1-2. (a) Modi ki testu di Isaías 41:10 , djuda un irman ki txoma Yoshiko? (b) Pamodi ki Jeová dexa pa kel mensaji fika skrebedu ti gósi?

UN IRMAN fiel ki txoma Yoshiko resebe un mau notísia. Se dotora fla-l ma el tinha sô alguns mês di vida. Modi ki el reaji? Yoshiko lenbra di un testu di Bíblia ki el gosta más txeu, Isaías 41:10. (Lé.) Ku kalma, el fla se dotora ma el ka staba ku medu, pamodi Jeová sta pega-l na se mô. * Kel testu djuda nos irman poi tudu kunfiansa na Jeová. Tanbê kel mésmu testu pode djuda-nu fika kalmu óras ki nu sta pasa pa un prubléma difísil. Modi ki kel-li pode kontise? Primeru, nu ben odja pamodi ki Deus manda Izaías pa el skrebe kel mensaji li.

² Jeová manda Izaías skrebe kes palavra li pa konsolaba judeus ki más tardi ta baba prézu na Babilónia. Má, Jeová dexa kel mensaji li fika skrebedu ti gósi pa konsola tudu se povu. (Isa. 40:8; Rom. 15:4) Oji nu sta vive ‘na un ténpu konplikadu, difísil di aguenta.’ Pur isu nu meste kel konsolu li mutu más txeu inda. — 2 Tim. 3:1.

3. (a) Ki promésas sta na Isaías 41:10 , ki é testu pa anu di 2019? (b) Pamodi ki nu meste di kes promésa?

³ Na kel studu li, nu sta ben konsentra na três promésa di Jeová ki sta na Isaías 41:10 : (1) Jeová ta sta ku nos, (2) el é nos Deus i (3) el ta djuda-nu. Kes  promésa li ta djuda-nu ten un fé más fórti. Nu meste di kes promésa * pamodi sima Yoshiko nu ten ki lida ku prublémas na vida. Tanbê nu ten ki aguenta kuzas mariadu ki ta kontise na mundu. I alguns di nos sta aguenta pirsigison di govérnus. Pur isu, nu sta ben pâpia di kada un di kes promésa.

4. (a) Kal ki é kel primeru promésa ki Izaías skrebe? (Tanbê djobe nóta di rodapé.) (b) Kuzê ki Jeová fla ki ta mostra ma el ta ama-nu? (c) Modi ki palavras di Jeová ta pô-u ta xinti?

⁴ Primeru, Jeová ta konsola-nu ku kes palavra li: ‘Ka bu xinti medu, pamodi N sta ku bo.’ * Jeová ta mostra ma el sta ku nos óras ki el ta da-nu tudu se atenson i amor. Repara ma el ta ama-nu txeu, kantu el fla: ‘Pamodi bu pasa ta ten txeu valor pa nhas odju, bu dadu ónra i N ta ama-u.’ (Isa. 43:4) Ka ten nada na Séu ku Téra ki ta poi Jeová dexa di ama kes ki ta sirbi-l. Nunka el ka ta dexa di ser lial. (Isa. 54:10) Se amor i se amizadi ta da-nu txeu koraji. El ta proteje-nu oji sima el protejeba se amigu Abron (Abraon). Jeová fla-l: ‘Ka bu xinti medu, Abron. Ami é un skudu pa bo.’ — Gén. 15:1.

5-6. (a) Modi ki nu sabe ma Jeová krê djuda-nu óras ki nu sta pasa pa prublémas? (b) Kuzê ki nu ta prende ku izénplu di Yoshiko ?

⁵ Jeová krê djuda-nu óras ki nu ta pasa pa prublémas. Nu sabe kel-la, pamodi el promete se povu: ‘Óras ki bu pasa na agus, N ta sta ku bo, i óras ki bu pasa na rius, es ka ta kubriu. Óras ki bu anda na lumi, bu ka ta fika txumuskadu, nen lumi ka ta kema-u.’ (Isa. 43:2) Kuzê ki kes palavra siginifika?

⁶ Jeová ka promete kaba ku nos prublémas. Má, el promete ma el ka ta dexa-nu foga na prublémas ki pode ser sima ‘rius’ i nen el ka ta dexa provasons ki pode ser sima ‘lumi’ pô-nu ta sufri pa tudu ténpu. Jeová promete  ma el ta sta ku nos pa el djuda-nu lida ku kes prubléma. Modi ki el ta faze kel-la? El ta djuda-nu fika kalmu. Asi nu ta kontinua lial pa el sikrê nu sta kóre risku di móre. (Isa. 41:13) Yoshiko, ki dja nu papiaba di el antis, xinti ma kel-li é verdadi. Se fidju-fémia, fla: “Nu fika dimiradu di odja modi ki nos mai staba kalmu. Nu odja ma Jeová da-l pas déntu di el. Nha mai pâpia di Jeová i di se promésa ku kes infermeru i kes algen ki staba duenti, ti dia ki el móre.” Kuzê ki nu ta prende ku izénplu di Yoshiko? Nu ten ki kúnfia na promésa di Deus: ‘N ta sta ku bo.’ Kel-li ta djuda-nu ten koraji i forsa pa nu lida ku prublémas.

7-8. (a) Kal ki é kel sugundu promésa ki Izaías skrebe i kuzê ki el siginifika? (b) Pamodi ki Jeová fla kes judeu ki staba prézu pa es ‘ka fika preokupadu dimás’? (c) Modi ki palavras na Isaías 46:3, 4 djuda povu di Deus ka fika ku medu?

⁷ Repara kel sugundu promésa ki Izaías skrebe: ‘Ka bu fika preokupadu dimás, pamodi mi é bu Deus.’ Kuzê ki kel-li siginifika? Na kel língua orijinal ki skrebedu kel versíklu li, palavra ki traduzidu pa ‘fika preokupadu dimás’, ta da ideia di un algen ki sta sénpri ta djobe pa tras pamodi el sta ku medu di algun kuza. Ô ku medu pa algen ka prujudika-l.

⁸ Pamodi ki Jeová fla kes judeu ki sta baba prézu na Babilónia, pa es ka ‘fikaba preokupadu dimás’? Pamodi el sabia ma kenha ki ta moraba la ta ben xintiba medu. Pamodi ki es ta ben xintiba medu? Na fin di kes 70 anu ki judeus ta fikaba prézu na Babilónia, Jeová ta ben uzaba trópas di Média ku Pérsia pa atakaba Babilónia i pa libertaba se povu. (Isa. 41:2-4) Kantu kes algen di Babilónia i di kes otu nason odjaba ses inimigu ta txiga, es ta tentaba nkoraja kunpanheru. Es ta fla: ‘Ser fórti.’ Tanbê es ta fazeba más deus falsu, ku speransa ma es ta protejeba es. (Isa. 41:5-7) Má, Jeová kalma korason di kes judeu ki staba prézu. Pa mostra diferénsa entri Israel ku kes otu nason, Jeová fla: ‘Abo, ó Israel, é nha sérvu. Ka bu fika preokupadu dimás, pamodi mi é bu Deus.’ (Isa. 41:8-10) Repara ma Jeová fla: ‘Mi é bu Deus.’ Jeová promete kes judeu fiel ma el ka skese di es, inda el éra ses Deus i inda es éra se povu. El fla-s: ‘N ta ben karega nhos, i N ta salva nhos.’ Di sertéza, kes palavra li konsola kes judeu ki staba prézu i da-s koraji. — Lé Isaías 46:3, 4.

9-10. Pamodi ki nu ka meste fika ku medu? Da un izénplu.

⁹ Oji pesoas na nos vólta sta mutu más preokupadu ku prublémas di mundu di ki un bês. É klaru ki nos tanbê nu ta fika prujudikadu pamodi kes prubléma. Má nu ka meste fika ku medu. Jeová ta fla-nu: ‘Mi é bu Deus.’ Pamodi ki sabe kel-li ta djuda-nu fika kalmu?

¹⁰ Pensa na kel izénplu li: Juzé ku Filipi sta déntu di avion. Má, béntu fórti sta ta sakudi avion. Timenti kel-li sta kontise, es obi un vós na altifanti: “Ka nhos tra sintu di suguransa. Nu ta ten turbulénsia pa algun ténpu.” Juzé kumesa ta xinti txeu medu. Kel vós na  altifalanti torna fla: “É pilotu ki sta pâpia. Tudu kuza sta kontroladu. Ka nhos preokupa.” Má simé Juzé kontinua preokupadu. Kantu el djobe pa ladu, el odja Filipi trankilu di se vida i el pergunta-l: “Pamodi ki bu sta kalmu dimás?” Filipi ri i el fla-l: “É pamodi N konxe kel pilotu li dretu. El é nha pai!” Dipôs Filipi fla: “Dexa-m konta-u sobri nha pai. N ten sertéza ma óras ki bu fika ta sabe kuzê ki dja el faze, bu ta fika más kalmu tanbê.”

11. Kuzê ki nu ta prende ku izénplu di kes dôs pasajeru?

¹¹ Kuzê ki nu ta prende ku kel izénplu li? Sima Filipi, nu ta fika kalmu pamodi nu konxe nos Pai Jeová, rei di dretu. Nu sabe ma óras ki nos prublémas é sima un tenporal, Jeová ta djuda-nu aguenta kes prubléma. (Isa. 35:4) Si nu kúnfia na Jeová, nu ta fika kalmu, timenti kes otu algen na mundu sta xeiu di medu. (Isa. 30:15) Tanbê nu ta imita Filipi óras ki nu ta djuda otus algen ntende pamodi ki nu ta kúnfia na Deus. Asi tanbê, es ta ten sertéza ma Jeová ta djuda-s ka ta nporta ki prubléma es sta ta pasa.

12. (a) Kal ki é kel tirseru promésa ki Izaías skrebe? (b) Kes palavra ‘governa ku se brasu’ ta lenbra-nu di kuzê?

¹² Repara kel tirseru promésa ki Izaías skrebe: ‘N ta da-u forsa, N ta djuda-u.’ Izaías dja skrebeba na kel otu kapítlu ma Jeová ta daba se povu forsa. El fla: ‘Jeová, ta ben ku puder, i el ta governa ku se brasu.’ (Isa. 40:10) Txeu bês na Bíblia, palavra ‘brasu’ siginifika forsa ô puder. Pur isu,  kes palavra ‘governa ku se brasu’ ta lenbra-nu ma Jeová é un Rei poderozu. Na txeu situason, el uza se grandi puder pa djuda i difende se sérvus. Jeová inda oji ta faze kel-la pa kes algen ki ta kúnfia na el. — Deut. 1:30, 31; Isa. 43:10, nóta di rodapé.

13. (a) Na ki situason Jeová sénpri ta kunpri se promésa di da-nu forsa? (b) Ki promésa di Deus ta da-nu más forsa i kunfiansa?

¹³ Jeová sénpri ta kunpri se promésa di ‘da-nu forsa’ óras ki nu ta lida ku pirsigison. Na alguns país, nos inimigus sta ta faze di tudu pa es kaba ku nos trabadju di pregason ô ku nos organizason. Má nu ka ta fika preokupadu dimás ku kel-li. Jeová da-nu un otu promésa ki ta da-nu forsa i kunfiansa. El fla: ‘Ka ten ninhun arma ki fazedu kóntra bo ki ta ten bon rezultadu’. (Isa. 54:17) Kel promésa li ta lenbra-nu di três kuza inportanti.

14. Pamodi ki nu ka ta fika spantadu óras ki nu ta pirsigidu?

¹⁴ Primeru, nos é sigidoris di Kristu, pur isu nu sabe ma es ta odia-nu. (Mat. 10:22) Jizus dja flaba se disiplus ma es ta sérba pirsigidu na es ténpu di fin. (Mat. 24:9; João 15:20 ) Sugundu, profesia di Izaías dja flaba ma nos inimigus ta odiaba nos, i tanbê es ta fazeba arma kóntra nos. Es pode konta mintira, poi un mintira ta parse ma é verdadi ô pirsigi-nu ku violénsia. (Mat. 5:11) Jeová ka ta ba inpidi nos inimigus di uza kes arma li kóntra nos. (Efé. 6:12; Apo. 12:17) Má nu ka meste xinti medu. Pamodi?

15-16. (a) Kal ki é kel tirseru promésa ki nu meste lenbra, i modi ki Isaías 25:4, 5 ta da-nu kel sertéza la? (b) Modi ki Isaías 41:11, 12 ta mostra kuzê ki ta kontise ku kes algen ki ta luta kóntra nos?

¹⁵ Pensa na kel tirseru promésa ki nu meste lenbra. Jeová fla ma ‘ka ten ninhun arma’ ki es ta uza kónta nos ‘ki  ta ten bon rezultadu.’ Sima un paredi ta proteje-nu di un tenporal fórti, Jeová tanbê ta proteje-nu di ‘folgu di algen mau’. (Lé Isaías 25:4, 5.) Ka ten nada ki nos inimgus ta faze ki ta prujudika-nu pa tudu ténpu. — Isa. 65:17.

¹⁶ Pa nu ten más kunfiansa na Jeová, el ta fla-nu kuzê ki ta ben kontise ku tudu kes ki ‘fika ku raiba’ di nos. (Lé Isaías 41:11, 12.) Ka ta nporta kuzê ki nos inimigus pode faze pa prujudika-nu, nu pode ten kel sertéza li: ‘Es ta kaba na nada i es ta dexa di izisti.’

17-18. (a) Modi ki lé Bíblia ta djuda-nu ten más kunfiansa na Jeová? Da un izénplu. (b) Modi ki pensa na testu pa anu 2019 pode djuda-nu?

¹⁷ Pa nu pode ten más kunfiansa na Jeová, nu meste konxe-l más dretu. I úniku manera di nu faze kel-li é óras ki nu ta lé Bíblia i pensa na el. Na Bíblia nu ta atxa stórias di verdadi ki ta mostra modi ki Jeová proteje se povu na ténpu antigu. Lé kes stória ta da-nu más kunfiansa ma Jeová ta kuida di nos tanbê.

¹⁸ Pensa na kel izénplu bunitu ki Izaías uza pa mostra modi ki Jeová ta proteje-nu. El fla ma Jeová é sima un pastor i se sérvus é sima ovelhas. Izaías fla sobri Jeová: ‘Ku se brasu el ta djunta se ovelhas i el ta karega-s na brasu.’ (Isa. 40:11) Óras ki nu ta lé ma Jeová ta brasa-nu, nu ta xinti se proteson i nu ta fika kalmu. Pa djuda-nu fika kalmu sikrê ku prublémas, skravu fiel i prudenti skodje Isaías 41:10 pa ser testu di anu pa 2019: ‘Ka bu fika preokupadu dimás, pamodi mi é bu Deus.’ Pensa na kel promésa li. El ta djuda-u ten más forsa pa lida ku prublémas ki sta pa ben.