1. Ki situason difísil Davidi pasa pa el?

 DAVIDI staba ta kóre pa salva se vida pamodi Saul, ki éra rei di Israel, krê mataba el. Kantu Davidi staba ta meste kumida, el para na sidadi di Nobi i el pidi sinku pon. (1 Sam. 21:1, 3) Dipôs, el ba sukundi el ku se trópas na un kavérna. (1 Sam. 22:1) Pamodi ki Davidi staba na kel situason la?

2. Modi ki Saul poi se kabésa na un situason prigozu? (1 Samuel 23:16, 17)

² Saul tinha txeu siumis di Davidi pamodi un monti algen gostaba di Davidi i es ta ilojiaba el pamodi el ganha txeu géra. Saul tanbê sabia ma Jeová dja negaba el pamodi el ka obi ku Jeová i ma Jeová dja skodjeba Davidi pa sérba rei na se lugar. (Lé 1 Samuel 23:16, 17.) Má dja ki Saul éra rei di Israel, el tinha txeu trópa i txeu algen pa djudaba el. Pur isu Davidi tevi ki fuji pa salva se vida. Bíblia ka ta fla ma Saul ta atxaba ma el ta pode inpidiba Jeová di poba Davidi ta ser rei. (Isa. 55:11) Má nu pode ten sertéza ma el staba ta poi se kabésa na un situason prigozu. Kes ki ta luta kóntra Jeová sénpri ta perde!

3. Modi ki Davidi staba ta xinti sikrê na un situason difísil?

³ Davidi éra un ómi umildi. El ka skodje bira rei di Israel,  é Jeová ki skodje-l. (1 Sam. 16:1, 12, 13) Saul fika ku txeu ódiu di Davidi ki el krê mataba el. Má Davidi ka poi kulpa na Jeová pamodi el staba na prigu. Nen el ka fika ta kexa pamodi el tinha poku kumida i el tevi ki ba sukundi na un kavérna. Envês di kel-li, ta parse ma éra kantu el staba na kel kavérna ki el skrebe un kántiku bunitu pa lova Deus. É di kel kántiku la ki tradu téma di es studu: ‘Kes ki ta buska Jeová ka ta ben xinti falta di ninhun kuza bon.’ — Sal. 34:10.

4. Ki perguntas nu sta ben responde i pamodi ki es é inportanti?

⁴ Oji txeu sérvu di Jeová tene poku kumida ô otus kuza ki es ta meste pa vive. * Kel-li sta kontise inda más gósi duránti es duénsa di COVID-19. Sima ‘grandi tribulason’ sta kuazi ta txiga, nu pode spéra ma nu ta ben pasa pa situasons mutu más difísil. (Mat. 24:21) Pur isu, é inportanti nu responde kes kuatu pergunta li: Modi ki Davidi ‘ka xinti falta di ninhun kuza bon’? Pamodi ki nu meste prende sta kontenti? Pamodi ki nu pode ten sertéza ma Jeová ta kuida di nos? I modi ki nu pode pripara gósi pa kes kuza ki sta ben kontise na futuru?

5-6. Modi ki Salmo 23:1-6 ta djuda-nu ntende kuzê ki Davidi krê flaba kantu el fla ma sérvus di Deus ‘ka ta xinti falta di ninhun kuza bon’?

⁵ Kuzê ki Davidi krê flaba kantu el fla ma sérvus di Jeová ‘ka ta xinti falta di ninhun kuza bon’? Nu pode atxa respósta na Salmo 23. (Lé Salmo 23:1-6.) Na komésu di kel Salmo, Davidi fla: ‘Jeová é nha Pastor. Nada ka ta ben falta-m.’ Na kes otu vérsu di kel Salmo, Davidi pâpia di kuzas ki ten txeu valor, sima kes bon kuza ki Jeová dja daba el pamodi el dexa Jeová ser se Pastor. Jeová gia-l na  ‘kes kaminhu di justisa’, i El kontinua ta djuda Davidi na kes ténpu sábi i na kes ténpu difísil. Davidi sabia ma el ta tinha prublémas sikrê Jeová staba ta orienta-l. Alvês el ta xintiba dizanimadu sima si el staba ta anda na meiu di un ‘rubera txeu sukuru’, i tanbê el tinha ki lidaba ku se inimigus. Má dja ki Jeová éra se Pastor, Davidi ‘ka ta xintiba medu di ninhun kuza mariadu’.

⁶ Nton di ki manera Davidi ‘ka xinti falta di nada’? El tinha tudu kuza ki el mesteba pa el tinha un amizadi fórti ku Jeová. Se alegria ka ta dipendeba di kuzas material. Davidi staba kontenti ku kel ki Jeová ta daba el. Kuza más inportanti pa el éra ten benson i proteson di se Deus.

7. Sima sta na Lucas 21:20-24, ki situason difísil kes kriston ki ta viveba na Judea pasa pa el?

⁷ Palavras di Davidi ta inxina-nu ma kuzas material ka debe ser más inportanti pa nos. Nu pode gosta di kes kuza material ki nu ten, má nu ka debe pô-s na primeru lugar na nos vida. Kel-li éra un verdadi inportanti ki kes kriston ki ta viveba na Judea ntende. (Lé Lucas 21:20-24.) Jizus aviza-s ma ta txigaba un ténpu ki inimigus ta serkaba sidadi di Jiruzalen. Óras ki kel-la kontiseba, es tinha ki ‘fujiba pa montis’. Si es saíba di sidadi, es ta skapaba, má es tinha ki dexaba txeu kuza pa tras. Dja ten alguns anu ki Sentinéla fla kel-li: “Es bandona ses kanpu i ses kaza. Nen es ka tra kes kuza ki es tinha déntu di ses kaza. Es kunfia ma Jeová ta protejeba es i ta apoiaba es. Es poi adorason pa Jeová na frenti di kalker otu kuza ki pode parse ma éra inportanti.”

8. Ki lison inportanti nu pode prende ku kes kriston ki ta viveba na Judea?

⁸ Ki lison inportanti nu pode prende ku kes kriston ki ta viveba na Judea? Kel Sentinéla tanbê fla: “Na futuru, nu pode pasa pa próvas di fé ki ta ben mostra kuzê ki nu ta atxa di kuzas material. Es é más inportanti pa nos ô salvason di tudu kes ki é lial pa Deus é más inportanti? Óras ki fin ben, talvês nu ten ki ben aguenta situasons difísil i ti fika sen alguns kuza. Nu ten ki ben sta prontu pa faze kalker sakrifisiu sima kes kriston di ténpu di apóstlus faze pa fuji di Judea.” *

9. Modi ki kel konsedju ki apóstlu Polu da kes kriston na Judea ta da-nu koraji?

⁹ Bu ta konsigi imajina modi ki foi difísil pa kes kriston dexa kuazi tudu kuza ki es tinha i kumesa un vida novu na un otu lugar? Es meste tinha fé pa es kunfiaba ma Jeová ta kuidaba di es. Má tinha un kuza ki pode djudaba es. Sinku anu antis di romanus serka Jiruzalen, apóstlu Polu da kes kriston na Judea un konsedju inportanti. El fla: ‘Nhos manera di vive debe sta livri di amor pa dinheru, má nhos fika kontenti ku kes kuza ki nhos ten. Pamodi el fla: “Nunka N ka ta dexa-u i nunka N ka ta bandona-u.” Pa nu fika xeiu di koraji i pa nu fla: “Jeová é kel ki ta djuda-m; N ka ta ten medu. Kuzê ki ómi pode faze-m?”’ (Heb. 13:5, 6) Di sertéza foi más fásil pa kes ki aplika konsedju di Polu leba un vida sinplis na kel novu lugar. Es tinha sertéza ma Jeová ta kuidaba di ses nisisidadi. Palavras di Polu ta da-nu sertéza ma nu pode ten mésmu kunfiansa.

10. Kuzê ki Polu krê inxinaba nos?

¹⁰ Polu da Timótiu kel mésmu konsedju ki tanbê ta sirbi pa nos. El fla: ‘Nton, si nu ten algun kuza di kume i pa bisti, nu ta fika kontenti ku kes kuza.’ (1 Tim. 6:8) Má kel-li krê fla ma nu ka pode kume un bon kumida, ten un bon kaza i kunpra ropas novu di vês en kuandu? É ka kel-li ki Polu krê flaba. El staba ta fla ma nu debe sta kontenti ku kalker kuza material ki nu ten. (Fil. 4:12) Kuzê ki Polu krê inxinaba nos? Nos amizadi ku Jeová é más inportanti di ki kalker kuza material ki nu ten. — Hab. 3:17, 18.

11. Ki lison sobri sta kontenti nu ta prende ku kes palavra ki Muizés fla israelitas?

¹¹ Talvês nu ta atxa ma nu meste un kuza má Jeová ta atxa ma nu meste otu kuza. Odja kuzê ki Muizés fla israelitas dipôs ki es pasa 40 anu na dizértu. El fla: ‘Jeová bu Deus abensua-u na tudu kuza ki bu faze. El sabe tudu sobri bu viaji na es dizértu grandi. Jeová bu Deus, ten stadu ku bo na es 40 anu, i nada ka falta-u.’ (Deut. 2:7) Duránti kes 40 anu, Jeová da israelitas maná pa es kume. Kel ropa ki es saíba ku el di Ijitu nunka ka straga. (Deut. 8:3, 4) Talvês alguns pode atxaba ma kes kuza éra poku, má Muizés lenbra-s ma es tinha tudu kel ki es staba ta meste. Jeová ta  fika kontenti si nu prende sta kontenti i da valor ti mésmu pa kes poku kuza ki el ta da-nu. Nu debe ntende ma es é prezentis di Jeová i agradese-l.

12. Kuzê ki ta mostra ma Davidi ka ta kunfiaba na se kapasidadi, má na Jeová?

¹² Davidi sabia ma Jeová é lial i ma el ta preokupa txeu ku kes ki ta ama-l. Kantu Davidi skrebe Salmo 34, se vida staba na prigu. Má dja ki el tinha un fé fórti na Jeová, el tinha sertéza ma ‘anju di Jeová’ ta staba se ‘pértu’ pa proteje-l. (Sal. 34:7) Talvês Davidi staba ta konpara anju di Jeová ku un trópa ki staba na kanpu di géra, sénpri sienti na se inimigu. Nbóra Davidi éra un trópa korajozu i Jeová promete ma el ta sérba rei, el ka kunfia na se kapasidadi di da ku pédra ô di uza spada pa kaba ku se inimigu. (1 Sam. 16:13; 24:12) El poi se kunfiansa na Deus. El tinha sertéza ma anju di Jeová ta salva ‘kes ki ten grandi ruspetu pa El’. É klaru ki nu ka debe spéra ma Jeová ta faze un milagri pa proteje-nu oji. Má nu sabe ma kes ki ta kunfia na Jeová ta ben resebe vida pa tudu ténpu, sikrê es móre gósi.

13. Óras ki Gogi di Magogi ataka-nu, pamodi ki ta ben parse ma é faxi kaba ku nos? Má pamodi ki nu ka debe xinti medu? (Odja dizenhu na kapa.)

¹³ Já já, nu ta ben mostra si nu ta kunfia na kapasidadi ki Jeová ten di proteje-nu. Óras ki Gogi di Magogi, ki é un grupu di nasons, ataka povu di Jeová, ta parse ma nos vida ta ben sta na prigu. Nu ta meste ten sertéza ma Jeová pode i ma el ta salva-nu. Pa kes nason, nu ta ben parse sima ovelhas ki ka ten ningen pa proteje-s. (Eze. 38:10-12) Nu ta ben sta sen arma i nu ka ta ben resebe trenu pa géra. Kes nason ta ben pensa ma é faxi kaba ku nos. Es ka sabe ma anjus di Jeová ta ben sta prontu pa proteje-nu. Má nu sabe kel-li pamodi nu ten fé. Modi ki es ta konsigi odja anjus di Jeová si es ka ten fé na el? Es ta ben fika uma spantadu óras ki anjus ben proteje-nu! — Apo. 19:11, 14, 15.

14. Kuzê ki nu pode faze gósi pa nu pripara pa futuru?

¹⁴ Kuzê ki nu pode faze gósi pa nu pripara pa futuru? Primeru, nu ka debe poi kuzas material na primeru lugar pamodi un dia nu ten ki ben dexa-s pa tras. Tanbê nu debe sta kontenti ku kel ki nu ten i pamodi nos é amigu di Jeová. Sima nu ta ba ta konxe nos Deus, nu ta ten más sertéza ma el ten kapasidadi di proteje-nu óras ki Gogi di Magogi ben ataka-nu.

15. Kuzê ki Davidi pasa pa el ki inxina-l ma Jeová nunka ka ta bandonaba el?

¹⁵ Odja kuzê más ki djuda Davidi i modi ki kel-li pode pripara-nu pa lida ku prublémas. Davidi fla: ‘Nhos sprimenta i nhos odja ma Jeová é bon; filís é kel ómi ki ta djobe proteson na el.’ (Sal. 34:8) Kes palavra li ta splika pamodi ki Davidi tinha sertéza ma el pode kontaba ku ajuda di Jeová. Davidi txeu bês kunfia na Jeová i se Deus nunka ka diziludi-l. Pur izénplu, kantu el éra jóven, el tevi ki briga ku Gulias, ki éra un Filisteu jiganti i un trópa balenti. Davidi fla-l: ‘Oji mê, Jeová ta ntrega-u na nha mô’. (1 Sam. 17:46) Dipôs, kantu Davidi staba ta sirbi na palásiu di Rei Saul, el tenta  mata Davidi txeu bês. Má ‘Jeová staba ku’ Davidi. (1 Sam. 18:12) Davidi tinha sertéza ma Jeová ta djudaba el na kes prubléma ki el staba ta pasa pamodi dja el djudaba el antis.

16. Di ki maneras nu pode ‘sprimenta i odja’ ma Jeová é bon?

¹⁶ Kantu más nu kunfia na orientason di Jeová, nu ta ten más sertéza ma el ta pode salva-nu na futuru. Ten situasons ki nu meste ten fé i sta prontu pa kunfia na Jeová. Pur izénplu, talvês nu meste pidi nos patron pa da-nu lisénsa pa nu sisti asenbleia ô kongrésu. Ô pode ser ki nu meste pidi nos patron pa muda nos óra di trabadju, asi pa nu pode sisti tudu nos runion i sai más txeu na pregason. Imajina ma nos patron nega seta kel pididu ki nu faze i nu perde trabadju. Si kel-li kontise, nu ta ten fé ma Jeová nunka ka ta bandona-nu i ma sénpri el ta da-nu kes kuza ki nu meste? (Heb. 13:5) Txeu di kes ki sta na sirvisu pa ténpu interu, pode konta-u spiriénsa ki ta mostra ma Jeová djuda-s kantu más es staba ta meste se ajuda. Jeová é fiel.

17. Kal ki é nos testu pa anu di 2022, i pamodi ki el ben déntu di óra?

¹⁷ Ku Jeová na nos ladu, nu ka ten motivu pa nu xinti medu di kuzas ki sta pa ben. Nos Deus nunka ka ta bandona-nu si nu kontinua ta poi se vontadi na primeru lugar na nos vida. Pa djuda-nu odja ma nu meste pripara désdi gósi pa kes kuza ki sta pa ben i kunfia ma Jeová nunka ka ta bandona-nu, Grupu Enkaregadu di Óbra skodje Salmo 34:10 pa ser nos testu pa anu di 2022: ‘Kes ki ta buska Jeová ka ta ben xinti falta di ninhun kuza bon.’