1-2. (a) Pamodi ki nu pode speraba ma Jizus ta inxinaba un manera sinplis di komemora se mórti? (b) Ki kualidadis di Jizus nu sta ben odja?

BU TA konsigi fla kuzê ki ta kontise tudu anu na Komemorason di mórti di Kristu? É klaru ki kuazi tudu nos nu ta lenbra di kes kuza ki ta fazedu na kel runion. Pamodi? Pamodi kel runion é sinplis. Má, el é un momentu rei di inportanti. Pur isu, talvês bu ta pergunta: ‘Pamodi ki el é un runion sinplis dimás?’

² Kantu Jizus staba na Téra, el ta inxinaba verdadis inportanti di un manera sinplis, klaru i faxi di ntende. (Mat. 7:28, 29) Di mésmu manera, el inxina-nu komemora * se mórti di un manera sinplis, má ki omésmu ténpu ta lenbra-nu pamodi ki el é inportanti. Nu sta ben odja midjór modi ki fazedu kel primeru Komemorason i alguns kuza ki Jizus fla i faze. Kel-li ta djuda-nu ntende modi ki Jizus mostra umildadi, koraji i amor. Tanbê nu ta ben prende modi ki nu pode imita-l más midjór.

3. Modi ki Mateus 26:26-28 , ta mostra ma kel komemorason ki Jizus inxina éra sinplis i kuzê ki ta reprizenta pon sen fermentu i vinhu?

³ Jizus inxina Komemorason di se mórti kantu el staba djuntu ku se 11 apóstlu fiel. El uza kes kuza ki resta di Páskua pa el faze kel Komemorason sinplis: pon sen  fermentu i vinhu. (Lé Mateus 26:26-28.) Jizus flaba se apóstlus ma pon sen fermentu ta reprizentaba se korpu perfetu i ma vinhu ta reprizentaba se sangi, ki el ta ben daba pa es. Talvês kes apóstlu ka fika spantadu ku kel runion sinplis má omésmu ténpu txeu inportanti. Pamodi?

4. Modi ki kel konsedju ki Jizus daba Marta, ta djuda-nu ntende pamodi ki el faze un Komemorason sinplis?

⁴ Repara kuzê ki kontise alguns mês antis, na tirseru anu di pregason di Jizus. El bai vizita se amigus Lázaru, Marta ku Maria. Na kel anbienti trankilu, Jizus kumesa ta inxina. Marta ka staba ta presta atenson, pamodi el staba okupadu ta pripara bons kumida pa Jizus. Kantu Jizus repara kel-la, el koriji-l ku amor. El djuda-l odja ma é ka tudu óra ki nu meste pripara bons kumida. (Luc. 10:40-42) Alguns ténpu dipôs, kantu sta faltaba alguns óra pa el móre, Jizus sigi se própi konsedju. El faze un Komemorason sinplis. Kuzê ki kel-li ta inxina-nu sobri Jizus?

5. Kuzê ki kel Komemorason sinplis ta inxina-nu sobri Jizus, i modi ki Filipenses 2:5-8 ta mostra kel-li?

⁵ Jizus mostra ma el éra umildi na tudu kuza ki el fla i ki el faze. É pur isu ki na kel noti antis di el móre el mostra umildadi. (Mat. 11:29) El sabia ma el sta ba ofereseba un sakrifisiu ki ta fikaba na stória. Tanbê el sabia ma Jeová ta resusitaba el i el ta sérba rei na Séu. Má simé, Jizus ka txoma atenson pa se kabésa pamodi el ka manda pa faze un komemorason konplikadu pa lenbra di se mórti. Má, el fla se disiplus ma es debe faze un komemorason sinplis un bês pa anu pa lenbra di el. (João 13:15; 1 Cor. 11:23-25) Kel runion sinplis i spesial ta mostra ma Jizus ka éra orgulhozu. Nu ta fika kontenti di sabe ma nos Rei é txeu umildi. — Lé Filipenses 2:5-8.

6. Modi ki nu pode imita umildadi di Jizus, óras ki nu sta pasa pa prublémas?

⁶ Modi ki nu pode imita umildadi di Jizus? Óras ki nu ta poi interesi di otus algen más primeru ki di nos. (Fil. 2:3, 4) Pensa otu bês na kel últimu noti di Jizus li na Téra. El sabia ma lógu el ta moreba di un manera ki el ta sufreba txeu. Má simé el staba txeu preokupadu  ku se apóstlus fiel, ki lógu dipôs ta fikaba tristi ku se mórti. Pur isu, duránti kel noti el apruveita pa el inxina, nkoraja i konsola se apóstlus. (João 14:25-31 ) Envês di el preokupa ku se kabésa, el staba más preokupadu ku se apóstlus, pamodi el é umildi. El dexa un grandi izénplu pa nos!

7. Modi ki Jizus mostra grandi koraji lógu dipôs ki el inxina Komemorason di se mórti?

⁷ Lógu dipôs ki Jizus inxina Komemorason di se mórti, el mostra grandi koraji. Di ki manera? Jizus seta faze vontadi di se Pai, sikrê el sabia ma el ta moreba sima un kriminozu i sima un algen ki pâpia mal di Deus. (Mat. 26:65, 66; Luc. 22:41, 42.) Jizus kontinua lial ti fin. Asi el onra nómi di Jeová, el apoia direitu ki Jeová ten di governa i el da-nu xansi di vive pa tudu ténpu si nu rapende di nos pekadu. Tanbê, Jizus pripara se sigidoris pa lida ku prublémas ki staba pa binha.

8. (a) Kuzê ki Jizus fla se apóstlus fiel? (b) Alguns anu dipôs ki Jizus móre, modi ki se disiplus sigi se izénplu di koraji?

⁸ Jizus tanbê mostra koraji pamodi el ka konsentra na se preokupasons, má el konsentra na nisisidadis di se apóstlus. Dipôs ki el manda Judas pa sai, Jizus faze kel komemorason sinplis ku un obijetivu. Éra pa el lenbraba kes ki skodjedu ku spritu santu kuzê ki se sangi fazeba pa es i ma es ta fazeba párti di kel novu kontratu. (1 Cor. 10:16, 17) Pa djuda-s mante fiel i pa es pode staba ku el na Séu, Jizus fla se sigidoris kuzê ki el ku se Pai ta speraba di es. (João  15:12-15 ) Jizus tanbê fla se apóstlus ma es ta ben pasaba pa txeu provason. El uza se própi izénplu pa fla-s: ‘Nhos ten koraji!’ (João 16:1-4a, 33 ) Txeu ténpu dipôs, disiplus di Jizus kontinua ta preokupa ku otus i ta imita koraji di Jizus. Nbóra es sufri txeu, sénpri es apoia kunpanheru na tudu prublémas. — Heb. 10:33, 34.

9. Modi ki nu pode mostra koraji sima Jizus?

⁹ Nos tanbê nu ta sigi izénplu di Jizus óras ki nu ta mostra koraji. Pur izénplu, nu meste ten koraji pa nu djuda nos irmons ki sta sufri pirsigison pamodi ses fé. Alvês, nos irmons ta podu na kadia sô pamodi es é Tistimunhas di Jeová. Óras ki kel-li kontise nu meste faze tudu kel ki nu pode pa djuda-s. I si meste, nu ta difende-s. (Fil. 1:14; Heb. 13:19) Otu manera di nu mostra koraji é óras ki nu ta kontinua ta prega ‘sen medu’. (Atus 14:3, BPK ) Sima Jizus, nu sta disididu na prega mensaji di Reinu, mésmu ki pesoas ta fika kóntra nos i ta pirsigi-nu. Má alvês nu ta xinti falta di koraji. Kuzê ki nu pode faze?

10. Na kes simana antis di Komemorason, kuzê ki nu debe faze i pamodi?

¹⁰ Nu ta fika ku más koraji óras ki nu ta pensa na speransa ki nu ten pamodi sakrifisiu di resgati di Jizus. (João 3:16; Efé. 1:7) Na kes simana antis di Komemorason, nu ten xansi di omenta nos gratidon pa resgati. Duránti kel ténpu, faze leitura di Bíblia pa Komemorason. Pensa ku orason na tudu kuza ki kontise ku Jizus poku antis di el móre. É inportanti faze kel-li pamodi óras ki txiga kel dia di Komemorason, nu ta ntende midjór kuzê ki ta reprizenta pon, vinhu  i sakrifisiu ki Jizus faze. Óras ki nu ntende kuzê ki Jizus ku Jeová faze pa nos i modi ki kel-li ta djuda-nu anos i kes algen ki nu ta ama, nos speransa ta fika más fórti. Tanbê kel speransa ta da-nu koraji pa nu aguenta ti fin. — Heb. 12:3.

11-12. Kuzê ki dja nu odja ti gósi?

¹¹ Dja nu odja ma Komemorason di mórti di Kristu ta lenbra-nu di valor di resgati. Má tanbê el ta inxina-nu sobri umildadi i koraji di Jizus. Nu ta fika kontenti pamodi nu sabe ma ti inda Jizus sta mostra kes kualidadi li na Séu. I el é kel Saserdóti Prinsipal ki sta pidi pa nos. (Heb. 7:24, 25) Pa nu mostra nos gratidon, nu debe komemora mórti di Jizus sima el manda. (Luc. 22:19, 20) Nu ta faze kel-li, na kel dia ki ta kai 14 di nizan, el é kel data más inportanti di anu.

¹² Manera sinplis ki Jizus komemora se mórti ta djuda-nu ntende otu kualidadi ki el ten. Un kualidadi ki el mostra sénpri kantu ki el staba na Téra i ki pô-l ta móre pa nos. É ki kualidadi?

13. Modi ki João 15:9 i 1 João 4:8-10 , ta splika amor ki Jeová i Jizus mostra, i ses amor ta djuda kenha?

¹³ Na tudu ki el ta fazeba, Jizus mostra di manera perfetu kel grandi amor ki Jeová ten pa nos. (Lé João 15:9; 1 João 4:8-10.) Más inportanti inda, Jizus da se vida pa nos pamodi el ta ama-nu. Ka ta nporta si nos é skodjedu ku spritu santu ô nu ta faze párti di ‘otus ovelha’, nu pode ten txeu benson pamodi sakrifisiu di resgati ki Jeová ku Jizus faze pa nos ku amor. (João 10:16; 1 João 2:2 ) Pensa tanbê na kes kuza ki Jizus uza pa faze Komemorason. Kel-li ta mostra ma Jizus ta ama i el ta preokupa ku se disiplus. Di ki manera?

14. Di ki manera Jizus mostra amor pa se disiplus?

¹⁴ Jizus mostra amor pa se disiplus skodjedu ku spritu santu, pamodi el ka inxina-s faze un Komemorason konplikadu, má sinplis. Sima ténpu ba ta pasa, kes skodjedu ku spritu santu tinha ki fazeba Komemorason tudu anu. Es tinha ki fazeba kel-la na tudu situason, mésmu na kadia. (Apo. 2:10) Má es konsigi sigi órdi di Jizus? Es konsigi sin!

15-16. Modi ki alguns irmon konsigi faze Komemorason, mésmu na situasons difísil?

¹⁵ Désdi ténpu di apóstlus ti na nos ténpu, sigidoris di Jizus sénpri faze sforsu pa komemora se mórti. Mésmu na situasons difísil, es faze di tudu pa es komemora mórti di Jizus sima el inxina-s. Repara alguns izénplu. Kantu irmon Harold King staba prézu el sô na Xina, el ranja manera di faze Komemorason. Sen ningen da kónta, el uza kuzas ki el tinha pa el pripara kel pon ku vinhu. Tanbê el faze di tudu pa el sabe dia izatu di Komemorason. Kantu txiga óra di Komemorason, el kanta, el faze orason i el faze un diskursu. El faze tudu kel-la el sô.

¹⁶ Odja un otu izénplu di un grupu di irmans ki staba prézu na un kanpu di konsentrason, duránti Sugundu Géra na Mundu. Es poi ses vida na prigu pa faze Komemorason di mórti di Jizus. Es konsigi faze kel-la sen ningen da kónta, pamodi Komemorason é un runion sinplis. Es fla: ‘Nu djunta i nu faze un róda.  Déntu meiu nu poi un banku pikinoti i nu kubri-l ku un panu branku. Di riba di el staba pon ku vinhu. Nu uza un véla pa límia kel lugar, pamodi si nu sendeba lus pode txomaba atenson. Nu torna ripiti nos promésa ki nu faze pa nos Pai di uza tudu nos forsa pa difende Se nómi santu.’ Kes irman la mostra ma es tinha txeu fé. I kel-li ta mostra ma Jizus ta ama-nu, pamodi nu ta konsigi faze Komemorason mésmu na situasons difísil.

17. Ki perguntas nu debe faze nos kabésa?

¹⁷ Sima ta ba ta txiga dia di Komemorason, nu debe pergunta nos kabésa: ‘Modi ki N pode mostra amor más txeu sima Jizus? N ta pensa na nisisidadis di otus algen más di ki kes di meu? N ta spéra di nhas irmons más di ki kel ki es ta pode ô N ta ntende ses limitason?’ Nu krê kontinua ta imita Jizus i ta ‘poi na lugar di otus’. — 1 Ped. 3:8.

18-19. (a) Mésmu ki Komemorason ka ta ben fazedu más, di kuzê ki nu pode ten sertéza? (b) Kuzê ki nu krê kontinua ta faze?

¹⁸ Ka ta dura nu ka meste faze Komemorason más. Óras ki Jizus ‘ben’ na grandi tribulason, el ta djunta na Séu ‘kes skodjedu’ ki inda ta sta na Téra. Dipôs di kel-li, Komemorason ka ta fazedu más. — 1 Cor. 11:26; Mat. 24:31.

¹⁹ Mésmu ki Komemorason ka ta ben fazedu más, nu pode ten sertéza ma povu di Deus ta kontinua ta lenbra ku karinhu di kel runion sinplis. Kel Komemorason ta lenbra-s di kel grandi umildadi, koraji i amor ki algen dja mostra. Na paraízu, nu ta ben konta kes algen ki ta sta la pamodi ki Komemorason foi txeu inportanti. Má, timenti kel dia ka txiga, nu krê kontinua ta imita umildadi, koraji i amor di Jizus. Si nu faze si, nu pode ten sertéza ma Jeová ta rekonpensa-nu. — 2 Ped. 1:10, 11.