1. (a) Ki prublémas txeu di nos ta pasa pa es? (b) Pamodi ki Jeová sta kontenti ku se sérvus lial? (Odja fotus na komésu di studu.)

SIMA nu sabe, vida na kel mundu li sta difísil pa tudu algen. Txeu di nos irmon ku irman, sta ta pasa pa prublémas gravi di saúdi. Nbóra alguns dja sta di idadi, es ten ki kuida di ses família ki dja sta más grandi. Inda ten otus ki sta ta luta sô pa ses família ka pasa fómi, pamodi ka ta da pa más ki si. I nu sabe ma ten txeu ki sta ta lida ku un monti di kes prubléma li, tudu djuntadu! Lida ku kes situason li, ta iziji ténpu i dinheru. Tanbê, kes prubléma ta pô-s ta fika kansadu i ti dizanimadu. Má, Jeová ta fika kontenti óras ki el ta odja pa nos! Pamodi, el ta odja ma mésmu ku txeu prubléma, se sérvus ta kontinua ta kúnfia di tudu korason na promésa ki el ta faze pa futuru midjór.

2. (a) Modi ki testu di Isaías 40:29 ta nkoraja-nu? (b) Ki disizon mariadu alguns sérvu di Jeová toma?

² Txeu bês, bu ta xinti ma bu ka sta aguenta más pamodi bus prubléma? Si bu sta xinti si, lenbra ma é ka sô bo ki sta na kel situason li. Bíblia ta mostra ma txeu sérvu di Jeová na ténpu antigu, pasa pa situasons ki es atxa difísil  di aguenta. (1 Reis 19:4; Jó 7:7) Má, envês di es dizisti, es pidi Jeová pa djuda-s. Es xinti ma Jeová é Deus ki ta ‘da forsa pa ken ki sta kansadu’. (Isa. 40:29) Má, alguns sérvu di Jeová oji ta atxa ma é midjór ‘tra un féria di ses sirvisu pa Jeová’, pa es pode lida ku prublémas di vida. Es ta atxa ma sirbi Jeová é ka un benson, má é un pézu na ses vida. Pur isu, es para di lé Bíblia, sisti runion i sai na pregason. Es faze kel ki Satanás kreba pa es fazeba.

3. (a) Kuzê ki nu pode faze pa Satanás ka pô-nu fika fraku? (b) Kuzê ki nu sta ben prende na kel studu li?

³ Satanás sabe ma lé Bíblia, sisti runion i sai na pregason ta pô-nu fika fórti. Pur isu, el krê inpidi-nu di faze kes kuza li. Óras ki bu sta xinti kansadu i dizanimadu, ka bu afasta di Jeová. Má, si bu sforsa pa bu bira más amigu di Jeová, ‘el ta pô-u fika firmi i el ta pô-u fika fórti.’ (1 Ped. 5:10; Tia. 4:8) Na kel studu li, nu sta ben pâpia di dôs situason ki pode dizanima-nu i modi ki nu pode lida ku es. Má primeru, nu sta ben pâpia di Isaías 40:26-31 ki ta mostra kapasidadi ki Jeová ten di djuda-nu.

4. Kuzê ki nu ta prende na testu di Isaías 40:26?

⁴ Lé Isaías 40:26. Ningen ka ta pode konta kantu stréla ki ten na séu. Sientistas ta kridita ma debe ten uns 400 bilhon di stréla sô na nos galáksia. Má simé, Jeová ta txoma kada stréla pa se nómi. Kuzê ki nu ta prende ku kel-li? Si Jeová ta preokupa ku kuzas ki ka ten vida, sima stréla, imajina modi ki el ta preokupa ku bo! Abo é ka sima un robô ki sta prugramadu pa faze se vontadi. Bu ta sirbi-l pamodi amor ki bu ten pa el! (Sal. 19:1, 3, 14) Jeová sabe tudu kuza ki bu ta xinti i ki bu ta pensa. El ta konta ‘ti mésmu kabélu di nhos kabésa.’ (Mat. 10:30) Bíblia ta fla: ‘Jeová sabe kuzê ki kes algen lial ta pasa’. (Sal. 37:18) Bu pode ten sertéza ma Jeová sabe prublémas ki bu ta pasa pa es i el ta da-u forsa ki bu meste pa bu pode aguenta.

5. Pamodi ki nu ten sertéza ma Jeová pode da-nu forsa?

⁵ Lé Isaías 40:28. Jeová é Fonti di inerjia ô di puder. Pur izénplu, é el ki ta da sól inerjia. Un skritor ki txoma David Bodanis fla ma inerjia ki sól ta liberta kada sugundu é sima bilhons di bonba atómika. Un otu algen ki ta faze piskiza ta kridita ma “inerjia ki sól ta liberta na un sugundu ta da pa sustenta-nu duránti 200 mil anu”! Agó pensa un poku na kel-li: kel mésmu Deus ki ta da sól inerjia promete da-nu forsa pa nu lida ku kalker tipu di prubléma!

6. (a) Di ki manera kanga di Jizus é suavi? (b) Pamodi ki é bon sabe kel-li?

⁶ Lé Isaías 40:29. Sirbi Jeová ta da txeu alegria. Jizus fla se disiplus: ‘Nhos poi nha kanga riba nhos.’ Má tanbê el fla: ‘I nhos ta atxa konsolu pa nhos. Pamodi nha kanga é suavi i nha karga é lébi.’ (Mat. 11:28-30) Di ki manera ki kanga di Jizus é suavi i se karga é lébi? Alvês nu ta xinti kansadu óras ki nu sai di kaza pa nu bai runion ô pregason. Má, modi ki nu ta xinti óras ki nu volta pa kaza? Nu ta xinti animadu i priparadu pa lida ku prublémas di vida. Pur isu, kanga di Jizus é suavi!

7. Da un izénplu ki ta mostra ma sisti runion ta anima-nu.

 ⁷ Odja izénplu di un irman ki ten depreson, fadiga i enxakeka. Ku tudu kes prubléma li, ta da pa ntende pamodi ki alvês el ka ta xinti gana di bai runion. Un bês, dipôs ki el faze txeu sforsu pa sisti un runion, el skrebe: “Kel diskursu ta papiaba sobri kuzê ki nu debe faze óras ki nu sta dizanimadu. Kel irmon pâpia ku txeu sentimentu ki N fika ku lágua na odju. Kel diskursu pô-m ta da más valor pa runions.” Kuza ki nos irman prende pô-l ta xinti ma bale péna sforsa pa nu sisti nos runion!

8, 9. Kuzê ki Polu krê flaba kantu el skrebe: ‘Óras ki N sta fraku, la ki N ta xinti más fórti’?

⁸ Lé Isaías 40:30. Ka ta nporta ki kapasidadi nu ten, má ten kuzas ki nu ka ta konsigi faze nos sô. Kel-li é un lison ki nos tudu debe prende. Nbóra apóstlu Polu tinha txeu kapasidadi, tinha alguns kuza ki el ka ta konsigiba faze. Kantu el ora Jeová sobri kel-li, Jeová fla-l: ‘Nha puder sta ta bira perfetu na bu frakéza.’ Polu ntende kuzê ki Jeová krê flaba el. El fla: ‘Óras ki N sta fraku, la ki N ta xinti más fórti.’ (2 Cor. 12:7-10) Kuzê ki Polu krê flaba?

⁹ Polu ntende ma el sô, el ka ta konsigiba faze txeu kuza. Má spritu santu di Jeová, da Polu forsa ki el mesteba i djuda-l faze kuzas ki ningen ka ta konsigiba faze el sô. Tanbê pode kontise mésmu kuza ku nos. Si nos forsa ta ben di Jeová, nada ka ta pode vense-nu!

10. Kuzê ki djuda Davidi lida ku prublémas?

¹⁰ Davidi pasa pa txeu prubléma, má txeu bês el xinti puder di Jeová. El fla: ‘Ku bu ajuda N pode ataka un grupu di bandidu; ku forsa di Deus, N pode subi na un paredi’. (Sal. 18:29) Ten alguns prubléma ki é sima paredi, sô nu ta konsigi salta-s ku ajuda di Jeová.

11. Modi ki spritu santu ta djuda-nu lida ku nos prubléma?

¹¹ Lé Isaías 40:31. Un ágia ka ta konsigi ten txeu óra ta bua sô ku se forsa. Má, el ta pruveta kulunas di ar kenti ki ta djuda-l subi kada bês más altu i sen kansa. Nos tanbê óras ki nu ta pasa pa prublémas, nu debe lenbra di ágia. Pidi Jeová pa da-u ‘kel ajudador ki é spritu santu.’ (João 14:26) Inda ben ki nu pode konta ku ajuda di Jeová 24 óra pur dia. Pur izénplu, un situason ki pode kansa-nu é óras ki nu ten prubléma ku un irmon na kongregason. Pamodi ki kel-li ta kontise?

12, 13. (a) Pamodi ki pode kontise prublémas entri irmons? (b) Kuzê ki stória di Juzé ta inxina-nu sobri Jeová?

¹² Alvês ta kontise prublémas entri irmons pamodi nos é inperfetu. Pur isu, nu pode spéra ma un óra ô otu, un irmon pode fla ô faze un kuza ki ta xatia-nu. Tanbê nu pode fla ô faze kuzas ki ta xatia-s. Kel situason li pode prova nos lialdadi pa Jeová. Modi ki nu pode mostra ma nos é lial? É óras ki nu ta prende trabadja djuntu ku ómis i mudjeris inperfetu, má ki Jeová ta ama simé.

¹³ Stória di Juzé ta inxina-nu txeu kuza sobri Jeová. Kantu Juzé éra jóven se irmons tinha invéja di el. Pur isu, es bende-l pa el ser skravu na Ijitu. (Gén. 37:28) Jeová fika tristi kantu el odja se amigu ta tratadu di kel manera la. Má el dexa kes kuza la kontise.  Dipôs di algun ténpu, mudjer di Putifar fla ma Juzé tenta viola-l. Pur isu, es pô-l na kadiâ. Más un bês Jeová ka faze nada. Kuzê ki nu ta prende? Jeová ka ta inpidi se sérvus di pasa pa prublémas. Má sima izénplu di Juzé ta mostra, el ka ta bandona-nu. Bíblia ta fla: ‘Jeová staba ku Juzé i el ta abensuaba tudu kel ki el ta fazeba.’ — Gén. 39:21-23.

14. Pamodi ki ka fika xatiadu i ka guarda mágua é bon pa nos?

¹⁴ Otu izénplu di algen ki maltratadu é Davidi. Má Davidi éra amigu di Jeová, pur isu el ka dexa mágua toma konta di el. El skrebe: ‘Ka bu fika xatiadu i dexa raiba pa la; ka bu xâtia dipôs pa bu faze kuzas mariadu’. (Sal. 37:8) Pamodi ki é bon pa nos si nu ka ‘fika xatiadu’? Óras ki nu ta faze si, nu sta ta imita Jeová ki ‘ka ta trata-nu di akordu ku nos pekadu’. (Sal. 103:10) Tanbê, ‘ka fika xatiadu’ i ka guarda mágua é bon pa nos saúdi. Fika ku raiba pode pô-nu ku tenson altu, prubléma na respira i na stômagu. Tanbê, el pode prujudika pánkrias i fígadu. Óras ki nu sta ku raiba é faxi nu faze asnera. I alvês fika xatiadu ta pô-nu ku depreson pa txeu ténpu. Má Bíblia ta fla: ‘Korason kalmu é vida pa korpu’. (Prov. 14:30) Pur isu, kuzê ki nu pode faze óras ki un irmon magua-nu? Nu ben odja konsedju di Bíblia ki ta djuda-nu lida ku es situason.

15, 16. Modi ki nu pode faze pas ku un irmon ki ofende-nu?

¹⁵ Lé Efésios 4:26. Nu ka ta fika spantadu óras ki un algen na trabadju ô na skóla trata-nu mal. Má, óras ki un irmon ô algen di nos família trata-nu mal, nu ta xinti txeu tristi. Óras ki kel-li kontise, kuzê ki bu ta faze? Bu ta tenta skese kel prubléma ô bu ta guarda mágua? Si bu ka ta konsigi skese kuzê ki kontise, nton rezolve kel asuntu lógu, sima Bíblia ta fla. Si bu fika txeu ténpu xatiadu ku kel irmon, ta fika más difísil nhos faze pas.

¹⁶ Imajina ki un irmon ofende-u i bu ka sta konsigi purdua-l. Modi ki bu pode faze pas ku kel irmon? Primeru, pidi Jeová pa djuda-u pâpia ku kel irmon di un manera ki nhos ta konsigi rezolve kel asuntu. Ka bu skese ma kel irmon é un amigu di Jeová. (Sal. 25:14) Jeová ta ama tudu  se amigus i el ta trata-s ku bondadi. El ta spéra ma bu ta faze kel mê. (Prov. 15:23; Mat. 7:12; Col. 4:6) Ka bu fika ta pensa ma kel irmon ofende-u di abuzu. Tanbê, ka bu atxa ma bu ka ten kulpa. Pur isu, pensa dretu na kuzê ki bu sta ba fla. Bu pode fla si: ‘Talvês ami é un algen ki ta mágua faxi, onti kantu bu fla kel kuza N xinti. . .’ Si kel prubléma ka rezolve sima bu staba ta spéra, torna tenta faze pas na un otu óra. Duránti kel ténpu, ora pa kel irmon ki ofende-u i pidi Jeová pa abensua-l. Tanbê, pidi Jeová pa djuda-u konsentra na kualidadis di kel irmon. Ka ta nporta kuzê ki kontise, Jeová ta fika kontenti di odja bu sforsu di faze pas ku Se amigu.

17. (a) Modi ki Jeová ta djuda un algen ki faze un pekadu gravi? (b) Pamodi ki nu debe seta lógu ajuda di Jeová?

¹⁷ Alguns algen ki faze pekadu gravi, ta xinti ma es ka merese sirbi Jeová más. É difísil karega pézu di kulpa. Pur izénplu, Davidi tevi txeu ténpu ta karega pézu di kulpa. El fla: ‘Timenti N staba kaladu nhas osu ba ta gasta, pamodi N ta pasaba dia interu ta jeme. Tantu di dia ku di noti, bu mô staba pizadu riba mi.’ Má, Davidi konsigi lida dretu ku kel prubléma, pamodi el éra amigu di Jeová. El skrebe: ‘Ti ki enfin N konfesa-u nha pekadu; i bu purdua-m nha éru i nhas pekadu.’ (Sal. 32:3-5) Si bu faze un pekadu gravi, Jeová sta prontu pa djuda-u. El ta uza ansions pa faze kel-la. Pur isu, seta lógu ajuda ki es ta da-u. (Prov. 24:16; Tia. 5:13-15) Ka bu skese ma pa bu vive pa tudu ténpu bu meste seta ajuda di Jeová. Má i si Jeová dja purdua-u bu pekadu i ti inda bu konsénsia sta pizadu? Kuzê ki bu pode faze?

18. Modi ki izénplu di Polu ta djuda kes ki tene konsénsia pizadu pamodi pekadus ki es fazeba?

¹⁸ Ta parse ma na alguns situason apóstlu Polu fika dizanimadu pamodi érus ki el faze na pasadu. El fla: ‘Ami é kel apóstlu ménus inportanti, N ka merese pa N txomadu di apóstlu, pamodi N pirsigi kongregason di Deus.’ Má dipôs el fla: ‘Má pamodi bondadi di Deus ki N ka merese ami é kel ki mi é.’ (1 Cor. 15:9, 10) Kes palavra li ta mostra ma nbóra Jeová sabeba ma Polu éra inperfetu, El ta amaba el simé. I Jeová kreba pa Polu sabeba kel-li. Nton, si na bu korason dja bu rapende di bus pekadu i dja bu konfesa bus éru pa Jeová, bu pode ten sertéza ma Jeová dja purdua-u. Seta perdon di Jeová i ka bu ten dúvida di se palavra! — Isa. 55:6, 7.

19. (a) Kal ki é testu di Bíblia pa anu di 2018? (b) Pamodi ki kel testu li foi ben skodjedu?

¹⁹ Sima ténpu di fin sta kada bês más pértu, nu pode spéra ma prublémas di vida ta omenta. Má, nu pode ten sertéza ma kel ki ta ‘da puder pa ken ki sta kansadu i ta da forsa pa ken ki sta sen forsa’, pode da-u forsa ki bu meste pa bu ka dizisti. (Isa. 40:29; Sal. 55:22; 68:19) Duránti anu di 2018, sénpri ki nu entra na Salon di Reinu nu ta lenbra di kel verdadi inportanti ki sta na Isaías 40:31 ki skodjedu pa ser testu di anu: ‘Kes ki ta spéra na Jeová ta torna ganha forsa.’