1, 2. Na 2018, ki runion ta ben djuda milhons di algen sta unidu i pamodi ki es runion é spesial? (Odja fotu na komésu di studu.)

NA DIA 31 di marsu di 2018, povu di Jeová i txeu di otus algen ki gosta di studa Bíblia, ta ba sta djuntu na Komemorason di mórti di Jizus Kristu. Ka ten ninhun otu kuza ki ta uni algen sima kel-li. Pamodi? Pamodi na kel dia timenti sól ta kanba, milhons di algen na Téra interu ta lenbra di sakrifisiu ki Jizus faze pa nos.

² Nu ten sertéza ma Jeová i Jizus ta fika kontenti na dia di Komemorason. La di Séu, es ta odja Téra ta da vólta i duránti 24 óra milhons di algen ta sisti es runion spesial. Na livru di Apocalipse, Bíblia ta pâpia di ‘un monti di algen ki ninhun ómi ka ta pode kontaba, di tudu nasons, tribus, povus i línguas.’ Kes algen li staba ta fla ku vós altu: ‘Nu salva pamodi nos Deus ki sta xintadu na tronu i pamodi Korderu.’ (Apo. 7:9, 10) Tudu anu é rei di sábi odja Jeová ku Jizus ta resebe ónra na dia di Komemorason.

3. Ki perguntas nu sta ben responde na kel studu li?

 ³ Na kel studu li, nu sta ben responde kes pergunta li: (1) Modi ki nu pode pripara pa Komemorason di manera ki nu ta tra pruvetu di el? (2) Di ki maneras Komemorason ta djuda povu di Jeová fika unidu? (3) Kuzê ki nos nu pode faze pa nu djuda povu di Jeová fika unidu? (4) Ki ténpu ki ta fazedu últimu Komemorason?

4. Pamodi ki é inportanti sisti Komemorason?

⁴ Pamodi ki é inportanti sisti Komemorason? Runions ta faze párti di nos adorason pa Jeová, i Komemorason é kel runion más inportanti di anu. Pur isu, Jeová i Jizus ta presta atenson na kenha ki ta faze sforsu pa ba sisti Komemorason. Nu krê pa es odja ma nu ta faze di tudu pa sisti es runion inportanti. Pa nu ka sisti es runion, sô si nu tene un prubléma gravi ô otu situason difísil ki ka ta dexa-nu bai. Óras ki nu ta mostra pa kuzas ki nu ta faze ma nos runion é inportanti, nu ta da más motivu pa Jeová mante nos nómi na se ‘livru di rekordason’. Na kel livru, ki tanbê ta txomadu ‘livru di vida’, sta skrebedu nómi di kes algen ki ta ba ganha vida pa tudu ténpu. — Mal. 3:16; Apo. 20:15.

5. Modi ki nu pode ‘djobe si nu sta na fé’ na kes dia antis di Komemorason?

⁵ Nu pode pripara pa Komemorason óras ki nu ta ‘djobe si nu sta na fé’. (Lé 2 Coríntios 13:5.) Modi ki nu pode faze kel-li? Nu meste tra ténpu pa nu pensa modi ki nos amizadi ku Jeová sta i ora sobri kel-li. Pur izénplu, nu pode pergunta: ‘N ta kridita ma é sô organizason di Jeová ki sta ta faze se vontadi? N sta ta faze tudu kel ki N pode pa N prega notísias sábi? Kuzas ki N ta faze, ta mostra ma N ta kridita ma nu sta vive na ténpu di fin i ma ka ta dura govérnu di Satanás ta ben kaba? N sta ta kúnfia na Jeová i na Jizus sima N ta kunfiaba kantu ki N batiza?’ (Mat. 24:14; 2 Tim. 3:1; Heb. 3:14) Nu ta odja si nos fé sta fórti, óras ki nu pensa na kes pergunta li.

6. (a) Kuzê ki nu meste faze pa nu ten vida pa tudu ténpu? (b) Kuzê ki un ansion ta faze pa el pripara pa Komemorason i modi ki nu pode pripara sima el?

⁶ Otu manera di pripara pa Komemorason é óras ki nu ta lé i pensa na asuntus ki ta pâpia sobri valor di es runion spesial. (Lé João 3:16; 17:3.) Pa nu ganha vida pa tudu ténpu, nu meste ‘konxe’ Jeová i ‘mostra fé’ na Jizus. Odja modi ki un irmon ki dja ten txeu ténpu ta sirbi kómu ansion ta pripara pa Komemorason. Dja ten txeu ténpu ki el ta djunta artigus di Sentinéla ki ta pâpia sobri Komemorason i amor ki Jeová ku Jizus ten pa nos. Alguns simana antis di Komemorason, el ta torna lé kes artigu i el ta pensa na valor di kel runion. El ta pruveta pa poi un ô más artigu novu djuntu ku kes ki el ta guarda. Tanbê, kel ansion li ta faze leitura di Bíblia ki ta fazedu na ténpu di Komemorason. El fla ma faze si, ta djuda-l prende un kuza diferenti tudu anu. Tanbê el fla, ma el ta xinti más amor pa Jeová i pa Jizus. Kuzê ki bu ta atxa di faze mésmu kuza? Piskiza alguns artigu ki pode djuda-u bira más amigu di Jeová i di Jizus. Dipôs tra ténpu pa lé i pensa na kes artigu. Asi, bu ta pripara dretu pa Komemorason.

7. (a) Kuzê ki Jizus pidi na orason na kel noti ki el inxina se disiplus faze Komemorason di se mórti? (b) Kuzê ki ta mostra ma Jeová responde orason di Jizus?

⁷ Na kel mésmu noti ki Jizus inxina se disiplus modi ki es ta fazeba Komemorason di se mórti, el faze un orason spesial. El pidi pa se sigidoris fika unidu sima el ku se Pai é unidu. (Lé João 17:20, 21.) Jeová responde kel orason i Komemorason é un próva di kel-la. Na dia di Komemorason, na Téra interu pesoas di txeu país ta djunta pa adora Jeová. Na alguns lugar é difísil odja pesoas di rasa diferenti ta sisti un runion djuntu. Na otus lugar pesoas ka gosta di odja dôs rasa djuntu. Má pa Jeová i Jizus, nos union é un kuza bunitu dimás!

8. Ki mensaji di speransa Jeová da Ezekiel?

⁸ Union ki ten na povu di Jeová é ka stranhu. Jeová dja flaba ma kel-li ta ben kontiseba. Nu ben odja kuzê ki Jeová fla Ezekiel sobri dôs pó, pó ‘di Judá’ i pó ‘di Juzé.’ (Lé Ezequiel 37:15-17.) Kel profesia li splikadu na Sentinéla di julhu di 2016: ‘Jeová da Ezekiel un mensaji di speransa. El promete ma nason di Israel ta ben fikaba sô un nason dipôs ki es voltaba pa téra ki Deus prometeba es. Kel profesia tanbê ta mostraba ma povu di Jeová ta ben fikaba unidu na ténpu di fin.’

9. Modi ki tudu anu nu ta odja profesia di Ezekiel ta kunpri?

⁹ Kel pó ‘di Judá’ ta reprizenta kes kriston skodjedu ku spritu santu. Kel pó ‘di Juzé’ ta reprizenta kes otu ovelha, ki é kes algen ki ten speransa di vive na Téra. Jeová fla ma el ta ben djuntaba kes dôs pó i es ta biraba un. (Eze. 37:19) Désdi 1919, Jeová sta ta djunta i organiza kes skodjedu ku spritu santu. Dipôs, kumesa ta parse un nunbru kada bês más txeu di kes otu ovelha. Kes dôs grupu djuntu ta bira ‘sô un ribanhu.’ (João 10:16; Zac. 8:23) Es ta sirbi Rei Jizus Kristu, ki na kel profesia Jeová txoma-l di ‘nha sérvu Davidi’. (Eze. 37:24, 25) Tudu anu, duránti Komemorason nu ta odja ma profesia di Ezekiel sta ta kunpri. Na kel runion spesial kes skodjedu ku spritu santu i kes ‘otu ovelha’ ta djunta pa agradise Jeová pa sakrifisiu di Jizus! Má, kuzê ki kada un di nos pode faze pa djuda povu di Jeová kontinua unidu?

10. Kuzê ki nu pode faze pa povu di Jeová kontinua unidu?

¹⁰ Un manera di djuda povu di Jeová kontinua unidu é óras ki nos é umildi. Kantu Jizus staba na Téra el fla ma se sigidoris debe ser umildi. (Mat. 23:12) Na mundu di oji, txeu algen ta atxa ma es é inportanti. Má, si nos é umildi di korason nu ka ta atxa ma nos é midjór di ki otus. Nu ta sforsa pa nu obi di korason ku kes irmon ki ta toma kónta di kongregason. Óras ki nu faze si, nu sta ta djuda kongregason kontinua unidu i más inportanti inda, Jeová ta fika kontenti. Bíblia ta fla: ‘Deus é kóntra orgulhozus, má el ta mostra bondadi ki nu ka merese pa umildis.’ — 1 Ped. 5:5.

11. Pamodi ki pensa na kuzê ki ta reprizenta kel pon i kel vinhu ta djuda-nu kontinua unidu?

¹¹ Otu manera di djuda povu di  Jeová kontinua unidu é óras ki nu ta pensa na kuzê ki ta reprizenta kel pon ku kel vinhu ki ta uzadu na Komemorason. Alguns dia antis di Komemorason i prinsipalmenti na kel noti, tra ténpu pa bu pensa dretu na kuzê ki kel pon sen fermentu i kel vinhu tintu ta reprizenta. (1 Cor. 11:23-25) Kel pon ta reprizenta korpu di Jizus sen pekadu i kel vinhu ta reprizenta se sangi ki el da pa nos. Má sô sabe kel-li ka ta txiga. Nu meste ntende kuzê ki sakrifisiu di Jizus ta prova. Kel sakrifisiu é midjór próva di amor di Jeová pa nos, pamodi el da-nu se Fidju. Tanbê é midjór próva di amor di Jizus, ki da se vida pa nos di se livri vontadi. Óras ki nu ta pensa na amor di Jeová i di Jizus, nos amor pa es ta fika más fórti. Kel amor é sima un kóla fórti ki ta poi povu di Jeová fika unidu na mundu interu.

12. Kuzê ki Jizus dexa klaru ma Jeová ta spéra di nos?

¹² Tanbê nu ta djuda povu di Jeová fika unidu óras ki nu ta púrdua nos irmon. Óras ki nu ta faze si, nu sta mostra ma nu sta kontenti ku perdon di Jeová. I nu sabe ma Jeová ta purdua-nu pamodi sakrifisiu ki Jizus faze pa nos. Lé stória ki Jizus konta na Mateus 18:23-34 i dipôs pergunta bu kabésa: ‘N ta sforsa pa N faze sima Jizus inxina? N ten paxénxa ku nhas irmon i N ta tenta ntende ses sentimentu? N sta prontu pa N púrdua kes ki magua-m?’ Dja ki nos é inperfetu, alvês ta fika difísil nu púrdua alguns ofénsa ô pekadu gravi. Má simé, nu meste lenbra kuzê ki Jeová ta spéra di nos. (Lé Mateus 18:35.) Jizus dexa klaru ma nu debe púrdua nos irmon óras ki ten motivu pa nu faze-l. Nunka nu ka debe skese di kel-li. Si nu ka púrdua nos irmon, Jeová ka ta purdua-nu. Pa nu kontinua unidu, é inportanti faze kel ki Jizus fla: púrdua nos irmon.

13. Kuzê ki ta djuda-nu púrdua kunpanheru?

¹³ Kuzê ki ta djuda-nu púrdua  kunpanheru? Óras ki nu ta púrdua, nu sta mostra ma nos é algen ki ta npenha pa pas. Apóstlu Polu fla ma nu debe ‘sforsa pa nu mante unidu ku spritu ki ta da pas.’ (Efé. 4:3) Pur isu, na ténpu di Komemorason i prinsipalmenti na kel noti, pensa na manera ki bu ta trata algen. Pergunta bu kabésa: ‘Tudu algen sabe ma mi é un algen ki ka ta guarda mágua? Pesoas ta odja ma mi é un tipu di algen ki ta sforsa pa pas i pa mante kongregason unidu?’ Ténpu di Komemorason ta da-nu xansi pa nu odja si nu sabe púrdua nos irmon.

14. Modi ki nu pode imita Jeová?

¹⁴ Otu kuza ki ta djuda povu di Jeová kontinua unidu é óras ki nu ta imita Jeová i mostra amor. (1 João 4:8) Alguns ta kustuma fla: ‘Ten irmons ki N gosta di es, má ten otus ki N ten ki aguenta-s.’ Má nu debe pensa si? Na Efésios 4:2 apóstlu Polu fla ma nu debe ‘aguenta kunpanheru ku amor’. Má aguenta irmons é diferenti di aguenta-s ku amor. Na kongregason nu ta atxa algen di tudu tipu. É Jeová ki traze tudu kes algen pa kongregason. (João 6:44) Si Jeová disidi traze kes algen, é pamodi es merese se amor. Si es merese amor di Jeová, kenha ki é nos pa fla ma un irmon ka merese nos amor? Nu krê kontinua ta obi ku órdi di Jeová di ama tudu irmons! — 1 João 4:20, 21.

15. Ki ténpu ki ta ben fazedu últimu Komemorason?

¹⁵ Ta txiga kel dia ki Komemorason ta fazedu pa últimu bês. Modi ki nu sabe kel-li? Na 1 Coríntios 11:26, Polu fla kes kriston skodjedu ku spritu santu ma tudu anu óras ki es faze Komemorason, es sta ta ‘aviza mórti di Sinhor, ti ki el ben’. Kel palavra ‘ben’ krê fla óras ki Jizus Kristu ben na ténpu di fin. Na kel profesia sobri grandi tribulason, Jizus fla: ‘Ta ben parse na Séu kel sinal di Fidju di Ómi i tudu tribus di Téra ta da ku mô na petu, ku tristéza i es ta odja Fidju di Ómi ta ben na núvens di séu, ku puder i ku txeu glória. I el ta ben manda se anjus ku un barudju fórti di tronbéta i es ta ben djunta kes ki el skodje désdi kes kuatu béntu, di un ladu di séu ti kel otu ladu.’ (Mat. 24:29-31) Ki ténpu ki anjus ta ben djunta kes skodjedu ku spritu santu ki inda sta na Téra? Kel-li ta ben kontise óras ki es resebe ses rekonpénsa di bai governa na Séu, dipôs ki grandi tribulason kumesa, má antis di Armajedon. Dipôs Jizus djuntu ku kes 144 mil ta ben distrui govérnus di ómi. (Apo. 17:12-14) Kel Komemorason ki ta fazedu antis di Jizus ben pa djunta kes skodjedu ku spritu santu, ta ben ser últimu Komemorason.

16. Pamodi ki bu sta disididu na sisti Komemorason es anu?

¹⁶ Nu faze tudu sforsu pa nu sisti Komemorason na dia 31 di marsu di 2018. Tanbê nu ta pidi Jeová pa djuda-nu pa nu kontinua ta djuda se povu sta unidu. (Lé Salmo 133:1.) Ka bu skese ma ta txiga kel dia ki Komemorason ta ben fazedu pa últimu bês. Timenti kel dia ka txiga, nu debe faze tudu sforsu pa sisti Komemorason i goza di kel union di povu di Jeová.