1. Sima Rei Davidi, kuzê ki alguns di nos pode pergunta?

NOS tudu nu krê ten un vida sen prubléma i na pas. Ningen ka gosta di xinti preokupadu dimás. Má alvês, nu ten ki lida ku alguns preokupason. Pur isu, alguns di nos pode faze kel mésmu pergunta ki Rei Davidi fazeba Jeová: ‘Ti ki ténpu N ta ten txeu preokupason, ku tristéza na nha korason tudu dia?’ — Sal. 13:2.

2. Kuzê ki nu sta ben odja na kel studu li?

² Nbóra nu ka pode fika livri di tudu preokupason, nu pode faze txeu kuza pa kontrola-s. Na kel studu li, primeru nu sta ben odja alguns kuza ki pode dexa-nu preokupadu dimás. Dipôs, nu ta ben odja 6 kuza ki nu pode faze pa nu fika kalmu óras ki nu ta lida ku nos prubléma.

3. Kuzê ki pode dexa-nu preokupadu? Nu ta pode faze alguns kuza pa kontrola-s?

³ Ten alguns kuza ki pode dexa-nu preokupadu i nu ka ta pode kontrola-s. Pur izénplu, nu ka ta pode inpidi pa présu di kumida, di ropa i di lugar di mora omenta tudu anu. Tanbê, nu ka ta pode kontrola atitudi di nos kolégas di trabadju i di skóla ki pode tenta-nu pa nu ser dizonéstu i ten konportamentu seksual mariadu. I nu ka ta konsigi inpidi pesoas di faze krimi na lugar ki nu ta mora. Kes prubléma li ta izisti pamodi nu sta vive na un mundu ki maioria di algen ka ta sigi konsedjus di Bíblia.  Tanbê, Satanás ki é deus di kel sistéma li, sabe ma kes ‘preokupason di mundu’ ta poi alguns algen ta para di sirbi Jeová. (Mat. 13:22; 1 João 5:19) Pur isu, nu ka ta fika spantadu di odja ma es mundu sta xeiu di prublémas ki pode poi algen ta fika txeu preokupadu!

4. Kuzê ki pode kontise óras ki nu sta pasa pa prublémas difísil?

⁴ Óras ki nu ta pasa pa prublémas difísil, nu pode fika preokupadu dimás. Pur izénplu, nu pode fika preokupadu ma nu ka ta konsigi ranja dinheru ki ta txiga pa kuida di nos nisisidadi. Ô nu pode fika ku medu ma un duénsa ka ta dexa-nu trabadja ô ta pô-nu perde kel trabadju. Tanbê, nu pode fika preokupadu ma nu pode kai na un tentason i dizagrada Jeová. Alén di kel-li, ka ta dura, Satanás ta ben poi kes algen ki el ta kontrola pa ataka povu di Deus. I nu pode fika preokupadu pamodi nu ka sabe modi ki nu ta ben reaji na kel situason. Talvês nu ta pergunta: ‘É mariadu N fika preokupadu ku kes kuza li?’

5. Kuzê ki Jizus krê flaba ku kes palavra li: ‘Nhos para di fika preokupadu dimás’?

⁵ Nu sabe ma Jizus fla se sigidoris: ‘Nhos para di fika preokupadu dimás’. (Mat. 6:25) Má Jizus krê flaba ma nu ka debe fika preokupadu ku nada? Klaru ki nau! Na verdadi, alguns sérvu fiel di Jeová na ténpu antigu pasa pa situasons ki dexa-s preokupadu dimás, má Jeová staba kontenti ku es. * (1 Reis 19:4; Sal. 6:3) Nu pode fla ma Jizus staba ta konsola-nu. El ka krê pa nu fika txeu preokupadu ku kuzas di vida pa es ka afeta nos sirvisu pa Deus. Nton, kuzê ki nu pode faze óras ki nu sta preokupadu? — Odja kuadru “ Modi ki nu pode faze kel-li?”

6. Sima sta na Filipenses 4:6, 7, kuzê ki pode djuda-nu mante kalmu?

⁶ (1) Faze orason sénpri. Óras ki bu sta preokupadu dimás, pidi Jeová na orason pa djuda-u. (1 Ped. 5:7) El ta da-u kel ‘pas di Deus, ki ningen ka ta konsigi ntende’. (Lé Filipenses 4:6, 7.) Jeová ta uza se spritu santu poderozu pa djuda-nu fika kalmu. — Gál. 5:22.

7. Di kuzê ki nu debe lenbra óras ki nu ta faze orason?

⁷ Óras ki bu ta faze orason, abri bu korason pa Jeová. Fla-l kal ki é prubléma i konta-l modi ki bu sta xinti. Si bu prubléma ten soluson, pidi Jeová pa djuda-u sabe kuzê ki bu ta faze i ten forsa pa bu faze-l. Si bu ka ta konsigi rezolve bu prubléma, pidi Jeová pa djuda-u i ka bu fika preokupadu dimás ku kel asuntu. Óras ki nu ta fla Jeová kal ki é nos prubléma i modi ki nu sta xinti, nu ta konsigi odja más klaru respósta di Jeová. Si respósta di bu orason ka ben na kel óra ki bu sta spéra, ka bu dizisti. Jeová ka krê sô pa nu fla-l klaru na nos orason kal ki é nos prubléma i modi ki nu sta xinti, má tanbê el krê pa nu kontinua ta ora. — Luc. 11:8-10.

8. Kuzê ki nu debe fla na nos orason?

⁸ Óras ki bu ta konta Jeová bus preokupason, ka bu skese di inklui palavras  di agradesimentu. É bon nu konsentra na kes bon kuza ki nu ten, mésmu óras ki nu sta na un situason difísil. Si alvês bu ka ta konsigi atxa palavras sértu pa fla kuzê ki bu sta xinti, lenbra ma Jeová ta responde ti kes orason sinplis sima: ‘Favor, djuda-m!’ — 2 Cró. 18:31; Rom. 8:26.

9. Undi ki nu pode atxa suguransa di verdadi?

⁹ (2) Ka bu kunfia na bu sabedoria, kunfia na sabedoria di Jeová. Na ténpu di proféta Izaías, kes trópa di Asíria staba ta amiasa povu di Judá. Es fika ku txeu medu ki es pidi Ijitu pa djuda-s. (Isa. 30:1, 2) Jeová aviza-s ma si es kunfiaba na gentis di Ijitu, es ta kaíba na disgrasa. (Isa. 30:7, 12, 13) Jeová uza proféta Izaías, pa flaba povu di Judá na undi ki es podia atxaba kel suguransa di verdadi. El fla: ‘Pa nhos ten forsa nhos ten ki kontinua kalmu i ten kunfiansa’ na Jeová. — Isa. 30:15b.

10. Na ki situasons nu meste mostra ma nu ta kunfia na Jeová?

¹⁰ Modi ki nu pode mostra ma nu ta kunfia na Jeová? Pensa na alguns izénplu. Imajina ma bu oferesedu un trabadju ki bu ta pagadu más dretu, má ki ta toma-u txeu ténpu i ki ta trapadja bu adorason pa Jeová. Ô imajina ma un koléga di trabadju sta gosta di bo, má el é ka un sérvu di Jeová batizadu. Ô nton imajina ma un família ki bu ta ama txeu fla-u kel-li: “Bu ten ki skodje ô mi ô bu Deus.” Na kada un di kes situason li é ka fásil toma un disizon, má Jeová ta da-u kel orientason ki bu meste. (Mat. 6:33; 10:37; 1 Cor. 7:39) Pergunta é: bu ta kunfia na Jeová i bu ta sigi se orientason?

11. Ki stórias di Bíblia nu pode studa pa djuda-nu fika kalmu óras ki otus ta fika kóntra nos?

¹¹ (3) Prende ku kes bon i mau izénplu. Bíblia ten txeu stória ki ta mostra ma é inportanti mante kalmu i kunfia na Jeová. Óras ki bu ta studa kes stória, repara kuzê ki djuda kes sérvu di Deus kontinua kalmu mésmu kantu otus algen fika kóntra es. Pur izénplu, kantu kel tribunal más altu di judeus manda kes apóstlu para di prega, es ka fika ku medu. Envês di kel-li, es fla ku koraji: ‘Nu ten ki obi ku Deus antis di nu obi ku ómis, pamodi é El ki ta manda.’ (Atos 5:29) Mésmu dipôs ki es sotadu, kes apóstlu ka dexa medu toma kónta di es. Pamodi? Pamodi es sabia ma Jeová staba ku es i el staba kontenti ku ses atitudi. Pur isu, es kontinua ta prega kes notísia sábi. (Atos 5:40-42) Un otu bon izénplu é kel di disiplu Estevão. Kantu ki el staba kuazi ta matadu, Estevão mante uma kalmu ki se róstu staba ‘sima róstu di un anju.’ (Atos 6:12-15) Pamodi? Pamodi el tinha sertéza ma Jeová staba kontenti ku el.

12. Sima sta na 1 Pedro 3:14 i 4:14, pamodi ki nu pode fika kontenti óras ki nu sta pirsigidu?

¹² Kes apóstlu tinha próvas klaru ma Jeová staba ku es. Es resebe puder di Deus pa faze milagri. (Atos 5:12-16; 6:8) Oji kel-li ka ta kontise, má Jeová ta uza se Palavra pa garanti-nu ma óras ki nu ta sufri pamodi nu sta faze se vontadi, el ta fika kontenti ku nos atitudi i el ta da-nu se spritu. (Lé 1 Pedro 3:14; 4:14.) Pur isu, ka bu fika ta pensa modi ki bu  ta ben reaji óras ki kumesa un pirsigison. Envês di kel-li, konsentra na kuzê ki bu pode faze gósi pa omenta bu kunfiansa ma Jeová pode djuda-nu i salva-nu. Sima kes primeru disiplus, kunfia na kel promésa di Jizus. El fla: “N ta da nhos palavra sértu pa nhos pâpia ki ninhun di nhos inimigu ka ta pode nega.” I nu ten kel garantia li: ‘Si nhos aguenta firmi, nhos ta resebe vida itérnu.’ (Lúkas 21:12-19, Bíblia Na Prugrésu Di Traduson Pa Lingua Kabuverdianu, BPK) Nunka ka bu skese ma mésmu ki un sérvu fiel di Jeová móre, el ta guarda na se mimória tudu kuza sobri el i El pode da-l vida otu bês.

13. Kuzê ki nu ta prende ku izénplu di kes ki ka mante kalmu i es ka kunfia na Jeová?

¹³ Tanbê nu pode prende ku kes ki ka sigi konsedju di mante kalmu i kunfia na Jeová. Studa kes mau izénplu ta djuda-nu ka faze mésmu éru ki es. Pur izénplu, lógu ki Rei Aza kumesa ta governa, un izérsitu grandi bai luta kóntra Judá. Aza kunfia na Jeová, pur isu, Jeová djuda-l ganha kel géra. (2 Cró. 14:9-12) Más tardi, Rei di Israel ki txomaba Baaza, tanbê amiasa Judá, má se trópas éra mutu más poku. Envês di kunfia na Jeová sima el fazeba antis, Aza paga trópas di Síria pa djuda-l. (2 Cró. 16:1-3) I na fin di se vida, kantu el fika txeu duenti, Aza ka buska ajuda di Jeová. — 2 Cró. 16:12.

14. Kuzê ki nu pode prende ku kes éru di Aza?

¹⁴ Na komésu, Aza ta pidiba ajuda di Jeová óras ki el ta pasaba pa prublémas. Má más tardi, el prifiri kuida di se prublémas el sô. Ta parse ma kel planu di Aza di pidi ajuda di sírius staba ta kóre dretu. Má pas di Judá ka dura txeu. Jeová uza un proféta pa fla Aza: ‘Dja ki bu kunfia na rei di Síria i bu ka kunfia na Jeová, bu Deus, kes trópa di rei di Síria skapa di bu mô.’ (2 Cró. 16:7) Nos tanbê nu meste toma kuidadu pa nu ka tenta rezolve nos prublémas nos sô, sen buska orientason di Jeová na Bíblia. Mésmu óras ki bu meste toma un disizon urjenti, mante kalmu i kunfia na Jeová i el ta djuda-u ten bon rezultadu.

15. Kuzê ki nu pode faze óras ki nu ta lé Bíblia?

¹⁵ (4) Dikora testus di Bíblia. Óras ki bu ta lé Bíblia, bu ta atxa kes testu ki ta mostra ma é inportanti mante kalmu i kunfia na Jeová. Tenta dikora kes testu. Pode ser bon le-s ku vós altu ô skrebe-s i djobe-s manenti. Jeová manda Juzué pa lé kel livru di Lei sénpri ku vós baxu. Kel-li ta djudaba el ka sô aji ku sabedoria, má tanbê vense kes medu ki talvês el xinti na se diziginason. (Jos. 1:8, 9) Di mésmu manera, txeu testu di Bíblia pode djuda-u fika kalmu na kes situason ki ta kustuma dexa-u txeu preokupadu i ku medu. — Sal. 27:1-3; Pro. 3:25, 26.

16. Modi ki Jeová ta uza kongregason pa djuda-nu mante kalmu i kunfia na el?

¹⁶ (5) Sta sénpri djuntu ku povu di Deus. Jeová ta uza nos irmons ku irmans pa djuda-nu mante kalmu i kunfia na el. Na nos runion, nu ta xinti txeu nkorajadu pa kes párti ki ta fazedu, kes komentáriu ki ta dadu i kes bon konbérsu ku nos irmons ku irmans. (Heb. 10:24, 25) Tanbê, un kuza ki é bon pa  nos é óras ki nu ta konta kes nos amigu di kunfiansa na kongregason modi ki nu sta xinti. ‘Un palavra sábi’ di un amigu pode djuda-nu xinti ménus preokupadu. — Pro. 12:25.

17. Sima sta na Hebreus 6:19, modi ki nos speransa na Reinu ta djuda-nu mante kalmu óras ki nu ta pasa pa situasons difísil?

¹⁷ (6) Bira bu speransa más fórti. Nos speransa na Reinu é sima un ‘ánkura pa alma’. El ta djuda-nu mante kalmu i ten kunfiansa óras ki nu sta pasa pa situasons difísil ô óras ki nu sta preokupadu dimás. (Lé Hebreus 6:19.) Nton pensa na kel promésa ki Jeová faze di un futuru na undi ki kes pensamentu negativu ka ta ben ten más. (Isa. 65:17) Imajina bu kabésa ta vive na un mundu novu di pas, undi ki kes situason ki ta pô-nu txeu preokupadu ka ta ten más. (Miq. 4:4) Tanbê, bu pode bira bu speransa más fórti óras ki bu ta pâpia di el ku otus algen. Faze tudu kel ki bu ta pode na trabadju di prega i di faze disiplus. Di kel manera li, bu ta ‘ten tudu sertéza di speransa ti ki fin txiga’. — Heb. 6:11.

18. Kuzê ki sta ben kontise na futuru i kuzê ki nu pode faze?

¹⁸ Sima nu sta ta txiga más pértu di fin di kel mundu li, nu ta ben ten más prubléma ki pode dexa-nu preokupadu dimás. Nos testu di anu pa 2021, ta djuda-nu lida ku kes prubléma i kontinua kalmu, ka ku nos própi forsa, má ku kel kunfiansa ki nu ten na Jeová. Duránti kel anu li, mostra ma bu ta kunfia na es promésa di Jeová: ‘Pa nhos ten forsa nhos ten ki kontinua kalmu i ten kunfiansa.’ — Isa. 30:15.