STUDU 8
KÁNTIKU 130 Nu púrdua kunpanheru
Modi ki nu pode imita perdon di Jeová?
“Sima Jeová sta sénpri prontu pa púrdua nhos, nhos tanbê nhos debe faze mésmu kuza.” — KOLOSENSIS 3:13.
ASUNTU PRINSIPAL
Na kel studu li nu sta ben odja kuzê ki nu pode faze pa púrdua un algen ki ofende-nu.
1-2. (a) Na ki situason pode ser difísil púrdua un algen? (b) Modi ki Denise púrdua un algen?
BU TA atxa ma é difísil pa bu púrdua otus algen? Pa txeu di nos é ka fásil púrdua un algen ki magua-nu txeu. Má ten kuzas ki nu pode faze pa nu ka kontinua xatiadu ô ofendidu i pa nu púrdua. Pur izénplu, odja kuzê ki kontise ku un irman ki txoma Denise. a El konsigi púrdua di un manera ki ta pô-nu dimiradu. Na 2017, Denise ku se família ba vizita kel novu Sédi Mundial di Tistimunhas di Jeová. Kantu es staba ta volta pa kaza, un otu kondutor ka konsigi kontrola se karu i el da na karu di Denise ku se família. Na kel asidenti, Denise dismaia. Kantu el korda, el da kónta ma ses fidju staba ku pankada gravi i ma se maridu, ki txomaba Brunu, móre. Kantu Denise lenbra di kuzê ki kontise, el fla: “N xinti deprimidu i konfuzu.” Dipôs, el fika ta sabe ma kel kondutor ka staba moku, el ka uzaba dróga i nen el ka staba distraídu. Nton, el faze orason ta pidi Jeová pa da-l pas.
2 Kel kondutor ki da na ses karu podu prézu i el akuzadu di mata algen sen el krê. Si tribunal disidiba ma el éra kulpadu, el pode sérba prézu. Má tribunal fla Denise ma kuzê ki el ta ba flaba na se tistimunhu ta afetaba disizon di juís txeu. Denise fla: “N xinti sima si algen abri kel frida i poi txeu sal na el, pamodi N tevi ki torna lenbra di tudu kes kuza di kel piór dia di nha vida.” Sô alguns simana dipôs, Denise staba na tribunal i ta pripara pa pâpia ku kel ómi ki traze txeu sufrimentu pa se família. Kuzê ki Denise fla? El pidi juís pa púrdua kel ómi. b Dipôs ki el tirmina di pâpia, juís kumesa ta txora. El fla: “Dja ten 25 anu ki mi é juís i nunka N ka odjaba un kuza di kel-li ta kontise na tribunal. Nunka N ka odja família di kel algen prujudikadu ta pidi pa púrdua kel algen kulpadu. Nunka N ka obiba palavras di amor i perdon sima kes-li.”
3. Kuzê ki djuda Denise púrdua?
3 Kuzê ki djuda Denise púrdua? El midita na perdon di Jeová. (Miq. 7:18) Óras ki nu ta mostra gratidon pa manera ki Jeová ta purdua-nu, nu ta xinti motivadu pa púrdua otus tanbê.
4. Kuzê ki Jeová krê pa nu faze? (Efézius 4:32)
4 Jeová krê pa nu sta prontu pa púrdua otus, sima el ta púrdua kada un di nos. (Lé Efézius 4:32.) Jeová ta spera ma nu ta sta prontu pa nu púrdua kes algen ki ta magua-nu. (Sal. 86:5; Luk. 17:4) Na kel studu li, nu ta ben odja três kuza ki ta djuda-nu púrdua más txeu.
KA BU IGINORA BUS SENTIMENTU
5. Sima sta na Provérbios 12:18, modi ki nu ta xinti óras ki un algen ta magua-nu?
5 Nu pode fika txeu maguadu pamodi un kuza ki un algen faze ô fla, prinsipalmenti si el é un algen ki nos é txeu amigu ô un algen di nos família. (Sal. 55:12-14) Alvês, kel mágua ki nu ta xinti na korason é sima si un algen da-nu ku faka. (Lé Provérbios 12:18.) Talvês, nu pode finji ma nu ka sta maguadu ô aji sima si nada ka kontise. Má si nu faze kel-li, é sima si nu dadu ku faka i nu ka tra kel faka. Di mésmu manera, nu ka debe spera ma kel mágua ki nu ten na korason ta midjora si nu finji ma nada ka kontise.
6. Modi ki nu pode reaji si un algen ofende-nu?
6 Óras ki un algen ta magua-nu, na komésu, talvês nu pode fika xatiadu. Bíblia ta rekonhese ma nu pode fika txeu xatiadu mê. Má, el ta fla-nu pa nu ka dexa kel sentimentu li toma kónta di nos. (Sal. 4:4; Efé. 4:26) Pamodi? Pamodi nos sentimentu pode pô-nu ta aji. É difísil pa un algen xatiadu toma bons disizon. (Tia. 1:20) Lenbra ma é normal bu fika xatiadu, má é bo ki ta disidi si bu ta kontinua xatiadu ô nau.
É normal bu fika xatiadu, má é bo ki ta disidi si bu ta kontinua xatiadu ô nau.
7. Modi ki nu pode xinti óras ki un algen magua-nu?
7 Óras ki un algen ta trata-nu mariadu, nu pode xinti otus kuza kasábi. Pur izénplu, un irman ki txoma Ana fla: “Kantu mi éra mininu, nha pai bandona nha mai i el kaza ku un mudjer ki es ta pagaba pa tomaba kónta di mi. N xinti bandonadu. Kantu es tevi fidju, N xinti sima si es tra-m nha lugar. N kria ku kel sentimentu ma ningen ka gostaba di mi.” Un irman ki txoma Goréte fla modi ki el xinti kantu se maridu trai-l. El fla: “Nos éra amigu désdi pikinoti. Nu foi pioneru djuntu! El mágua nha korason.” Un irman ki txoma Nuemi fla: “Nunka N ka ta imajinaba ma nha maridu pode maguaba mi. Kantu nha maridu konta-m ma el staba ta odja pornografia sukundidu, N xinti sima si el ingana-m i trai-m.”
8. (a) Kal ki é alguns razon ki nu debe púrdua otus algen? (b) Ki bons rezultadu nu ta ten óras ki nu ta púrdua otus algen? (Odja kuadru “ I si nu sufri txeu pamodi un algen?”.)
8 Nu ka ta pode kontrola kuzê ki otus algen ta faze ô fla, má nu ta pode kontrola modi ki nu ta reaji. Normalmenti, midjór manera di reaji é púrdua. Pamodi? Pamodi nu ta ama Jeová, i el krê pa nu ser un algen ki ta púrdua otus. Si nu kontinua xatiadu i nu ka púrdua, nu pode toma un mau disizon i ti prujudika nos saúdi. (Pro. 14:17, 29, 30) Odja izénplu di un irman ki txoma Kristina. El fla: “Óras ki N sta xatiadu ô ofendidu, N ta ri más poku. N ta kume kes kumida ki é ka bon pa saúdi, N ka ta konsigi durmi dretu i é difísil kontrola nhas sentimentu, i kel-li ta afeta nha kazamentu i nha amizadi ku otus algen.”
9. Pamodi ki nu ka debe guarda rankor?
9 Mésmu si kel algen ki magua-nu nunka ka pidi-nu diskulpa, nu pode faze algun kuza pa ka dexa kel prubléma prujudika-nu txeu. Modi ki nu pode faze kel-li? Goréte, ki dja nu papiaba di el antis, fla: “Leba ténpu pa N dexa di guarda rankor i di xinti raiba di kel ómi ki éra nha maridu. Má kantu N konsigi faze kel-li, N xinti txeu pas.” Óras ki nu ka ta guarda rankor, nu ka ta dexa mágua afeta manera ki nu ta trata otus algen. Tanbê, nu ta faze dretu pa nos mê óras ki nu ka ta fika sô ta pensa na kuzê ki kontise i nu ta pruveta nos vida otu bês. (Pro. 11:17) Má i si dipôs di seta bus sentimentu, inda bu ka sta prontu pa púrdua?
PRENDE LIDA KU BUS SENTIMENTU
10. Pamodi ki nu debe da ténpu pa nos korason kura? (Odja dizenhus.)
10 Modi ki bu pode para di xinti raiba ô xinti ofendidu? Un manera ki nu pode konsigi kel-li é dexa ténpu pasa pa nos korason kura. Sima óras ki un algen ta panha un asidenti gravi, el ta meste tratamentu i ténpu pa el rekupera, mésmu kuza ta kontise óras ki un algen magua-nu. Nu ta meste ténpu pa nu kura mágua na nos korason antis di nu sta prontu pa púrdua un algen di korason. — Ecl. 3:3; 1 Ped. 1:22.
Sima óras ki un algen ta panha un asidenti gravi, el ta meste tratamentu i ténpu pa el rekupera, mésmu kuza ta kontise óras ki un algen magua-nu. (Odja parágrafu 10.)
11. Modi ki orason pode djuda-u púrdua otus algen?
11 Faze orason ta pidi Jeová pa djuda-u púrdua. c Ana ki dja nu papiaba di el antis, splika modi ki orason djuda-l. El fla: “N pidi Jeová pa púrdua nos tudu na nha família pamodi kuzas ki nu fla ô faze ki ka staba dretu. Dipôs, N skrebe un karta pa nha pai i pa nha madrasta i N fla-s ma dja N purduaba es.” Ana rekonhese ma faze kel-li ka foi fásil. Má el fla: “N ta spera ma pamodi N tenta imita Jeová na púrdua otus algen, nha pai i nha madrasta pode krê prende más sobri Jeová.”
12. Pamodi ki nu debe kunfia na Jeová envês di na nos sentimentu? (Provérbios 3:5, 6)
12 Kunfia na Jeová, ka na bus sentimentu. (Lé Provérbios 3:5, 6.) Jeová sénpri sabe kuzê ki é midjór pa nos. (Isa. 55:8, 9) I nunka el ka ta pidi-nu pa nu faze un kuza ki ta prujudikaba nos. Pur isu, óras ki el ta insentiva-nu pa nu púrdua otus, nu pode ten serteza ma faze kel-li é bon pa nos. (Sal. 40:4; Isa. 48:17, 18) Má si nu kunfia na nos sentimentu, talvês nunka nu ka ta konsigi púrdua. (Pro. 14:12; Jer. 17:9) Nuemi ki dja nu papiaba di el antis, fla: “Na komésu N ta ranjaba diskulpa pa N ka purduaba nha maridu, pamodi el ta odjaba pornografia. N tinha medu ma el pode maguaba mi otu bês ô ma el pode skeseba kel dór ki el poba mi ta xinti. N ta flaba nha kabésa ma Jeová ta intende nhas sentimentu. Má, N kumesa ta da kónta ma sô pamodi Jeová ta intende nhas sentimentu, kel-li ka krê fla ma el ta konkorda ku es. El sabe modi ki N staba ta xinti i ma ta leba ténpu pa nha korason kura. Má tanbê el krê pa N púrdua”. d
DIZENVOLVE BONS SENTIMENTU
13. Di akordu ku Romanus 12:18-21, kuzê ki nu meste faze?
13 Óras ki nu ta púrdua un algen ki magua-nu txeu, nu krê faze más di ki sô para di pâpia di kel asuntu. Si kel algen ki magua-nu é nos irmon ô irman, nos obijetivu é faze pas. (Mat. 5:23, 24) Envês di xinti raiba, nu ta skodje mostra mizerikórdia i púrdua. (Lé Romanus 12:18-21; 1 Ped. 3:9) Kuzê ki pode djuda-nu faze kel-li?
14. Kuzê ki nu debe tenta faze, i pamodi?
14 Jeová ta skodje odja bons kualidadi ki pesoas ten. Nu debe imita Jeová i djobe bons kualidadi na kel algen ki ofende-nu. (2 Cró. 16:9; Sal. 130:3) Si nu sta djobe defetu na un algen, é kel-la ki nu ta atxa. Má, si nu sta ta djobe bons kualidadi na el, nu ta atxa-s. Óras ki nu ta djobe kuzas bon na otus algen é más fásil nu purdua-s. Pur izénplu, un irmon ki txoma Jorji fla: “N ta atxa más fásil púrdua un irmon óras ki N konpara kel kuza mariadu ki el faze-m ku un lista grandi di kuzas ki N gosta na el.”
15. Pamodi ki pode ser bon fla kel algen ma dja nu purdua-l?
15 Un kuza inportanti ki nu debe pensa na faze é fla kel algen ma dja nu purdua-l. Pamodi? Odja kuzê ki Nuemi ki dja nu papiaba di el antis, fla: “Nha maridu pergunta-m: ‘Dja bu purdua-m?’ Kantu N abri bóka pa N fla: ‘N ta purdua-u’, N ka konsigi. N da kónta ma inda N ka purduaba el di korason. Ku ténpu N konsigi fla-l kes três palavra inportanti li: ‘N ta purdua-u.’ Kantu N púrdua nha maridu, el tinha láguas na odju. N fika spantadu di odja modi ki el xinti aliviadu i modi ki N xinti midjór tanbê. Dipôs di kel-la, poku-poku N ba ta kunfia na el, i gósi el é nha midjór amigu otu bês.”
16. Kuzê ki bu prende sobri púrdua?
16 Jeová krê pa nu púrdua otus algen. (Kol. 3:13) Má simé, pode ser difísil faze kel-li. Má nu pode konsigi si nu ka iginora nos sentimentu i nu sforsa pa nu lida ku es. Dipôs di faze kel-li, nu pode dizenvolve sentimentus puzitivu. — Odja kuadru “ Três pasu pa púrdua”.
PENSA NA KES BON REZULTADU DI PÚRDUA
17. Ki bons rezultadu nu ta ten óras ki nu ta púrdua otus algen?
17 Nu ten bons motivu pa nu púrdua otus algen. Odja alguns di es. Primeru, nu ta imita i nu ta agrada nos Pai, Jeová, ki ten mizerikórdia. (Luk. 6:36) Sugundu, nu ta mostra gratidon di verdadi pamodi Jeová ta purdua-nu. (Mat. 6:12) Tirseru, nu ta ten un saúdi midjór i nu ta ten bons amizadi.
18-19. Kuzê ki pode kontise óras ki nu ta púrdua otus algen?
18 Óras ki nu ta púrdua otus algen, bons kuza ki nu ka staba ta spera pode kontise. Pur izénplu, odja kuzê ki kontise ku Denise, ki dja nu papiaba di el antis. Enbóra na kel ténpu el ka sabia, kel ómi ki poi kel asidenti ta kontise staba ta pensa na mata kabésa dipôs di se julgamentu. Má, el fika dimiradu ku perdon di Denise ki el kumesa ta studa Bíblia ku Tistimunhas di Jeová.
19 Talvês, púrdua otus algen é un di kes kuza más difísil ki nu ta ben faze na vida. Má, el pode ser un di kes disizon ki más ta traze-nu alegria. (Mat. 5:7) Pur isu, é bon nos tudu nu faze nos midjór pa imita perdon di Jeová.
KÁNTIKU 125 ‘Filís é kes ki ten mizerikórdia!’
a Mudadu alguns nómi.
b Na alguns situason kada irmon meste disidi kuzê ki el ta faze.
c Odja vídius di múzikas ku téma: “Perdoem uns aos outros”, “Púrdua sénpri” i “Faze pas”, na jw.org.
d Enbóra odja pornografia é pekadu i el ta mágua kel maridu ô kel mudjer inosenti, di akordu ku Bíblia el ka ten razon pa divôrsia.
