1, 2. Modi ki Jeová ta uza kuzas ki ten na naturéza?

JEOVÁ é un Deus ki gosta di da. Tudu kel ki nu ten é el ki da-nu. El é donu di tudu oru, prata i di tudu kes otu kuza ki ten na naturéza. Jeová ta uza kes kuza li, pa sustenta vida na Téra. (Sal. 104:13-15; Ageu 2:8) Bíblia tanbê ta fla ma txeu bês, Jeová faze milagri pa uza kuzas ki ten na naturéza pa kuida di se povu.

² Pur izénplu, duránti 40 anu ki israelitas staba na dizértu, Jeová da-s maná ku agu. (Êxo. 16:35) Pur isu, ‘nada ka falta-s.’ (Nee. 9:20, 21) Jeová uza proféta Elizeu, pa faze un milagri. Elizeu faze un poku di azeti bira txeu i ki da pa intxi un monti póti. Kel milagri li, djuda un viúva paga se dívida i dinheru ki resta da pa el kuida di nisisidadis di el ku se fidjus. (2 Reis 4:1-7) Jeová da Jizus puder pa faze milagris pa ranja kumida pa pesoas i ti dinheru ki es staba ta meste. — Mat. 15:35-38; 17:27.

3. Ki perguntas nu ta ben responde na studu di oji?

³ Jeová pode faze kalker kuza pa sustenta se kriaturas  na Téra. Se puder ka ten limiti. Má simé, Jeová ta da-nu xansi di uza kuzas ki nu ten pa apoia se organizason. (Êxo. 36:3-7; lé Provérbios 3:9.) Pamodi ki Jeová ta spéra pa nu torna da-l kuzas di valor ki el da-nu? Modi ki sérvus fiel di Jeová na ténpu antigu, ta uzaba kuzas ki es tinha pa apoiaba kes ki staba na trabadju di Jeová? Modi ki organizason di Jeová oji ta uza kontribuisons ki nu ta da? Nu ta ben responde kes pergunta li na studu di oji.

4. Óras ki nu ta da Jeová kel ki nu ten, kuzê ki nu sta ta mostra?

⁴ Óras ki nu ta da Jeová kuzas ki nu ten, nu sta ta mostra nos gratidon i nos amor pa el. Rei Davidi fla povu di Israel sobri nisisidadi di faze kontribuison pa faze ténplu i el splika-s pamodi. El fla-s ma tudu ki nu ta da Jeová é sima ki nu sta torna da-l kuza ki el da-nu. Nos tanbê, óras ki nu para pa nu pensa na tudu ki Jeová dja faze pa nos, nos korason ta fika xeiu di gratidon. — Lé 1 Crónicas 29:11-14.

5. Modi ki Bíblia ta mostra ma ser un algen ki gosta di da ta faze párti di nos adorason pa Jeová?

⁵ Ser un algen ki gosta di da, ta faze párti di nos adorason pa Jeová. Na un vizon, apóstlu Juan odja sérvus di Jeová na Séu ta fla: ‘Jeová nos Deus, bo ki merese resebe glória, ónra i puder pamodi bu kria tudu kuza i pa bu vontadi es pasa ta izisti i es kriadu.’ (Apo. 4:11) Nu ten sertéza ma Jeová merese resebe glória i ónra. Pur isu, nu krê da-l kel midjór ki nu ten. Tanbê, Jeová flaba israelitas ma es debe partisipaba na três fésta ki ta fazeda tudu anu. Na kel ténpu, kes fésta ta fazeba párti di adorason pa Jeová. Lei ta flaba ma es ka debe ‘aprizentaba dianti di Jeová ku mô baziu.’ (Deut. 16:16) Oji tanbê, da Jeová kel ki nu ten di korason ta faze párti di nos adorason. Óras ki nu faze si, nu ta mostra ma nu ta da valor pa trabadju ki párti di organizason di Jeová na Téra sta ta faze.

6. Pamodi ki é bon ser un algen ki gosta di da? (Odja fotu na komésu di studu.)

⁶ Kes algen ki gosta di da, sénpri ta faze kuzas pa otus, envês di spéra sô pa es dadu. (Lé Provérbios 29:21.) Kes tipu di algen li, ta ten bon saúdi. Pensa na un mininu ki ta djunta dinheru ki se pai ku se mai ta da-l. Dipôs, el ta uza kel dinheru pa kunpra un prezenti pa se pai ku se mai. Modi ki bu ta atxa ma se pai ku se mai ta xinti? Di mésmu manera, óras ki nos é algen ki gosta di da, nu sta ta mostra ma nu ta da valor pa tudu ki Jeová ta faze pa nos. Tanbê, pensa na un pioneru ki inda ta mora ku se pai ku se mai. El ta disidi da se pai ku se mai un párti di dinheru ki el ta ganha, pa djuda na dispéza di kaza. Talvês, se pai ku se mai pode ka spéra pa el faze kel-la. Má es pode seta kel ajuda, pamodi é un manera di ses fidju mostra gratidon pa tudu kuza ki es faze pa el. Di mésmu manera, Jeová sabe ma kel ki nu ta faze pa otus é bon pa nos.

7, 8. Da izénplus ki ta mostra modi ki povu di Jeová ta fazeba kontribuisons pa (a) un trabadju ki staba ta mestedu i (b) apoia otus kuza ki tinha aver ku ses adorason pa Jeová.

⁷ Bíblia ta mostra ma povu di Deus sénpri ta uzaba kuza ki es tinha pa apoiaba adorason verdaderu. Na alguns situason, povu di Deus faze kontribuison pa djuda na un trabadju ki staba ta mestedu. Pur izénplu, Muizes pidi povu  pa da kontribuison pa faze tabernákulu. Tanbê, Rei Davidi faze mésmu kuza kantu ki es ta fazeba ténplu. (Êxo. 35:5; 1 Crón. 29:5-9) Na ténpu di Rei Jioás, saserdótis uza kontribuison ki povu da pa konpo ténplu. (2 Reis 12:4, 5) Na ténpu di apóstlus, kontise un grandi fómi i alguns irmon staba ta pasa nisisidadi. Nton, ‘di akordu ku posibilidadi di kada un, disiplus manda ajuda pa irmons ki ta moraba na Judea.’ — Atos 11:27-30.

⁸ Povu di Jeová tanbê ta fazeba kontribuisons pa apoiaba kes ki ta tomaba kónta di óbra. Pur izénplu, tudu kes otu tribu di Israel dadu txon na téra ki Deus prometeba es, má levitas ka dadu. Pur isu, kel lei ki Deus da Muizes ta flaba ma kes otu israelita debe daba levitas dízimu. Kel-la ta djudaba levitas fika konsentradu na ses trabadju na tabernákulu. (Núm. 18:21) Tanbê, kontise mésmu kuza na ténpu di Jizus ku se apóstlus. Es ta kontaba ku apoiu di alguns ‘mudjer ki ta uzaba kuzas di valor ki es tinha pa djudaba es.’ — Lucas 8:1-3.

9. Di undi ki ta binha kes kontribuison ki povu di Jeová ta daba?

⁹ Má, di undi ki ta binha kes kontribuison ki povu di Jeová ta daba? Ta dipendeba. Pur izénplu, kantu es staba ta faze tabernákulu, israelitas oferese kuzas ki es trazeba di Ijitu. (Êxo. 3:21, 22; 35:22-24) Na ténpu di apóstlus, alguns ta bendeba ses kaza ku ses txon i es ta daba apóstlus dinheru. Dipôs, apóstlus ta uzaba kes kontribuison pa djudaba di akordu ku nisisidadi di kada un. (Atos 4:34, 35) Otus irmon ta guardaba un párti di ses dinheru tudu simana, pa faze kontribuison. (1 Cor. 16:2) Asi, kes ki tinha txeu ku kes ki tinha poku, tudu ta apoiaba óbra di Jeová. — Lucas 21:1-4.

10, 11. (a) Povu di Jeová na ténpu antigu gostaba di da. Modi ki nu pode imita-s? (b) Kuzê ki bu ta atxa di priviléjiu ki bu ten di apoia óbra di Reinu?

¹⁰ Oji tanbê, nu ten xansi di faze kontribuisons pa djuda na trabadju ki sta ta mestedu. Pur izénplu, talvês nos kongregason disidi konpo Salon di Reinu ô faze un otu Salon novu. Ô pode ser ki prédiu di Betel di nos país sta meste konpo. Tanbê nu pode faze kontribuison pa apoia kongrésu ki nu sta sisti ô pa djuda irmons ki sta sufri pamodi dizastris na naturéza. Nos kontribuison tanbê ta djuda kubri dispézas di irmons na mundu interu ki ta sirbi na Betel, misionárius, pionerus spesial i enkaregadus di grupu di kongregason. Tanbê, bu kongregason pode disidi kantu dinheru ki es ta pode da tudu mês pa djuda faze Salons di Reinu i Salons di Asenbleia ki ta sirbi pa nos irmon na mundu interu.

¹¹ Nos tudu nu pode faze nos párti na djuda óbra ki Jeová sta ta faze na es ténpu di fin. Nu pode bai na kaxa di kontribuison na Salon di Reinu i faze nos kontribuison di manera ki ningen ka ta da kónta. Tanbê, nu pode faze nos kontribuison pa internet na site jw.org. Asi, ningen ka ta sabe kantu kontribuison ki nu da. Alguns irmon ta atxa ma ses kontribuison é poku dimás i ma ka ta faze falta. Má, si nu ba djobe, maioria di kontribuisons ki ta fazedu é poku, ki dipôs ta djuntadu i ta bira txeu. Sikrê ku falta di dinheru, nos irmons gosta di da, sima kes irmon di Masedónia na ténpu antigu. Kes irmon di Masedónia, éra ‘txeu póbri’ má simé es ta fazeba kontribuisons. — 2 Cor. 8:1-4.

12. Kuzê ki organizason oji ta faze pa uza kes kontribuison di midjór manera?

¹² Grupu Enkaregadu di Óbra ta faze  tudu sforsu pa uza kontribuisons di manera fiel i ku sabedoria. (Mat. 24:45) Antis di es toma un disizon, es ta ora i es ta faze planus sobri modi ki es ta uza kes dinheru ki dadu. (Lucas 14:28) Na ténpu ki Bíblia skrebedu, kes ki ta kuidaba di kontribuisons ta sigiba alguns régra. Asi, es ta tinha sertéza ma uzadu dinheru sô na óbra di Jeová. Pur izénplu, kantu Esdras bai Jiruzalen, el leba oru, prata i otus kuza di valor ki rei di Pérsia da. Si djuntadu tudu kes kontribuison ki fazedu, na dinheru di Kabu Verdi el ta da uns 10 bilhon di skudu. Esdras sabia ma kes kontribuison éra di Jeová. Pur isu, el da orientason klaru pa nada ka perde duránti kel viaji prigozu ki el faze di Pérsia ti Jiruzalen. (Esdras 8:24-34) Un otu izénplu é di apóstlu Polu, ki djunta kontribuisons pa djuda irmons na Judea ki staba ta pasa difikuldadis. Polu tanbê, sigi orientasons pa el tinha sertéza ma kes responsável ki ta kuidaba di kontribuisons, sta ta fazeba el ‘ku onestidadi ka sô dianti di Jeová, má tanbê dianti di ómis.’ (Lé 2 Coríntios 8:18-21.) Povu di Jeová oji, ta sigi izénplu di Esdras i di Polu. Nos organizason ten orientasons klaru sobri modi ki ta resebedu i modi ki ta uzadu kontribuisons ki nu ta faze.

13. Pamodi ki na últimus ténpu organizason fika ta faze alguns trabadju di manera más sinplis?

¹³ Alvês, un família ta disidi popa dinheru i muda ses manera di vive pa es ka gasta más txeu di ki kel ki es ta ganha. Ô tanbê es pode disidi leba un vida más sinplis pa faze más na trabadju di Jeová. Organizason di Jeová ta faze mésmu kuza. Na últimus ténpu, organizason disidi kumesa ta faze txeu kuza. Asi alguns bês, gastadu más txeu di ki kes kontribuison ki resebedu. Pur isu, organizason disidi na faze kuzas más sinplis di manera ki ta gastadu más poku. Ses obijetivu é uza di midjór manera kes kontribuison ki irmons ta da.

14-16. (a) Kuzê ki organizason sta ta faze ku kontribuisons ki el ta resebe? (b) Kuzê ki organizason dja faze ki djuda-u?

¹⁴ Alguns di kes ki dja ten txeu ténpu ta sirbi Jeová, fla ma nunka es ka odja tantu nobidadi na organizason di Jeová sima gósi. Pur izénplu, na últimus anu lansadu site jw.org i JW Broadcasting. Tanbê, Tradução do Novo Mundo da Bíblia Sagrada sta ta fazedu na txeu língua. Na anu di 2014/2015, fazedu un  kongrésu internasional ku téma: “Continue a Buscar Primeiro o Reino!” Alguns di kes kongrésu fazedu na kes stádiu grandi na 14 sidadi, na txeu párti di mundu. Kes ki sisti kongrésu fika rei di kontenti.

¹⁵ Txeu irmon skrebe pa agradise pa monti prezenti ki es resebe di organizason di Jeová. Odja kuzê ki un kazal ki ta sirbi na un país di Ázia skrebe: “Nu ta sirbi na un sidadi pikinoti i alvês nu ta xinti nos sô. Óras ki nu ta sirbi na un lugar lonji, é faxi nu skese ma nu ta faze párti di un organizason grandi. Má, sénpri ki nu ta odja prugramas di JW Broadcasting, nu ta lenbra ma nu ta faze párti di un família grandi na mundu interu. Irmons di li gosta txeu di Broadcasting. Sénpri ki es odja Broadcasting ki ta fazedu tudu mês, es ta kustuma fla ma es xinti más pértu di Grupu Enkaregadu di Óbra. Nunka es ka xinti tantu orgulhu di faze párti di organizason di Jeová sima gósi.”

¹⁶ Oji sta ta fazedu i sta ta konpodu uns 2.500 Salon di Reinu na mundu interu. Dipôs ki alguns irmon di Onduras kumesa ta uza ses novu Salon di Reinu, es skrebe: “Nu sta txeu kontenti di faze párti di família di Jeová i ten irmons na mundu interu. Ku ajuda di Jeová i di irmons, nos sonhu di ten un Salon di Reinu na nos zóna dja realiza.” Alvês nu ta kustuma obi irmons ta fla mésmu kuza óras ki es resebe Bíblia ô otus publikason na ses língua. Tanbê, óras ki es ta resebe ajuda dipôs ki kontise un dizastri na naturéza i óras ki es ta ten bon rezultadu na tistimunhu pa públiku, na kes sidadi grandi ô na lugar ki es ta mora.

17. Modi ki nu sabe ma Jeová sta ta apoia se organizason oji?

¹⁷ Txeu bês, pesoas ka ta ntende modi ki nu ta konsigi faze nos óbra sô ku kontribuisons. Dipôs ki un diretor di un enpréza grandi vizita un di kes lugar ki ta inprimidu nos publikasons, el fika dimiradu di odja ma tudu trabadju ki ta fazedu la é di grasa i nu ka ta faze atividadis pa pidi dinheru. El ka ntende modi ki nu ta pode faze kel-li. Má nu sabe ma kel-li sô é posível pamodi Jeová sta ta apoia se organizason oji. — Jó 42:2.

18. (a) Modi ki Jeová ta abênsua kes algen ki ta apoia óbra di Reinu? (b) Modi ki nu pode inxina nos fidju i nos studanti di Bíblia ser un algen ki gosta di da?

¹⁸ Jeová ta da-nu un priviléjiu grandi ki é apoia óbra di Reinu ki sta fazedu oji. El ta promete ma kes ki ta faze kel-li ta resebe txeu benson. (Mal. 3:10) Jeová tanbê promete ma ken ki gosta di da ta rekonpensadu. (Lé Provérbios 11:24, 25.) Kes algen ki gosta di da, es é más filís ‘pamodi é más sábi da di ki toma.’ (Atus 20:35; BPK) Tanbê nu pode inxina nos fidju i studantis di Bíblia ser algen ki gosta di da. Modi ki nu pode faze kel-li? Pa kuzas ki nu ta fla i pa kuzas ki nu ta faze. Óras ki es sigi nos izénplu, es ta resebe txeu benson.

19. Modi ki kel studu li nkoraja-u?

¹⁹ Tudu kel ki nu ten é Jeová ki da-nu. Óras ki nu ta da Jeová kel ki nu ten, nu ta mostra ma nu ta ama-l i ma nu ta da valor pa tudu kel ki el ta faze pa nos. (1 Crón. 29:17) Modi ki israelitas xinti kantu ki es da kontribuison pa faze ténplu? Bíblia ta fla: ‘Povu fika kontenti di faze ofértas di livri vontadi, pamodi es ta fazeba kes oférta di livri vontadi pa Jeová di tudu ses korason.’ (1 Crón. 29:9) Nos tanbê, nu ta fika txeu kontenti di da Jeová un párti di tudu kel ki el ta da-nu.