1. Pamodi ki nu sta ta vive na un ténpu spesial?

NU STA ta vive na un ténpu spesial. Bíblia ta fla ma na nos ténpu, Jeová ta ben djuntaba un ‘monti di algen di tudu nasons, povus i línguas’. Povu di Jeová é un ‘nason fórti’ ki ten más di 8 milhon di algen filís ki ‘ta faze sirvisu sagradu pa el dia ku noti’. (Apo. 7:9, 15; Isa. 60:22) Oji, nu sta ta odja txeu algen ta mostra amor pa Jeová i pa kunpanheru. Kel-li é un kuza ki nunka ka kontiseba antis.

2. Ki tipu di amor nu ta odja na kes algen ki ka ta ama Deus? (Odja dizenhu na komésu di studu.)

² Má, Bíblia tanbê ta fla ma na nos ténpu ta ben parseba un otu tipu di amor: un tipu di amor ki ta poi algen ta pensa sô na se kabésa. Nu ta ben odjaba kel tipu di amor li na kes algen ki ka ta ama Deus. Apóstlu Polu skrebe sobri modi ki pesoas ta ben mostraba kel tipu di amor li. El fla: ‘Na ténpu di fin ómis ta ben ama sô ses kabésa, ta ama dinheru, es ta krê sô pasa sábi envês di ama Deus’. (2 Tim. 3:1-4) Kel tipu di amor li é diferenti di amor pa Deus. Ken ki ten kel amor li, ta atxa ma el ta ser filís, má el ka ta konsigi. Kel tipu di amor li, ta poi pesoas ta ama  sô ses kabésa i ta pô-nu vive na un mundu ‘difísil di aguenta.’

3. (a) Kuzê ki nu sta ben odja na kel studu li? (b) Pamodi ki nu meste studa es asuntu?

³ Polu tanbê fla ma na ténpu di fin, kel tipu di amor li ta fikaba normal. Kel-li é un prigu pa kes algen ki ta sirbi Jeová. Pur isu, el fla ma nu meste ‘fika lonji’ di kes algen ki ta mostra kel tipu di amor li. (2 Tim. 3:5) Alvês é difísil fika lonji di kes tipu di algen li. Má, kuzê ki nu meste faze pa nu ka fika ta pensa sô na nos kabésa? Kuzê ki nu meste faze pa nu agrada Jeová, ki é un Deus di amor? Na kel studu li, nu sta ben odja diferénsa entri amor pa Deus i kel amor ki sta na 2 Timóteo 3:2-4. Pamodi ki nu meste faze kel-li? Pamodi asi nu ta odja si nu meste midjora nos manera di mostra amor. Kel-li tanbê ta djuda-nu ser filís di verdadi.

4. Pamodi ki é ka mariadu nu ama nos kabésa déntu limiti?

⁴ Apóstlu Polu fla: ‘Ómis ta ben ama sô ses kabésa’. Má, é mariadu nu ama nos kabésa? Nau. Jeová faze-nu pa nu ten amor. Pur isu, é normal nu ama nos kabésa, má déntu limiti. Jizus fla: ‘Ama otus algen sima bu ta ama bu kabésa.’ (Mar. 12:31) Si nu ka ta ama nos kabésa, nu ka ta konsigi ama otus algen. Bíblia tanbê ta fla: ‘Maridu debe ama se mudjer sima el ta ama se própi korpu. Ómi ki ta ama se mudjer, el ta ama se kabésa, pamodi ninhun ómi nunka ka ôdia se própi korpu, má el ta da-l kumida i el ta kuida di el’. (Efé. 5:28, 29) Kel-li ta mostra ma é inportanti nu ama nos kabésa déntu limiti.

5. Modi ki kes algen ki ta pensa na ses kabésa di manera izajeradu ta aji?

⁵ Kel amor ki 2 Timóteo 3:2 ta pâpia di el, é ka un sentimentu normal i el é ka bon. El é un tipu di amor ki ta poi algen ta pensa sô na se kabésa. Ken ki ta ama se kabésa di manera izajeradu, el sta ta pensa dimás na se kabésa. (Lé Romanos 12:3.) Algen di kes tipu li ta pensa sô na ses interesi, es ka ta pensa na otus algen. Óras ki un kuza ka kontise sima es ta krê, es ta kustuma poi kulpa na otus algen, envês di seta ses fadja. Kes tipu di algen li é ka filís di verdadi. Alguns di kes studiozu di Bíblia, ta konpara kes algen ki ta pensa sô na ses kabésa “ku un animal ki txoma orisu. El é sima porku spinhu. Kósta di kel animal é xeiu di spinhu, má se bariga é xeiu di kabelu. Óras ki orisu ta rola el ta sukundi párti di péli pa el, má el ta dexa kel párti di spinhu pa otus.”

6. Amor pa Deus ta djuda-nu ten ki kualidadis?

⁶ Un di kes primeru kuza ki Polu fla ma pesoas ta tinha na ténpu di fin é amor pa ses kabésa. Pamodi? Alguns studiozu di Bíblia ta atxa ma é pamodi kel tipu di amor li, ki sta kontise tudu kes otu kuza mariadu ki Polu ta fla dipôs. Má, amor pa Deus ta poi algen ta ten bons kualidadi. Pur izénplu, ken ki ta ama Deus ta ten alegria, pas, paxénxa, bondadi, amor lial, fé, brandura i es ta kontrola ses kabésa. (Gál. 5:22, 23) Bíblia tanbê ta fla: ‘Filís é kel povu ki se Deus é Jeová!’ (Sal. 144:15) Jeová é un Deus filís i el krê pa se sérvus tanbê ser filís. Nos é ka sima kes algen ki ta ama sô ses kabésa i es ta krê sô toma. Má, nu ta fika kontenti di da otus algen kuzas ki nu ten. — Atos 20:35.

7. Ki perguntas pode djuda-nu sabe si nu sta ta ama nos kabésa más di ki Deus?

 ⁷ Modi ki nu ta sabe si nu sta ta ama nos kabésa más di ki Deus? Repara kuzê ki Bíblia ta fla na Filipenses 2:3, 4: ‘Ka nhos faze nada pa konpitison nen ku orgulhu; má ku umildadi nhos trata otus sima algen más inportanti ki nhos, ka nhos djobe sô nhos própi interesi, má tanbê interesi di otus.’ Nton, nu pode pergunta nos kabésa: ‘N ta sigi kel konsedju li na nha vida? Pur izénplu, N ta poi vontadi di Jeová na primeru lugar? N ta tenta djuda otus na kongregason i na pregason?’ Nu meste sforsa pa nu djobe interesi di otus más primeru ki di nos. Má Jeová ta fika kontenti óras ki nu ta faze si. Ka ten nada más sábi di ki agrada kel ki faze Séu ku Téra.

8. Pamodi amor pa Deus kuzê ki alguns algen faze?

⁸ Amor pa Deus motiva alguns algen dexa di djobe fama i ganha txeu dinheru, pa es pode faze más na sirvisu di Jeová. Odja izénplu di Ericka ki é un médika ki ta mora na Mérka. Envês di ser un algen inportanti i ganha txeu dinheru, el disidi ser pionera i djuntu ku se maridu es sirbi na alguns país. Ericka fla: “Nu ten txeu stória sábi di ténpu ki nu sirbi na kongregason di língua stranjeru. Tanbê nu ranja txeu amigu. Tudu kel-li poi nos vida más filís. Ami é médika ti inda, má kuzê ki ta pô-m filís é uza txeu párti di nha ténpu ta djuda pesoas ten un amizadi ku Jeová i djuda irmons.”

9. Pamodi ki amor pa dinheru ka ta pô-nu ser filís?

⁹ Polu fla tanbê ma pesoas ta ben ‘ama dinheru.’ Alguns anu atras, un pioneru na Irlanda staba ta pâpia ku un ómi sobri Deus. Kel ómi tra dinheru di se kartera i el fla ku tudu bazofaria: ‘Kel-li ki é nha deus!’ Txeu algen ka ten koraji di fla klaru un kuza di kel-li. Má mundu sta xeiu di algen ki ta ama dinheru i kuzas ki dinheru pode kunpra. Bíblia ta mostra ma amor pa dinheru ka ta pô-nu ser filís. El ta fla: ‘Ken ki ta ama prata nunka ka ta farta di prata, i ken ki ta ama rikéza nunka ka ta fika kontenti ku kel ki el ta ganha.’ (Ecl. 5:10) Un algen ki ta leba vida sô ta djobe más dinheru, ta ten ‘txeu sufrimentu.’ —  1 Tim. 6:9, 10.

10. Kuzê ki Agur fla sobri rikéza i pobréza?

¹⁰ Tudu algen meste di dinheru. Dinheru ta sirbi pa proteson. (Ecl. 7:12) Má, un algen ta konsigi ser filís di verdadi sô ku poku kuza? Klaru ki sin! (Lé Eclesiastes 5:12.) Agur fidju di Jaki pidi Jeová: ‘Ka bu da-m nen pobréza nen rikéza. Da-m sô nha bokadu kumida.’ É faxi ntende pamodi ki Agur ka krê sérba póbri dimás. Sima el splika dipôs, el ka krê xintiba tentadu na furta. Agur sabeba ma Deus ta ôdia furtu. Má tanbê el fla Jeová ma el ka krê sérba riku. Pamodi? El skrebe: ‘Pa N ka farta i pa N nega-u, i pa N fla: ‘Ken ki é Jeová?’’ (Prov. 30:8, 9) É tristi odja ma alguns pasa ta kúnfia na rikézas i es skese di Jeová.

11. Ki konsedju Jizus da sobri djunta dinheru?

¹¹ Ken ki ta ama dinheru ka ta konsigi faze vontadi di Jeová. Jizus fla: ‘Ningen ka pode ser skravu di dôs sinhor; ô el ta ôdia un i el ta ama kel otu, ô el ta pega un i el ta dispreza kel otu. Nhos ka pode ser skravu di Deus i di Rikézas.’ Antis di el fla kel-li, el da un otu konsedju: ‘Nhos para di djunta tizorus na Téra, na undi ki bitxu ku feruju ta straga i na undi ki ladrons ta ronba i ta furta.’ — Mat. 6:19, 20, 24.

12. Pamodi ki ten un vida sinplis ta djuda-nu sirbi Jeová midjór? Da un izénplu.

 ¹² Txeu algen diskubri ma es ta ser más filís óras ki es ta leba un vida sinplis. Tanbê, leba un vida sinplis ta djuda-nu ten más ténpu pa nu sirbi Jeová midjór. Odja izénplu di Jack ki ta vive na Mérka. El bende un kaza grandi i se enpréza, pa el pode ser pioneru djuntu ku se mudjer. El fla: “Nos kaza éra bunitu i el tinha un kintal grandi. Foi difísil fika sen nos kaza i kuzas di valor ki nu tinha. Má duránti txeu anu, N ta txigaba kaza dizanimadu pamodi prublémas. Má nha mudjer ki éra pioneru fíksu ta staba sénpri kontenti. El ta flaba: ‘N ten midjór patron ki ten!’ Gósi ami tanbê é pioneru. I nos dôs nu ten priviléjiu di trabadja pa Jeová.”

13. Ki perguntas pode djuda-nu odja si nu ta ama dinheru?

¹³ Pa nu sabe si nu ta ama dinheru más di ki Deus, nu pode pergunta nos kabésa: ‘N ta kridita na kel ki Bíblia ta fla sobri dinheru i N ta faze sima el ta fla? Kuzê ki é más inportanti pa mi: dinheru, amizadi ku nha família, nhas amigu ô nha amizadi ku Jeová? N ta kúnfia di verdadi ma Jeová ta kuida di nhas nisisidadi?’ Nu pode ten sertéza ma ken ki ta kúnfia na Jeová, nunka ka ta fika diziludidu. — Mat. 6:33.

14. Kuzê ki Jeová ta pensa sobri diverson?

¹⁴ Apóstlu Polu fla ma txeu algen oji ta krê sô pasa sábi. Sima dja nu odja é ka eradu nu ama nos kabésa i krê ten dinheru, má déntu limiti. Di mésmu manera, é ka eradu divirti. Má, nu ka debe faze-l di manera izajeradu. Jeová ta fika kontenti óras ki nu ta divirti. El ka krê pa nu ivita tudu tipu di diverson. Pur isu, Bíblia ta insentiva-nu: ‘Bai, kume bu kumida ku alegria i bebe bu vinhu ku korason kontenti’. — Ecl. 9:7.

15. Kuzê ki kes algen ki ta krê sô pasa sábi ta faze?

¹⁵ Óras ki Bíblia ta pâpia na 2 Timóteo 3:4 sobri pesoas ki ta krê sô pasa sábi, el ta mostra ma kes algen ka ta lenbra di Deus na ses vida. Repara ma kel testu ka ta pâpia di pesoas ki ta ama sabura  di mundu más di ki Deus. Má, el ta pâpia di pesoas ki ta ama sabura di mundu envês di ama Deus. Un livru inportanti fla: “Kel [versíklu] li ka krê fla ma kes algen ta ama Deus poku. El krê fla ma es ka ten ninhun amor pa Deus.” Kel-li é un avizu pa kes algen ki sta ta dizenvolve txeu amor pa kes sabura di mundu. Óras ki Bíblia ta fla ma algen krê sô pasa sábi é sima si sabura di mundu dja toma-l kónta kabésa, el ka ta pode pensa na otu kuza más. — Lúkas 8:14, BPK.

16, 17. Kuzê ki Jizus ta pensaba sobri diverson?

¹⁶ Jizus ka ta pensaba ma diverson éra mariadu. Pur izénplu, el bai pa un fésta di kazamentu i ‘un grandi fésta’. (João 2:1-10; Lúkas 5:29, BPK) Na kel fésta di kazamentu, vinhu staba kuazi ta kaba. Nton, el faze un milagri i agu bira vinhu. Alguns pâpia mal di Jizus pamodi el ta gostaba di kume i bebe ku se amigus. Má dipôs, Jizus dexa klaru ma kes algen ka staba ta pensa dretu sobri diverson. — Lucas 7:33-36.

¹⁷ Má simé, diverson é ka éra kuza más inportanti na vida di Jizus. El ta xintiba más alegria na faze vontadi di Jeová di ki na diverson. El ta fazeba di tudu pa djudaba pesoas i ti el da se vida pa nu pode ten speransa di vive pa tudu ténpu. Kantu el pâpia ku se sigidoris, el ka fla-s pa es djobe filisidadi na sabura di mundu. El fla: ‘Nhos é filís óra ki pesoas insulta nhos i pirsigi nhos i konta mintira i es fla tudu tipu di kuzas mariadu kóntra nhos, pamodi mi. Nhos fika kontenti i nhos fika xeiu di alegria, pamodi nhos rekonpénsa é grandi na Séu; pamodi dja es pirsigiba kes proféta ki vive antis di nhos.’ — Mat. 5:11, 12.

18. Ki perguntas ta djuda-nu sabe si nu sta ta ama sabura di mundu más txeu di ki Jeová?

¹⁸ Modi ki nu ta sabe si nu sta ta ama sabura di mundu? Nu pode pergunta: ‘N ta gasta más ténpu ku diverson ô ku runion i pregason? N sta dispostu na poi vontadi di Jeová na primeru lugar? Óras ki N ta skodje diverson, N ta tenta sabe kal ki é opinion di Jeová?’ Nu ta ama Jeová i nu krê faze se vontadi. Pur isu, nu ta ivita kes kuza ki nu sabe ma el ka gosta, má tanbê kes kuza ki nu ten dúvida ma el pode ka gosta. — Lé Mateus 22:37, 38.

19. Ken ki nunka ka ta pode ser filís di verdadi?

¹⁹ Dja ten uns 6 mil anu ki umanus sta ta sufri na mundu di Satanás. I na es ténpu di fin, mundu sta xeiu di pesoas ki ta ama sô ses kabésa, ki ta ama dinheru i sabura di mundu. Kes algen li, ta pensa sô na ses interesi i es ta poi ses vontadi na primeru lugar. Es ka pode ser filís di verdadi. Un skritor di Salmu skrebe sobri ken ki pode ser filís di verdadi. El fla: ‘Filís é kel ki ten Deus di Jakó pa djuda-l, ki ta poi se speransa na se Deus Jeová.’ — Sal. 146:5.

20. Pamodi ki bu ta xinti filís di faze vontadi di Jeová?

²⁰ Nos amor pa Deus sta kada bês más fórti. I tudu anu, más algen ta djunta ku nos na adora Jeová. Kel-li é un próva ma Reinu di Deus sta ta governa i ma ka ta dura el ta ben traze txeu benson pa umanus. Ka ten nada ki ta da-nu más alegria di ki sabe ma nu sta faze vontadi di Jeová. I kes ki ta ama Jeová ta ser filís pa tudu ténpu. Na kel otu studu, nu ta ben odja ma kes algen ki ta ama sô ses kabésa, tanbê ta ten otus kualidadi mariadu. I nu ta ben odja ma kes algen li é diferenti di sérvus di Jeová ki ta sforsa pa ten bons kualidadi.