1. Modi ki éra família di Tiagu?

 TIAGU, irmon di Jizus, kria na un família ki tinha un amizadi fórti ku Jeová. * Se pai ku se mai, Juzé ku Maria, ta amaba Jeová txeu i es faze ses midjór pa sirbi-l. Tiagu tevi otu benson. Se irmon más grandi ta ben sérba kel Misías ki prometedu. Tiagu tevi un priviléjiu grandi di faze párti di kel família!

2. Ki razons Tiagu tinha pa ruspetaba se irmon más grandi?

² Tiagu tinha txeu razon pa ruspetaba se irmon más grandi. (Mat. 13:55) Pur izénplu, kantu Jizus tinha 12 anu, el tinha txeu konhisimentu di Skrituras ki kes instrutor na Jiruzalen fika dimiradu ku el. (Luc. 2:46, 47) Tiagu talvês trabadja na karpintaria djuntu ku Jizus. Si el faze kel-li, el bira ta konxe se irmon más dretu inda. Irmon Nathan Knorr ta flaba txeu bês: “Bu ta prende txeu sobri un algen óras ki bu ta trabadja djuntu ku el.” * Tiagu talvês odja Jizus ta ‘kontinua ta faze prugrésu na sabedoria i ta kria na favor di Deus i di ómis.’ (Luc. 2:52) Talvês nu pode pensa ma Tiagu é un di kes primeru algen ki bira disiplus di Jizus, má é ka kel-li ki kontise.

3. Modi ki Tiagu reaji kantu Jizus kumesa se pregason?

 ³ Duránti pregason di Jizus li na Téra, Tiagu ka bira se disiplu. (João 7:3-5) Na verdadi, ta parse ma Tiagu éra un di kes família di Jizus ki pensa ma ‘dja el biraba dodu.’ (Mar. 3:21) I ka ten nada ki ta mostra ma Tiagu staba djuntu ku se mai, Maria, kantu Jizus matadu na staka di tortura. — João 19:25-27.

4. Kuzê ki nu sta ben odja na kel studu li?

⁴ Dipôs, Tiagu poi fé na Jizus i el bira un ansion ruspetadu na kongregason. Na kel studu li, nu sta ben odja dôs lison ki nu pode prende ku Tiagu: (1) pamodi ki nu meste kontinua umildi i (2) modi ki nu pode ser bons instrutor.

5. Modi ki Tiagu reaji kantu Jizus parse pa el?

⁵ Na ki ténpu ki Tiagu bira un disiplu lial di Jizus? Dipôs ki Jizus resusitadu, ‘el parse pa Tiagu i dipôs pa tudu kes apóstlu.’ (1 Cor. 15:7) Dipôs ki Tiagu odja Jizus, el bira se disiplu. El staba djuntu ku kes otu apóstlu, na primeru andar di un kaza na Jiruzalen, ta spéra resebe spritu santu. (Atos 1:13, 14) Dipôs, Tiagu tevi priviléjiu di sirbi na grupu enkaregadu di óbra na ténpu di apóstlus. (Atos 15:6, 13-22; Gál. 2:9) I algun ténpu antis di anu 62, spritu santu orienta-l pa el skrebe un karta pa kristons skodjedu ku spritu santu. Kel karta ta djuda-nu oji, ka ta nporta si nu ten speransa di vive na Séu ô na Téra. (Tia. 1:1) Un storiador di ténpu di apóstlus ki txomaba Juzefu, fla ma Ananias, ki éra Saserdóti Prinsipal i fidju di Anás, manda mata Tiagu. Tiagu kontinua fiel pa Jeová ti fin di se vida li na Téra.

6. Di ki manera Tiagu éra diferenti di kes xéfi di relijion di se ténpu?

⁶ Tiagu éra umildi. Pamodi ki nu pode fla kel-li? Odja modi ki Tiagu reaji kantu Jizus parse pa el, i modi ki txeu xéfi di relijion di judeus reaji. Kantu Tiagu odja próva klaru ma Jizus éra Fidju di Deus, el foi umildi i el seta kel-li. Má kes saserdóti prinsipal na Jiruzalen ka faze kel-li. Pur izénplu, es ka podia negaba ma Jizus resusita Lázaru. Má envês di rekonhese ma Jizus éra  reprizentanti di Jeová, es tenta mata el ku Lázaru. (João 11:53; 12:9-11) Dipôs, kantu Jizus resusitadu, es tenta sukundi kel verdadi li di otus algen. (Mat. 28:11-15) Kes xéfi di relijion éra orgulhozu, pur isu es ka seta ma Jizus éra Misías.

7. Pamodi ki nu ka debe ser orgulhozu?

⁷ Kuzê ki nu ta prende? Ka bu ser orgulhozu i dexa Jeová inxina-u. Sima un duénsa pode ka dexa korason di un algen funsiona dretu, orgulhu pode ka dexa-nu sigi orientasons di Jeová. Kes farizeu dexa ses korason bira duru dimás i es nega kridita na kes próva klaru ma Jizus tinha spritu santu di Deus i ma el éra Fidju di Deus. (João 12:37-40) Ses orgulhu foi prigozu pamodi el ka dexa-s ganha vida pa tudu ténpu. (Mat. 23:13, 33) É rei di inportanti nu kontinua ta dexa Palavra di Deus i se spritu muda nos manera di ser i orienta nos pensamentu i kes disizon ki nu ta toma! (Tia. 3:17) Dja ki Tiagu éra umildi, el dexa Jeová inxina-l. I sima nu sta ben odja, pamodi se umildadi el bira un bon instrutor.

8. Kuzê ki ta djuda-nu ser bons instrutor?

⁸ Tiagu tinha poku skóla. Ta parse ma kes xéfi di relijion di se ténpu ta atxaba ma el éra un algen ‘normal i ku poku skóla’, sima apóstlu Pedru ku Juan. (Atos 4:13) Má Tiagu prende ser un bon instrutor. Nu ta odja kel-li óras ki nu ta lé kel karta ki ten se nómi. Sima Tiagu, talvês nu ka ten txeu skóla. Má simé ku ajuda di spritu santu di Jeová i ku trenamentu ki se organizason ta da-nu, nos tanbê, nu pode ser bons instrutor. Nu ben odja pamodi ki Tiagu éra bon instrutor i kuzê nu pode prende ku el.

9. Splika modi ki Tiagu ta inxinaba.

⁹ Tiagu ka uza palavras difísil ô rasusinu konplikadu. Pur isu, kes algen ki ta obiba el sabia kuzê ki es meste fazeba i modi ki es ta fazeba el. Pur izénplu,  odja un manera sinplis ki Tiagu inxina se irmons ma es debe staba prontu pa sufri injustisa, sen guarda rankor. El skrebe: ‘Pa nos, kes algen ki aguenta firmi é filís. Nhos obi ta fladu ma Jó aguenta firmi i nhos odja rezultadu ki Jeová da-l; nhos odja ma Jeová ten grandi konpaxon i el é mizerikordiozu.’ (Tia. 5:11) Repara ma Tiagu uza Skrituras pa inxina. El uza Palavra di Deus pa djuda se irmons ntende ma Jeová sénpri ta rekonpensa kes algen ki ta mante lial pa El, sima Jó. Tiagu uza palavras sinplis i ku lójika pa inxina un lison. Asi, el ka txoma atenson pa se kabésa, má pa Jeová.

10. Modi ki nu pode imita Tiagu óras ki nu ta inxina?

¹⁰ Kuzê ki nu ta prende? Mante bu mensaji sinplis i inxina ku bazi na Palavra di Deus. Óras ki nu ta inxina otus algen, nu ka debe tenta mostra-s ma nu sabe txeu kuza, má nu debe mostra-s ma Jeová sabe txeu kuza i ma el ta preokupa txeu ku es. (Rom. 11:33) Nu ta konsigi faze kel-li si sénpri nu inxina ku bazi na Palavra di Deus. Pur izénplu, envês di fla nos studantis di Bíblia kuzê ki nu ta fazeba si nu staba na ses lugar, nu debe djuda-s rasusina ku bazi na izénplus di Bíblia i ntende kuzê ki Jeová ta pensa i ki el ta xinti. Asi, es ta xinti gana di faze kuzê ki es prende pa es agrada Jeová, ka pamodi es krê agrada-nu.

11. Ki prublémas alguns kriston na ténpu di Tiagu tinha, i ki konsedju el da-s? (Tiago 5:13-15)

¹¹ Tiagu éra sinseru. Na se karta, nu ta odja ma el sabia di kes prubléma ki se irmons ku irmans tinha i el da-s orientason klaru sobri kuzê ki es meste fazeba. Pur izénplu, alguns kriston ta duraba ki aplika konsedju. (Tia. 1:22) Otus ta trataba kes riku más dretu di ki póbris. (Tia. 2:1-3) I otus tinha prubléma na kontrola ses língua. (Tia. 3:8-10) Kes kriston li tinha prublémas gravi, má Tiagu ka dizisti di es. El da-s konsedju ku bondadi, má di manera dirétu. El insentiva kes ki ses amizadi ku Jeová staba fraku pa pidi ajuda di ansions. — Lé Tiago 5:13-15.

12. Modi ki nu pode mante un atitudi puzitivu óras ki nu ta djuda nos studantis di Bíblia?

¹² Kuzê ki nu ta prende? Ser sinseru, má kunfia ma pesoas ta midjora. Pode ser difísil pa txeu di kes algen ki ta studa Bíblia ku nos aplika kuzê ki Bíblia ta inxina. (Tia. 4:1-4) Talvês ta leba algun ténpu pa es bandona kes ábitu mariadu i mostra kes kualidadi sima di Jizus. Sima Tiagu, nu meste ten koraji pa nu fla nos studantis kuzê ki es meste midjora. Má tanbê nu meste kunfia ma Jeová ta toka korason di kes algen umildi i el ta da-s forsa ki es meste pa faze mudansa na ses vida. — Tia. 4:10.

13. Sima sta na Tiago 3:2, kuzê ki Tiagu rekonhese?

¹³ Tiagu ka ta pensaba dimás di se kabésa. Tiagu ka ta pensaba ma el éra más inportanti di ki otus kriston pamodi el éra irmon di Jizus ô pamodi kes diziginason inportanti ki el tinha. El txoma kes otu kriston di ‘nhas irmon ki N krê txeu’. (Tia. 1:16, 19; 2:5) El ka tenta poi otus algen ta pensa ma el éra perfetu. Envês di kel-li, el inklui se kabésa na kel frazi li: ‘Nos tudu nu ta fadja txeu bês.’ — Lé Tiago 3:2.

14. Pamodi ki nu debe seta nos fadja?

 ¹⁴ Kuzê ki nu ta prende? Lenbra ma nos tudu nu ta fadja. Nu ka debe pensa ma nos é más inportanti di ki kes algen ki nu ta inxina. Pamodi? Si nu poi nos studantis ta pensa ma nu ka ta fadja, es pode fika dizanimadu pamodi es pode atxa ma nunka es ka ta konsigi obi ku leis di Deus. Má óras ki nu ta fla-s ma alvês é ka fásil pa nu sigi prinsípius di Bíblia i nu splika-s modi ki Jeová djuda-nu vense nos prubléma, nu ta djuda nos studantis odja ma es tanbê, es pode sirbi Jeová.

15. Ki tipu di ilustrason Tiagu ta uzaba? (Tiago 3:2-6, 10-12)

¹⁵ Tiagu uza bons ilustrason. Nu ten sertéza ma spritu santu djuda-l, má tanbê ta parse ma el prende txeu na studa kes ilustrason ki se irmon más grandi, Jizus, ta uzaba. Kes ilustrason ki Tiagu uza na se karta é sinplis i lison é klaru. — Lé Tiago 3:2-6, 10-12.

16. Pamodi ki nu debe uza bons ilustrason?

¹⁶ Kuzê ki nu ta prende? Uza bons ilustrason. Óras ki bu ta uza bons ilustrason, bu ta poi obidu di pesoas ta bira sima odju. Kes algen ki sta obi kes ilustrason ta xinti sima si es sta ta odja kuzê ki bu sta inxina. Asi es ta lenbra di kes verdadi inportanti di Bíblia. Jizus éra bon na uza ilustrason i se irmon Tiagu sigi se izénplu. Nu ben odja un ilustrason ki Tiagu uza i pamodi ki éra un bon ilustrason.

17. Pamodi ki kel ilustrason ki sta na Tiago 1:22-25 é un bon ilustrason?

¹⁷ Lé Tiago 1:22-25. Tiagu uza ilustrason di un spedju. Kel-li éra un bon ilustrason pamodi txeu razon. El krê mostraba ma si nu krê pa Palavra di Deus djuda-nu, nu meste faze más di ki sô lé, má aji di akordu ku kel ki nu lé. Kel ilustrason éra faxi di ntende. Kuzê ki el krê inxinaba? Si un ómi djobe na spedju i el repara ma el ten algun kuza ki el meste konpo, má el ka konpo-l, ka ta sirbi pa nada. Di mésmu manera, si nu lé Palavra di Deus i nu odja ma nu meste faze algun mudansa na nos manera di ser i  nu ka faze-s, kel leitura ka ta sirbi pa nada.

18. Ki três kuza nu debe faze óras ki nu ta uza un ilustrason?

¹⁸ Óras ki nu ta uza un ilustrason, nu pode imita Tiagu si nu faze kes três kuza li: (1) Ten sertéza ma kel ilustrason ki nu sta uza ta djuda-nu inxina kel pontu ki nu sta pâpia di el. (2) Uza ilustrason ki é fásil di algen ntende. (3) Mostra kel algen modi ki el pode aplika kes lison di kel ilustrason. Si bu ka sta konsigi atxa bons ilustrason, djobe na Índice das Publicações da Torre de Vigia. Bai na párti “Ilustrações” i bu ta atxa un monti ilustrason ki bu pode uza. Nu pode konpara ilustrasons ku un mikrofóni. Sima un mikrofóni ta poi nos vós más altu, un bon ilustrason ta djuda pesoas ntende klaru kuzê ki bu sta inxina. É midjór uza ilustrason sô na kes pontu prinsipal ki bu krê inxina. É klaru ki kel razon más inportanti pa nu midjora nos manera di inxina é ka txoma atenson pa nos kabésa, má djuda tudu kes algen ki nu ta pode faze párti di família di Jeová.

19. Modi ki nu ta mostra ma nu ta ama nos irmons ku irmans?

¹⁹ Sima Tiagu, nu ka tevi priviléjiu di kria djuntu ku un irmon más grandi di ki nos i ki é perfetu. Má nu ten ónra di sirbi Jeová djuntu ku un família grandi di irmons ku irmans. Nu ta mostra nos amor pa es óras ki nu ta pasa ténpu ku es, prende ku es i kontinua lial ta sirbi Jeová djuntu ku es ta prega i ta inxina. Óras ki nu ta sforsa pa imita izénplu di Tiagu na nos atitudi, na nos konportamentu i na nos manera di inxina, nu ta da ónra pa Jeová i nu ta djuda kes algen sinseru bira amigu di nos Pai na Séu.