Maria i se maridu ki txoma Juan, a ta mora na un lugar ki es ta pode pâpia di kes notísia sábi pa txeu algen di Filipinas ki ba trabadja la. Duránti COVID-19, Maria kumesa studus di Bíblia ka sô na país undi ki el ta vive, má tanbê na otus lugar di mundu. Modi ki el faze kel-li?

Maria ta perguntaba ses studanti di Bíblia: “Bu konxe algun algen ki ta gostaba di studa Bíblia?” Si es flaba sin, el ta perguntaba es si es pode aprizentaba el kes algen. Faze kel pergunta sinplis li, txeu bês ta da bons rezultadu. Pamodi? Pamodi normalmenti pesoas ki ta da valor pa Palavra di Deus ta krê fla ses família i amigus kes kuza ki es prende. Kal ki foi rezultadu di faze kel pergunta li?

Jael ki ta studaba ku Maria aprizenta-l kuatu algen ki krê studaba Bíblia tanbê. Un di es é Kristina, ki gostaba txeu di se studu di Bíblia ki el pidi Maria pa studa ku el dôs bês pa simana. Kantu Maria pergunta-l si el konxeba algun algen ki ta gostaba di studa Bíblia, Kristina fla-l: “Sin, N ta aprizenta-u nhas amiga.” Déntu di poku simana, Kristina aprizenta Maria kuatu amiga ki krê studaba. Dipôs Kristina aprizenta-l otus amiga, i kes amiga aprizenta-l otus algen ki tanbê staba interesadu na studa Bíblia.

Kristina tanbê kreba pa se família ki staba na Filipinas prende sobri Bíblia. Nton el pâpia ku se fidju-fémia Andrea. Na komésu, Andrea pensa: ‘Tistimunhas di Jeová é un relijion stranhu ki ka ta kridita na Jizus i es ta uza sô Velhu Testamentu.’ Má, dipôs di se primeru studu, el da kónta ma kuzê ki el ta pensaba sobri Tistimunhas di Jeová staba mariadu. Duránti se studu el ta flaba: “Si sta na Bíblia, nton é verdadi!”

Dipôs di algun ténpu, Andrea aprizenta Maria dôs amiga i un koléga di trabadju ki kumesa ta studa. Tanbê, sen Maria da kónta, un tia di Andrea ki txoma Ánjila staba ta obi ses studu. Nton un dia, Ánjila pidi Andrea pa aprizenta-l Maria i pa pidi-l pa studa Bíblia ku el. Ánjila staba ta gosta di kuzê ki el staba ta prende. Dipôs di un mês, dja el tinha txeu testu di Bíblia na kabésa i el krê studaba kuatu bês pa simana! Ku ajuda di Andrea, Ánjila kumesa ta sisti tudu runion pa xamada ku vídiu.

 Kantu Maria fika ta sabe ma maridu di Kristina ki txoma Juzué staba ta obi ses studu, Maria pergunta-l si el ta gostaba di studa djuntu ku es. Juzué fla: “N ta ba sô obi má ka bu faze ninhun pergunta. Si bu faze-m pergunta N ta sai.” Na sinku minutu di studu, el faze más pergunta di ki Kristina i el krê kontinuaba ta studa Bíblia.

Kel pergunta sinplis ki Maria ta fazeba pô-l ta ten txeu studu di Bíblia. Dja ki es éra txeu, el ranja manera pa otus Tistimunha di Jeová faze-s studu. Maria kumesa 28 studu di Bíblia na kuatu país diferenti.

Jael, kel primeru studanti ki nu pâpia di el na kel spiriénsia li, batiza na abril di 2021. Kristina batiza na maiu di 2022 i el volta pa Filipinas pa fika ku se família. Dôs studanti ki Kristina aprizenta Maria tanbê batiza. Ánjila batiza alguns mês dipôs, gósi el é pionera fíksu. Juzué ki é maridu di Kristina i Andrea ses fidju-fémia i txeu di kes otu studanti sta ta faze bon prugrésu.

Na ténpu di Jizus i ses apóstlu, txeu algen pâpia ku ses família i ses amigu di kes kuza ki es prende sobri Jizus. (Juan 1:41, 42a; Atus 10:24, 27, 48; 16:25-33) Pamodi ki bu ka ta pergunta bu studanti i otus algen interesadu: “Bu konxe algun algen ki krê studa Bíblia?” Si bu faze kel pergunta sinplis li, talvês bu ta atxa txeu algen ki krê studa Bíblia.