ta purdua-nu di txeu manera.
JEOVÁ TA TRA NOS PEKADU
5. Kuzê ki ta kontise óras ki Jeová púrdua nos pekadu?
5 Txeu bês, Bíblia ta konpara pekadu ku un pézu. Rei Davidi pâpia di ses pekadu di kel manera li: ‘Pamodi nhas fadja sta riba di nha kabésa; es é txeu dimás pa N karega, sima un karga pizadu.’ (Sal. 38:4) Má, Jeová ta púrdua pekadu di kes algen ki ta rapende. (Sal. 25:18; 32:5) Kel palavra ebraiku ki uzadu pa “perdon” na kel testu li krê fla “labanta” ô “karega”. Óras ki Jeová ta púrdua nos pekadu, é sima si el ta tra-nu tudu pézu di kulpa ki nu sta xinti. É sima si nu tene un pézu riba di nos onbru i el ta tra-nu el.
‘Púrdua’ (Sal. 32:5)
6. Undi ki Jeová ta leba nos pekadu?
6 Bíblia ta uza un otu konparason pa mostra ma Jeová ta poi nos pekadu lonji di nos. Salmo 103:12 ta fla: ‘Sima undi sol ta sai sta lonji di undi ki sol ta kanba, é si ki el ta poi nos pekadus lonji di nos.’ Undi sol ta sai é lonji di undi ki sol ta kanba. Nunka es ka ta inkontra. Kes palavra li krê fla ma Jeová ta poi nos pekadu más lonji di nos di ki kel ki nu ta konsigi imajina. Kel-li ta da-nu serteza ma Jeová ta purdua-nu di manera konplétu!
‘Sima undi sol ta sai sta lonji di undi ki sol ta kanba’ (Sal. 103:12)
7. Kuzê ki Bíblia ta fla ma Jeová ta faze ku nos pekadu? (Miqueias 7:18, 19)
7 Óras ki Jeová ta poi nos pekadu lonji di nos, el ta kontinua ta pensa na es? Nau. Rei Ezekias skrebe sobri Jeová: ‘Bu bota tudu nhas éru bu tras.’ (Isa. 38:9, 17; nóta di rodapé.) Kel-li krê fla ma Jeová ta tra pekadu di kes algen ki rapende, i el ka ta lenbra di es más. Kes palavra li tanbê pode traduzidu asi: “Bu poi [nhas pekadu] ta fika sima ki nunka es ka kontise.” Bíblia ta distaka es pontu na más un konparason, ki sta na Miqueias 7:18, 19. (Lé.) Kes versíklu li ta fla ma Jeová ta bota nos pekadu na fundu di mar. Na pasadu, si un kuza kaíba na fundu di mar, nunka más el ka ta pode atxadu otu bês.
‘Bu bota tudu nhas éru bu tras’ (Isa. 38:17)
‘Bu ta ben bota tudu ses pekadu na fundu di mar’ (Miq. 7:19)
8. Kuzê ki dja nu prende ti li?
8 Bíblia ta mostra klaru ma óras ki Jeová purdua-nu, el ta tra nos pekadu di manera konplétu, asi nu ka meste xinti kulpadu más. É sima Davidi fla: “Filís é kes ki purduadu kes kuza mariadu ki es faze i kes ki ses pekadu kubridu. Filís é kel ómi ki Jeová ka ta leba en kónta se pekadu di ninhun manera.” (Rom. 4:7, 8) É kel-li ki é verdaderu perdon!
JEOVÁ TA LABA NOS PEKADU
9. Ki konparason Jeová uza pa djuda-nu odja di ki manera ki el ta púrdua nos pekadu?
9 Jeová uza un otu konparason sobri modi ki el ta tra pekadu di kes algen ki rapende, ki ta djuda-nu da más valor inda pa sakrifisiu di resgati. Bíblia ta fla ma Jeová ta laba i linpa pekadu. Kel-li ta bira kel pekador linpu otu bês. (Sal. 51:7; Isa. 4:4; Jer. 33:8) Própi Jeová ta fla kal ki é rezultadu di kel-li. El ta fla: ‘Sikrê nhos pekadu é sima skarlati, es ta biradu branku sima névi; sikrê es é brumedju sima panu karmezin, es ta bira sima lan.’ (Isa. 1:18) É difísil dimás tra un mantxa skarlati ô karmezin di un ropa. É pur isu ki Jeová faze kel konparason li, pa mostra ma nos pekadu pode linpadu di tal manera ki pode parse ma nunka nu ka peka.
‘Sikrê nhos pekadu é sima skarlati, es ta biradu branku sima névi’ (Isa. 1:18)
10. Ki otu konparason Jeová uza pa mostra tamanhu di se perdon?
10 Sima nu odja na studu ki pasa, pekadu é sima un “dívida”. (Mat. 6:12; Luk. 11:4) Nton kada bês ki nu peka kóntra Jeová, é sima si nos dívida sta ta fika kada bês más txeu. Nos dívida ku Jeová é grandi dimás! Má óras ki Jeová purdua-nu, é sima si el kansela kes dívida ki nu ta fikaba ku el. El ka ta iziji pa nu paga pa kes pekadu ki dja el purdua-nu. Sima un algen ki ten un dívida ta fika txeu kontenti óras ki el kanseladu el, nos tanbê nu ta fika txeu kontenti óras ki Jeová ta púrdua nos pekadu!
“Purdua-nu nos dívida” (Mat. 6:12)
11. Kuzê ki Bíblia krê fla óras ki el ta fla ma nos pekadu ta “pagadu”? (Atus 3:19)
11 Jeová ka ta sô kansela nos dívida ô nos pekadu, má tanbê el ta paga-s. (Lé Atus 3:19.) Óras ki ta kanseladu un dívida, nu pode imajina un algen ta riska valor di kel dívida. Má simé, ta da pa odja kel nunbru dibaxu di kel risku. Má paga un kuza é diferenti. Pa djuda-nu intende, nu meste lenbra ma kel tipu di tinta ki pesoas ta fazeba na pasadu pode sérba fásil di tra. Pur isu, un algen pode panhaba un spónja modjadu i linpa kuzê ki staba skrebedu ku kel tinta. Nton, óras ki es ta “pagaba” un dívida ku un spónja, el ta dizaparseba di manera konplétu. Pesoas ka ta konsigi odjaba kuzê ki staba skrebedu antis. É sima ki kel dívida nunka ka izistiba. Nos é gratu pamodi nu sabe ma óras ki Jeová púrdua nos pekadu, é sima si nunka es ka kontise! — Sal. 51:9.
“Pa nhos pekadu pode pagadu” (Atus 3:19)
12. Kuzê ki nu ta prende ku kel konparason di un núven xeiu di agu?
12 Ten un otu manera ki Jeová ta mostra modi ki el ta púrdua nos pekadu di manera konplétu. El ta fla: ‘N ta ben paga bus éru sima si N kubri-s ku un núven, i bus pekadu sima si N kubri-s ku un núven xeiu di agu.’ (Isa. 44:22) Óras ki Jeová ta púrdua nos pekadus, é sima si el ta uza un núven xeiu di agu pa sukundi-s, pa nen nos, nen el ka odja-s más.
‘N ta ben paga bus éru sima si N kubri-s ku un núven’ (Isa. 44:22)
13. Modi ki nu ta xinti óras ki Jeová ta púrdua nos pekadu?
13 Kuzê ki kes konparason li ta inxina-nu? Óras ki Jeová púrdua nos pekadu, nu ka meste kontinua ta xinti kulpadu pa réstu di nos vida. Sakrifisiu di Jizus paga nos pekadu di manera konplétu. Óras ki Jeová púrdua nos pekadu, é sima si nunka nu ka peka. Óras ki nu rapende di nos pekadu, nu ta ten kel perdon di verdadi ki é sô Jeová ki ta da-nu.
JEOVÁ TA SETA PA NU SER SE AMIGU OTU BÊS
Kel perdon di nos Pai ki sta na séu ta da-nu xansi di ten un bon amizadi ku el (Odja parágrafu 14.)
14. Pamodi ki nu pode kunfia na perdon di Jeová? (Odja fotus.)
14 Óras ki Jeová purdua-nu, nu pode ten serteza ma nu ta bira se amigu otu bês. Kel perdon di Jeová ta djuda-nu ka kontinua ta xinti kulpadu. Nu ka meste xinti medu i pensa ma Jeová ta fika xatiadu ku nos i ma el ta buska manera di kastiga-nu. Kel-li nunka ka ta kontise! Óras ki Jeová fla ma el ta púrdua nos pekadu, nu pode kunfia na el. Jeová fla proféta Jeremias: ‘N ta ba púrdua ses éru i N ka ta lenbra más di ses pekadu.’ (Jer. 31:34) Apóstlu Paulu uza palavras sima kes-li kantu el fla: “N ka ta ben lenbra más di ses pekadu.” (Ebr. 8:12) Má kuzê ki kel-li krê fla?
‘N ka ta lenbra más di ses pekadu’ (Jer. 31:34)
15. Na ki sentidu ki Jeová ka ta lenbra más di nos pekadu?
15 Na Bíblia, é ka sénpri ki palavra “lenbra” krê fla lenbra di algun kuza ki kontise na pasadu. Envês di kel-li, el pode krê fla faze algun kuza. Pur izénplu, kel kriminozu ki staba na staka na ladu di Jizus pidi-l: “Jizus, lenbra di mi óras ki bu entra na bu Reinu.” (Luk. 23:42, 43) El staba ta pidi Jizus pa faze algun kuza pa el. Respósta ki Jizus da mostra ma el krê resusitaba kel ómi kriminozu. Nton, óras ki Jeová ta fla ma el ka ta lenbra más di nos pekadu, el krê fla ma el ka ta faze nada pa kastiga-nu na futuru pamodi kes pekadu ki dja el purdua-nu.
16. Ki konparason Bíblia ta uza pa djuda-nu intende liberdadi ki nu ta xinti pamodi perdon di Jeová?
16 Óras ki Jeová purdua-nu, nu ta xinti livri. Bíblia ta uza otu konparason pa djuda-nu intende kel-li. El ta fla ma pamodi nos é inperfeitu, nos é “skravu di pekadu”. Má pamodi perdon di Jeová, nu “libertadu di pekadu”. (Rom. 6:17, 18; Apo. 1:5) Óras ki nu sabe ma Jeová purdua-nu, nu pode fika filís sima un skravu ki libertadu.
“Nhos libertadu di pekadu” (Rom. 6:18)
17. Modi ki perdon pode ser sima un kura? (Isaías 53:5)
17 Lé Isaías 53:5. Bíblia ta fla ma pamodi nos é pekador, nos é sima un algen ki ten un duénsa ki ka ten kura. Pamodi resgati ki Jeová da-nu através di se Fidju, nu pode fla ma nu kuradu. (1 Ped. 2:24) Óras ki nu ta peka, nos amizadi ku Jeová ta fika prujudikadu. Má pamodi resgati el pode purdua-nu i nu pode ten un amizadi fórti ku el otu bês. Sima un algen ta fika txeu kontenti óras ki el kuradu di un duénsa gravi, nos tanbê nu ta fika txeu kontenti óras ki nu ta rekupera nos amizadi ku Jeová i nu ta ten se aprovason otu bês.
‘Nu kuradu pamodi se fridas’ (Isa. 53:5)
MODI KI PERDON DI JEOVÁ TA AFETA NOS VIDA?
18. Kuzê ki nu ta prende di kes konparason ki Bíblia ta faze sobri perdon di Jeová? (Odja kuadru “Modi ki Jeová ta purdua-nu?”.)
18 Kuzê ki nu ta prende ku kes konparason ki Bíblia ta faze sobri perdon di Jeová? Nu pode ten serteza ma óras ki Jeová ta púrdua nos pekadu, é sima si nos pekadu nunka ka kontise i nu pode ten serteza ma el ka ta ben kastiga-nu na futuru pamodi es. Pur isu, nu pode ten un bon amizadi ku nos Pai na séu. Omésmu ténpu, kes konparason ta lenbra-nu ma verdaderu perdon é un prezenti. El ta ben di amor di Jeová i di se grandi bondadi ki el mostra pa tudu algen na téra. Kel-li é un kuza ki nu ka mereseba. — Rom. 3:24.
19. (a) Pa kuzê ki nu debe mostra gratidon? (Romanus 4:8) (b) Kuzê ki nu ta ben odja na kel otu studu?
19 Lé Romanus 4:8. Kada un di nos, nu debe xinti txeu gratidon pa Jeová, ki é kel Deus di ‘verdaderu perdon’! (Sal. 130:4) Má si nu krê pa Jeová purdua-nu, nu meste faze un kuza inportanti. Jizus fla kel-li: “Si nhos ka púrdua otus algen ses fadja, nhos Pai ka ta púrdua nhos fadja tanbê.” (Mat. 6:14, 15) Nton nu meste imita Jeová i púrdua otus algen. Modi ki nu pode faze kel-li? Kel otu studu ta ben mostra modi ki nu pode faze kel-li.
KÁNTIKU 46 Obrigadu, Jeová
a Kel testu na ebraiku ta uza kes palavra “kel perdon”, ki krê fla kel úniku perdon verdaderu, enbóra ta izisti otus tipu di perdon. Txeu traduson di Bíblia ka ta distaka kel kuza inportanti li, má Bíblia Traduson di Mundu Novu ka faze si. El distaka kel ideia sobri perdon verdaderu di manera klaru na Salmo 130:4.
