ALGUN bês dja bu xinti ma bu tevi ki lida ku bus prubléma bo sô? Nu sta ta vive na un ténpu “konplikadu i difísil di aguenta” ki ta pô-nu ta xinti dizanimadu i nos sô. (2 Tim. 3:1) Má nu ka ten ki lida ku kes prubléma di vida nos sô. Bíblia ta mostra ma é inportanti ten amigus di verdadi na ‘ténpu di frónta.’ — Pro. 17:17.

Apóstlu Paulu viaja djuntu ku ses amigu i es djuda-l di txeu manera. (Kol. 4:7-11) Kantu Paulu staba prézu na Roma ses amigu faze kuzas pa el, ki el ka ta konsigi fazeba. Pur izénplu, Epafroditu da Paulu kes kuza ki el staba ta meste ki irmons ku irmans manda di Filipus. (Flp. 4:18) Tíkiku leba kes karta di Paulu pa txeu kongregason. (Kol. 4:7) Ku ajuda di ses amigu, Paulu konsigi faze se trabadju di pregason sikrê el staba prézu na kaza ô izoladu na kadia. Modi ki bu pode ser un amigu di verdadi oji?

Izénplu di irmons ku irmans oji ta mostra kuzê ki amigus di verdadi pode faze pa djuda kunpanheru. Odja izénplu di un irman ki mostra ser un amiga di verdadi pa Elizabeti, ki é un pionera fíksu i ki ta mora na Spanha. Kantu se mai atxadu ku kánser i el staba kuazi ta móre, kel irman manda Elizabeti txeu mensajen ki tinha versíklus di Bíblia ki ta da koraji. Elizabeti fla: “Kes mensajen da-m forsa pa N vive kada dia sen xinti mi sô.” — Pro. 18:24.

Nu pode bira nos amizadi más fórti ku nos irmons ku irmans óras ki nu ta djuda-s bai pa runion i pa pregason. Pur izénplu, bu ta pode da un irmon ô un irman ki dja sta di idadi buleia pa bai runion ô bai pregason? Si bu djuda-s di kel manera li, bu ta da-s koraji i tanbê bu ta resebe koraji. (Rom. 1:12) Má, alguns irmon ka ta pode sai di ses kaza. Modi ki bu pode ser un amigu di verdadi pa es?

Alguns irmon ku irmans ten prublémas di saúdi ô otu situason ki ka ta dexa-s sisti runion na Salon di Reinu. Odja izénplu di Davidi ki atxadu ku kánser. El faze kimioterapia pa más di 6 mês. Duránti tratamentu Davidi ku se mudjer ki txoma Lídia, ta sistiba runion pa xamada ku vídiu.

Ki ajuda ki es resebe di ses amigu di kongregason? Dipôs di kada runion alguns di kes irmon ki staba na Salon di Reinu ta sforsaba pa pâpia ku Davidi i Lídia pa xamada  ku vídiu. Alén di kel-li, dipôs ki Davidi i Lídia ta daba komentáriu, es ta resebeba mensajen di irmons ki ta daba es koraji. Modi ki kel-li poi Davidi i Lídia ta xinti? Davidi i Lídia xinti ma es ka staba es sô.

Nu ta pode sai na pregason ku un irmon ô un irman ki ka ta pode sai di kaza? Nu pode faze alguns mudansa pikinoti, asi nu ta mostra ma nu ka skese di kes algen ki sta ta lida ku kes prubléma li. (Pro. 3:27) Pamodi ki bu ka ta faze un prugrama pa bu pode pasa algun ténpu ku es ta skrebe karta ô ta da tistimunhu pa tilifóni? Kes irmon ki ka ta pode sai di kaza ta konsigi sisti runion pa pregason pa xamada ku vídiu. Davidi i Lídia ta da txeu valor pa kel ki ses kongregason faze pa es. Davidi fla: “Sô di sta ku nos grupu pa pregason pa pâpia un bokadinhu i faze pregason da-nu txeu koraji.” Di vês en kuandu, si ta da i si é suguru, bu ta pode pidi un studanti di Bíblia pa bai kaza di un irmon ô irman pa nhos faze-l studu la?

Óras ki nu ta trabadja djuntu ku nos irmons i irmans ki ka ta pode sai di kaza nu ta odja ses kualidadi bunitu i nu ta bira más ses amigu. Pur izénplu, óras ki bu ta prega djuntu ku es i bu ta odja ses kapasidadi di uza Palavra di Deus pa toka korason di algen bu ta dimira-s más txeu. Bu pode faze novus amigu óras ki bu ta djuda irmons i irmans bai pregason i bai runion. — 2 Kor. 6:13.

Paulu xinti konsoladu pamodi se amigu Titu staba djuntu ku el. (2 Kor. 7:5-7) É bon nu fla nos irmons ku irmans kuzas ki ta inkoraja-s. Má izénplu di Titu tanbê ta inxina-nu ma nu ta konsola-s óras ki nu ta pasa ténpu ku es i nu ta faze kuzas pa djuda-s. — 1 Juan 3:18.

Nos irmons ku irmans na Rúsia sta ta da un bon izénplu na modi ki es sta ta djuda kunpanheru. Odja spiriénsia di Sergey i se mudjer Tatiana. Dipôs ki pulísia invadi ses kaza i djobe kuzê ki es tinha la, es leba-s pa ba faze-s pergunta. Tatiana libertadu primeru i el volta pa kaza. Sergey fla: “Lógu ki Tatiana txiga na kaza, un irman korajoza parse na nos pórta. Más amigus ben i es djuda-nu ruma nos apartamentu dipôs ki es invadi nos kaza.”

Sergey tanbê fla: “Sénpri N gosta di Provérbios 17:17, ki ta fla: ‘Un amigu di verdadi ta ama tudu óra i el é un irmon ki nase pa ténpu di frónta.’ Duránti kel ténpu di pirsigison li, N mesteba ajuda di nhas amigu más txeu inda. N prende ma kes palavra na Provérbios 17:17 é verdadi própi. Jeová da-m amigus ki ka xinti medu di fika na nha ladu.” a

Sima nu ta ba ta lida ku situasons más difísil, nu ta meste di amigus pa djuda-nu. Nu ta ba meste di es más txeu inda na grandi tribulason. Nton, nu faze tudu kel ki nu ta pode pa nu bira un amigu di verdadi gósi! — 1 Ped. 4:7, 8.