SIN, es ta uzaba el na alguns situason. Odja un izénplu. Deuteronómio 24:14, 15 ta fla: ‘Ka bu splora kel trabadjador kontratadu ki sta ta pasa nisisidadi i ki é póbri, ka ta nporta si el é un di bus irmon ô un stranjeru ki ta mora na bu téra. . . Sinon el pode txoma Jeová kóntra bo i bu ta fika ku kulpa di pekadu.’

Na un padás di arjila ki atxadu pértu di Asdodi, sta skrebedu un prubléma ki kontise sima kel ki nu lé na Deuteronómio 24:14, 15. Kel padás di arjila skrebedu uns 600 anu antis di Kristu. El ta konta di un ómi ki ta trabadjaba na kanpu i ki faze un reklamason. Ta parse ma el ka konsigi ntrega kel párti di kodjéta ki staba konbinadu. Pur isu, se patron toma-l se ropa. Na kel arjila sta skrebedu: “Dja ten uns dia ki dipôs ki N finda di djunta kodjéta, ki Hoshayahu ki é fidju di Shobay, panha ropa di npregadu di nho [kel ómi ki faze reklamason] . . . Tudu nhas koléga ki nu trabadja djuntu déntu sól, é tistimunha. . . . ma kel ki N fla é verdadi. N ka faze nada mariadu. . . . Si governador atxa ma nhu ka ten obrigason di manda-l ntrega ropa pa se npregadu, N ta pidi nho pa faze kel-li pamodi péna di mi. Nho manda-l pa el da-m nha ropa! Nho ka pode fika kaladu timenti npregadu di nho sta sen se ropa.”

Un storiador ki txoma Simon Schama fla ma kel stória li, ka ta mostra sô frónta di un ómi ki krê pa es da-l se ropa. El skrebe: “Ta da pa odja ma kel algen ki faze kel reklamason ta konxeba lei ki staba na Bíblia, prinsipalmenti kuzê ki Levítico i Deuteronómio ta flaba sobri maltrata algen póbri.”