STUDU 6
KÁNTIKU 18 Obrigadu pa resgati
Pamodi ki nu ta da txeu valor pa perdon di Jeová?
“Deus ama mundu di tal manera ki el da se úniku Fidju”. — JUAN 3:16.
ASUNTU PRINSIPAL
Nu krê ten más gratidon pa perdon di Jeová. Pa kel-li nu ta ben prende kuzê ki Jeová faze pa nos pekadu pode purduadu.
1-2. Di ki manera ki nos situason é sima di kel jóven ki parágrafu 1 ta pâpia di el?
IMAJINA un jóven ki kria na un família riku. Un dia ta kontise un dizastri i se pai ku se mai ta móre na un asidenti. Kel notísia ta dexa-l dizusperadu. Má kel jóven ta resebe un otu notísia kasábi. El ta fika ta sabe ma se pai ku se mai gasta más dinheru di ki kel ki es tinha i es dexa-l ku txeu dívida. Nton, envês di erda ses rikéza, el fika ku ses dívida i pesoas krê pa el paga-s lógu. Nunka el ka ta konsigi paga tudu kes dívida.
2 Nu pode fla ma nos situason é sima di kel jóven. Nos primeru pai ku mai, Adon ku Eva, éra perfeitu i es ta viveba na un paraízu bunitu. (Jén. 1:27; 2:7-9) Es pode tinha un vida filís i pa tudu ténpu. Má dipôs tudu kuza muda. Es perde kel Paraízu ki éra ses kaza i es ka ta pode viveba pa tudu ténpu más. Nton kuzê ki ses fidju erda di es? Bíblia ta fla-nu: “Pekadu entra na mundu através di sô un ómi [Adon] i mórti através di pekadu, i di kel manera li mórti spadja pa tudu ómi, pamodi es tudu tinha pekadu”. (Rom. 5:12) Eransa ki Adon dexa-nu ku el é pekadu i rezultadu di kel-li é mórti. Pekadu ki nu erda é sima un dívida grandi dimás ki ninhun di nos ka ta konsigi paga. — Sal. 49:8.
3. Pamodi ki nu pode fla ma nos pekadu é sima un “dívida”?
3 Jizus fla ma pekadu é sima un “dívida”. (Mat. 6:12; Luk. 11:4) Tudu bês ki nu peka é sima si nu ta fika ku un dívida ku Jeová, i nu ten ki paga kel dívida. I si el ka pagadu, sô nu ta konsigi pagaba el ku nos mórti i nu ta fikaba sen ninhun speransa di vive otu bês. — Rom. 6:7, 23.
4. (a) Kuzê ki ta kontiseba ku tudu pekador si es ka tinha ajuda? (Salmo 49:7-9) (b) Na Bíblia kuzê ki siginifika palavra “pekadu”? (Odja kuadru “ Pekadu”.)
4 Nu ta konsigi rekupera tudu kel ki Adon ku Eva perde? Ninhun di nos ka ta konsigi nos sô. (Lé Salmo 49:7-9.) Sen ajuda, nu ka ta tinha ninhun speransa di ten vida na futuru i nen di ser resusitadu. Nu ta moreba i nu ka ta viveba otu bês, sima óras ki animal ta móre. — Ecl. 3:19; 2 Ped. 2:12.
5. Modi ki nos Pai ki krê-nu txeu djuda-nu paga nos dívida di pekadu? (Odja dizenhus na kapa.)
5 Pensa na kel jóven ki nu papiaba di el antis. Modi ki el ta xintiba si un ómi riku oferese pa pagaba tudu ses dívida? Di serteza el ta xintiba txeu gratidon i el ta setaba kel grandi prezenti li. Di mésmu manera, Jeová ki é nos Pai ki krê-nu txeu, da-nu un prezenti ki ta paga nos dívida di pekadu ki nu erda di Adon. Jizus splika kel-li kantu el fla: “Deus ama mundu di tal manera ki el da se úniku Fidju, asi pa tudu kel ki mostra fé na el ka ser distruídu, má pa ten vida pa tudu ténpu.” (Juan 3:16) Alén di kel-li, pamodi kel prezenti li nu pode ten un bon amizadi ku Jeová.
Jizus sta prega notísias sábi sobri perdon di Jeová ki ten bazi na sakrifisiu di resgati. (Juan 3:16) Dipôs el sta oferese se própi vida pa pode ten un resgati. (Odja parágrafu 5.)
6. Kuzê ki nu sta ben pâpia di el na kel studu li, i pamodi?
6 Modi ki kel grandi prezenti li, ki paga nos pekadu ô nos “dívida”, pode djuda-nu? Pa responde kel pergunta li nu ta ben odja alguns palavra ki Bíblia ta uza i kuzê ki es ta siginifika. Sima nu ta ba ta midita na kuzê ki Jeová faze pa purdua-nu, nu ta xinti más gratidon pa el.
JEOVÁ KREBA PA NU FAZE PAS KU EL
7. (a) Kuzê más ki Adon ku Eva perde? (b) Dja ki nos é fidju di Adon ku Eva, kuzê ki nu meste faze? (Romanus 5:10, 11)
7 Kantu Adon ku Eva peka, es ka sô perde xansi di vive pa tudu ténpu, má tanbê es perde kel amizadi ki es tinha ku ses Pai, Jeová. Antis di Adon ku Eva peka es ta fazeba párti di família di Deus. (Luk. 3:38) Kantu es ka obi ku Jeová, el ka dexa-s faze párti di se família más. Kel-li kontise antis di es ten fidju. (Jén. 3:23, 24; 4:1) Dja ki nos é ses fidju, nu meste faze pas ku Jeová. (Lé Romanus 5:10, 11.) Kel-li krê fla ma nu meste dizenvolve un amizadi ku Deus. Di akordu ku un livru, kel palavra gregu ki uzadu li pa “faze pas”, tanbê ta siginifika “faze amizadi ku un inimigu”. Nu ta fika dimiradu pamodi é Jeová ki foi primeru ki faze algun kuza pa poi kel-li ta kontise. Di ki manera?
JEOVÁ RANJA MANERA PA NU BIRA SE AMIGU
8. Kuzê ki Jeová faze pa nu pode ser se amigu?
8 Jeová ranja un soluson pa nu ser se amigu. El faze un kuza pa rekupera kel ki Adon perde. Modi ki el faze kel-la? El ranja un kuza ki ten mésmu valor ki kel ki Adon perde. Na Romanus 3:25 ta fla ma “Deus aprizenta... un oférta pa nu faze pas ku el”. Pamodi kel-li kada un di nos pode sta na pas ku el.
9. Kuzê ki Jeová faze pa pekadu di kes israelita pode purduadu?
9 Jeová ranja manera pa pekadus di kes israelita purduadu i pa es ten un bon amizadi ku el. Kes israelita ta fazeba un fésta spesial un bês pa anu, ki ta txomadu Dia ki ta Oferesedu Sakrifisiu pa Perdon di Pekadu. Na kel dia, saserdóti prinsipal ta ofereseba sakrifisius di animal pa pekadu di povu. É klaru ki sô sakrifisius di animal ka ta pode kubriba konpletamenti pekadu di kes israelita, pamodi pesoas ten más valor di ki animal. Má óras ki un israelita ki rapende ofereseba un sakrifisiu ki Jeová ta izijiba, el pode tinha serteza ma Jeová ta purduaba el. (Ebr. 10:1-4) Kes sakrifisiu ki israelitas ta ofereseba na Dia ki ta Oferesedu Sakrifisiu pa Perdon di Pekadu i na otus okazion djuda-s intende ma es éra pekador i ma es mesteba di algun kuza ki ta kubriba ses pekadu konpletamenti.
10. Kuzê ki Jeová faze pa púrdua pekadu di pesoas na mundu interu?
10 Kuzê ki Jeová faze asi pa pekadu di pesoas na mundu interu purduadu? El ranja manera pa se Fidju ki el ta ama txeu “oferesedu sô un bês pa karega pekadu di txeu algen.” (Ebr. 9:28) Jizus da “se vida pa resgata txeu algen.” (Mat. 20:28) Kuzê ki é resgati?
SAKRIFISIU DI JIZUS PAGA PRÉSU DI RESGATI
11. (a) Di akordu ku Bíblia, kuzê ki é resgati? (b) Sô kenha ki pode pagaba resgati?
11 Di akordu ku Bíblia, Jeová disidi ma présu di un resgati meste pagadu, asi pa nos pekadu purduadu i pa nu pode bira se amigu. a Kal ki éra présu di resgati ki tinha ki pagadu pa pesoas pode tinha kel ki Adon perde? Lenbra ma Adon ku Eva perde ses vida perfeitu i xansi di vive pa tudu ténpu. Nton, resgati tinha ki ser un présu igual ku kel ki perdedu. (1 Tim. 2:6) Éra sô un ómi adultu ki pode pagaba el. El tinha ki ser un algen (1) perfeitu, (2) ki ta pode viveba pa tudu ténpu na téra i (3) ki staba prontu pa sakrifika se vida pa nos. Sô vida di un algen asi ki ta pode pagaba kel ki perdedu.
12. Pamodi ki Jizus konsigi paga kel présu ki mesteba pa resgati?
12 Odja três motivu di pamodi ki Jizus konsigi paga resgati. (1) El éra perfeitu i “el ka faze pekadu”. (1 Ped. 2:22) (2) Pamodi kel-li el ta pode viveba pa tudu ténpu na téra. (3) El staba prontu pa móre i da se vida pa nos. (Ebr. 10:9, 10) Jizus éra un algen perfeitu sima kel primeru ómi, Adon, antis di el peka. (1 Kor. 15:45) Nton, dja ki Jizus móre pa nos, el pode pagaba kel présu izatu ki mesteba pa rekupera kel ki Adon perde. (Rom. 5:19) Pur isu, Jizus bira “kel últimu Adon”. Ka meste más ninhun otu algen perfeitu pa ben i rekupera kel ki Adon perde. Jizus móre “un bês pa tudu ténpu”. — Ebr. 7:27; 10:12.
13. Modi ki perdon sta ligadu ku resgati?
13 Modi ki perdon sta ligadu ku resgati? Jeová ranja un manera di púrdua pekadu di kes algen ki é pekador, asi pa es pode ser se amigu. Má pa nos pekadu pode ser purduadu, tinha ki pagadu un resgati. Présu di resgati é vida perfeitu di Jizus. — Efé. 1:7; Ebr. 9:14.
JEOVÁ LIBERTA-NU DI PEKADU I DI MÓRTI I EL TA TXOMA-NU JUSTU
14. Kuzê ki nu sta ben odja gósi i pamodi?
14 Modi ki kel ki Jeová faze ta djuda-nu? Pa responde kel pergunta li, nu sta ben pâpia di siginifikadu di dôs palavra ki Bíblia ta uza pa djuda-nu intende modi ki perdon di Jeová pode djuda-nu.
15-16. (a) Na Bíblia, kuzê ki palavra “libradu” krê fla? (b) Modi ki kel-li ta pô-nu ta xinti?
15 Bíblia ta fla ma pamodi resgati pagadu, nu libradu ô nu libertadu. Apóstlu Pedru ta splika kel-li di kel manera li: “Pamodi nhos sabe ma é ka ku kuzas ki ta straga, sima prata ô oru, ki nhos libertadu [na gregu ta fla “resgatadu; libradu”] di kel manera di vive sen valor, ki nhos gentis grandi pasa nhos. Má é ku sangi ki ten txeu valor, sima di un korderu sen difeitu i sen mantxa, kel di Kristu.” — 1 Ped. 1:18, 19; nóta di rodapé.
16 Pamodi sakrifisiu di resgati, nu pode libertadu di pekadu i di mórti ki ta pô-nu ta sufri txeu. (Rom. 5:21) Nu ta xinti txeu gratidon pa Jeová i pa Jizus pamodi es salva-nu através di sangi, ô vida di Jizus, ki ten txeu valor. — 1 Kor. 15:22.
17-18. (a) Kuzê ki siginifika ser txomadu justu? (b) Ki benson nu ta ben ten pamodi Jeová txoma-nu justu?
17 Bíblia ta fla ma Jeová ta txoma se sérvus di justu. Kel-li krê fla ma nos pekadu ta pagadu ô linpadu sima si nunka nu ka peka. Óras ki Jeová ta faze si, el ka ta viola se leis di justisa. Jeová ta txoma-nu justu ka pamodi nu merese ô pamodi el ta aprova nos pekadu. Má si nu mostra fé na kuzê ki Jeová i Jizus faze pa resgata-nu, Jeová ta sta prontu pa púrdua nos pekadu. — Rom. 3:24; Gál. 2:16.
18 Kuzê ki kel-li ta siginifika pa kada un di nos? Kes ki skodjedu pa ba governa ku Jizus na séu, dja txomadu justu i es bira fidjus di Deus. (Titu 3:7; 1 Juan 3:1) Ses pekadu dja purduadu. Kel-li é sima si nunka es ka peka, pur isu es sta kualifikadu pa ba sta na Reinu di Deus. (Rom. 8:1, 2, 30) Kes otu algen ki txomadu justu ta ben vive pa tudu ténpu na téra. Jeová dja púrdua ses pekadu i dja es bira se amigu. (Tia. 2:21-23) Kes monti di algen ki ta ben salva na Armajedon, ten xansi di ka móre nunka más. (Juan 11:26) “Kes algen justu” i “kes algen injustu” ki móre ta ben ser resusitadu. (Atus 24:15; Juan 5:28, 29) Ku ténpu, tudu sérvu di Jeová na téra ki ta obi ku el ta ben “ten kel liberdadi ku glória di fidjus di Deus.” (Rom. 8:21) Nu tene gana pa txiga kel ténpu ki nos tudu ta ben ser fidju perfeitu di nos Pai, Jeová!
19. Modi ki nos situason midjora grasas-a kel ki Jizus ku Jeová faze pa nos? (Odja kuadru “ Perdon di Jeová”.)
19 Na verdadi, nos situason é sima di kel jóven ki nu papiaba di el antis, ki perde tudu kuza i el fika ku un dívida grandi dimás ki el ka ta konsigi pagaba. Má Jeová djuda-nu. Nos situason muda pamodi Jeová ranja un manera pa nos pekadu ser purduadu i Jizus paga resgati. Nos fé na Jizus ta libra-nu ô ta liberta-nu di pekadu i di mórti. Óras ki Jeová púrdua nos pekadu, kel-li é sima si nunka nu ka peka. Má más inportanti inda é ki gósi nu pode ten un bon amizadi ku nos Pai na séu, Jeová, ki ta ama-nu txeu.
20. Kuzê ki nu ta ben pâpia di el na kel otu studu?
20 Nu ta xinti txeu gratidon pa Jeová i pa Jizus óras ki nu ta midita na tudu kuza ki dja es faze pa nos. (2 Kor. 5:15) Sen ses ajuda, nu ka ta tinha ninhun speransa! Má kuzê ki perdon di Jeová ta siginifika pa kada un di nos? É kel-li ki nu ta ben pâpia di el na kel otu studu.
KÁNTIKU 10 Nu lova nos Deus Jeová!
a Na alguns língua, kel palavra “resgati” traduzidu pa “présu di vida”, ô “pagamentu ki fazedu”.
