1. Modi ki un diskursu ki fazedu na un kongrésu na anu 1935 muda speransa di un jóven?

UN JÓVEN tinha 18 anu kantu el batiza na anu 1926. Se pai ku se mai éra Studantis di Bíblia, ki éra nómi di Tistimunhas di Jeová na kel ténpu. Es tinha três fidju matxu i dôs fidju-fémia, i es inxina-s pa es sirbi Jeová i imita Jizus Kristu. Sima tudu Studantis di Bíblia na kel ténpu, kel jóven fiel li ta kumeba pon i ta bebeba vinhu tudu anu na Komemorason di mórti di Kristu. Má se speransa muda kantu el obi un diskursu inportanti ku téma “Kel monti di algen”. Irmon Rutherford faze kel diskursu li na anu 1935 na un kongrésu na Washington, sidadi di Mérka. Kuzê ki kes Studanti di Bíblia prende na kel kongrésu?

2. Ki verdadi inportanti irmon Rutherford splika na se diskursu?

² Na se diskursu irmon Rutherford splika klaru kenha ki ta ben fazeba párti di kel ‘un monti di algen’ ki Apocalipse 7:9 ta pâpia di el. Ti kel ténpu, kes Studanti di Bíblia ta pensaba ma kel un monti di algen éra un grupu di pesoas li na Téra ki ta baba pa Séu, má ki éra ménus fiel di ki kes skodjedu ku spritu santu. Irmon Rutherford uza Bíblia pa splika ma kel un monti di algen ka skodjedu pa bai vive na Séu. Má es éra kes otu ovelha * di Kristu ki ta ben salvaba na ‘grandi tribulason’ i ta ben viveba pa tudu ténpu na Téra. (Apo. 7:14) Jizus promete: ‘N ten  otus ovelha, ki é ka di kel kural li; es tanbê N ten ki traze-s, i es ta obi ku nha vós i es ta bira un ribanhu sô, ku un pastor sô.’ (João 10:16) Kes ovelha li é kes Tistimunha di Jeová lial ki ten speransa di vive pa tudu ténpu na un paraízu li na Téra. (Mat. 25:31-33, 46) Nu ben odja modi ki kel novu ntendimentu di verdadi di Bíblia muda vida di txeu Tistimunha di Jeová, i tanbê di kel jóven di 18 anu. — Sal. 97:11; Pro. 4:18.

3-4. Na kel kongrésu di 1935, kuzê ki milharis di algen ntende sobri ses speransa i pamodi?

³ Kel momentu más inportanti di kel kongrésu foi kantu irmon Rutherford pidi kes algen ki staba ta sisti: “Tudu kes ki ten speransa di vive pa tudu ténpu na Téra pode labanta favor?” Na kel kongrésu staba uns 20 mil algen. Un irmon ki staba la, fla ma más di metadi di kes algen labanta. Nton, irmon Rutherford fla: “Nhos odja! Kel un monti di algen!” Dipôs di kel-li, tudu kes algen ki staba la da palmu uma riju i ku txeu alegria. Kes algen ki labanta ntende ma es ka skodjedu pa es ba vive na Séu. Es sabia ma es ka skodjedu ku spritu santu. Na kel otu dia di kongrésu, 840 algen batiza, i maioria di es tinha speransa di vive pa tudu ténpu na Téra.

⁴ Dipôs di kel diskursu, milharis di otus algen i kel jóven ki dja nu papiaba di el antis, para di kume pon i bebe vinhu na Komemorason di mórti di Kristu. Txeu algen ta xintiba di mésmu manera ki un irmon ki fla: “Kel Komemorason di 1935 foi kel últimu bês ki N kume pon i bebe vinhu. N da kónta ma Jeová ka skodjeba mi ku se spritu santu pa N ba vive na Séu. Envês di kel-li, N tinha speransa di vive na Téra i di partisipaba na kel trabadju di bira Téra un paraízu.” (Rom. 8:16, 17; 2 Cor. 1:21, 22) Désdi kel ténpu, kel monti di algen sta ta bira kada bês más txeu i es sta ta trabadja djuntu ku kes skodjedu ku spritu santu ki inda sta na Téra.

5. Kuzê ki Jeová ta pensa di kes ki para di kume pon i bebe vinhu na Komemorason?

⁵ Kuzê ki Jeová ta pensa di kes ki para di kume pon i bebe vinhu na Komemorason dipôs di 1935? I si oji un Tistimunha di Jeová sinseru kume pon i bebe vinhu na Komemorason di mórti di Kristu i dipôs el da kónta ma el é ka skodjedu ku spritu santu? (1 Cor. 11:28) Alguns ten stadu ta kume pon i ta bebe vinhu na Komemorason pamodi es ka ntende dretu kal ki é ses speransa. Má si es rekonhese ses éru, es para di kume pon i bebe vinhu na Komemorason i es kontinua ta sirbi Jeová ku lialdadi, di sertéza el ta odja-s sima párti di kes otu ovelha. Nbóra es ka ta kume pon i bebe vinhu na Komemorason, ti inda es ta sisti kel runion inportanti pamodi es ta da txeu valor pa kuzê ki Jeová i Jizus faze pa es.

6. Kuzê ki Jizus manda anjus pa faze?

⁶ Dja ki grandi tribulason sta kuazi ta txiga, é bon nu torna lenbra kuzê ki Apocalipse kapítlu 7 ta fla sobri kes kriston skodjedu ku spritu santu i kel monti di algen. Na kel vizon, Jizus manda anjus pa kontinua ta pega riju kes kuatu  béntu di distruison. Es ka debe larga kes béntu ti ki tudu kes kriston skodjedu ku spritu santu seladu. Kel-li krê fla óras ki Jeová dja disidi ma es é fiel. (Apo. 7:1-4) Kes kriston skodjedu ku spritu santu ta resebe ses rekonpénsa óras ki es bira reis i saserdótis djuntu ku Kristu na Séu. (Apo. 20:6) Jeová, Jizus i anjus ta ben fika txeu kontenti óras ki es odja kes 144 mil skodjedu ku spritu santu ta resebe ses rekonpénsa na Séu.

7. Sima sta na Apocalipse 7:9, 10, ken ki Juan odja na un vizon i kuzê ki es staba ta faze? (Odja dizenhu na kapa.)

⁷ Dipôs di pâpia di kes 144 mil rei i saserdóti, Juan odja un kuza ki dexa-l txeu kontenti: ‘un monti di algen’ ki ta ben salva na Armajedon. Diferenti di kel primeru grupu ki ten un nunbru fíksu di 144 mil algen, kel sugundu grupu é mutu más grandi i el ka ten un nunbru fíksu. (Lé Apocalipse 7:9, 10.) Kel monti di algen sta ‘bistidu ku ropa branku kunpridu’. Kel-li krê fla ma es konsigi ‘mante sen mantxa di mundu’ di Satanás i ma es kontinua lial pa Deus i pa Kristu. (Tia. 1:27) Es sta ta grita di alegria pamodi tudu kuza ki Jeová i Jizus, kel Korderu di Deus, faze pa es salva. Tanbê es tene fódjas di palmera na mô. Kel-li ta mostra ma es ta rekonhese ku alegria ma Jizus é kel Rei ki Jeová skodje. — Konpara ku João 12:12, 13.

8. Sima sta na Apocalipse 7:11, 12, modi ki kes algen na Séu reaji kantu es odja kel monti di algen?

⁸ Lé Apocalipse 7:11, 12. Modi ki kes algen na Séu reaji kantu es odja kel monti di algen? Juan odja ma tudu algen na Séu fika xeiu di alegria i es lova Deus kantu es odja kel monti di algen. Família di Jeová na Séu ta ben fika kontenti di odja kel vizon di Juan ta kunpri óras ki kel monti di algen salva na grandi tribulason.

9. Sima sta na Apocalipse 7:13-15, kuzê ki kes ki ta faze párti di kel monti di algen sta ta faze gósi?

⁹ Lé Apocalipse 7:13-15. Juan skrebe ma kel monti di algen ‘laba ses ropa kunpridu i es bira-s branku na sangi di Korderu.’ Kel-li krê fla ma es ten un konsénsia linpu i ma Jeová sta kontenti ku es. (Isa. 1:18) Es é kristons ki da ses vida pa Deus i batiza, ki ta mostra un fé fórti na sakrifisiu di Jizus i ki ten un amizadi fórti ku Jeová. (João 3:36; 1 Ped. 3:21) É pur isu ki es pode faze sirvisu sagradu pa Deus dia ku noti li na Téra. Mésmu gósi es é zelozu i es ta faze maior párti di trabadju di prega i inxina. Asi es ta poi interesis di Reinu na primeru lugar na ses vida. — Mat. 6:33; 24:14; 28:19, 20.

10. Di kuzê ki kel monti di algen ten sertéza, i ki promésa es ta ben odja ta kunpri?

¹⁰ Kel monti di algen ki ta ben salva ku vida na grandi tribulason ten sertéza ma Deus ta ben kontinua ta kuida di es, pamodi el promete ma ‘se ténda ta ben sta ku es’. Nton, ta ben kunpri kel promésa ki kes otu ovelha tene gana di odja: ‘[Deus] ta ben linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór.’ — Apo. 21:3, 4.

11-12. (a) Sima sta na Apocalipse 7:16, 17, ki bensons kel monti di algen ta ben resebe? (b) Kuzê ki kes otu ovelha pode faze na Komemorason, i pamodi ki es ta faze-l?

¹¹ Lé Apocalipse 7:16, 17. Gósi li alguns Tistimunha di Jeová sta ta pasa  fómi pamodi falta di dinheru i pamodi géra. Otus sta prézu pamodi ses fé. Má kes ki ta faze párti di kel monti di algen sta txeu filís. Pamodi es sabe ma dipôs ki es salva di distruison di kel sistéma li, es ta ben ten kumida avontádi na sentidu fíziku i na sentidu spritual. Óras ki Jeová ben distrui es mundu mau di Satanás, el ta ben proteje kel monti di algen di se raiba, ki é sima ‘un kalor fórti’. Dipôs ki grandi tribulason kaba, Jizus ta ben gia kes algen ki salva pa kes ‘fonti di agu di vida [pa tudu ténpu]’. Pensa na kel-li: Kel monti di algen ten un speransa rei di sábi. Di tudu kes bilhon di algen ki dja vive, es ta ben ser kes úniku ki pode ka móre nunka más! — João 11:26.

¹² Kes algen ki ta faze párti di kes otu ovelha, ten txeu gratidon pa Jeová i pa Jizus pamodi kel speransa rei di sábi ki es ten. É verdadi ki es ka skodjedu pa ba vive na Séu, má kel-la ka krê fla ma es ten ménus valor pa Jeová. Má sima kes kriston skodjedu ku spritu santu, es ten priviléjiu di lova Deus i Kristu. I un manera di faze kel-li é óras ki es ta sisti Komemorason di mórti di Kristu.

13-14. Pamodi ki nos tudu debe sisti Komemorason di mórti di Kristu?

¹³ Na kes últimu anu, é más ô ménus un algen na kada mil di kes ki sisti Komemorason ki kume pon i bebe vinhu. Na maioria di kongregason, ningen ka ta kume pon i bebe vinhu na Komemorason. Kuazi tudu algen ki ta sisti Komemorason ten speransa di vive na Téra. Nton, pamodi ki es ta sisti Komemorason di mórti di Kristu? Es ta sisti pamodi kel mésmu motivu ki ta poi algen ta sisti kazamentu di un amigu. Kes algen ki ta ba sisti un kazamentu krê mostra ma es ta ama i ma es ta apoia kel kazal. Di mésmu manera, kes ki ta faze párti di otus ovelha ta ba sisti Komemorason pamodi es krê mostra ma es ta ama i ma es ta apoia Kristu i kes skodjedu ku spritu santu. Tanbê es krê mostra ma es ta da valor pa kel  sakrifisiu ki Jizus faze, ki é un sakrifisiu ki ta da-s speransa di vive pa tudu ténpu na Téra.

¹⁴ Kes otu ovelha tanbê ta sisti Komemorason pamodi es krê obi ku Jizus. Kantu Jizus faze kel primeru Komemorason di se mórti, djuntu ku se apóstlus fiel, el fla-s: ‘Nhos kontinua ta faze kel-li, pa lenbra di mi.’ (1 Cor. 11:23-26) Pur isu, timenti kes kriston skodjedu ku spritu santu inda sta na Téra, kes otu ovelha ta kontinua ta sisti Komemorason di mórti di Kristu. I tanbê, es ta kontinua ta konvida otus algen pa sisti kel Komemorason inportanti.

15. Modi ki nu pode lova Deus i Kristu na Komemorason?

¹⁵ Na Komemorason nu ten oportunidadi di kanta i di faze orason djuntu. Di kel manera li, nu ta lova Deus i Kristu. Téma di diskursu di kel anu li é: “Da valor pa kuzê ki Deus i Jizus Kristu faze pa bo!” El ta ben pô-u ta da más valor pa Jeová i pa Jizus. Óras ki ta pasadu pon ku vinhu, tudu algen ki sta sisti ta ben lenbra di kuzê ki es ta reprizenta: korpu i sangi di Jizus. I nu ta ben lenbra tanbê di amor ki Jeová mostra kantu el dexa se Fidju móre pa salva nos vida. (Mat. 20:28) Tudu kes ki ta ama nos Pai na Séu i se Fidju, di sertéza ka ta krê perde kel Komemorason.

16. Kuzê ki kes kriston skodjedu ku spritu santu i kes otu ovelha ten igual?

¹⁶ Kes skodjedu ku spritu santu i kes ki ta faze párti di otus ovelha ten txeu kuza igual. Kes dôs grupu li ten txeu valor pa Jeová. Na verdadi, Jeová paga kel mésmu présu pa kunpra-s, ki é vida di se Fidju ki el ta ama txeu. Kel diferénsa entri kes dôs grupu li é kel speransa ki es ten. Kes kriston skodjedu ku spritu santu i kes ki ta faze párti di otus ovelha debe mante lial pa Deus i pa Kristu. (Sal. 31:23) I lenbra, Jeová ta da kada algen se spritu santu di akordu ku kel ki el meste, ka ta nporta si el é un kriston skodjedu ku spritu santu ô si el é di otu ovelha.

17. Ki rekonpénsa kes kriston skodjedu ku spritu santu tene gana di resebe?

¹⁷ Kes kriston skodjedu ku spritu santu ka ta nase ku kel speransa di ba vive na Séu. É Jeová ki ta poi kel speransa na ses korason. Es ta pensa na kel speransa, es ta faze orason sobri el i es tene gana di resebe ses rekonpénsa na Séu. Es ka sabe modi ki ses korpu ta ba ser  óras ki es sta la. (Fil. 3:20, 21; 1 João 3:2) Má simé, es tene gana di ba sta ku Jeová, Jizus i anjus, i di toma ses lugar na Reinu djuntu ku kes otu kristons skodjedu ku spritu santu ki dja sta na Séu.

18. Ki rekonpénsa kes otu ovelha tene gana di resebe?

¹⁸ Kes otu ovelha tene gana di ben vive pa tudu ténpu na Téra. Kel-li é un dizeju normal di kalker algen. (Ecl. 3:11) Es tene gana pa txiga kel dia ki es ta ben trabadja pa bira Téra un paraízu. Es tene gana di faze ses kaza, planta ses jardin i kria ses fidju ku saúdi perfetu. (Isa. 65:21-23) Es tene gana di ben viaja pa txeu párti di Téra ta odja montanhas, floréstas, mar i di studa tudu kes kuza ki Jeová kria. I más inportanti inda, es ta fika txeu kontenti di sabe ma na futuru, ses amizadi ku Jeová ta ben fika kada bês más fórti.

19. Ki oportunidadi kada un di nos ta ben ten duránti Komemorason, i ki dia ki ta ben fazedu Komemorason kel anu li?

¹⁹ Jeová da kada un di se sérvus un speransa rei di sábi pa futuru di vive pa tudu ténpu. (Jer. 29:11) Komemorason di mórti di Kristu ta da-nu grandi oportunidadi pa nu agradese Deus i Kristu pa tudu kel ki es faze pa nu pode ben vive pa tudu ténpu. Nu ka ten dúvida ma Komemorason é kel runion más inportanti di anu pa kes kriston verdaderu. Na kel anu li, Komemorason ta ben fazedu dipôs ki sól kanba na sábadu, dia 27 di marsu di 2021. Txeu algen ta ben sta livri pa sisti es runion inportanti. Otus ta ben sisti sikrê ku opozison. I inda otus ta ben komemora mórti di Kristu déntu di kadia. Ka ta nporta kal ki ta ben ser bu situason, lenbra ma Jeová, Jizus i anjus ta sta ta odja-nu. Nu krê pa kada algen, grupu i kongregason ten un bon Komemorason!