1-2. (a) Na ki dia ki más nu ta pensa na un algen ki nu krê txeu ki móre? (b) Kuzê ki Jizus faze na kel noti antis di el móre?

 SIKRÊ dja ten txeu ténpu ki kes algen ki nu ta ama móre, ti inda nu ta lenbra di es. Nu ta pensa na es prinsipalmenti na kel data ki es móre.

² Tudu anu, nu ta djunta ku milhons di algen na mundu interu na kel data ki móre un algen ki nu krê txeu, ki é Jizus Kristu. (1 Ped. 1:8) Nu ta djunta pa nu lenbra di kel algen ki da se vida pa resgata-nu di pekadu i di mórti. (Mat. 20:28) Na verdadi, Jizus krê pa se sigidoris lenbra di se mórti. Na kel noti antis di el móre, el faze un komemorason spesial i el da kel órdi li: ‘Nhos kontinua ta faze kel-li pa nhos lenbra di mi.’ — Lucas 22:19.

3. Kuzê ki nu sta ben odja na kel studu li?

³ É poku algen ki ta sisti Komemorason di mórti di Jizus ki ten speransa di ba vive na Séu. Má milhons di kes ki ten speransa di vive na Téra tanbê ta sisti. Na kel studu li, nu sta ben odja pamodi ki kes dôs grupu di algen li ta tene gana di sisti Komemorason tudu anu. Tanbê nu ta ben odja modi ki sisti Komemorason ta djuda-nu. Má primeru, nu ben odja pamodi ki kes skodjedu ku spritu santu ta sisti Komemorason.

4. Pamodi ki é sô kes skodjedu ku spritu santu ki pode kume pon i bebe vinhu na Komemorason?

⁴ Tudu anu, kes skodjedu ku spritu santu ki ta sisti Komemorason, ta kume pon i ta bebe vinhu. Pamodi ki  es debe faze kel-li? Respósta sta na kuzê ki kontise na kel últimu noti antis di Jizus móre. Dipôs ki Jizus komemora Páskua, el faze un novu komemorason ki ta txomadu di Komemorason di mórti di Kristu. El pasa pon ku vinhu pa se 11 apóstlu fiel i el fla-s pa es kume i pa es bebe. Jizus pâpia ku es sobri dôs kontratu: kel novu kontratu i kel kontratu pa un Reinu. * (Luc. 22:19, 20, 28-30) Kes kontratu ta daba kes apóstlu i otus algen oportunidadi di biraba reis i saserdótis na Séu. (Apo. 5:10; 14:1) É sô kes skodjedu ku spritu santu ki inda sta na Téra i ki ta faze párti di kes dôs kontratu, ki pode kume pon i bebe vinhu na Komemorason.

5. Kuzê ki kes skodjedu ku spritu santu sabe sobri kel speransa ki es dadu?

⁵ Odja otu razon ki ta poi kes kriston skodjedu ku spritu santu ku gana di sisti Komemorason. Kel-li ta da-s oportunidadi di pensa na ses speransa. Jeová da-s speransa di ten un vida na Séu ki ka ta kaba i ki ka ta straga. Es ta ba governa djuntu ku Jizus i ku kes otu algen ki ta faze párti di 144 mil. I más inportanti inda, es ta ba sta djuntu ku Jeová! (1 Cor. 15:51-53; 1 João 3:2) Kes skodjedu ku spritu santu sabe ma es konvidadu pa es ten kes priviléjiu la na Séu. Má pa es dexadu entra na Séu, es ten ki kontinua fiel ti ki es móre. (2 Tim. 4:7, 8) Kes skodjedu ku spritu santu ta fika uma kontenti di pensa na ses speransa di ba vive na Séu. (Tito 2:13) I kes ki ta faze párti di ‘otus ovelha’? (João 10:16) Pamodi ki es tanbê es ta sisti Komemorason?

6. Pamodi ki kes otu ovelha ta sisti Komemorason tudu anu?

⁶ Kes otu ovelha ka ta kume pon i nen es ka ta bebe vinhu na Komemorason, má es ta fika kontenti di sta la. Na anu di 1938, kes algen ki tinha speransa di vive na Téra konvidadu pa primeru bês pa sisti Komemorason. Sentinéla di 1 di marsu di 1938, fla: “Kes algen ki ta faze párti di [otus ovelha] debe sisti kel runion li i odja kuzê ki ta fazedu. . . . I kel-li tanbê debe ser un ténpu pa es xinti alegria.” Sima kes algen ki konvidadu pa un serimónia di kazamentu ta fika kontenti, kes otu ovelha tanbê ta fika kontenti di sisti Komemorason.

7. Pamodi ki kes otu ovelha ta fika ku gana di sisti diskursu di Komemorason?

⁷ Kes otu ovelha tanbê ta pensa na ses speransa. Es ta fika ku gana di sisti diskursu di Komemorason pamodi el ta pâpia txeu di kuzê ki Jizus i kes 144 mil ta ben faze pa kes algen fiel duránti Govérnu di Kristu di mil anu. Djuntu ku Jizus, kes ki ta ba governa na Séu ta ben poi Téra ta bira un paraízu i es ta ben djuda kes algen fiel bira perfetu. Milhons di algen ki ta sisti Komemorason ta fika kontenti di imajina modi ki kes profesia di Bíblia ta ben kunpri, sima kes ki sta na Isaías 35:5, 6; 65:21-23; i Apocalipse 21:3, 4. Óras ki es ta imajina ses vida djuntu ku kes algen ki es ta ama na mundu novu, ses  speransa pa futuru ta fika más fórti i es ta fika ku gana di kontinua ta sirbi Jeová. — Mat. 24:13; Gál. 6:9.

8. Kuzê más ki ta poi kes otu ovelha ta sisti Komemorason?

⁸ Odja otu razon ki ta poi kes otu ovelha ta sisti Komemorason. Es krê mostra ma es ta ama i ma es ta djuda kes kriston skodjedu ku spritu santu. Palavra di Deus dja flaba ma kes kriston skodjedu ku spritu santu i kes ki ten speransa di vive na Téra ta ben trabadjaba unidu ku kunpanheru. Modi ki es ta faze kel-li? Nu ben odja alguns izénplu.

9. Sima Zacarias 8:23 ta mostra, kuzê kes otu ovelha ta xinti pa kes kriston skodjedu ku spritu santu?

⁹ Lé Zacarias 8:23. Kel-li é un profesia bunitu ki ta splika kuzê ki kes otu ovelha ta xinti pa ses irmons ku irmans ki é skodjedu ku spritu santu. Kes palavra ‘un judeu’ i ‘nhos’ sta ta pâpia di kes kriston skodjedu ku spritu santu ki inda sta na Téra. (Rom. 2:28, 29) Kes ‘des ómi di tudu língua di nason’ ta reprizenta kes otu ovelha. I kes palavra ‘pega riju’, ta mostra ma kes otu ovelha é lial pa kes kriston skodjedu ku spritu santu i es sta unidu ku es na adorason puru. Pur isu, na kel noti di Komemorason, kes otu ovelha ta mostra ma es sta unidu ku kes kriston skodjedu ku spritu santu, óras ki es ta sisti Komemorason djuntu ku es.

10. Kuzê ki Jeová faze pa kunpri kel profesia ki sta na Ezequiel 37:15-19, 24, 25?

¹⁰ Lé Ezequiel 37:15-19, 24, 25. Pa kunpri kel profesia li, Jeová dja poi kes kriston skodjedu ku spritu santu i kes otu ovelha ta trabadja unidu ku kunpanheru. Kel profesia li ta pâpia di dôs pó. Kes ki ten speransa di ba vive na Séu é sima pó ‘di Judá’ (na kel tribu ki es ta skodjeba kes rei di Israel), i kes ki ten speransa di vive na Téra é sima kel pó ‘di Efrain’. * Jeová ta ben djuntaba kes dôs grupu pa biraba ‘sô un pó’. Kel-li krê fla ma es sta ta sirbi Jeová unidu, dibaxu di orientason di ses Rei, Jizus Kristu. Tudu anu kes skodjedu ku spritu santu i kes otu ovelha ta sisti Komemorason, ka sima dôs grupu siparadu, má sima ‘un ribanhu sô’ ku ‘un pastor sô’. — João 10:16.

11. Sima sta na Mateus 25:31-36, 40, kal ki é midjór manera di kes ‘otu ovelha’ djuda irmons di Kristu?

¹¹ Lé Mateus 25:31-36, 40. Kes ‘ovelha’ ki Jizus pâpia di el ta reprizenta kes algen fiel ki ta vive na ténpu di fin i ki ten speransa di vive na Téra. Es é lial pa kes kriston skodjedu ku spritu santu. Es ta djuda-s kunpri kel responsabilidadi grandi ki es ten, ki é prega i faze disiplus na mundu interu. — Mat. 24:14; 28:19, 20.

12-13. Di ki otus manera ki kes otu ovelha ta mostra ma es ta djuda irmons di Kristu?

¹² Tudu anu na kes simana antis di Komemorason, kes otu ovelha ta mostra ma es ta djuda kes irmon di Kristu. Es ta partisipa na un kanpanha ki ta fazedu na mundu interu pa konvida kes algen ki krê sisti Komemorason. (Odja kuadru “ Bu sta ta faze planu pa ténpu  di Komemorason?”) Tanbê es ta faze di tudu pa Komemorason fazedu na tudu kes kongregason na mundu interu, sikrê kes kongregason ka ten ninhun skodjedu ku spritu santu. Kes otu ovelha ta fika kontenti di djuda kes irmon di Kristu di kel manera li. Es sabe ma pa Jizus, kes kuza ki es ta faze pa kes skodjedu ku spritu santu é sima si es sta ta faze pa el. — Mat. 25:37-40.

¹³ Ka ta nporta si nu ten speransa di vive na Séu ô na Téra, kuzê más ki ta pô-nu ta sisti Komemorason?

14. Modi ki Jeová i Jizus mostra-nu ses grandi amor?

¹⁴ Nu ta da valor pa amor ki Jeová ku Jizus mostra pa nos. Jeová dja mostra se amor pa nos di txeu manera, má ten un ki é más inportanti di ki tudu kes otu. Nos Deus manda se Fidju, Jizus, pa sufri i móre pa nos. (João 3:16) Nu sabe tanbê ma Jizus mostra se grandi amor pamodi el da se vida pa nos di livri vontadi. (João 15:13) Nunka nu ka ta konsigi paga Jeová i Jizus kel amor ki es mostra pa nos. Má nu pode mostra nos gratidon pa manera ki nu ta vive kada dia. (Col. 3:15) I nu ta sisti Komemorason pamodi nu krê lenbra di ses amor i nu krê mostra-s nos amor.

15. Pamodi ki kes skodjedu ku spritu santu i kes otu ovelha ta da txeu valor pa prezenti di resgati?

¹⁵ Nu ta da txeu valor pa resgati. (Mat. 20:28) Kes kriston skodjedu ku spritu santu ta da txeu valor pa resgati pamodi kel-li ta da-s xansi di ba vive na Séu. Dja ki es ten fé na sakrifisiu di Jizus, Jeová ta txoma-s di justu i el adota-s pa es ser se fidjus. (Rom. 5:1; 8:15-17, 23) Kes otu ovelha tanbê ta da valor pa resgati. Pamodi es ten fé na sakrifisiu di Jizus, es sta linpu dianti di Deus, es ta faze sirvisu sagradu pa el i es ta ten speransa di skapa na ‘grandi tribulason’. (Apo. 7:13-15) Un manera ki kes skodjedu ku spritu santu i kes otu ovelha ta mostra ma es ta da valor pa resgati, é óras ki es ta sisti Komemorason di mórti di Jizus tudu anu.

16. Kal ki é otu kuza ki ta pô-nu ta sisti Komemorason?

¹⁶ Otu kuza ki ta pô-nu ta sisti Komemorason é pamodi nu krê obi ku órdi di Jizus. Ka ta nporta kal ki é nos speransa pa futuru, nos tudu, nu krê obi ku kel órdi ki Jizus da na kel noti ki el faze Komemorason. El fla: ‘Nhos kontinua ta faze kel-li pa lenbra di mi.’ — 1 Cor. 11:23, 24.

17. Modi ki Komemorason ta djuda-nu bira más amigu di Jeová?

¹⁷ Nu ta bira más amigu di Jeová. (Tia. 4:8) Sima dja nu prende, Komemorason ta da-nu xansi di pensa na speransa ki Jeová da-nu i tanbê na kel grandi amor ki el mostra pa nos. (Jer. 29:11; 1 João 4:8-10) Óras ki nu pensa na kel speransa sértu ki nu ten pa futuru i na kel amor ki ka ta kaba ki Deus ten pa nos, nos amor i nos amizadi pa el ta fika más fórti. — Rom. 8:38, 39.

18. Pensa na izénplu di Jizus ta pô-nu krê faze kuzê?

¹⁸ Nu ta krê imita izénplu di Jizus.  (1 Ped. 2:21) Na kes dia antis di Komemorason, nu ta lé kes stória di Bíblia ki ta pâpia sobri kel últimu simana di Jizus na Téra, se mórti i se resureison. Tanbê na kel noti di Komemorason, kel diskursu ta lenbra-nu di amor ki Jizus mostra pa nos. (Efé. 5:2; 1 João 3:16) Óras ki nu lé sobri sakrifisiu ki Jizus faze i nu pensa na el, nu ta krê ‘kontinua ta anda sima el anda.’ — 1 João 2:6.

19. Modi ki nu pode kontinua na amor di Deus?

¹⁹ Nu ta fika ku más vontadi di krê kontinua ta ser amigu di Jeová. (Judas 20, 21) Óras ki nu ta faze tudu kel ki nu pode pa nu obi ku Jeová, nu ta kontinua na se amor, nu ta santifika se nómi i nu ta poi se korason ta fika kontenti. (Pro. 27:11; Mat. 6:9; 1 João 5:3) Sisti Komemorason ta pô-nu ku más vontadi di vive kada dia di un manera ki nu ta mostra Jeová ma nu krê kontinua na se amor pa tudu ténpu!

20. Ki bons razon nu ten pa nu sisti Komemorason?

²⁰ Ka ta nporta si nos speransa é di vive pa tudu ténpu na Séu ô na Téra, nu ten bons razon pa nu sisti Komemorason. Tudu anu óras ki nu ta djunta na kel data, nu ta lenbra di mórti di kel algen ki nu ta ama, ki é Jizus Kristu. Más inportanti inda, nu ta lenbra di kel grandi amor ki Jeová mostra pa nos kantu el da se Fidju pa salva-nu. Es anu, Komemorason ta fazedu sésta-fera, 15 di abril di 2022. Nu ta ama Jeová i se Fidju. Pur isu, na data di mórti di Jizus, nada ka pode ser más inportanti pa nos di ki sisti Komemorason.